3 Ket banaꞌ ta wanin anaod, namakiꞌ sara si Maria tan Marta nin mako nin mangiparateꞌ kona ni Jesus a wana, “Ser, si amigo mo nin kawaꞌnan mo, ket main nin masakit na.”

4 Sin narngeꞌ na in ni Jesus wana, “Siin nin masakit na, kai ya nin mangangga sa patiti, no kai edet, nangyadiꞌ ti nin pakaipadaran nin kataꞌgayan nan Dios ta pigaw nin maipataꞌgay akon si Anak na.”

5 Anaod, inadoꞌ nasaran maong ni Jesus tin mibubsat a Marta, Maria tan Lazaro. 6 Banaꞌ konan siin, sin narngeꞌ na a main nin masakit na ni Lazaro, namalabas ya yapoꞌ nin rway awro itaw sa kamiꞌnan na, 7 miꞌsa wana konran tumutumbok na, “Sumubliꞌ atamo sa Judea.”

8 Baleꞌ wanra nin niꞌbat kona, “Maistro, amboꞌ et nin naꞌteng a pinatyuan rakamon kudasen nin Judio nin itaw. Andiꞌ kamo nin sumubliꞌ anamanaet itaw!”

9 Wana ni Jesus, “Magwaꞌ et ta italaga nan Dios a kusto nin udas para sa sayay mangyadiꞌ.^b Bilang wadiꞌ, no paꞌsar lumalako ya a sayay tawo no awro, kai ya nin misakin banaꞌ ta makaꞌkit ya banaꞌ sa palaway nan sitin mundo. 10 Baleꞌ, no paꞌsar iti ya sa yabi nin lumalako, misakin ya banaꞌ ta madedlem ket kasa yay palaway kona.” 11 Ket nituloy na, “Si amigo tamon si Lazaro ket mampaꞌlek ya. Keen koya nin pukawen.”

12 Niꞌbat ran tumutumbok na, “Uunuren, no mampaꞌlek ya ket mabista ta umandaꞌ yayna liꞌ.” 13 Wanin a wanra banaꞌ ta say pakataros ra ket mampaꞌlek yan pageꞌ si Lazaro, baleꞌ say rabay nan irgwen ni Jesus ket nati ya.

14 Konan siin, diritsawan nan nibaritaꞌ ni Jesus a wana, “Nati yayna si Lazaro, 15 baleꞌ maririket ako anamaet a lamang ta kasa akodtaw sin nati ya. Nangyadiꞌ yayti para sa kaabigan moyo, ta pigaw nin lalo kamon mamper no siꞌno ako. Kanyaꞌ nin mako atamo anadtaw kona.”

16 Konan siin, wana ni Tomas a mantawagen nin Singin, konra nin kapada nan tumutumbok, “Sigi, mayi atamo ana ta pigaw nin kipati atamo kona ni Maistro!”

17 Sin rinmateꞌ saradtaw sa Betania si Jesus, natandaan na nin aꞌpat a awro naynan naitabon ni Lazaro. 18 Siti si baryo nin Betania, adani yadtaw sa Jerusalem ta kurang a tuloy kilumitro tamoꞌ a kadayꞌan na. 19 Kanyaꞌ nin abaw saray Judio nin ibat itaw a nako nin nangliwaliwa konra ni Marta tan Maria sa nipati nan busat ra.

20 Sin narngeꞌ na ni Marta a manrumateꞌ ya si Jesus, kinaꞌ naya nin sinnaꞌ, baleꞌ si Maria ket nabatiꞌ yadtaw sa bali ra. 21 Wana ni Marta kona ni Jesus, “Ser, no iti kamo tamoꞌ kumon, kai ya nin nati a busat mi! 22 Baleꞌ tandaꞌ ko nin lamang a mataman nin sawanin, animan a dawaten moyo konan Dios ket iyaburoy na nin mangyadiꞌ komoyo.”

23 Wana ni Jesus, “Sumubliꞌ ya nin mabyay a busat mo.”

24 Ket wana anamaet ni Marta, “Oꞌ a, tandaꞌ ko a sumubliꞌ ya liꞌ nin mabyay no pasublien sara nin mabyay a nunati no saytaw liꞌ no marateꞌ a awro.”

25 Konan siin, wana ni Jesus, “Siꞌko a main nin pakayadiꞌ nin mamasubliꞌ nin mabyay konran nunati ana, tan siꞌko a mampami nin byay. Si siꞌnuman a magmatalek kongko, mataman nin mati ya, mabyay ya et a lamang. 26 Ket, saray mabyay a mampagmatalek sara kongko, kai sara gapo nin peteg nin mati. Tepren moyti para?”

27 “Oꞌ Ser,” niꞌbat na ni Marta, “mamper ako a siꞌkay mantagaꞌnan mi nin rumateꞌ iti sa mundo. Siꞌka a Cristo nin Anak na nin Dios.”

28 Kayadiꞌ na nin inirgoyti ni Marta, sinmubliꞌ ya sa bali ra. Kinayaban naya si Maria tan wanan niyanas, “Rinmateꞌ ya si Maistro, ket manꞌipakayaban naka.” 29 Sin narngeꞌ nayti ni Maria, inumdeng yan tampor tan nako naya nin sinnaꞌ si Jesus.

30 Sin sain ket, itaw ya et sa rikor nin baryo si Jesus, itaw sa nannaan na ni Marta kona. 31 Saray Judio anamaet nin mampangliwaliwa kona ni Maria, sin naꞌkit rayan apuradon nibwat, tinumbok raya banaꞌ ta say wanra ket mako ya sa nanabunan kona ni Lazaro ta pigaw nin umakis ya.

32 Sin nakarateꞌ yadtaw si Maria sa kamiꞌnan na ni Jesus, nanalimukod ya sa adapan na tan wana, “Ser, no iti kamo tamoꞌ kumon, kai ya nin nati a busat mi.”

33 Sin naꞌkit na ni Jesus a mampangabet-abet ya si Maria tan saray Judio nin tinmumbok kona, inmidap nin tuloy a nakem na tan ginmereng ya 34 ket wana, “Adti moya nin nitabon?”

“Mayi kamo, Ser, ta keen moya nin kiten,” wanra nin niꞌbat.

35 Nilwaꞌ ya si Jesus. 36 Konan siin, wanra nin Judio, “Kiten moyo no paꞌno nin kaalaki a pangangawaꞌnan na kona!”

37 Wanra anamaet nin raruma konra, “Nagwaꞌ na a makaꞌkit yayna a sayay bulag. Main anamaet kumon nin nagwaꞌ na ta pigaw nin kai ya nin nati si Lazaro.”

38 Ginmereng ya anamana nin maong si Jesus, ket kinmadani ya sa nanabunan kona ni Lazaro a siti ket yukib ya nin sinadaan nin alakin bato. 39 “Galten moyay bato,” nigan-gan na.

Baleꞌ andiꞌ yay busat nan si natin si Lazaro, si Marta, a wana, “Ser, mabangꞌet yayna ta aꞌpat a awro yayna nin nitabon.”

40 Wana ni Jesus kona, “Nalingwanan moyna para a nibaritaꞌ koyna komo a no magmatalek ka kongko ket maꞌkit mo a pakayadiꞌ na nin Dios?” 41 Ket, ginlat rayay bato. Ket, tinmangar ya si Jesus tan wana, “Ama ko, kisalamat ako komo ta rinngeꞌ nako. 42 Tandaꞌ ko a manrengꞌen nako nin pirmi, baleꞌ nibaritaꞌ koyti banaꞌ konra nin sarayti nin tutawo, ta pigaw nin mamper sara nin siꞌka a namakiꞌ kongko.”

43 Kayadiꞌ na nin nibaritaꞌ ti ni Jesus, nitaꞌway na a wana, “Lazaro, lumiwaꞌ kadsen!” 44 Linmiwaꞌ ya anaod si Lazaro a napunggos yan abel laloynay gamet tan ayi na tan napunggos nin alakin panyoꞌ a rupa na. Ket wana ni Jesus konran itaw, “Warwaren moyoy nipamunggos kona ta pigaw nin makakimey ya.”

45 Sin sain, main saraytaw saray Judio nin nako konra ni Maria nin nakaꞌkit sa ginwaꞌ na ni Jesus, ket nagmatalek sara kona. 46 Saray raruma baleꞌ, nako sara konra nin Pariseo nin nikaꞌ ra nin niparateꞌ a ginwaꞌ na ni Jesus.

47 Kanyaꞌ nin sin sain, nipakayaban rasaran Pariseo tan saray pupangulo ran pupadiꞌ a raruman myimbron Kunsiho, miꞌsa wanra, “Ani a gawꞌen tamo ta siin nin tawo ket abaw anay man-gawꞌe-gawꞌen nan baraꞌmon gawaꞌ nan Dios? 48 No pauryan tamoya tana nin wanin, sarba ra nin tutawo, magmatalek kona. Ket saray mampagꞌuray kontamo nin taga Roma, mako saradti tan gamgamen rayayti kontamo si Timplo tamo tan si nasyon tamo.”

49 Baleꞌ si Caifas a syay Sangkataꞌgayan nin Padiꞌ sin sain a taon wana, “Siꞌkamo! Kai moyo gapo nin mataros. 50 Matkap moyon maamingaw a mabista a sayay tawo tana a mati ta pigaw nin maisalba saray kaꞌbawan, dyan si sarba tamon gumabali a mati.” 51 Siti nin nibaritaꞌ na ni Caifas, kai nin nangibwat sa kaisipan na nin bukod no kai edet, banaꞌ ta syay Sangkataꞌgayan nin Padiꞌ, nipapadles nan Dios kona a matkap yan mati si Jesus, ta pigaw nin saray kadayaan na nin saray Judio ket maisalba sara. 52 Mati ya amboꞌ tamoꞌ nin para konran kadayaan nan saray Judio no kai edet, para et konran sarba ran aꞌnak nan Dios nin natayak-tayak sa nagsikabarang nin lugar ta pigaw nin gawꞌen nasaran sayan-sayay pamilya. 53 Ket nangibwat ana konan siin nin awro, saray pupangulo ran Judio, niplano rayna no paꞌno rayan mapati si Jesus.

54 Banaꞌ anaod ta wanin, kai sarayna nin nipaꞌki-paꞌkit nin lumala-lalako si Jesus itaw sa Judea no kai edet, nibwat saran nako sa Efraim, sayay babali nin adani sa lugar a amboꞌ nin matawo. Ket itaw sara yapoꞌ nin saray tumutumbok na.

55 Edet, dandani ana sin sain a pista ra nin Judio a mantawagen nin Nipanglabas. Kanyaꞌ nin abaw saray Judio nin ibat sa bubaryo nin tinmangkar sa Jerusalem ta pigaw nin gawꞌen ra a ritwal nin piriringgas ta pigaw nin magwaꞌ ray mako sa pista. 56 Tiningka-tingkap rayan tutawo si Jesus, ket sin mampididinep saraynadtaw sa sakop nan Timplo, nitepetan sara sa saya tan saya a wanra, “Ani sa wamoyo? Mako yadti kasi nin kipista?” 57 Wanra in ta nigan-gan ran saray pupangulo ran pupadiꞌ tan saray Pariseo a siꞌnuman a makatandaꞌ sa kamiꞌnan na ni Jesus, ipatandaꞌ na konra ta pigaw nin dakpen raya.