2 Anaod, dandani ana sin sain a pista ra nin Judio a mantawagen nin Pista nin Abung-abong^a. 3 Ket saray bubsat na ni Jesus wanra kona, “Umalis kadti tan mako ka sa Judea ta pigaw nin maꞌkit ran tumutumbok modtaw a makapakaꞌngap nin man-gawꞌe-gawꞌen mo, 4 ta si tawon mampangapes a magꞌin yan bantog, kai na nin iyadi a man-gawꞌe-gawꞌen na. Anaod ta mampangwaꞌ ka nin makapakaꞌngap a bubagay, ipadar moyna ah, ta pigaw nin matandaan sa intiro nin mundo!” 5 Wanra in nin bubsat na ni Jesus ta mataman nin sara ket kai nin mamper kona.

6 Wana ni Jesus konra, “Kai et nin narateꞌ a kuston panaon ko para sa wanin. Mako kamoyna ta magwaꞌ moyoy mako abirno nin ani a udas. 7 Kasa nin prublima komoyo banaꞌ ta saray iti konan sitin mundo, ket kasan puon ran guraen rakamo, baleꞌ siꞌko, guraꞌ rako banaꞌ ta mampatutuꞌwan ko a say man-gawꞌe-gawꞌen ra ket dukaꞌ. 8 Sigi, mako kamo nin kipista baleꞌ siꞌko, kai ako nin mako banaꞌ ta kai et nin narateꞌ a kuston panaon para kongko.” 9 Sin naibaritaꞌ nayna in ni Jesus, pinaibatiꞌ yadtaw sa Galilea.

10 Nibwat sarayna anaod a bubsat na ni Jesus. Ket, nako ya anamaet sa pista nin kasan nakatandaꞌ. 11 Sin sain, tikap saraynan tikap kona a pupangulo ran Judio sa pista, nin tepet saraynan tepet no adti ya. 12 Saray abaw a tutawo anamaet mianas-anasan saran mampagꞌiirgo maipaꞌkaꞌ kona. Wanra nin raruma, “Maong yan tawo.” Baleꞌ saray raruma anamaet wanra, “Kai pa ta manꞌibarang nasaray tutawo.” 13 Wanin man, kasa gapo nin nagꞌirgo maipaꞌkaꞌ kona nin main nin nakarngeꞌ banaꞌ ta maliꞌmo sara konran pupangulo ra.

14 Sin iti ana sa kapikngaan a pista, nako yadtaw sa sakop nan Timplo si Jesus nin nangyakay ya. 15 Ket nakaꞌngapan raya nin saray pupangulo ran Judio a wanra, “Adti ket nin ibat in nin pakatandaꞌ nan siin nin tawo? Amboꞌ ya anamaet nin di-adal nin bilang komi!”

16 Konan siin, imbatan nasara ni Jesus a wana konra, “Sayti say manꞌiyakay ko, kai nin nangibwat kongko no kai edet, konan Dios a syay namakiꞌ kongko. 17 Si siꞌnuman a magdisidido nin gawꞌen na a no ani a rabay nan Dios, sya a makaꞌkit no say manꞌiyakay ko ket nangibwat konan Dios, o kaisipan ko tamoꞌ nin diri. 18 Wanin ta si saya nin mampagꞌirgo nin nangibwat sa kaisipan na tamoꞌ nin diri ket, manꞌapesen na nin magꞌin ataꞌgay a pangingikit kona. Baleꞌ, si sayay tawon tikapen na a mapagalangan yay namakiꞌ kona, say manꞌibaritaꞌ na ket pulos nin katutuꞌwan ta kasa gapo nin pibulaꞌ-bulaꞌ kona. 19 Kai moyo para nin tandaꞌ a Gugan-gan nin nibi na ni Moises? Sain a rabay nan Dios ket kasa gapo komoyo a mampanukid. Kikiten moyo, manꞌiplano rakon patyen!”

20 Inumbat sara a tutawo a wanra, “Nasrepan ka nin ispiriton dukaꞌ! Siꞌno wadiꞌ a marabay nin mangmati komo?”

21 Konan siin wana ni Jesus, “Nagtrabaho ako a namaandaꞌ akon niꞌsa sa sayay Awro nin Painawa, ket nabigraꞌ kamoyna ngaꞌmin. 22 Baleꞌ, magtrabaho kamo a turien moyo sara anamaet lamang a aꞌnak moyon lulalaki sa Awron Painawa. Wanin ta main ya in nin nigan-gan na komoyo ni Moises a naimatawan nayna anaod konra et nin saray pupuon na. 23 No gawꞌen moyo in abirno nin Awron Painawa sa tana a matukid a nigan-gan na ni Moises maipaꞌkaꞌ tamoꞌ sa sayay parti nan lalaman, ambaleꞌ ey a masager kamo kongko ta namaandaꞌ ako sa Awron Painawa ta pigaw nin si intiro nin lalaman na ket napaandaꞌ ya? 24 Andiꞌ kamo nin manintinsya nin naipatukdoꞌ sa pangingikit moyo tamoꞌ no kai edet, adalen moyo yapoꞌ nin kusto a bubagay ta pigaw nin sa katunungan a paninintinsya moyo.”

25 Sin sain, main saray taga Jerusalem a wanra, “Amboꞌ para a syayti si tawon rabay ra nin patyen? 26 Ket e! Iti ya nin mampagꞌirgo nin kasan dangkaꞌ sa adapan ran abaw a tutawo. Saray pupangulo anamaet, kai sara gapo nin mangkumuntra kona. Peteg palayi nin alilbien ra a syayna a Cristo? 27 Baleꞌ, kai nin magwaꞌ, ta no rumateꞌ yay Cristo, kasa kano nin makatandaꞌ nin pangibwatan na. Baleꞌ sitin tawo, tandaꞌ tamo nin peteg a ibwatan na.”

28 Sin sain, nipaksaw na ni Jesus a busis na nin mampangyakay itaw sa sakop nan Timplo a wana, “Wamoyo a tandaꞌ rako tan tandaꞌ moyo a ibwatan ko. Wanin man, say katutuꞌwan anamaet lamang, kai nin nangibwat kongko a kappikaꞌ kodti, no kai edet, main nin namakiꞌ kongko a sya tamoꞌ a tutuo. Siꞌkamo, kai moya nin tandaꞌ! 29 Siꞌko baleꞌ, tandaꞌ koya banaꞌ ta nangibwat ako kona, tan sya anaod a namakiꞌ kongko.”

30 Konan siin a nibaritaꞌ na ni Jesus, niplano ra nin dakpen ya, baleꞌ kasa nin nanakep kona banaꞌ ta kai et nin narateꞌ a udas a mati ya nin pakatukid nin plano nan Dios. 31 Baleꞌ konra nin saray abaw a tutawo, abaw sara a nagmatalek kona ni Jesus, ta wanra, “Amboꞌ yayti et para a rumateꞌ nin Cristo? Kasayna angangko nin makagwaꞌ et nin mas abaw a mumilagro nin pakaꞌkitan dyan say man-gawꞌen nan siti.”

32 Sin narngeꞌ ra nin Pariseoyti nin manꞌibari-baritaꞌ ra nin tutawo, sara tan saray Pupangulon Pupadiꞌ, namakiꞌ sara nin gwardya sa Timplo nin keen raya nin dakpen si Jesus. 33 Ket sin sain, wana ni Jesus, “Makalamoꞌ rako tana sa anted a panaon, miꞌsa sumubliꞌ akoyna konan namakiꞌ kongko. 34 Marateꞌ liꞌ a tikapen rako baleꞌ kai rako nin madumog banaꞌ ta itaw sa kamiꞌnan ko ket kai kamo nin makapikaꞌ.”

35 Konan siin, wanra nin pupangulo ran Judio sa saya tan saya, “Adti ya kadiꞌ nin makoytin tawo nin kai tamoya kano nin maꞌkit? Mako ya palayi sa adayoꞌ nin lulugar nin kamiꞌnan ran kapada tamon Judio ta pigaw nin mangyakay ya konran amboꞌ nin Judio? 36 Ani kadiꞌ a pipaꞌkaan nin saytaw say wanan tikapen tamoya liꞌ baleꞌ kai tamoya nin madumog, tan sa kamiꞌnan na ket kai atamo nin makapikaꞌ?”

37 Sin sangkasuyutan anan awro nin Pistan Abung-abong a syay sangkaimpurtantiwan nin awro, inumdeng ya si Jesus tan nipaksaw na a busis na a wana, “Si siꞌnuman nin milataꞌ, umarak ya kongko ta pigaw nin minom ya. 38 Wanin a mabasa sa Masanton Kasuratan a wana,

40 Main konran saray nakarngeꞌ sa saytin wana ni Jesus a namaritaꞌ, “Peteg a siti ana a mantagaꞌnan nin Prupita!”

41 Saray raruma anamaet wanra, “Syayti ana a Cristo.”

Baleꞌ saray raruma et wanra, “Impusibli in! Kai ya nin mangibwat sa Galilea a Cristo! 42 Oꞌ, ta main nin mabasa sa Masanton Kasuratan a wana si sya a Cristo ket, mangibwat ya sa puri na ni David tan itaw ya nin maiyanak sa Betlehem a babali na ni David.^b” 43 Kanyaꞌ anaod nin, niduduma a pangngipaꞌkaꞌ ra nin tutawo kona ni Jesus. 44 Main sara anamaet a marabay nin dakpen raya, baleꞌ, kasa nin nanakep kona.

45 Sin wanin, saraytaw saray gwardya sa Timplo ket sinmubliꞌ sarayna sa kamiꞌnan ra nin Pupangulon Pupadiꞌ tan Pariseo. Ket inusisaꞌ rasara, “Mayin a kai moya nin niꞌras iti?” wanra.

46 Ket niꞌbat ra nin gwardya, “Kasa gapo nin makakipada konan sitaw nin tawo sa pakayadiꞌ nin pagꞌiirgo na!”

47 Tinuyaꞌ-tuyaꞌ rasaran Pariseo a wanra, “Pati siꞌkamo para ket naulaw na anamaet? 48 Main ana para nin tandaꞌ moyon pupangulo o konran Pariseo nin mampagmatalek kona? Kasa gapo! 49 Kiayi kamo konran sarain nin amboꞌ nin di-adal; kasan tandaꞌ ran sarain maipaꞌkaꞌ sa Gugan-gan tamon Judio. Mirisi moyo!”

50 Si saya konran Pariseo nin itaw sin sain ket si Nicodemo a sya nako ya intaw kona ni Jesus. Wana konran kalalamoꞌ na, 51 “Ibaritaꞌ sa Gugan-gan tamo a kai tamoya magwaꞌ nin sintinsyawan a sayay tawo nin kai tamoya yapoꞌ nin usisaen. Matkap a magkamain ya yapoꞌ nin pagkanawanawa nin umbat ta pigaw nin maꞌkit tamo no ani a kasalanan na. Amboꞌ para nin wanin?”

52 Konan siin niꞌbat ra kona, “Baraꞌmo ka anamaet nin saray taga Galilea! Keen mo nin adalen a Masanton Kasuratan ta pigaw nin matandaan mo a kasa nin prupita a mangibwat sa Galilea.”

53 ^cKayadiꞌ nin sain, nagsiugot anay barang saya sa bali ra.