8
Si Jesus baleꞌ, nako ya sa Talugtog nin Olibo. 2 Masakbay et sin kabuklasan, nako ya anamanaet itaw sa sakop nan Timplo ket inaribungbungan rayan tutawo. Konan siin, tinmekreꞌ ya ket niyakay nasara. 3 Sin sain, rinmateꞌ saray Madudunong sa Gugan-gan tan saray Pariseo a main nin awit ran sayay babayi nin nadakep nin mangkilalaki.a Pinaꞌdeng rayayti sa adapan ra. 4 Miꞌsa wanra kona ni Jesus, “Maistro, sitin babayi, nadakep ya nin mangkilalaki. 5 Manꞌibaritaꞌ sa Gugan-gan nin nibi na ni Moises a say wanti nin babayi ket matkap yan kudasen nin bato anggan mati ya. Siꞌka pa, ani a disisyon mo?” 6 Wanin a wanra ta pigaw nin kalꞌuten raya si Jesus, ta mangibwat wadiꞌ sa ubat na ket, main nin maiparsa ra kuntra kona. Baleꞌ, dinmukot ya si Jesus tan nanurat ya sa lutaꞌ a inusar nay garamay na.7 Kai raya nin tegnan nin tepetan si Jesus, kanyaꞌ nin inumdeng ya tan wana konra, “Si siꞌnuman komoyo a kasa nin kasalanan na, sya a muꞌna nin mangudas kona.” 8 Miꞌsa dinmukot ya anamana tan nanurat ya sa lutaꞌ. 9 Ket, sin narngeꞌ raya in a wana ni Jesus, saya-saya sara nin nibwat a tinmaranaꞌ konran sangkasikenan. Ket kasa nin nabatiꞌ itaw no kai si Jesus tana tan si babayi nin itaw et nin nakaꞌdeng. 10 Ket inumdeng yayna si Jesus, tan wana konan babayi, “Arikong, adti saraynaytaw? Ya, kasa nin nabatiꞌ ni sayan manusa komo?”
11 “Kasa, Ser,” wana nin babayi.
“Kai kata anamaet nin dusawen,” wana ni Jesus. “Sigi, mako kayna, baleꞌ tegnan moynay pagkakasalanan mo.”
Mikumprunta a Pammatutuo na ni Jesus tan ni Ama na
12 Miꞌsa anamanaet, nagꞌirgo ya si Jesus konran tutawo a wana, “Siꞌko a palaway nin mamalaway konran tutawodti sa mundo. Siꞌnuman a magꞌin nin tumutumbok ko, kai ya nin lumalako sa kadedleman ta main ya kona a palaway a mami nin byay.”
13 Sin sain, wanra nin Pariseo kona, “Siꞌkan bukod a mampagtistigos maipaꞌkaꞌ sa lalaman mon diri.b Ket sain say manꞌibari-baritaꞌ mo kai magwaꞌ nin tepren.”
14 Ket wana nin inumbat ni Jesus, “Abirno nin mampagꞌirgo ako nin pammatutuo maipaꞌkaꞌ kongko nin diri, say manꞌibaritaꞌ ko baleꞌ ket tutuo, banaꞌ ta tandaꞌ ko no adti ako nin ibat tan no adti a keen ko. Baleꞌ siꞌkamo, kai moyoyti nin tandaꞌ nin maipaꞌkaꞌ kongko. 15 Siꞌkamo, manintinsya kamo nin nipatukdoꞌ moyo sa panunukat nin tawo tamoꞌ! Siꞌko baleꞌ, kai ako nin manintinsya nin siꞌnuman. 16 Baleꞌ no bilang wadiꞌ a manintinsya ako, say paninintinsya ko ket kusto ta amboꞌ kon bukod a manintinsya, no kai edet, main nin kalamoꞌ ko, si Ama ko a syay namakiꞌ kongko. 17 Sa Gugan-gan moyo wana et a say pammatutuo ran rwa ray tistigos ket matkap a akuen. 18 Ket anaod, siꞌko, patutuꞌwan koy maipaꞌkaꞌ kongko nin diri tan patutuꞌwan na anamaet nin Ama ko nin namakiꞌ kongko.”
19 Ket konan siin nitepet ra kona, “Adti ya ket a Ama mo?”
Inumbat ya si Jesus a wana, “Kai rako et nin katandaꞌ nin peteg tan kai moya anamaet nin katandaꞌ a Ama ko. No katandaꞌ rako kumon, wanin moyo anamaet konan Ama ko.”
20 Nibaritaꞌ nayti ni Jesus sin itaw ya nin mampangyakay sa sakop nan Timplo, itaw sa bandan pangangwan nin daꞌton. Baleꞌ kasan nanakep kona ta kai et nin narateꞌ a udas a mati ya nin pakatukid nin plano nan Dios.
Si Jesus Nangibwat yadtaw konan Dios
21 Wana anamanaet ni Jesus konra, “Siꞌko, lumakwan akoyna liꞌ ket, tikapen rakoc. Baleꞌ, mati kamo nin awit moyoy kasalanan moyo, ta sa keen ko, kai kamo nin makapikaꞌ.”
22 Konan siin wanra nin panuyaꞌ-tuyaꞌ kona nin saray Judio, “Wana, kai atamo kano nin makapikaꞌ sa keen na. Mipati ya palayi?d”
23 Inumbat ya si Jesus a wana, “Siꞌkamo, taga kamodti sa lutaꞌ, ket iti a kukaisipan moyo. Baleꞌ siꞌko, amboꞌ akon tagadti, no kai edet, itaw sa taꞌgay ket naiduma a kaisipan ko. 24 Kanyaꞌ nin nibaritaꞌ ko komoyo a mati kamo nin awit moyoy kasalanan moyo. Mati kamoynaod nin awit moyoy kasalanan moyo no kai moyo nin akuen a ‘Siꞌko yay si Main Anggaynan-angga.’e ”
25 “Siꞌno ka ket?” nitepet ra kona.
Niꞌbat na ni Jesus, “Siꞌko yaytaw si manꞌibaritaꞌ koyna komoyo nangibwat et sin saytaw sin taranaꞌ.f 26 No maipaꞌkaꞌ komoyo, abaw a magwaꞌ kon ibaritaꞌ nin kuntra tan ipakasalanan komoyo. Wanin man, say manꞌibari-baritaꞌ ko tamoꞌ konran tutawodti sa mundo ket saytaw say narngeꞌ ko kona nin si namakiꞌ kongko. Wanin ta tutuo anaod a manꞌibaritaꞌ na.”
27 Kai ra nin nataros a mampagꞌirgo ya nin maipaꞌkaꞌ konan Ama, 28 kanyaꞌ nin wana ni Jesus, “No saytaw liꞌ, no siꞌkon si Pinaitawo ket nikwa moyokoyna itaw sa taꞌgay nin kudos, matandaan moyoyna liꞌ a ‘Siꞌko yay si Main Anggaynan-angga’. Matandaan moyo anamaet a lamang a kasa nin man-gawꞌen ko sa kabukudan ko tamoꞌ; say manꞌibaritaꞌ ko tamoꞌ ket say manꞌiyakay na kongko nin Ama ko. 29 Kalamoꞌ koya anamaet a syay namakiꞌ kongko ta kai nako gapo nin linakwanan banaꞌ ta lawas nin man-gawꞌen ko no ani a makapaririket kona.”
30 Ket abaw sara konran saray nakarngeꞌ sa sain nin nibaritaꞌ na a namper kona.
Tinugaꞌ na ni Jesus a Pammemper ran Tutawo
31 Edet, wana ni Jesus konran Judio nin namper kona, “No ituluy-tuloy moyoy sumunor sa manꞌibaritaꞌ ko, peteg a tumutumbok katamo, 32 ket matandaan moyo no ani a katutuꞌwan. Ket say katutuꞌwan, galten kamo sa pakaaripen.”
33 Konan siin wanra, “Puri nakami ni Abraham, ket kai kami et gapo nagꞌin nin aripen nin siꞌnuman. Ambaleꞌ a wamo nin galten kami sa pakaaripen?”
34 Wana nin inumbat ni Jesus, “Isipen moyoyti nin maong: Si siꞌnuman a mampagkasalanan ket aripen ya nin kasalanan. 35 Wanin man, si sayay aripen, magwaꞌ nin masilyan a kapapaꞌsar na sa sayay pammali. Si sayay anak baleꞌ, magnayon ya nin anak nan ama na. 36 Edet, no siꞌko nin si Anak nan Dios ket galten katamo sa pakaaripen, peteg a amboꞌ kamoyna nin aripen.
37 Alilbien koyna a puri nakamo ni Abraham. Wanin man, amboꞌ kamon bilang kona ta main iti komoyo a rabay rako nin patyen banaꞌ ta kai moyo nin manꞌakuen a manꞌibaritaꞌ ko. 38 Say manꞌibaritaꞌ ko ket say naꞌkit ko konan Ama ko. Ket kipada sa wanin anamaet a man-gawꞌen moyo, ta siꞌkamo, mansunuren moyoy wanan si ama moyo.”
39 Konan siin inumbat sara a Judio a wanra, “Peteg a si Abraham a ama mi!”
Baleꞌ wana ni Jesus, “No peteg anaod a aꞌnak nakamo ni Abraham, arigen moyo kumon a ginwaꞌ na. 40 Baleꞌ siꞌkamo, manꞌipamuspusan moyo a patyen rako mataman no mampamaritaꞌ ako komoyo nin katutuꞌwan a narngeꞌ ko konan Dios. Kasa gapo nin wanin a ginwaꞌ na ni Abraham. 41 Say manꞌarigen moyo ket say gawaꞌ nan ama moyo.”
“Si Dios a peteg nin Ama mi ta sya tamoꞌ a mansunuren mi! Amboꞌ kamin aꞌnak sa rikor!” wanra.
42 Wana ni Jesus konra, “No peteg nin si Dios a Ama moyo, kawaꞌnan moyoko kumon banaꞌ ta, siꞌko, kapada koya tan itaw ako nin nangibwat kona. Amboꞌ nin nangibwat kongko a mako akodti no kai edet, kona nin syay nangibakiꞌ kongko. 43 Ambaleꞌ a kai moyo nin tarusan a manꞌibaritaꞌ ko? Banaꞌ anaod ta kai moyo rabay nin akuen a manꞌibaritaꞌ ko. 44 Kapada nakamo nin si ama moyo a si Dimunyo, tan say gagara moyo ket say sunuren moyoy karabayan nan siin a ama moyo. Mangmamati yayna nangibwat et sin tinmaranaꞌ yan mabyay. Kasa gapo nin kabiangan na sa katutuꞌwan ta kasan katutuꞌwan iti kona. No mibulaꞌ-bulaꞌ ya, bagay kona banaꞌ ta talagan mabulaꞌ ya tan sya a puon nin kabulaan. 45 Baleꞌ siꞌko, say manꞌibaritaꞌ ko komoyo ket say katutuꞌwan, kanyaꞌ nin kai rako nin tepren. 46 Main para nin iti komoyo nin makapamatutuo a main nin ginwaꞌ ko nin kasalanan? Kasa! Wanin anaod ta katutuꞌwan a manꞌibaritaꞌ ko. Ambaleꞌ a kai rako nin tepren? 47 Saray ikon nan Dios, rengꞌen tan tukiden ra a wana konra. Baleꞌ siꞌkamo, kai kamo nin rumngeꞌ banaꞌ anaod ta amboꞌ nakamo nin ikon.”
48 Konan siin, wanra nin Judio, “Kuntrabidag ka! Nasrepan kan ispiriton dukaꞌ!”
49 “Kai ako nin nasrepan nin ispiriton dukaꞌ no kai edet, mampagalangan koyay Ama ko,” wanan inumbat ni Jesus. “Wamoyo a syay ama moyo anamaet, mayin edet a kai rako nin mampagalangan? 50 Wanin man, kai ako nin mampaningkap nin pammagalang kongko ta main nin makauray nin maningkap nin pammagalang kongko tan sya a manintinsya no ani a kusto. 51 Isipen moyoyti nin maong: Si siꞌnuman a nipatukdoꞌ nay pagkakabyay na sa manꞌibaritaꞌ ko, kai na gapo nin dalanan a patiti.”
52 Konan siin wanra nin Judio, “Kasa pa gapo nin dwadwa a nasrepan ka nin ispiriton dukaꞌ. Oꞌ a ta manꞌibaritaꞌ mo a kai ya gapo nin mati a siꞌnuman nin nipatukdoꞌ nay pagkakabyay na sa manꞌibaritaꞌ mo! Baleꞌ, nati ya si Abraham tan wanin ra anamaet nin prupita a saray nangiparateꞌ anaod nin minsahi nan Dios. 53 Mas ataꞌgay ka et para dyan si puon min si Abraham tan saray prupita? Anaod, pari-pariho saran nati. Ani ket a pangngipaꞌkaꞌ mo sa lalaman mon diri?”
54 Ket wanan inumbat ni Jesus, “No pagalangan koy lalaman kon diri, kasan kakanaan, baleꞌ isen yay Ama ko a syay mamagalang kongko. Wamoyo a sya a Dios moyo 55 mataman no kai moya nin katandaꞌ. Baleꞌ siꞌko, katandaꞌ koya. No ibaritaꞌ ko a kai koya nin katandaꞌ, magꞌin kapada moyoko nin mabulaꞌ. Baleꞌ katandaꞌ koya anaod tan manꞌipatukdoꞌ koy byay ko sa wana. 56 Wanin ana a ririket na nin puon moyon si Abraham banaꞌ ta inilalwan na a maꞌkit nay irarateꞌ kodti. Ket pageꞌ a naꞌkit nayti ket maririket ya.”
57 Konan siin, wanra nin Judio kona, “No kasa et nin limampuloꞌ a taon mo, sukat a wamo ket naꞌkit mayna si Abraham!”
58 Ket wana ni Jesus, “Isipen moyoyti nin maong: Kai ya et nin niyanak si Abraham, main akoyna nin gindath.”
59 Konan siin, nagsipurot sara nin bato ta pigaw nin kudasen rayan patyen, baleꞌ niyadii ya si Jesus, miꞌsa nibwat yaynadtaw sa sakop nan Timplo.