3 Inumbat ya si Jesus a wana, “Niyanak yan bulag ti nin lalaki, amboꞌ nin banaꞌ ta nagkasalanan ya o, banaꞌ ta nagkasalanan saray matua na, no kai edet, nangyadiꞌ a wanin ta pigaw nin maipaꞌkit no ani a gawꞌen nin pakayadiꞌ nan Dios kona. 4 Ket, matkap a gawꞌen tamo a nipagwaꞌ na nin si namakiꞌ kongko mintras nin awro et, a siti a udas a nipagwaꞌ nayti. Banaꞌ ta yabi ana liꞌ ket, kasayna liꞌ nin makagwaꞌ nin animan. 5 Baleꞌ iti ako et konan sitin mundo, ket siꞌko a palaway nin mamalaway sa tutawo.”

6 Kayadiꞌ na nin nibaritaꞌ in ni Jesus, linmudaꞌ ya sa lutaꞌ; miꞌsa na kinalap nin ginwaꞌ nan tupaꞌ; ket nipulapod na sa mata na nin bulag 7 a wana, “Mako ka magraꞌmos itaw sa dipusito nin ranom itaw sa Siloe.” (Say katarusan na nin Siloe ket, nibakiꞌ.) Wanin anaod a ginwaꞌ na nin lalaki ket sin nayadiꞌ, makaꞌkit yayna, ket nugot yayna sa bali ra.

8 Ket, sin naꞌkit raya nin kabaraybay na tan saraytaw saray nakaꞌkit kona sin mangkipayabor ya et, wanra, “Amboꞌ yayti taw para si gindat nin nakatekreꞌ a mangkipayabor?”

9 Wanra nin raruma, “Oꞌ, sya in taw.” Wanra baleꞌ nin raruma, “Kai, kabakas naya tamoꞌ.”

Konan siin, wana nin lalaki, “Oꞌ, siꞌko pan diri.”

10 Ket, “Paꞌno nin nangyadiꞌ a makaꞌkit kayna?” wanra.

11 Wana nin niꞌbat, “Sitaw si tawo nin mantawagen nin Jesus, nangwaꞌ ya nin tupaꞌ, miꞌsa na nin nipulapod sa mata ko, tan wana kongko, ‘Mako ka sa Siloe tan magraꞌmos kadtaw.’ Nako ako anaod tan nagraꞌmos ako, ket sin nayadiꞌ, makaꞌkit akoyna.”

12 Konan siin, nitepet ra, “Adti yayna, ey?”

Ket inumbat ya, “Taꞌwan.”

13 Ket, niꞌras rayayti si tawo a gindat nin bulag konran Pariseo. 14 Wanin, ta Awron Painawa sin nangwaꞌ ya nin tupaꞌ si Jesus tan sin ginwaꞌ na nin makaꞌkit yaynay bulag. 15 Ket, tinepetan raya anamaet nin Pariseo no paꞌno nin nangyadiꞌ a makaꞌkit yayna. Wana konra, “Pinulapudan nan tupaꞌ a mata ko; miꞌsa ako nako nin nagraꞌmos; ket sawanin, makaꞌkit akoyna.”

16 Sin sain, wanra nin raruma nin Pariseo, “Kai magwaꞌ a nibakiꞌ naya nin Dios in nin tawo ta kai naya nin kabilangan a Awron Painawa.”

Saray raruma anamaet baleꞌ wanra, “Baleꞌ kai ya kumon nin makagwaꞌ nin wanti nin makapakaꞌngap nin pakaꞌkitan no saya ya wadiꞌ nin makasalanan.” Anaod, kai nin nitutuno a kukaisipan ra.

17 Ket tinepetan raya anamanaet a tawo a wanra, “Ket sawanin, siꞌka, ani a maibaritaꞌ mo maipaꞌkaꞌ kona, banaꞌ ta wamo ket ginwaꞌ nan makaꞌkit kayna?”

Niꞌbat na, “Saya ya nin prupita.”

18 Saray pupangulo ran Judio, kai sara nin mamper a siti nin makaꞌkit ana sawanin ket syaytaw si gindat nin bulag nin niyanak anggan kai rasara nin matepetan a matua na. Kanyaꞌ nin nipakayaban rasara 19 tan tinepetan rasara a wanra, “Anak moyayti? Peteg para nin bulag ya nin niyanak? No wanin, mayin edet a makaꞌkit yayna sawanin?”

20 Ket wanra nin niꞌbat nin matua na, “Oꞌ peteg a anak miya in tan peteg a bulag ya nin niyanak. 21 Baleꞌ, si makaꞌkit yayna sawanin, kai mi nin tandaꞌ no paꞌno nin nangyadiꞌ, o no siꞌno a nangwaꞌ nin makaꞌkit yayna. Sya a tepetan moyo ta iti yayna sa kuston idad ket makaꞌbat yayna.” 22 Nibaritaꞌ ra a wanin nin saray matua na banaꞌ ta maliꞌmo sara konran pupangulo ran Judio, banaꞌ ta nipapagketan ra a, si siꞌnuman a mangibaritaꞌ a si Jesus syay Cristo, ket galten ya sa dupong ran Judio. 23 Siin anaod a rason no ambaleꞌ a wanran matua na ket iti yayna sa kuston idad, sya a tepetan ra.

24 Anaod, saray pupangulo ran Judio, nipakayaban rayaytaw si gindat nin bulag a wanra kona, “Ipangakoꞌ mo sa adapan nan Dios, ibaritaꞌ mo a tutuo. Tandaꞌ mi a, sitaw si tawo nin namaandaꞌ komo ket, makasalanan ya.”

25 Wana nin tawo, “Kai ko nin tandaꞌ no sitaw nin tawo ket, makasalanan ya o kai. Si tandaꞌ ko tamoꞌ ket bulag akon gindat, baleꞌ makaꞌkit akoyna sawanin.”

26 Nitepet ra kona, “Oꞌ, baleꞌ, paꞌno na nin ginwaꞌ a makaꞌkit kayna? Ani a ginwaꞌ na?”

27 Ket niꞌbat na, “Nibaritaꞌ koyna anaod komoyo, baleꞌ kai moyo nin asikaswen. Ambaleꞌ a rabay moyo anamana nin marngeꞌ? Rabay moyo anamaet para a magꞌin nin tumutumbok na?”

28 Konan siin, nagsari-saritaan raya a wanra, “Ha! Siꞌka a tumutumbok na nin sitaw a tawo! Baleꞌ siꞌkami, tumutumbok nakami ni Moises, 29 banaꞌ ta tandaꞌ mi a si Dios, nagꞌirgo ya kona ni Moises. Baleꞌ siin nin tawo, kai mi gapo nin tandaꞌ no adti a ibwatan na.”

30 Sin sain, wana nin niꞌbat nin tawo, “Ya, ansiin liꞌ! Kai moyo nin tandaꞌ a ibwatan na, ket sya a nanglat nin pagꞌin kon bulag. 31 Tandaꞌ tamo nin peteg a kai na nin rengꞌen nin Dios a dawat nan sayay makasalanan, no kai edet, si rengꞌen na, ket si sayay mangigalang kona tan mangwaꞌ nin karabayan na. 32 Nangibwat ana sin taranaꞌ na nin mundo, kasa et gapo nin tawo nin natandaan nin nangwaꞌ a makaꞌkit yaynay sayay bulag nin niyanak. 33 Bilang wadiꞌ a amboꞌ ya nin ibat konan Dios, kai ya edet kumon gapo makagwaꞌ nin bilang sa wanti.”

34 Konan siin wanra nin inumbat, “Makasalanan kayna nangibwat et sin kai ka et nin niyanak, ket sukat a siꞌka a mangyakay komi?” Ket sin sain, ginlat raya sa dupong ra.

35 Sin natandaan na ni Jesus a ginwaꞌ ra konan tawo, tiningkap naya tan wana kona, “Magmatalek ka para kona nin si Pinaitawo?”

36 Inumbat yay tawo a wana, “Ser, siꞌno ya ket? Ibaritaꞌ moyo pa kongko ta pigaw nin magmatalek ako kona.”

37 Ket wana ni Jesus, “Sawanin a mismo, mangkaꞌkit ma banaꞌ ta syayti si mangkiirgo komo.”

38 Sin sain, wanan tawo, “Ser, magmatalek ako.” Ket nanalimukod yan nangrayo kona ni Jesus.

39 Sin sain, wana ni Jesus, “Nako akodti konan sitin mundo ta pigaw nin pipuruken kosaray tutawo. No main saray baraꞌmon bulag maipaꞌkaꞌ konan Dios, palawayan kosara. Sara baleꞌ a wanra ket tandaꞌ raya a Dios, magꞌin sara anamaet nin baraꞌmon sayay peteg nin bulag.”

40 Main saray Pariseo nin itaw sa dani nin kamiꞌnan na ni Jesus a nakarngeꞌ sa inirgo na, ket tinepet ra kona, “Rabay mo para nin irgwen ket bulag kami anamaet maipaꞌkaꞌ konan Dios?”

41 Ket niꞌbat na ni Jesus, “Wamoyo kai, ket no bulag kamo kumon, kasa nin kasalanan moyo, baleꞌ banaꞌ ta wamoyo a makaꞌkit kamo, mampisyon a kasalanan moyo.”