3 Ket, sinrepan naya ni Satanas si Judas Iscariote a saya konran labinrwan apostoles na ni Jesus. 4 Ket nako ya si Judas konran Pupangulon Pupadiꞌ tan pupangulo ran gwardya sa Timplo tan nikitarusan ya konra no paꞌno nayan maipagamet konra si Jesus. 5 Anaod, pinasyan riga ra ket nipangakoꞌ ran byan rayan kwarta. 6 Ket nikikumpurmi ya tan nangkit yayna nin tyimpon maipagamet naya konra si Jesus nin kai ra maaraman nin tutawo.

7 Sawanin, narateꞌ anay uꞌnan awro nin Pistan Pangangan nin Tinapay a Kasan Pammakbo a syay awron pangmamatin karniro para sa Pistan Nipanglabas. 8 Ket nibakiꞌ nasara ni Jesus si Pedro tan si Juan a wana, “Mako kamoyna ta isadyaꞌ moyoy pangapunan tamo sa pista.”

9 Tinepet ra, “Adti a rabay moyo nin pangisadyaan mi?”

10 Niꞌbat na, “Wanti e: Mansumrep kamo et tamoꞌ sa syudad ket main liꞌ nin lalakin masnaan moyodtaw a mampangawit yan sampaya nin ranom. Tumbuken moya sa balin keen na 11 tan ibaritaꞌ moyo konan main ikon nin bali, ‘Wana ni Maistro tamo, adti ya kano a kwarton kidungwan nan mangapon komi nin tumutumbok na sitin yabi nin Pistan Nipanglabas?’ 12 Ket ipaꞌkit naya komoyoy sayay alawang nin kwarto sa taꞌgay nin nasadyaꞌ tan kumplito anay agamiren. Ket itaw, manadyaꞌ kamo nin kumanaꞌ kontamo.”

13 Nako sarayna ket pageꞌ a nadumog rayaytaw si nibaritaꞌ na ni Jesus konra. Kanyaꞌ nin nisadyaꞌ raynay pangapunan ra sa pista.

14 Sin udas anan pangngapon, nidudungo sara sa pangnganan si Jesus nin saray apostoles na. 15 Sin sain, wana ni Jesus konra, “Manꞌapes-apesen koynaytin naꞌteng si makakidungo komoyo nin mangan sa sitin pista baꞌyo ako nin mangirangep nin dyaꞌdyaꞌ. 16 Anaod, ibaritaꞌ koyti komoyo, kai akoyna liꞌ anamanaet nin mangan sa wantin pista anggan matukid ana a tutuon pipaꞌkaan nan siti no lison magꞌadiꞌ yayna liꞌ a Dios.”

17 Kaaram, kinalap nayay baso a main nin arak nin ubas. Nikisalamat ya konan Dios, miꞌsa wana, “Kalapen moyayti ket saya-saya kamon minom, 18 ta ibaritaꞌ ko komoyo a mangibwat sawanin, kai akoyna gapo nin minom nin arak nin ubas anggan si Dios ket lison mampagꞌadiꞌ yayna.”

19 Kaaram nangalap yan tinapay tan nikisalamatan nayay Dios, miꞌsa naya nin simpi-simping tan nitayak na konra, tan wana, “Siti a lalaman ko nin maidaꞌton para komoyo. Gawꞌen moyoyti nin pirmi ta pigaw nin mapanemtem moyoy byay tan patiti ko.”

20 Wanin anamaet, sin nayadiꞌ sarayna nin nangan, kinalap naya a baso tan wana, “Sayti nin arak a pakaꞌkitan nin baꞌyon pakitarato nan Dios sa tutawo nin paꞌgeten yan dayaꞌ ko nin tumuroꞌ para komoyo.

21 Wanin man, rengꞌen moyayti: Iti yan kadungo tamoy tawon magtraidor kongko. 22 Siꞌkon si Pinaitawo, mati ako sigon sa niketeg nan Dios baleꞌ kadoꞌ yayna in si magtraidor kongko!” 23 Ket nagsitepetan sara no siꞌno kadiꞌ konra a mampangiplanon siin.

24 Kaaram, nipupurpya sara anamaet a apostoles no siꞌno konra a ibilang nin sangkataꞌgayan. 25 Ket wana ni Jesus, “Saray uadiꞌ iti sa mundo, manꞌaripenen rasaray masakupan nin uray ra; mataman nin wanin, pagalangan sara a wadiꞌ ket matulong sara. 26 Baleꞌ siꞌkamo, amboꞌ nin manepeg a gawꞌen moyo in. No kai, no siꞌno komoyo a sangkataꞌgayan a butang, sya a magꞌin nin sangkaayupaan, tan si sayay pangulo, sya a magsirbi. 27 Siꞌno ket a mas ataꞌgay, si nakadungon mampangan o si mampagsirbi? Syimpri a, si nakadungo, kai para? Baleꞌ siꞌko, iti ako komoyo nin kapada nan sayay tagasirbi.

28 Siꞌkamo, mandumaer kamon kalamoꞌ ko sa pakasubok ko. 29 Kanyaꞌ nin no paꞌno a siꞌko ket binyan nakon Ama ko nin kanepegan nin magꞌadiꞌ, byan katamo anamaet nin kanepegan nin kipagꞌuray kongko ket 30 makakidungo kamo liꞌ kongko nin mangan tan minom no mampagꞌadiꞌ akoyna. Tumekreꞌ kamo sa tutruno ket kipagꞌuray kamo konran labinrway grupo ran puri na ni Israel.”

31 “Simon Pedro, mangrengeꞌ ka. Si Satanas, inaburuyan naynan Dios a dawat nan subuken a pammemper moyo ngaꞌmin, a say paꞌsar moyo ket kapada no pipuruken a byas tan ataꞌ nin yakayaken. 32 Baleꞌ, nidasal takayna, Simon, a kai kumon nin mayegyeg a pagmamatalek mo. Ket no sinmubliꞌ kayna liꞌ kongko, pagsenen mosaray bubsat mo.”

33 Wanan niꞌbat ni Pedro kona, “Uunuren, sisasadyaꞌ akon maipriso o mati nin kalamoꞌ ka.”

34 Ket wana ni Jesus kona, “Pedro, ibaritaꞌ koyti komo, konan sitin yabi baꞌyo main nin tumarangꞌok nin manok, mitlo mo ibudiꞌ a katandaꞌ nako.”

35 Miꞌsa wana ni Jesus konran saray apostoles na, “Sin nibakiꞌ katamon mangyakay nin kai katamo nin pinibalon nin kwarta, bag tan apin nin ayi, nagkurang kamo para?”

“Kai,” wanran niꞌbat.

36 Ket wana ni Jesus konra, “Sawanin baleꞌ, no main nin kwarta tan bag moyo, matkap nin awiten moyo. Ket no kasan armas moyo, ilakoꞌ moyoy aysing moyo ta manaliw kamo 37 ta ibaritaꞌ ko komoyo a matukid yay wanan Masanton Kasuratan maipaꞌkaꞌ kongko a,

38 “Uunuren,” wanran saray apostoles na, “ya e a rwa ray armas.”

Ket wana ni Jesus, “Kustoyna in!”

39 Bilang ugaliꞌ na, nibwat ya si Jesus nin nako sa Talugtog Olibo. Nayi saray tumutumbok na. 40 Sin nakarateꞌ saraynadtaw, wana ni Jesus konra, “Dumasal kamo ta pigaw nin kai kamo madaeg nin tukso.”

41 Kaaram, kinmadayoꞌ ya konra nin kapada kaadayoꞌ nin maabot nan sayay nibasyon bato, miꞌsa ya nanalimukod nin dinmasal a wana, 42 “Ama ko, no magwaꞌ, andiꞌ mo kumon nin ipairangep kongko in say dyaꞌdyaꞌ a adapen kon irangep. Wanin man, amboꞌ a karabayan ko a masunor, no kai say karabayan mo.” 43 Ket sin sain, main nin anghil nin ibat sa langit a pinaipaꞌkit nin namaksaw nin nakem na. 44 Sa idap nin paꞌsar na, lalo yaynan masuet nin dinmasal si Jesus ket nanaynge-saynget yan baraꞌmon dayaꞌ nin tinmuroꞌ sa lutaꞌ.^c

45 Sin nayadiꞌ yayna nin dinmasal, sinmubliꞌ ya konran tumutumbok na ket naratꞌanan nasaran mampaꞌlek sa nalabas a bereng ra. 46 Wana konra, “Ambaleꞌ a mampaꞌlek kamo? Mibangon kamo ta dumasal kamo ta pigaw nin kai kamo madaeg nin tukso!”

47 Sin mampagꞌirgo ya et si Jesus, rinmateꞌ saray abaw nin tutawo. Iti ya sa uꞌna si Judas a saya konran labinrwan tumutumbok na. Kinmadani ya kona ni Jesus ta pigaw nin arkan naya. 48 Ket wana ni Jesus kona, “Judas, ani? Traiduren nakon si Pinaitawo konan sitin arek mo?”

49 Sin naamingaw ran kalalamoꞌ na ni Jesus a main nin amboꞌ nin mabistan mangyadiꞌ, wanra kona, “Uunuren, kilaban kami ana! Main nin beneng mi!” 50 Bigraꞌ, tinagaꞌ nayan saya konran apostoles a sayay katulong nan Sangkataꞌgayan nin Padiꞌ ket naglat yan natagaꞌ a wanan nin tutulyan na.

51 Ket wana ni Jesus, “Kustoyna in!” Ginaꞌgetan nayay tutulyan nan katulong ket tampor a inmandaꞌ ya.

52 Miꞌsa wana ni Jesus konran Pupangulon Pupadiꞌ, upisyalis ran saray gwardya sa Timplo tan Mangatuntawo ran Judio a nakodtaw nin manakep kona, “Saya ako para nin kriminal ta nakabeneng kamo tan main nin pekpek moyo? 53 Inawru-awron kalamoꞌ rakodtaw sa sakop nan Timplo, ket kai rako nin dinakep. Baleꞌ sawanin, inaburuyan kamo nin gawꞌen moyo a rabay moyo tan say rabay nan adiꞌ nin kadedleman.”

54 Dinakep raya si Jesus tan nikaꞌ raya sa bali nan Sangkataꞌgayan nin Padiꞌ. Si Pedro, tinmumbu-tumbok ya baleꞌ itaw ya tamoꞌ sa dayoꞌ. 55 Main nin namuor itaw sa butlay nin baraybay nan bali nan Sangkataꞌgayan nin Padiꞌ, miꞌsa tinmekreꞌ saran pairangrang. Ket nako ya nin pairangrang nin kalamoꞌ ra si Pedro. 56 Naꞌkit nayan sayay babayin katulong si Pedro nin mantumekreꞌ sa danin puor ket pinastang nayan maong miꞌsa wana, “Kalamoꞌ naya in!”

57 Ket nibudiꞌ nayti ni Pedro tan wana, “Arikong, kai pa! Ni kai koya nin katandaꞌ!”

58 Amboꞌ nin naꞌteng, main et nin nakaalilbiꞌ kona ket wana, “Saya ka anamaet konran kalalamoꞌ na!”

Wanan nibudiꞌ ni Pedro, “Kai pa, amigo!”

59 Napalabas a magsayay udas, sayay lalaki anamaet a nangipasuet, “Pageꞌ pan kalamoꞌ nayayti ni Jesus ta taga Galilea ya.”

60 Baleꞌ inumbat ya si Pedro a wana, “Amigo, kai ko gapo tandaꞌ in say manꞌibaritaꞌ mo!”

Kapingmatan, leleg nan mampagꞌirgo ni Pedro, main nin tinmarangꞌok nin manok. 61 Sin sain, linmingap ya si Jesus tan pinastang naya si Pedro. Sawanin, napanemtem na ni Pedroytaw say nibaritaꞌ na ni Jesus nin Uunuren kona a wana, “Baꞌyo main nin tumarangꞌok nin manok konan sitin yabi, nitlo moyna nin nibudiꞌ a katandaꞌ nako.” 62 Nibwat ya si Pedro ket inmakis ya sa bereng nan tuloy.

63 Sawanin, saray mampaggwardya kona ni Jesus, nagꞌirgu-irgo saran pammadingꞌey kona tan binugbu-bugbog raya. 64 Pinepet ra et a mata na miꞌsa wanra kona, “Prupita ka! Ibaritaꞌ mo no siꞌnoy namikas komo.” 65 Ket abaw et a nipanuyaꞌ-tuyaꞌ ra kona.

66 Sin buklas ana, nididinep saray iti sa Kunsiho ran Judio a saray Pupangulon Pupadiꞌ tan Madudunong sa Gugan-gan; ket niyadap ya si Jesus konra. 67 Wanra kona sin sain, “Ibaritaꞌ mo komi, siꞌkay Criston nipangakoꞌ nan Dios?”

Ket wana ni Jesus konra, “Mataman nin ibaritaꞌ ko komoyo, kai moyon lamang nin tepren; 68 ket no tepetan katamo anamaet, kai kamon lamang nin umbat. 69 Baleꞌ sa amboꞌ ana nin maꞌteng, siꞌkon si Pinaitawo, tumekreꞌ akoyna liꞌ iti sa wanan nan Dios, a sya a Makapangyayadiꞌ.^d”

70 Sin sain, nagsitepet sara a wanra, “Siꞌka edet a Anak nan Dios?”

Ket wanan niꞌbat ni Jesus, “Nairgo moyoynaod ana.”

71 Sawanin, wanra, “Kai tamoyna nin matkap a raruma et nin ibidinsya! Narngeꞌ tamon diri a nibaritaꞌ nan mismo.”