5 Ket kinmikit ya si Jesus tan naꞌkit nan pinasyan kaꞌbawan ran tutawo nin manrumateꞌ. Ket wana kona ni Felipe, “Adti atamo kadiꞌ mangalap nin kanen ran sarayti?” 6 Tandaꞌ na ni Jesus no ani a gawꞌen na baleꞌ nitepet nayti ta pigaw nin subuken na no ani a iꞌbat na ni Felipe.

7 Wana ni Felipe, “Abir nin main wadiꞌ nin ribu-ribo^a nin isaliw tamon tinapay ket kai nin makayadiꞌ konra ngaꞌmin mataman no makapangan tamoꞌ nin daiteꞌ a barang saya.”

8 Sin sain, wana nin saya konra nin tumutumbok na ni Jesus, si Andres a aryen na ni Simon Pedro, 9 “Main yayti e si anak a lalaki nin nibalon nin lima ray makapoy a klasi nin tinapay^b tan rwa ray kunaꞌ, baleꞌ umno anayti ey sa kaꞌbawan ran sarain a tutawo.”

10 “Patekreen moyo sara,” wana ni Jesus konra nin tumutumbok na. Rarabot itaw ket itaw sara nin tinmekreꞌ a tutawo. Saray lulalaki ket maglimanribo sarayna. 11 Kaaram, inagwang na ni Jesus a tinapay tan nikisalamat ya konan Dios. Miꞌsa nipaitayak nayti konran tutawo. Wanin a lamang a ginwaꞌ na sa kunaꞌ. Binyan ra a barang saya nin say rabay na nin kaꞌbaw. 12 Ket sin nabsoy anan nangan a sarba, wana ni Jesus konran tumutumbok na, “Dinepen moyo a natraꞌ ta pigaw nin kai nin mapirdi.” 13 Wanin anaod a ginwaꞌ ra ket nakapnoꞌ sara nin labinrway balyag sa natraꞌ konran limay tinapay.

14 Sin naꞌkit ra anaod nin tutawoyti nin ginwaꞌ na ni Jesus nin mamatutuo nin maipaꞌkaꞌ kona nin diri, wanra, “Siti anan diri yaytaw si Prupita nin nipadles a makodti sa lutaꞌ!”

15 Baleꞌ nadlaw na ni Jesus nin keen raya pwirsawen nin kalapen nin tutawo tan pasueten rayan gawꞌen nin adiꞌ ra. Kanyaꞌ nin nibwat ya nin bukod nin nakodtaw sa sayay purod.

16 Sin mandumedlem ana, nako saray tumutumbok na ni Jesus sa rigrig nin baybay. 17 Yabi ana ket kai ya et nin nikisnaꞌ konra si Jesus kanyaꞌ nin rinmuran sarayna sa baluto nin mako sa Capernaum. 18 Sin sain, inmarubuob ket inmalalaki a daluyon. 19 Sin nakasaki saraynan manꞌibugsay rayay baluto ra nin angangko lima o aꞌnem a kilumitroy kadayꞌan, naꞌkit rayan manꞌumarak si Jesus a manlumalako ya sa babo nin ranom. Ket pinasyan liꞌmo ra. 20 Baleꞌ wana ni Jesus konra, “Siꞌkoyti, andiꞌ kamo nin maliꞌmo!” 21 Ket pinasyan ririket ra nin pinaruran raya si Jesus sa baluto; ket kapingmatan iti sarayna sa abay itaw sa lugar a keen ra.

22 Kinabuklasan, saray tutawo nin nabatiꞌ itaw sa rubariꞌ, mapanemtem ra a saya tamoꞌ intaw a baluto sa abay itaw tan tandaꞌ ran kai raya nin kalamoꞌ si Jesus nin tumutumbok na, ta sarayti tamoꞌ a rinmuran konan si baluto. 23 Sin sain, main nin umno ran baluto nin ibat sa Tiberias a dinmuong itaw sa dani nan si lugar a nanganan ran tinapay nin tutawo mayadiꞌ ya nin nikisalamat si Uunuren a Jesus. 24 Ket banaꞌ ta naꞌkit ran abaw nin tutawo a kasa yadtaw si Jesus tan wanin sara anamaet a tumutumbok na, rinmuran sarayti sa baluto tan nako sara sa Capernaum ta pigaw nin tikapen rayadtaw si Jesus.

25 Ket sin nadumog rayadtaw si Jesus sa rubariꞌ nan taaw, wanra nin nitepet, “Maistro, paꞌno kamon nakarateꞌ iti? Tiningkap mika.”

26 Ket si wana nin niꞌbat ni Jesus, “Oꞌ, mantikapen rako anaod. Sawanin, isipen moyoyti nin maong: Say rason a mantikapen rako ket si nangan kamo nin tinapay ket nabsoy kamo, amboꞌ nin banaꞌ ta nataros moyoy pipaꞌkaan nin makapakaꞌngap nin nunangyadiꞌ a nabantayan moyo. 27 Matkap a amboꞌ a ikabyay nin masidaꞌ a tikapen moyo, no kai edet, say ikabyay nin misyon komoyo a sayti ket mami nin anggan-angga nin byay a iti konan Dios. Ket si makapami komoyo nin sain nin ikabyay ket siꞌkon si Pinaitawo a pinatutuꞌwan nan Dios a syay Ama ko nin piniliꞌ nako.”

28 Konan siin, wanran nitepet kona, “Ani ey a gawꞌen mi nin akuen nan Dios ta pigaw nin matingkap mi in?”

29 Ket wanan niꞌbat ni Jesus, “Siti a matkap moyon gawꞌen nin ipagwaꞌ nan Dios komoyo:

30 Ket wanra anamanaet nin nitepet, “Ani a pakaꞌkitan a maipaꞌkit mo komi ta pigaw nin tepren mi a manꞌibaritaꞌ mo? Ani a gawꞌen mo? 31 Anaod, pinakan saran manna^c a pupuon mi sin itaw sara nin manlumalako sa lugar a kasan tawo tan siin lamang a mabasa sa Masanton Kasuratan a wana, ‘Pinakan nasara nin ikabyay nin ibat sa langit.’^d ”

32 Inumbat ya si Jesus a wana, “Isipen moyo nin maong a kasan mabasa a si Moises a nami komoyo nin sain nin ikabyay nin ibat sa langit no kai edet, si Ama ko a mampami komoyo nin peteg nin ikabyay nin ibat sa langit. 33 Wanin ta si peteg nin ikabyay a ibi nan Dios, ket sitaw si kinmayupaꞌ nin ibat sa langit a mami nin byay konran tutawo.”

34 Ket konan siin wanra nin tutawo, “Ser, lawas nin byan rakami pa edet nin siin nin ikabyay.”

35 Wana ni Jesus nin nipapalaway, “Siꞌko a ikabyay a mami nin peteg nin byay. Ket, si siꞌnuman a umarak kongko nin magmatalek ya, mapdaꞌ yan liso a bilang kai yayna gapo nin gumitil o milataꞌ. 36 Baleꞌ, bilang sa nibaritaꞌ koyna komoyo nin gindat, siꞌkamo, abirno nin naꞌkit moyoyna a pakaꞌkitan nin ginwaꞌ ko, kai kamo et a lamang nin magmatalek. 37 Siꞌno sara man a italek na nin Ama ko kongko, umarak sara kongko. Si umarak kongko anamaet, kai koya gapo nin andian. 38 Oꞌ, wanin a karabayan nan Ama ko tan kinmayupaꞌ akon ibat sa langit amboꞌ ta pigaw nin gawꞌen koy no ani a rabay ko, no kai edet, say rabay na nin si namakiꞌ kongko. 39 Ket say rabay na nin Ama ko a syay namakiꞌ kongko ket si kasan maisyay kongko konran nitalek na kongko, no kai edet, pasublien kosara liꞌ nin mabyay kona sa suyot nin awro. 40 Oꞌ, rabay na nin Ama ko a saray makatandaꞌ rako tan magmatalek sara kongko ket magkamain sara nin anggan-angga nin byay a iti kona. Ket, siꞌkon diri a mamasubliꞌ nin mabyay liꞌ konra kona sa siin a suyot nin awro.”

41 Bere-bere saray Judio konan sitaw si wana ni Jesus a sya a ikabyay nin ibat sa langit. 42 Wanra, “Amboꞌ para a si Jesus yayti nin anak na ni Jose? Tandaꞌ tamo saran peteg a matua na. Ambaleꞌ a wana ket kinmayupaꞌ yan ibat sa langit?”

43 Kanyaꞌ nin wana ni Jesus konra, “Andiꞌ kamo nin miiirgo nin mianas-anasan. 44 No kai naya nin inayat a sayay tawo nin Ama ko nin si namakiꞌ kongko, kasa nin siꞌnuman a umarak kongko nin mamper. Ket, saray umarak kongko ket pasublien kosara liꞌ nin mabyay konan Dios sa suyot nin awro. 45 Wanin ta main yayti e si mabasa sa nisurat ran prupita a wana, ‘Saray sarba ra nin tawo na ket iyakay nasaran Dios.’^e Ket siꞌno sara man a mangrengeꞌ sa wana nin Ama ko ta pigaw nin makaadal sara kona ket sara a umarak kongko. 46 Amboꞌ nin rabay kon ibaritaꞌ ket main ana nin nakaꞌkit kona nin Dios a Ama, banaꞌ ta kasa et gapo nin nakaꞌkit kona no kai siꞌko tamoꞌ nin nangibwat kona.

47 Isipen moyoyti nin maong: Si magmatalek kongko, main anan anggan-angga nin byay na a iti konan Dios. 48 Wanin ta siꞌko a ikabyay a mami nin peteg nin byay. 49 Saray pupuon moyo, nangan sara nin manna sin itaw sara nin manlumalako sa lugar a kasan tawo, wanin man nati saran lamang. 50 Baleꞌ si ikabyay nin manꞌibaritaꞌ ko komoyo sawanin, si peteg nin ikabyay nin ibat sa langit. Si mangan nin sitin ikabyay, kai ya gapo nin mati. 51 Ket siꞌkon diri ya in si ikabyay a mami nin peteg nin byay nin ibat sa langit. Si siꞌnuman a mangan nin sitin ikabyay, mabyay ya anggan-angga. Ket siti nin ikabyay, sya a lalaman ko nin ibi ko liꞌ ta pigaw nin saray tutawodti sa mundo ket mabyay sara.”

52 Konan siin nididiskusyon saray Judio a wanra, “Paꞌno na kadiꞌ nin ibi a lalaman nan siin a tawo ta pigaw nin kanen tamo?”

53 Sin sain, wana ni Jesus, “Isipen moyoyti nin maong: No kai moyo nin kanen a lalaman ko nin si Pinaitawo tan kai moyo nin inumen a dayaꞌ kon tumuroꞌ, kasa komoyo a manustini nin byay 54 ta saray mangan nin lalaman ko tan minom nin dayaꞌ ko, sara a main nin anggan-angga nin byay a iti konan Dios, tan sara anamaet a pasublien ko liꞌ nin mabyay konan Dios sa suyot nin awro. 55 Wanin banaꞌ ta si lalaman ko, syay tutuo nin ikabyay tan say dayaꞌ ko, sya a tutuo nin inumen. 56 Ket, si mangan nin lalaman ko tan si minom nin dayaꞌ ko, misyon ya lawas kongko, tan siꞌko kona. 57 Kapada a main nin byay kon nangibwat konan si sibibyay a Dios nin nangibakiꞌ kongkodti, main nin byay na nin mangibwat kongko nin si mangan kongko 58 ta siꞌko a tutuo nin ikabyay nin ibat sa langit. Naiduma yaytin ikabyay sa kinnan ra nin pupuon moyo sin saytaw, ta saray nangan sin saytaw, nati sara nin lamang, baleꞌ si mangan kona nin sitin tutuon ikabyay, mabyay ya anggan-angga.”

59 Nibaritaꞌ nayti ngaꞌmin ni Jesus sin nangyakay ya sa sinaguga itaw sa Capernaum.

60 Edet, sin saraytaw saray mantumumbu-tumbok kona ket narngeꞌ rayti nin nibaritaꞌ na, wanra nin kaꞌbawan konra, “Mabyat in say manꞌibari-baritaꞌ na. Kasa gapo nin mamper sa sain.”

61 Tandaꞌ na ni Jesus a bere-bere saran mampianas-anasan a tumutumbok na maipaꞌkaꞌ sa sayti kanyaꞌ nin wana, “Banaꞌ para sa nibaritaꞌ kon si mangan nin lalaman ko tan si minom nin dayaꞌ ko ket marmay kamoyna kongko? 62 Ani ana liꞌ a pakataros moyo konan siin no maꞌkit moyo nin siꞌkon si Pinaitawo ket muliꞌ akoynan sumubliꞌ sa ibwatan ko? 63 Si Ispirito nan Dios a mampami nin byay. Kasan kausaran nan lalaman sa sayti, no kai edet, say manꞌibari-baritaꞌ ko komoyo a main nin kausaran. Sayti ket ibat konan Ispirito tan mami nin byay. 64 Baleꞌ main sara komoyo a kai ra nin akuen a manꞌibari-baritaꞌ ko,” wana ni Jesus. Nibaritaꞌ nayti banaꞌ ta tandaꞌ nayna nin gindat no siꞌnu-siꞌno saray kai nin mamper kona tan no siꞌno liꞌ a magtraidor kona. 65 Wana et nin nituloy ni Jesus, “Siin a rason no ambaleꞌ a nibaritaꞌ ko komoyo a kasa nin siꞌnuman a umarak kongko no kai na nin pangibwaten nin Ama ko.”

66 Ket nangibwat ana sin sain, abaw sara konran saray mantumumbu-tumbok kona a ginmurot ana kona tan kai rayna nin nituloy a nayi kona. 67 Kanyaꞌ nin konan siin wana ni Jesus konran labinrwan tumutumbok na, “Ket sawanin, lumakwan kamoyna anamaet para?”

68 Ket inumbat ya si Simon Pedro a wana, “Catawan, kasaynan raruma et nin unuren mi. Siꞌkan diri a mampagꞌirgo nin say susaritaꞌ a mami nin anggan-angga nin byay a iti konan Dios. 69 Siꞌkami, mampagmatalek kami komoyo ta kasa gapo nin dwadwa nin maalilbiꞌ mi a siꞌkamo a Masantos nin nibakiꞌ nan Dios.”

70 Wana ni Jesus, “Siꞌko a namiliꞌ komoyo nin labinrwa, amboꞌ para nin wanin? Wanin man, si saya komoyo ket kaayon nayan Dimunyo.” 71 Si manꞌibaritaꞌ na ket si Judas a anak na ni Simon Iscariote, a mataman nin saya ya konra nin labinrwan tumutumbok na, sya et a lamang liꞌ a magtraidor kona ni Jesus.