2 Baleꞌ niꞌbat na ni Jesus konra, “No muꞌdit yay langit no mansumrep yay awro, ibaritaꞌ moyo, ‘Mabista liꞌ a tyimpo dilap,’ 3 tan no kabubuklas ket muꞌdit a siraꞌ nan awro tan marurem yay langit, wamoyo, ‘Rumapeg ya sawanin.’ Mataros moyoy pipaꞌkaan nin bakas nan langit, ket sukat a kai moyo nin mataros a pipaꞌkaan nin bubagay a mampangyadiꞌ konan sitin panaon!^a 4 Siꞌkamoynan tutawo sawanin a dukaꞌ tan malamang konan Dios! Mayin ta kidawat kamo kongko nin pakaꞌkitan? Kasan pakaꞌkitan a ibat ako sa langit nin ipaꞌkit komoyo no kai kal-la tamoꞌ sitaw si naꞌkit a nangyadiꞌ kona ni Jonas^b sin saytaw.” Sin nayadiꞌ na anayti nin nibaritaꞌ, linakwanan nasarayna.

5 Sinmaki saran makodtaw sa rubariꞌ a tumutumbok na ni Jesus baleꞌ nalingwanan ra a nibalon. 6 Sin nakaabay sarayna, wana ni Jesus konra, “Pakailag kamon maong sa pammakbo ran Pariseo tan Saduseo.”

7 Nagꞌiirgwan rayaytaw nin tumutumbok si wana. Wanra, “Wantaw a nibaritaꞌ na ta nalingwanan tamoy nibalon nin tinapay.”

8 Nataros na ni Jesus no ani a mampagꞌirgwan ra kanyaꞌ nin wana konra, “Ambaleꞌ a siin si nalingwanan moyoy tinapay a mampagꞌiirgwan moyo? Kurang a pagmamatalek moyo! 9 Anggan sawanin kai moyo et nin matarusan? Nalingwanan moyoyna para? Sin tinau-tao koy lima ran tinapay nin nipamakan konran limanribon lulalaki, umnoy balyag a nadinep moyon taraꞌ; 10 tan sin tinau-tao koy pito ran tinapay nin nipamakan konran aꞌpat a ribon lulalaki, umnoy gagaban a nadinep moyon taraꞌ? 11 Ambaleꞌ a kai moyo tana nin mataros a amboꞌ nin maipaꞌkaꞌ sa tinapay a manꞌibaritaꞌ ko komoyo sin wangko nin pakailag kamo sa pammakbo ran Pariseo tan Saduseo?”

12 Nataros rayna sin sain nin tumutumbok a amboꞌ nin say pammakbo nin usaren no mangwaꞌ nin tinapay a wana ni Jesus nin matkap ran ilagen, no kai edet, say akay ran Pariseo tan Saduseo maipaꞌkaꞌ konan Cristo.

13 Nako ya si Jesus tan saray tumutumbok na sa lugar nin adani sa babali nan Cesarea-Filipos. Sin itaw sarayna, tinepet na ni Jesus konran tumutumbok na nin wana, “Ani a ibari-baritaꞌ ran tutawo maipaꞌkaꞌ kongkon si Pinaitawo? Siꞌno ako kano a wanra?”

14 Wanra nin niꞌbat, “Main nin mamaritaꞌ a siꞌka si Juan a Mammawtismo, baleꞌ main anamaet nin mamaritaꞌ a siꞌka si Elias. Saray raruma et ibaritaꞌ ra a siꞌka si Jeremias, o no kai, saya ka konran saray prupita.”

15 “Ket siꞌkamo anamaet, siꞌno ako sa wamoyo?” nitepet na konra.

16 Niꞌbat na ni Simon Pedro, “Siꞌkay Cristo, si Anak nan sibibyay a Dios nin nipangakoꞌ na.”

17 Ket wanan niꞌbat ni Jesus kona, “Makarmaꞌ ka, Simon nin anak na ni Jonas, ta amboꞌ nin tawo a nakatandaan mon sain no kai edet, dirin si Ama kon itaw sa langit a nangipatandaꞌ komo. 18 Ket siꞌko, ibaritaꞌ ko a siꞌka, Pedro^c ka. Konan siin si baraꞌmon sayay baton pundasyon a pangipatukduan ko nin nikapasaya ran lapag nin tutawo ko. Kasa liꞌ gapo nin makadaeg konra, mataman et nin say pakayadiꞌ nin mangibwat sa impyirno. 19 Komo, ibi ko liꞌ a pagkanawanawa nin mangipatandaꞌ nin maipaꞌkaꞌ kongko, a bilang nin naipya komo a tumbok nin Pagꞌadian nin mangibwat sa Langit ta pigaw nin makasrep saray abaw a tutawo. Say aburuyan modti sa lutaꞌ nin magwaꞌ nin gawꞌen, aburuyan nan Dios, tan say kai mo nin aburuyan iti sa lutaꞌ nin magwaꞌ nin gawꞌen, kai na nin aburuyan nin Dios.”

20 Sin nayadiꞌ nayna nin nibaritaꞌ ti ni Jesus, mairot nasaran binibilin a tumutumbok na a andiꞌ ra gapo nin ibari-baritaꞌ a syay Cristo.

21 Nangibwat ana sin sain, nipatandaan nayna ni Jesus konran tumutumbok na a naiketeg anan mangyadiꞌ kona. Wana konra, “Matkap a mako ako sa Jerusalem ket itaw mangirangep ako liꞌ nin abaw nin pammadyaꞌdyaꞌ ran saray Madudunong sa Gugan-gan tamo, tan saray Pupangulon Pupadiꞌ tan saray Mangatuntawo tamo. Ipapati ako liꞌ baleꞌ marateꞌ a ikatlon awro ket pasublien nako liꞌ nin mabyay nin Dios.”

22 Sin sain, nikadayoꞌ nayan bugaꞌ ni Pedro si Jesus konran raruma tan inimaꞌno naya a wana, “Ser, kai in nin magwaꞌ! Si Dios kai na kumon nin aburuyan a mangyadiꞌ in komo!”

23 Nibring ya si Jesus nin inadap naya si Pedro tan wana, “Satanas, lumakwan kadti! Makasamben ka kongko ta say iti sa nakem mo ket amboꞌ nin kumpruntado sa karabayan nan Dios, no kai edet, sa pangingisip nin tutawo.”

24 Ket wana ni Jesus konran tumutumbok na, “Si sayay marabay nin magꞌin nin tumutumbok ko, matkap a galten nayna sa kaisipan na a karabayan nan bukod. Oꞌ a, matkap nayan balatayen a kudos na nin ipulisay nay lalaman nan diri ket tumbuken nakon pirmi. 25 Wanin ta si siꞌnuman a say byay nadti tana a mampagawan na, mati ya liꞌ et a lamang, baleꞌ si tawo nin gurutan nay byay nadti banaꞌ sa pammabli na kongko, madumog na a tutuon byay. 26 Ani wadiꞌ a magun-guna nan sayay tawo no maikon nay intiron kayamanan sa babon lutaꞌ, baleꞌ si byay na a nibayad na sa sain? Kasa gapo! Kasa gapo nin magwaꞌ nan ipambot nin sayay tawo sa byay a naꞌmet na. 27 Anaod, sa amboꞌ nin maꞌteng, siꞌkon si Pinaitawo ket sumubliꞌ ako liꞌ nin main kongko a pakayadiꞌ tan kagalangan nan Ama ko tan kalamoꞌ kosara a uanghil na. No saytaw liꞌ ket tubaleen ko a barang tawo sigon sa ginwa-ginwaꞌ ra.^d 28 Ibaritaꞌ koyti komoyo a main komoyodti sawanin a sibibyay et liꞌ no siꞌkon si Pinaitawo ket ipaꞌdeng ko a pagꞌadian ko.”