“Kai ko nin nibaritaꞌ in komoyo sin taranaꞌ et banaꞌ ta kalamoꞌ rako et, 5 baleꞌ sawanin, manꞌibaritaꞌ koyna banaꞌ ta sumubliꞌ akoyna kona nin si namakiꞌ kongko. Ket kasa tana para gapo komoyo nin manepet no adti a keen ko? 6 Wanin anaod banaꞌ ta sa narngeꞌ moyon nibaritaꞌ ko ket mabereng kamo. 7 Baleꞌ say katutuꞌwan, para sa kaabigan moyo a lumakwan ako. Wanin ta no kai ako nin lumakwan, kai ya anamaet nin makodti komoyo a Ispirito na nin Dios. Baleꞌ no lumakwan ako, ibakiꞌ koyadti liꞌ nin tumulong komoyo. 8 Saytaw no iti yayna liꞌ, patutuꞌwan na konran abaw nin tutawo a abas a pakatandaꞌ ra maipaꞌkaꞌ sa kasalanan, maipaꞌkaꞌ sa no ani a mapteg sa adapan nan Dios tan maipaꞌkaꞌ sa paninintinsya na nin Dios. 9 Patutuꞌwan na konra a maipaꞌkaꞌ sa kasalanan ta kai sara nin mampagmatalek kongko ket kasalanan ra in. 10 Patutuꞌwan na et konra a maipaꞌkaꞌ sa no ani a mapteg sa adapan nan Dios ta mako akoyna konan Dios a syay Ama ko, ket kai moyoyna liꞌ nin maꞌkit a kinamapteg ko. 11 Patutuꞌwan na et anamaet konra a maipaꞌkaꞌ sa paninintinsya nan Dios konra ta si Satanas a syay mampagꞌuray konran tutawodti sa mundo, sinintinsyawan nayaynan dusawen.

12 Abaw et a ibaritaꞌ ko komoyo nin kai ko et nin maibaritaꞌ sawanin banaꞌ ta kai moyo et nin maabot nin tarusan. 13 Baleꞌ no iti yayna liꞌ a Ispirito nin mangyakay nin katutuꞌwan, ipatyoꞌ na liꞌ a kaisipan moyo nin matandaan moyo a sarban katutuꞌwan. Wanin ta, amboꞌ liꞌ nin mangibwat kona nin diri a ibaritaꞌ na, no kai edet, ipatandaan na a marngeꞌ na mangibwat konan Dios. Ket, pati say mangyadiꞌ sa adapen, ipatandaan na et komoyo. 14 Pagalangan nako liꞌ banaꞌ ta say no ani a iti kongko ket saytaw a ipatandaan na komoyo. 15 Wangko a no ani a iti kongko ket sayti a ipatandaan nan Ispirito nan Dios komoyo banaꞌ ta, say sarban iti konan Ama ko, ket saytaw anamaet a lamang a iti kongko.

16 Oꞌ, sa amboꞌ ana nin maꞌteng ket kai rakoyna nin maꞌkit, baleꞌ sa amboꞌ liꞌ a lamang nin maꞌteng, ket maꞌkit rako anamanaet.”

17 Sin wanin a wana ni Jesus, saray raruma konran tumutumbok na wanra sa saya tan saya, “Ani kadiꞌ a rabay na nin irgwen? Wana sa amboꞌ ana nin maꞌteng ket kai tamoyayna kano nin maꞌkit; miꞌsa wana sa amboꞌ liꞌ baleꞌ anamaet nin maꞌteng ket, maꞌkit tamoya anamana kano, tan wana et ket mako ya kano konan Ama na. 18 Siin si wana nin sa amboꞌ ana nin maꞌteng, ani a rabay na nin irgwen? Kai tamo nin mataros.”

19 Tandaꞌ na ni Jesus a rabay ray manepet kona kanyaꞌ nin wanayna konra, “Amboꞌ para a mampitepetan kamo sa saya tan saya maipaꞌkaꞌ sa wangko a sa amboꞌ ana nin maꞌteng ket kai rakoyna liꞌ nin maꞌkit, baleꞌ sa amboꞌ liꞌ a lamang nin maꞌteng ket maꞌkit rako anamana? 20 Isipen moyoyti nin maong: Umakis tan gumereng kamo liꞌ; saray kai baleꞌ nin tumumbok kongko, ket rumiriket sara. Gumereng kamo anaod, baleꞌ say kaberengan moyo, masilyan liꞌ nin ririket. 21 Say kapada ket say masakit a pangingirangep nan idap nin sayay mangabing. Baleꞌ kayadiꞌ nayna liꞌ nin mangabing, malingwanan nayna a idap na banaꞌ ta pinasya ana liꞌ nin ririket na banaꞌ ta naiyabing yayna a anak na. 22 Kapada nin siin a kapapaꞌsar moyo banaꞌ ta sawanin ket mabereng kamo. Baleꞌ marateꞌ liꞌ a awro a makapikiꞌkit atamo anamana, ket maririket kamo liꞌ. Ket sa sain nin ririket moyo, kasa liꞌ gapo nin makapanglat.

23 No saytaw liꞌ nin panaon, kasaynan matkap moyo nin itepet kongko. Isipen moyoyti nin maong: Animan a dawaten moyo konan Ama ko, ibi na komoyo banaꞌ ta mangingilalaman kamo kongko. 24 Anggan sa sayti nin udas, kasa et gapo nin dinawat moyo kona a naipatukdoꞌ sa pagꞌin moyon mangingilalaman kongko. Sawanin baleꞌ, kidawat kamo ket mabyan kamo ta pigaw nin makusto a ririket moyo.

25 Manꞌibari-baritaꞌ koyti nin bubagay a mampangusar ako nin ararem a pananaritaꞌ. Baleꞌ sa adapen nin panaon, kai akoyna nin mangusar nin ararem a pananaritaꞌ, no kai edet, ibaritaꞌ koyna komoyo nin diritsawan a maipaꞌkaꞌ konan Ama ko. 26 No saytaw liꞌ nin panaon, syayna liꞌ a kidawatan moyo banaꞌ ta siꞌkamo ket mangingilalaman kamo kongko. Kai ko nin manꞌibaritaꞌ a siꞌko a kidawat kona para komoyo 27 banaꞌ ta si Dios nin Ama ket inadoꞌ nakamo nin diri. Inadoꞌ nakamo banaꞌ ta inadoꞌ rako tan mamper kamo a nangibwat ako kona. 28 Si Ama ko a ibwatan ko nin nakodti sa mundo, tan sya liꞌ lamang a sublian ko ta lumakwan akoynadti sa mundo.”

29 Sin narngeꞌ ra in nin tumutumbok na nin wana, wanra kona, “Sawanin ket mapala-palaway anay manꞌibaritaꞌ moyo banaꞌ ta diritsawan anay pagꞌiirgo moyo a kai kamoyna nin mampangusar nin ararem a pananaritaꞌ. 30 Sawanin anaod, tandaꞌ mi anan peteg a tandaꞌ moyo a sarba. Pati say tutepet a iti sa kanakman nin tawo, kai ana nin matkap nin ibalikas komoyo ta tandaꞌ moyoyna. Kanyaꞌ nin mamper kami a nangibwat kamo konan Dios.”

31 Ket niꞌbat na ni Jesus konra, “Peteg para nin mamper kamoyna? 32 Ket narateꞌ ana anaod a panaon a siꞌkamo ket misisyak kamo a magsiugot kamoyna sa pammali moyo ket lakwanan rakoyna nin bukud-bukod. Wanin man, amboꞌ kon talagan bukud-bukod ta kalamoꞌ koyay Ama ko. 33 Manꞌibaritaꞌ koyti komoyo ta pigaw nin matinek a kaisipan moyo mangibwat sa nikaipasaya moyo kongko. Peteg a mapadyaꞌdyaꞌ kamodti sa mundo. Wanin man, pakagsen kamo banaꞌ ta nadaeg koyna a kukapangyadian iti sa mundo.”