Si Jesus, Maipada ya sa Sayay Maong a Mammastor
10
Ket, wana ni Jesus, “Isipen moyoyti nin maong: Bilang wadiꞌ, main nin kural ran karniro ket si sayay tawo, sumrep yadtaw nin muliꞌ ya sa darekdek imbis a dumalan yadtaw sa purta, saya ya anaod nin mannakaw nin samsamen nasara. 2 Baleꞌ, si sumrep nin dumalan ya sa purta, sya a peteg nin mammastor ran karniro. 3 Pasrepen naya nin gwardya. Ket maalilbiꞌ ran karniro a tunoy na. Tawag-tawagen nasaray karniro na sa ngaran ra tan irikor nasara sa kural. 4 Ket no itaw saraynay sarba ran ikon na sa rikor, muꞌna ya konra tan tumbuken raya banaꞌ ta tandaꞌ ray tunoy na. 5 Kai sara gapo nin tumumbok sa raruma, no kai edet, palaywan rayayti banaꞌ ta kai ra nin tandaꞌ a tunoy na.”6 Nibaritaꞌ nayayti ni Jesus nin alimbawaꞌ konra, baleꞌ kai ra nin natarusan a rabay na nin ipatarusan. 7 Sin wanin, wana anamaet ni Jesus, “Isipen moyoyti nin maong: Siꞌko a dadalanan ran karniro. 8 Sarba ra nin saray nuꞌna dyan siꞌko nin nagwadiꞌ-wadiꞌ saran dadalanan, nin irikor rasaray paꞌsar karniro, mannakaw sara nin samsamen rasara. Baleꞌ kai rasara nin rinngeꞌ nin saray paꞌsar karniro. 9 Siꞌko a dadalanan sa pako konan Dios. Si siꞌnuman a sumrep nin dumalan kongko, ket maisalba ya. Maipada ya sa sayay karniro nin sumrep tan lumiwaꞌ sa kural ket makadumog yan pangnganan.
10 Si sayay mannakaw, mako ya tamoꞌ nin manakaw, mangmati tan manidaꞌ. Baleꞌ siꞌko, nako akodti ta pigaw nin saray tutawo ket magkamain sara nin byay a iti konan Dios nin sitin byay ket bastanti ya. 11 Si sangkaungan nin mammastor konran karniro ket, siꞌko. Asikaswen kosara mataman no pangibwatan ti nin patiti ko. 12 Si sayay tawon manꞌupaan tamoꞌ, maꞌkit naya man nin itaw et sa dayoꞌ nin manꞌumarak a sayay mabayanin ayep, lakwanan nasarayna a karniro nin malayo ya banaꞌ ta amboꞌ ya a mammastor tan amboꞌ nasara nin ikon. Ket no rumateꞌ yaynay mabayanin ayep, kayat-kayaten nasaray karniro ket pisisyaken nasara. 13 Malayo ya banaꞌ anaod ta manꞌupaan ya tamoꞌ kanyaꞌ nin kai sara nin maalaga kona.
14 Baleꞌ siꞌko, sangkaungan ako nin mammastor. Wanin banaꞌ ta say pitatandaan mi nin saray paꞌsar karniro ko 15 ket kapada nin pitandaan mi nin Ama ko. Wanin et, asikaswen kosara a paꞌsar karniro ko mataman no pangibwatan ti nin patiti ko. 16 Main et nin raruma nin paꞌsar karniro ko nin kasa konan siti nin paꞌsar kurala. Matkap a dinepen kosara anamaet ta rengꞌen raynamaet a tunoy ko. Ket magꞌin nin sayan-sayay paꞌsar bakid sara nin saya a mammastor ra.
17 Si Ama ko, kawaꞌnan nako banaꞌ ta tumulok ako kona nin ibi ko a byay ko nin mati ako ta pigaw nin sumubliꞌ ako nin mabyay. 18 Kasa anaod nin makapangmati kongko no amboꞌ nin mangibwat kongko a mapati ako, banaꞌ ta main nin kapangyadian ko nin ibi koy byay kon mati tan main a lamang nin kapangyadian ko nin bawien koy byay ko. Wanin banaꞌ ta sain a niketeg nan Dios maipaꞌkaꞌ kongko.”
19 Sin sain, kasa anamana nin pipapasaya nin kukaisipan ra nin Judio banaꞌ sa sain nin nibaritaꞌ na ni Jesus. 20 Saray abaw konra wanra, “Nasrepan ya nin ispiriton dukaꞌ ket mangkaluang ya! Ambaleꞌ a mangrengeꞌ kamo kona?”
21 Ket wanra anamaet nin raruma, “Makapagꞌirgu-irgo ya para nin wanin a saya nin nasrepan nin ispiriton dukaꞌ? Matambar na para nin sayay ispiriton dukaꞌ a pagꞌin nan bulag nin sayay tawo?”
Natarusan ran Judio a Nibaritaꞌ na ni Jesus a Dios ya
22 Sin panaon anan marayꞌep, syaynay pangngisilibra sa Jerusalem nin pista a mantawagen nin Pangingididika konan Timplo. 23 Sin sain, itaw yan manlumala-lalako si Jesus sa lugar sa Timplo a mantawagen nin Balkon na ni Solomonb 24 ket inaribungbungan rayan Judio tan wanra kona, “Anggan kaꞌno rakami nin pangisipen et? Ibaritaꞌ moyna nin diritsawan no siꞌka a Cristo.”
25 Niꞌbat na ni Jesus konra, “Nibaritaꞌ koyna komoyo baleꞌ kai moyo nin rabay a mamper. Say makapakaꞌngap nin man-gawꞌe-gawꞌen ko nin nipagwaꞌ na nin Ama ko, sain a mamatutuo nin maipaꞌkaꞌ kongko. 26 Baleꞌ kai kamo anaod nin mamper banaꞌ ta amboꞌ kamon paꞌsar karniro ko, 27 ta saray paꞌsar karniro ko, maipurok ray tunoy ko tan siꞌko anamaet, tandaꞌ kosara, kanyaꞌ nin tumbuken rako. 28 Ket byan kosara nin anggan-angga nin byay a iti konan Dios. Oꞌ, kai sara gapo nin maisyay konan Dios, tan kasa gapo nin makapanamsam konra kongko. 29 Wanin banaꞌ ta si Ama ko nin nangipya konra kongko ket sya a makapangyayadiꞌ sa sarba,c ket kasa gapo nin makapanamsam konra sa pammaga nan Dios a syay Ama. 30 Siꞌko tan si Dios a syay Ama ket napasaya kami.”
31 Konan siin, sa ikarwan parso, nagsipurot saran bato a Judio ta pigaw nin kudasen raya si Jesus. 32 Sin sain, wana konra, “Abaw anay nipaꞌkit ko komoyo nin mabibistan gawaꞌ a nipagwaꞌ nan Ama ko kongko. Aya wadiꞌ sa saytin ginwa-ginwaꞌ ko a rason a kudasen rako?”
33 Imbatan rayan Judio a wanra, “Amboꞌ nin banaꞌ sa mabibistan ginwaꞌ mo a rason a kudasen mika no kai banaꞌ ta manꞌuꞌna-uꞌnawan ma a Dios. Siꞌka a mapala-palaway nin tawo tamoꞌ ket manꞌipariho moy lalaman mon diri konan Dios.”
34 Ket inumbat ya si Jesus a wana, “Main baleꞌ nin naisurat sa Masanton Kasuratan a wamoyo sayti a Gugan-gan moyo maipaꞌkaꞌ konra nin pupangulo moyo sin saytaw nin wanti a wana, ‘Siꞌko nin si Dios, ibaritaꞌ ko a dios kamo.’d 35 Siin nin wanan Dios a naisurat sa Masanton Kasuratan ket kai ya gapo nin mapakai. Anaod, no dios a nipanawag nan Dios konran saraytaw saray tawon nagꞌirgwan na, 36 ambaleꞌ a kongko nin nitalaga na para sa sayti tan nibakiꞌ nadti sa mundo ket wamoyo a manꞌuꞌna-uꞌnawan koyay Dios no wangko a siꞌkoy Anak nan Dios? 37 No kai ko kumon nin man-gawꞌen a makapakaꞌngap nin gugawaꞌ a manꞌipagwaꞌ na nin Dios kongko, andiꞌ kamo kumon nin mamper sa ibaritaꞌ ko. 38 Baleꞌ anaod ta man-gawꞌen ko, sain a matkap nin rason a mamper kamo no siꞌno ako, abirno nin kai kamo nin mamper sa ibaritaꞌ ko, ta pigaw nin mapiho moyo nin si Ama, ket iti ya kongko tan siꞌko, ket iti ako anamaet kona.”
39 Ket, konan siin, anamanaet dakpen raya kumon si Jesus, baleꞌ napalꞌisan nasara.
40 Mayadiꞌ in, sinmubliꞌ ya si Jesus itaw sa rubariꞌ nan Ilog Jordan, itaw sa namawtismwan na intaw ni Juan. Ket itaw yayna yapoꞌ. 41 Ket abaw sara a tutawo nin naku-nako kona ta wanra, “Si Juan, kai ya gapo nin nangwaꞌ nin makapakaꞌngap nin gawaꞌ a mamatutuo nin maipaꞌkaꞌ kona, baleꞌ say sarba nin nibari-baritaꞌ na maipaꞌkaꞌ kona nin sitin tawo ket peteg a tutuo.” 42 Ket abaw saradtaw a nagmatalek kona ni Jesus.