2 Si Judas a syay magtraidor kona ni Jesus, tandaꞌ nayayti nin lugar banaꞌ ta pirmi yan makodtaw si Jesus tan saray tumutumbok na. 3 Kanyaꞌ nin itaw nasara nin niꞌras a grupo nin sundaloꞌ^a tan gwardya sa Timplo nin nibakiꞌ ran saray Pupangulon Pupadiꞌ tan saray Pariseo. Nagsiawit sara nin tyoꞌ ra tan di-armas sara.

4 Tandaꞌ na ngaꞌmin ni Jesus a mangyadiꞌ kona kanyaꞌ nin sinnaꞌ nasarayna tan tinepet na, “Siꞌno a mantikapen moyo?”

5 “Si Jesus a taga Nazaret,” niꞌbat ra.

“Siꞌko yan diri,” wana. Nakaꞌdeng yadtaw nin kalamoꞌ ra sin sain si Judas a nagtraidor kona ni Jesus. 6 Sin nibaritaꞌ na ni Jesus a sya anaod, inmanunor sara ket natumba sara.

7 Ket tinepet na anamanaet ni Jesus, “Siꞌno ket a mantikapen moyo?”

“Si Jesus a taga Nazaret,” wanra.

8 “Nibaritaꞌ koyna anaod komoyo a siꞌko yan diri,” wana ni Jesus. “No wanin a siꞌko a mantikapen moyo, aburuyan moyo saran mako anayti saray kalalamoꞌ ko.” 9 Sa wanin ket matukid yaytaw si wana konan Ama na, “Ni saya tamoꞌ, kasa gapo nin maisyay kongko konran saray nipudir mo kongko.”

10 Ket si Pedro, tampor nayan inuyos a beneng na tan tinagaꞌ nayay sayay katulong nan Sangkataꞌgayan nin Padiꞌ. Ket naglat yan natagaꞌ a wanan nin tutulyan nan katulong a say ngaran na ket Malco. 11 Wana ni Jesus kona ni Pedro, “Ikaluban mayna in si beneng mo! Sa wamo para ket amboꞌ akon disidido nin mangirangep nin dyaꞌdyaꞌ a ipairangep nan Ama ko kongko?”

12 Konan siin, saray sundaloꞌ nin taga Roma a nipangulo nan kapitan ra tan saray gwardya nin Judio sa Timplo, dinakep raya si Jesus ket binaror ray gamet na. 13 Nuꞌna raya nin niyadap kona ni Anas^b nin katyangan na ni Caifas. Si Caifas a Sangkataꞌgayan nin Padiꞌ sin sain a taon. 14 Sya anamaet a namaritaꞌ intaw konran Judio a wanan maong ana konan sayay tawo a mati ta pigaw nin maisalba saray kaꞌbawan.^c

15 Si Simon Pedro tan si saya et nin tumutumbok na ni Jesus, tinmumbok sara. Siti nin saya et nin tumutumbok, katandaꞌ nayan Sangkataꞌgayan nin Padiꞌ, kanyaꞌ nin inaburuyan ya nin sumrep nin kalamoꞌ na ni Jesus sa luob nin pukok nan bali nan padiꞌ, 16 baleꞌ si Pedro, nabatiꞌ yadtaw sa rikor nan purta nin pukok. Sin wanin, sitaw si tumutumbok a katandaꞌ nan Sangkataꞌgayan nin Padiꞌ, linmiwaꞌ ya tan kinaꞌ naya nin kinairgo yaytaw si balasang a mampamantay sa purta. Ket inmaburoy ya nin paluuben ya si Pedro. 17 Sin manlumuob ya si Pedro, wana nin balasang kona, “Sa wangko saya ka anamaet nin tumutumbok nan siin a tawo.”

Ket, “Kai,” niꞌbat na ni Pedro.

18 Marayꞌep sin sain, kanyaꞌ nin saray aripen tan saray gwardya ket namabaya saran uring nin pairangrangan ra. Ket, nikilawok yan pinairangrang si Pedro konra.

19 Sawanin, tinepetan naya nin si gindat a Sangkataꞌgayan nin Padiꞌ si Jesus maipaꞌkaꞌ konra nin tumutumbok na tan say akay na. 20 Inumbat ya si Jesus, “Adap-adapan akon nagꞌirgo sa pangrerengeꞌ ran abaw a tutawo; nangyakay-akay ako sa susinaguga tan itaw sa sakop nan Timplo, nin sayti a lugar nin pididinepan ran sarban Judio. Kasa gapo nin nibaritaꞌ ko nin budian. 21 Ambaleꞌ nin siꞌkoy usisaen moyo? Saray matkap moyo nin usisaen ket saray nakarngeꞌ kongko ta tandaꞌ ra no ani a nibari-baritaꞌ ko.”

22 Sin wanin a ubat na ni Jesus, rinampaꞌ naya nin saya konran gwardya nin itaw, a wana nin siti, “Ambaleꞌ a ubatan man wanin a Sangkataꞌgayan nin Padiꞌ?”

23 Inumbat ya si Jesus a wana, “No main nin niꞌbat ko nin abas, ibaritaꞌ mo ta pigaw nin matandaan. Baleꞌ no kasa anamaet, ambaleꞌ a rinampaꞌ nako?”

24 Ket say sinmunor, nipaiyater naya ni Anas si Jesus nin nabaror et a gamet na, kona ni Caifas a syay Sangkataꞌgayan nin Padiꞌ.

25 Si Pedro anamaet, itaw ya et nin nikilawok nin mampairangrang, ket wanran itaw kona, “Sa wami saya ka anamaet nin tumutumbok nan siin a tawo.”

“Kai pa!” niꞌbat na ni Pedro.

26 Sin sain, main nin aripen nadtaw nin Sangkataꞌgayan nin Padiꞌ a siti ket kanayon nayan sitaw si naglatan nin tutulyan a tinagaꞌ na ni Pedro. Wana kona ni Pedro, “Amboꞌ para a saya ka konran naꞌkit kon kalalamoꞌ nadtaw sa pukok nin kukayo?”

27 Baleꞌ nibudiꞌ na anamana in ni Pedro. Bigraꞌ a main nin tinmarangꞌok nin manok.

28 Mayadiꞌ ya nin nausisaꞌ si Jesus itaw sa bali na ni Caifas, buklas ana. Ket saray pupangulo ran Judio, niꞌras raya sa palasyo na ni Gubirnador Pilato a mantawagen nin Pretorio. Kai sara nin sinumrep a Judio sa palasyo nan gubirnador ta pigaw nin kai sara nin maikwintan nikasamaꞌ^d ket kai sara maawaan nin mangisilibran Pistan Nipanglabas. 29 Konan siin, linmiwaꞌ ya si Pilato tan nitepet na konra, “Ani a riklamo moyo kuntra konan sitin tawo?”

30 Ket niꞌbat ra, “No kasa nin ginwa-ginwaꞌ nan dukaꞌ nin siti, kai miya kumon nin niꞌras iti komo.”

31 Konan siin wana ni Pilato, “Siꞌkamoynay makauray. Siꞌkamoynay manintinsya kona sigon sa Gugan-gan moyo.”

Ket niꞌbat ra, “Siꞌkami baleꞌ nin Judio ket kasa nin pakayadiꞌ mi nin manusan patiti.” 32 Wanin a nangyadiꞌ ta pigaw nin saytaw say nibaritaꞌ na ni Jesus maipaꞌkaꞌ sa klasin pangmamati^e kona, ket matukid.

33 Sin sain, linmuob yayna sa palasyo na si Pilato, miꞌsa naya nin nipakayaban si Jesus. Tinepet na kona, “Siꞌka paran pageꞌ a Adiꞌ ran Judio?”

34 Inumbat ya si Jesus, “Nitepet mo in para mangibwat sa nakem mo nin bukod o mangibwat sa darom nin raruma?”

35 Ket niꞌbat na ni Pilato, “Ya, ambaleꞌ! Saya ako para nin Judio? Saran diri a kapada mo nin Judio tan saray pupangulo ran pupadiꞌ moyo a nangipagamet komodti kongko. Ani ket a ginwaꞌ mo?”

36 Inumbat ya si Jesus a wana, “Say pagꞌaadiꞌ ko, amboꞌ nin kapada konran saray magꞌuuray iti sa mundo ta no saya ako kumon nin adiꞌ iti sa mundo, saray tutawo ko, nikilaban sara kumon ta pigaw nin kai ako nin naipagamet konran mumagꞌuray nin Judio. Baleꞌ anaod, say pagꞌaadiꞌ ko ket amboꞌ nin iti konan sitin sakop.”

37 Sin sain, wana ni Pilato, “No wanin edet, saya ka nin adiꞌ!”

Inumbat ya si Jesus, “Siꞌkamo a mampamaritaꞌ a saya akon adiꞌ. Say gagara ko nin nakodti sa lutaꞌ nin nipaiyanak ket ta pigaw nin ipatandaan koy katutuꞌwan. Ket si siꞌnuman nin mamaalaga sa katutuꞌwan, akuen na a manꞌibari-baritaꞌ ko.”

38 Ket konan siin, nitepet na ni Pilato, “Ani wadiꞌ a katutuꞌwan?”

Kayadiꞌ na nin inirgo in, linmiwaꞌ ya anamana si Pilato tan wana konran Judio, “Kasan maꞌkit ko nin kasalanan na. 39 Baleꞌ main nin ugaliꞌ moyo a mangibulos ako nin sayay priso tepeꞌ nin Pistan Nipanglabas. Rabay moyo para nin bulusan koyayti si Adiꞌ moyon Judio?”

40 Ket, “Kai, amboꞌ ya in!” wanra nin niburyaw. “Si Barrabas a rabay mi!” Siti si Barrabas ket saya ya nin tulisan.