Patyen naya ni Herodes a Tawon Nangisadyaꞌ sa Irarateꞌ nan Cristo
14
Sin sain, natandaan na ni Herodes Antipasa, a syay ulon gubyirno sa Galilea, a maipaꞌkaꞌ kona ni Jesus. 2 “Sya si Juan a sinmubliꞌ nin mabyay! Ket anaod, main nin pakayadiꞌ nan makagwaꞌ nin mumilagro,” wana ni Herodes konran tutawo na 3 ta intaw ket nipadakep naya si Juan, nipapriso tan nipakadinawan naya. Ginwaꞌ nayti ni Herodes banaꞌ kona ni Herodias a asawa nan busat na nin si Felipe, 4 ta wana intaw nin nibari-baritaꞌ ni Juan kona ni Herodes, “Abas a iꞌyan ma.” 5 Konan siin ket rabay nayaynan ipapati si Juan baleꞌ maliꞌmo ya konran kaꞌbawan ra nin tutawo ta tepren ran saya yan prupita si Juan.6 Baleꞌ sin narateꞌ a awron nikaiyanak na ni Herodes tan sinilibra rayti, dinmukdok yay anak nan balasang ni Herodias sa adapan ran bubisita. Napagustwan ya si Herodes 7 ket wana konan balasang, “Sambawan ko nin ibi ko komo a animan nin dawaten mo.”
8 Binibilin nayan ina na a balasang kanyaꞌ nin wanti a dinawat na kona ni Herodes, “Rabay kon ibi ma kongko sawanin ana nin mismo nin naikwa sa plato a ulo na ni Juan a Mammawtismo.”
9 Nagbabawian nan adiꞌ a nipangakoꞌ na, baleꞌ banaꞌ ta nagpangakoꞌ yan sinambawan na ket narngeꞌ ran bubisita na, nigan-gan nay pakaunor nin dawat nan balasang. 10 Nipaputol naya sa priswan a ulo na ni Juan. 11 Nikwa raya sa plato miꞌsa raya nin nibi konan balasang, ket si balasang nikaꞌ naya konan ina na. 12 Ket kinaꞌ raya kinalap itaw sa priswan nin tumutumbok na ni Juan a bangkay na tan nitabon raya. Miꞌsa, nikaꞌ ra nin niparateꞌ kona ni Jesus a nangyadiꞌ.
Main nin Pakayadiꞌ nan Cristo Sa Ikabyay
13 Sawanin, sin natandaan na ni Jesus a maipaꞌkaꞌ sa sain, nibwat ya tan saray raruman tumutumbok na nin rinmuran sa baluto a mako sa lugar a kasan tawo ta pigaw nin magbukud-bukod sara. Baleꞌ abaw saray tutawon nakatandaꞌ no adti a keen ra kanyaꞌ nin nibwat sara sa bubabali ra nin nangrigrig baybay saran linmalakon tinmumbok kona. 14 Sin nakaabay sarayna si Jesus, naꞌkit nasara a abaw itaw nin tutawo. Makaꞌdwan yan tuloy konra. Ket pinaandaꞌ nasaray main nin masakit.
15 Sin dumedlem ana, kinmadani saray tumutumbok na kona ket wanra, “Mandumedlem ana ket kasa pa et nin bubalidti, kanyaꞌ nin paibwaten mosarayna nin makapako sara sa raruman bubaryo ket makasaliw saran kanen ra.”
16 “Kai sara matkap nin palakwanen,” wana ni Jesus. “Siꞌkamoynay mamin maꞌkan ra.”
17 “Ya! Lima ray tinapay tan rwa ray kunaꞌ tamoꞌ baleꞌ a main iti,” wanra.
18 Ket wana ni Jesus, “Ikaꞌ moyodti kongko.” 19 Pinatekreꞌ nasara a tutawo sa rarabot. Inagwang nay liman tinapay tan saray rwan kunaꞌ miꞌsa ya tinmangar sa langit ket nikisalamat ya konan Dios. Tinau-tao nayti tan nibi na konran tumutumbok na nin itayak ra konran tutawo. 20 Nakapangan sara ngaꞌmin a tutawo tan nabsoy sara. Dininep ran tumutumbok a taraꞌ ket main nin labinrwan balyag. 21 Saray nangan, limanribo saray lulalaki tan kai sarayna nin nikibilang a bubbayi tan aꞌnak. 22 Kaaram, pinaruran nasarayna ni Jesus sa baluto a tumutumbok na tan pinauꞌna nasaraynan mako sa rubariꞌ nan baybay legꞌan nasaran pinaibwat a tutawo.
Main nin Pakayadiꞌ nan Cristo sa Sarban Pwirsa sa Libed-libed
23 Sin nakaibwat saraynay tutawo, nako ya sa sayay ataꞌgay nin purod, a bukud-bukod nadtaw, ta pigaw nin dumasal ya. Mandumedlem ana ket itaw ya et nin bukud-bukod. 24 Sara anamaet baleꞌ a tumutumbok na nin mansumaki sa baluto, itaw sarayna sa butlay. Mangkapaidap saran sumaki ta alalaki a daluyon tan sungsong yay siri.
25 Sin bandan parbangon, tinmumbok ya konra nin manlumalako ya sa babon ranom. 26 Ket sin naꞌkit ran main nin manlumalako sa babon ranom, naliꞌmwan sara. “Main nin lampong!” nitaꞌway ra nin pinasyan liꞌmo.
27 Nagꞌirgo yan tampor si Jesus a wana, “Andiꞌ kamo nin maliꞌmo. Siꞌkoyti. Paksawen moyoy nakem moyo.”
28 Wana ni Pedro, “Catawan, no pageꞌ a siꞌka in, kayaban nakon makodsen komo a lumalako ako sa babon ranom.”
29 “Paradti,” wana ni Jesus.
Inmarawas ya sa baluto si Pedro tan linmalako yan nako kona ni Jesus. 30 Baleꞌ linmiꞌmo ya sin nadlaw nan pinasyan peres ket manlumdeg yayna. “Byayen nako, Catawan!” wanan nitaꞌway.
31 Sinampat naya nin tampor ni Jesus tan wana kona, “Siꞌkan kurang a pagmamatalek, ambaleꞌ a nagdwadwa ka?”
32 Rinmuran sara sa baluto ket linumteng ana. 33 Saray itaw sa baluto nangrayo sara kona ni Jesus. Wanra, “Peteg a siꞌkay Anak nan Dios!”
Main nin Pakayadiꞌ nan Cristo nin Mamaandaꞌ nin Masakit
34 Sin nakaripay sarayna, inmabay sara sa Genesaret. 35 Naalilbiꞌ rayan tutawodtaw si Jesus ket nipata-patandaꞌ ra sa nagsikabarang nin lugar itaw a pagkamain na. Ket inawit-awit rasaran tutawo kona a mampagmasakit. 36 Nikidawat saran ingangaꞌdo kona a aburuyan nasara tanan kuditen ray saroy nin aysing na. Ket sarba ran nakakudit inmandaꞌ sara.