Si Dasal nan Pangulon Padiꞌ tamo
17
Nibaritaꞌ na in ni Jesus. Ket mayadiꞌ, tinmangar ya sa langit tan wana, “Ama ko, narateꞌ ana a panaon nin pangingirangep ko. Ipadar moy kinasiꞌno ko nin Anak mo ta pigaw nin maipadar ko anamaet a kinasiꞌno mo nin Ama ko. 2 Gawꞌen mo in ta pigaw nin ibi koy anggan-angga nin byay a iti komo konran sarba ran nipudir mo kongko, ta nibi mo kongko a pakayadiꞌ konran sarban tutawo. 3 Ket siti e a pipaꞌkaan nin anggan-angga nin byay a iti komo: Si katandaꞌ raka a siꞌka tamoꞌ a peteg nin Dios tan katandaꞌ rako nin si nibakiꞌ mo a si Jesu-Cristo. 4 Nipadar koynay kinasiꞌno modti sa mundo ta nagwaꞌ koyna a nipagwaꞌ mo kongko. 5 Ket sawanin, Ama ko, isubliꞌ nako anadsen komo, sa kataꞌgayan nin paꞌsar nin pikalamoꞌ ta sin baꞌyo ya et nin pinarsa a mundo.6 Saraytin tawo a nipudir mosara kongko, nipadar ko konra no siꞌno kan peteg. Minumundo a kabibyay ran gindat baleꞌ ikon mosara tan nipudir mosara kongko. Ket tinmulok saran liso sa nibaritaꞌ mo. 7 Sawanin tandaꞌ rayna a siꞌkay ibwatan nin sarban ginwaꞌ tan nibaritaꞌ ko. 8 Anaod, inakoꞌ ra ngaꞌmin a nibaritaꞌ ko konra nin nibaritaꞌ mo kongko, tan sigurado saran siꞌka a ibwatan ko tan namper saran maong nin siꞌka a namakiꞌ kongko.
9 Sarain a manꞌidasalan ko ta tutawo mosara. Amboꞌ nin saray kai nin tumumbok kongko a manꞌidasalan ko no kai edet, saray tutawo mo nin nipudir mo kongko. 10 Oꞌ anaod, sarba nin ikon ko ket ikon mo, tan sarba nin ikon mo ket ikon ko anamaet. Ket sarayti, manꞌipadar ray kinasiꞌno ko. 11 Kai ako nin magpirmi konan sitin mundo no kai edet, sumubliꞌ akoyna komo. Sara baleꞌ, mabatiꞌ saradti. Ket, masantos a Ama ko, alilaen mosara pa nin makapagkabyay sara sigon sa kinasiꞌno mo a nitalek mo kongkoa ta pigaw nin mipapasaya sara kapada a napasaya ata. 12 Leleg a iti ako konra, inalilaꞌ kosara nin magkabyay sara sigon sa kinasiꞌno mo a nitalek mo kongko. Nisakit kosara ket peteg a kasa gapo nin naisyay kongko no kai kal-la tamoꞌ sitaw si naiketeg ana nin madusa sa impyirno. Wanin a nangyadiꞌ ta pigaw nin say naisurat ket matukid.
13 Ket anaod, sumubliꞌ akoyna liꞌ komo, baleꞌ iti ako et konan sitin mundo. Kanyaꞌ nin manꞌidasal koyti sawanin ta pigaw nin matawayan raynamaet nin peteg a ririket nin iti kongkon diri. 14 Nipadar ko konra a say rabay mon ipatandaan, ket nagꞌin guraꞌ rasara anamaet nin saray kai nin tumumbok kongko. Wanin ta kapada kosaran naiduma konran raruman tawo nin say kaisipan ra ket iti tamoꞌ sa mundo. 15 Wanin man, kai ko nin dawaten a galten mosaradti sa mundo no kai edet, a idipinsa mosara konan si sya a Kadukaan. 16 Amboꞌ saran iti sa sakop nadti sa mundo no kai kapada kosara. 17 Ket, italaga mosaran para komo nin pakaipadaran nin say katutuꞌwan maipaꞌkaꞌ komo. Say saritaꞌ a mangibwat komo, ket sayti a katutuꞌwan maipaꞌkaꞌ komo. 18 Ibakiꞌ kosara konran kapada ran tutawodti sa mundo nin kapada nin nipamakiꞌ mo kongkodti 19 tan italaga koy kadiryan ko para konra ta pigaw nin peteg a maitalaga saran ikon mo.
20 Amboꞌ nin sara tamoꞌ a manꞌidasalan ko no kai edet, pati saray magmatalek liꞌ kongko mangibwat sa ipata-patandaan ra maipaꞌkaꞌ kongko. 21 Ama ko, sapa kumon ta mipapasaya sara kapada a nipasaya ata. Sapa anamaet kumon a naipasaya sara kontamo kapada a siꞌka ket naipasaya ka kongko tan siꞌko ket naipasaya ako komo, ta pigaw nin saray tutawo ket mamper sara a siꞌka a namakiꞌ kongko. 22 Say nipaipadar mon kataꞌgayan nin kinasiꞌno mo kongko ket sain a ipadar ko anamaet konra ta pigaw nin mipapasaya sara kapada a napasaya ata. 23 Naipasaya ako konra tan naipasaya ka kongko ta pigaw nin peteg saran mipapasaya. Ket no wanin, matandaan ran lawas nin tutawo a siꞌka a namakiꞌ kongko tan say pangangawaꞌnan mo konra, ket kapada nin pangangawaꞌnan mo kongko.
24 Ama ko, rabay ko et a saray tutawo nin nipudir mo kongko ket kalamoꞌ kosaran pirmi ta pigaw nin kiramaꞌ sara sa kagalangan ko. Siti a kagalangan nin nibi mo kongko banaꞌ ta kawaꞌnan nakoyna baꞌyo ya et nin pinarsa a mundo.
25 Mapteg a Ama ko, saray kaꞌbawan nin tutawo ket kai raka nin katandaꞌ. Siꞌko baleꞌ, katandaꞌ kata; tan sarayti saray tumutumbok ko, tandaꞌ ra a siꞌka a namakiꞌ kongko. 26 Ket nipatandaan ko konra no siꞌno ka, tan manꞌituluy-tuloy koyti nin man-gawꞌen ta pigaw nin kawaꞌnanen ra a sarba kapada nin pangangawaꞌnan mo kongko tan ta pigaw nin miikap ako konra.”