Say Nakaibakian nan Cristo, Kai nin Nipatukdoꞌ sa Kaugalian
15
Niꞌsa, main nin Pariseo tan Madudunong sa Gugan-gan a rinmateꞌ nin ibat sa Jerusalem a nako kona ni Jesus. Nitepet ra kona, 2 “Ambaleꞌ a man-gurutan ran tumutumbok mo a kaugalian a nangibwat et konran pupuon tamo bilang say mangan sarayna nin kai ra nin tumbuken a ugaliꞌ nin manepeg a pammusbos nin ranom sa gamet?”3 Niꞌbat na ni Jesus konra, “Siꞌkamo anamaet, ambaleꞌ a man-gurutan moyoy nigan-gan nan Dios banaꞌ sa panunumbok moyo nin kaugalian moyo 4 ta wanan Dios, ‘Igalang ma si ama mo tan si ina mo,’a tan wana et, ‘Si siꞌnuman a mamadukaꞌ nin ama na o ina na, kasan sapo nin patyen ya.’b 5 Baleꞌ siꞌkamo, say manꞌiyakay moyo ket sakalako. Wamoyo a no main nin magwaꞌ nan ibin tulong nin sayay tawo konran mangatua na, ibadaꞌ nayna konra a igagara na anayti nin idaꞌton konan Dios ket kai na nin maibi nin tulong konra. 6 Ket sigon sa sain a akay moyo, kai nasarayna matkap nin lingapen a mangatua na. Sa wanin a gawaꞌ moyo sa tanay matumbok moyo a uakay moyon bukod, ginwaꞌ moyon kasan kwinta a nibaritaꞌ nan Dios. 7 Mampisantu-santos kamo tamoꞌ. Kustoy nipadles na ni Prupita Isaias maipaꞌkaꞌ komoyo a wana,
8 ‘Saraytin tutawo,’ wanan Dios, ‘raywen rako sa irgo,
baleꞌ say kukanakman ra ket adayoꞌ nin tuloy kongko.
9 Kasan kakanaan nin pangrarayo ra kongko
ta uakay ran diri a manꞌipatukid ra nin baraꞌmo nin gugan-gan ko.’c ”
10 Pinakadani nasara ni Jesus kona a abaw nin tutawon itaw. Wana konra, “Rengꞌen rako tan tarusan moyoy ibaritaꞌ ko. 11 Amboꞌ a say sumrep sa bebey nan sayay tawo a puon nin pagkakasalanan na, no kai say dukaꞌ a lumiwaꞌ sa bebey na.”
12 Kinmadani sara konay tumutumbok na ket wanra kona, “Tandaꞌ mo paran napasager mosaray Pariseo sa saytaw say nibaritaꞌ mo?”
13 Niꞌbat na ni Jesus konra, “Sarban mula nin kai na nin nimula ni Ama ko nin itaw sa langit ket madutdot liꞌ. 14 Pauryan moyo sara. Baraꞌmo saran sayay bulag a mampanabin nin mangyakay dalan konan saya et nin bulag. Amboꞌ nin maꞌteng ket pariho saran maikuraꞌbot.”
15 Kapingmatan wana ni Pedro, “Ipapalaway mo pa komi a pipaꞌkaan nan sitaw si pangingiyarig nin nibaritaꞌ mo konran tutawo.”
16 “Ani, anggan sawanin kapada ran raruma, kai kamo et nin makataros?” wana ni Jesus konra. 17 “Kai moyo para nin maamingaw a sarban ipasrep tamo sa bebey tamo ket mako sa tyan tamo miꞌsa liꞌ a lamang nin lumiwaꞌ? 18 No kai edet a lamang, say dukaꞌ nin lumiwaꞌ sa bebey nan sayay tawo nin mangibwat sa nakem na, sayti a mamagkasalanan konan sayay tawo! 19 Wanti ana: say dukaꞌ nin kukaisipan, say mangmati, say kiraray sa amboꞌ nin asawa, say sarbaynan klasin pangikon ran lalaki nin kapada ran lalaki o ran babayi nin kapada ran babayi, say manakaw, say mibulaꞌ-bulaꞌ, tan say manidaꞌ nin kagalangan nin raruman tawo; mangibwat in sa nakem nan sayay tawo. 20 Sain nin gugawaꞌ a mamagꞌin konan sayay tawo nin kai kumanaꞌ sa pangingikit nan Dios. Amboꞌ taw say kai nin panunumbok sa kaugalian a manepeg nin pammusbos nin gamet.”
Naipatukdoꞌ a Nipamakiꞌ konan Cristo sa Adoꞌ na konran Tumper
21 Linmakwan saraynadtaw si Jesus tan nako sara sa sayay lugar nin adani sa syudad nin Tiro tan Sidon. 22 Main nin mampiikap itaw nin sayay babayin amboꞌ nin Judio ta taga Canaan ya a tinmumbok konra. Wana nin manꞌitaꞌwa-taꞌway, “Kaꞌdwan nako kadiꞌ, Catawan, siꞌkan nipangakoꞌ a puri na ni David. Nasrepan yan ispiriton dukaꞌ a anak kon babayi ket mangkapaidap yan maong.”
23 Baleꞌ kai ya gapo nin tinumnoy si Jesus. Kinmadani sara kona a tumutumbok na tan dinawat ra nin niꞌno kona a wanra, “Nangibwat naon ya in et nin tumbok anan tumbok tan taꞌway anan taꞌway. Paibwaten mayna pa.”
24 Ket wana ni Jesus, “Nibakiꞌ nako baleꞌ nin Dios nin mako tamoꞌ konran Israelita, a sara ket baraꞌmo saran kukarniron nabarang.”
25 Baleꞌ, inmarak yay babayi kona tan nanalimukod ya. Nikidawat yan ingangaꞌdo nin wana, “Catawan, tulungan nako!”
26 Imbatan naya ni Jesus, “Amboꞌ nin manepeg a kalapen a kanen ran aꞌnak tan ipakan konran tuweꞌd.”
27 Niꞌbat na nin babayi, “Ser, tutuo in say wamo baleꞌ, mataman anamaet nin saray aso ket maꞌkan ray pasiꞌ ran amo ra.”
28 “Pinasyan eget nin pagmamatalek mo, Baying!” wana ni Jesus kona. “Mangyadiꞌ in say mandawaten mo.” Ket sin saytaw nin mismo, inmandaꞌ yay anak nan sitaw a babayi.
29 Linmakwan yaynadtaw si Jesus a nangrigrig yan Baybay Galilea. Nuliꞌ ya sa sayay purod ket tinmekreꞌ yadtaw. 30 Abaw saray tutawon inmarak itaw kona. Abaw saray tutawon mampagmasakit nin nagsikabarang a niꞌras ra kona, bilang saray paralitiko, saray pilay, saray bulag, saray umel, tan saray main nin raruma et nin masakit. Nikwa-nikwa rasara sa adapan na ni Jesus ket pinaandaꞌ nasara ngaꞌmin — 31 a makapagꞌirgo saraynay umel, makakimey saraynay paralitiko, makalalako saraynan limpyo a pilay, tan makaꞌkit saraynay bulag. Nakaꞌngap sara ngaꞌmin a tutawon itaw nin nakaꞌkit sa sayti ket rinayo rayay Dios, si Dios a manraywen ran Israelita.
32 Kinayaban nasara ni Jesus a tumutumbok na ket wana konra, “Kudwaꞌdwan kosarayti saray tutawo ta tuloy awro raynan iti ket naꞌpos anay balon ra. Kai kosara rabay nin paibwaten nin kai nin nangan ta bangliꞌ no maulaw-ulaw sara sa dalan sa bitil ra.”
33 Wanra nin tumutumbok na, “Adti atamo mangalap iti sa wantin kasan kabali-balin lugar nin kanen a sumadag konran saraytin pinasyan kaꞌbawan nin tutawo ey?”
34 Nitepet na ni Jesus konra, “Umno ra et a natraꞌ nin tinapay?”
“Pito ra et tan main nin umno ray madidintek nin kunaꞌ,” niꞌbat ra nin tumutumbok.
35 Ket pinatekreꞌ nasara ni Jesus a tutawo sa lutaꞌ. 36 Kinalap nasaray piton tinapay tan say kunaꞌ tan nikisalamat ya konan Dios. Tinau-tao nayti miꞌsa na nibi-nibi konran tumutumbok na nin itayak ra konran tutawo. 37 Nakapangan sara ngaꞌmin a tutawo tan nabsoy sara. Sumunor, sin dininep ran tumutumbok na a taraꞌ ket main nin piton gagaban. 38 Saray nangan, aꞌpat a ribo saray lulalaki tan kai sarayna nin nikibilang a bubbayi tan saray aꞌnak.
39 Kaaram, pinaibwat nasarayna ni Jesus a tutawo, miꞌsa nako yayna nin rinmuran sa baluto nin mako sa lugar a sakop nan Magadan.