Iyalimbawaꞌ sa Mula nin Ubas a Pakikalamoꞌ na kontamo ni Jesus
15
“Siꞌko a paꞌsar peteg nin puon nin ubasa, tan si Ama ko a mangngalilaꞌ. 2 Mampukanen nasara a sarba ra nin paꞌsar sanga nin kai man-gumunga, ket manrarusan nasara anamaet a paꞌsar sanga nin man-gumunga ta pigaw nin mas gumunga sara et. 3 Ket siꞌkamo a susanga nin nararusan ana mangibwat sa niyakay-akay ko komoyo nin nipasrep moyo sa kukanakman moyo. 4 Ituluy-tuloy moyo a naipasaya kongko ta pigaw nin ituluy-tuloy ko anamaet a naipasaya komoyo. Si sayay sanga, kai ya gapo nin gumunga no naisyay ya konan puon. Wanin anamaet, siꞌkamo, kai kamo nin magkamain nin paꞌsar bunga para konan Dios no kai moyo nin ituluy-tuloy a naipasaya kongko.”5 Wana anamanaet nin inuman ni Jesus, “Siꞌko a paꞌsar puon nin ubas ket siꞌkamo a paꞌsar susanga. Si siꞌnuman a tumuluy-tuloy nin naipasaya kongko ta pigaw nin iti ako anamaet kona, siin nin tawo ket abaw a paꞌsar bunga na para konan Dios, banaꞌ ta si sayay tawo, kasa nin mababaꞌ na nin gawꞌen no kasa ako kona. 6 Ket si siꞌnuman anamaet a kai nin tumuluy-tuloy nin naipasaya kongko, kapada na a sanga nin napukan nin nitampal. Ket no nakriꞌ anayti liꞌ nin susanga, dinepen tan puuran. 7 Baleꞌ no tumuluy-tuloy kamo nin naipasaya kongko tan ipasrep moyo sa kukanakman moyo a manꞌibaritaꞌ ko ta pigaw nin tumulok kamo sa sayti, animan a dawaten moyo ket maibi komoyo. 8 Mapagalangan ya a Ama ko no abaw a bunga moyo para kona, tan sayti ket mangipaꞌkit a tumutumbok katamo.
9 Inadoꞌ katamo kapada nin pangangadoꞌ na nin Ama ko kongko. Ituluy-tuloy moyoy miikap sa pangangadoꞌ ko komoyo. 10 No tumulok kamo sa gugan-gan ko, miikap kamo sa adoꞌ ko; a bilang anaod sa katutulok ko sa gugan-gan nan Ama ko, tan mampiikap ako sa adoꞌ na. 11 Nibaritaꞌ koyti komoyo ta pigaw nin mairamaꞌ kamo sa ririket ko tan malipos kamon ririket moyo.
12 Igan-gan koyti komoyo: Aduen moyo a saya tan saya kapada nin pangangadoꞌ ko komoyo.
13 Si sangkaalakyan nin pangangadoꞌ a maipaꞌkit nan sayay tawo ket, si mati ya ta pigaw nin mabyay saray uamigo na. 14 Anaod, uamigo katamo no tumulok kamo sa gugan-gan ko. 15 Amboꞌ ana nin aripen a pangngikwinta ko komoyo no kai edet, uamigo, banaꞌ ta si sayay aripen ket kai na nin tandaꞌ a iti sa kaisipan nan amo na. Baleꞌ siꞌkamo, nipatandaan koyna ngaꞌmin komoyo a narngeꞌ ko konan Ama ko. 16 Amboꞌ nin siꞌkamo a namiliꞌ kongko, no kai edet, siꞌko a namiliꞌ tan nanudoꞌ komoyo. Ginwaꞌ ko in ta pigaw nin mako kamo nin magkamain kamo nin bunga para kongko, a sain nin paꞌsar bunga moyo ket magnayon anggan-angga, tan ta pigaw nin animan a dawaten moyo konan Ama ko banaꞌ ta mangingilalaman kamo kongko, ket maibi komoyo.
17 Manꞌibibilin ko komoyo maipaꞌkaꞌ sa sayti a anaod ket, aduen moyo a saya tan saya.”
Duksa-duksaen saraynaod liꞌ a Tumutumbok na ni Jesus
18 “Andiꞌ kamo nin makaꞌngap no guraen rakamon tutawodti sa mundo. Panemtemen moyo tana a nuꞌna rakoyna nin ginuraꞌ dyan siꞌkamo. 19 No say pigagawaꞌ moyo kumon ket minumundo a kapada nin pigagawaꞌ ra, kalalamoꞌ rakamo kumon nin inadoꞌ ra. Baleꞌ anaod, kalalamoꞌ katamo ta piniliꞌ katamo ta pigaw nin maiduma kamo konran raruman tawodti sa mundo, ket siin a rason a guraen rakamo. 20 Panemtemen moyaytaw si naibaritaꞌ koyna komoyo a si sayay aripen, kai ya nin mas ataꞌgay dyan si amo na. No dinuksa-duksaꞌ rako, duksa-duksaen rakamo anamaet. No tinmulok sara kumon sa nibari-baritaꞌ ko, tumulok sara anamaet sa ibari-baritaꞌ moyo. 21 Baleꞌ banaꞌ ta mangingilalaman kamo kongko, gawꞌen ra a sarban sain komoyo. Wanin ta kai raya nin katandaꞌ a si namakiꞌ kongko. 22 No kai ako kumon nin nakodti nin niparateꞌ konra a no ani a nangibwat konan Dios, amboꞌ ra kumon nin kasalanan a kai rayti nin akuen. Anaod sawanin, kasayna nin maibadaꞌ ra sa pagkakasalanan ra. 23 Si mampanguraꞌ kongko ket man-guraen naya anamaet a Ama ko. 24 Amboꞌ ra et kumon nin kasalanan no kai ko nin nipaꞌkit konra a makapakaꞌngap nin nunangyadiꞌ a kasa et gapo nin raruma nin nakapangwaꞌ. Wanin man, abirno nin naꞌkit ra a ginwa-ginwaꞌ ko, man-guraen rako et a lamang tan si Ama ko. 25 Baleꞌ mampangyadiꞌ ti anaod nin pakatukid sa wana sa Masanton Kasuratan a, ‘Guraen rako nin kasan puon tan pwit.’b
26 Sawanin, mangipatutuo ya liꞌ nin maipaꞌkaꞌ kongko a Ispirito nin ibat konan Ama ko. Ibakiꞌ koya komoyo nin mako ya tumulong komoyo. Si pangibwatan na ket si Dios ket mangyakay yan katutuꞌwan maipaꞌkaꞌ kona. 27 Siꞌkamo anamaet, patutuꞌwan moyo liꞌ a maipaꞌkaꞌ kongko, banaꞌ ta nikikalamoꞌ kamoyna kongko nangibwat et sin taranaꞌ.