Say Nipamakan konran Magꞌaꞌpat a Ribon Tutawo
8
Napalabas a umnoy awro sin sain, nadinep saraynaet a tutawon abaw a nako kona ni Jesus. Ket naꞌpos raynay balon ra, kanyaꞌ nin kinayaban nasara ni Jesus a tumutumbok na, ket wana konra, 2 “Kudwaꞌdwan kosarayti saray tutawo ta tuloy awro raynan iti ket naꞌpos anay balon ra. 3 Main nin nangibwat et sa adadayoꞌ nin lugar, ket no pasublien kosara anamaet sa bubali ra nin kai nin nangan, bangliꞌ no maulaw-ulaw sara sa dalan sa bitil ra.”4 Wanran tumutumbok na, “Adti atamo ey nin mangalap iti sa wantin kasan kabali-balin lugar nin ipakan konran saraytin tutawo?”
5 Nitepet na ni Jesus konra, “Umno ra et a natraꞌ nin tinapay?”
“Pito ra tamoꞌ,” niꞌbat ran tumutumbok na.
6 Pinatekreꞌ nasara ni Jesus a tutawo sa lutaꞌ. Miꞌsa kinalap nasaray piton tinapay tan nikisalamat ya konan Dios. Tinau-tao nayti miꞌsa na nin nibi konran tumutumbok na nin itayak ra konran tutawo. 7 Main anamaet nin umno ray madidintek nin kunaꞌ. Nayadiꞌ ya nin nikisalamat konan Dios, nibi nayti konran tumutumbok na nin itayak ra anamaet konran tutawo. 8 Nakapangan saray tutawo tan nabsoy sara. Sumunor, sin dininep ran tumutumbok na a taraꞌ ket main nin piton gagaban.
9 Saray nangan, magꞌaꞌpat a ribo sara. Kaaram, pinaibwat nasarayna ni Jesus a tutawo.
10 Miꞌsa tampor rinmuran yayna tan saray tumutumbok na sa baluto nin mako sa sakop nan lugar nin Dalmanuta.
Say Panglilingo ran Pariseo
11 Sin rinmateꞌ saradtaw, main nin Pariseo nin nako kona ni Jesus. Ket nikidiskusyon sara kona ta mampangkit saran puon a sidaen ray kagalangan na. Kanyaꞌ nin dinawat ran mangwaꞌ yan makapakaꞌngap nin pakaꞌkitan a nibakiꞌ nayan Dios. 12 Sinmaꞌwet ya sa idap nin nakem na miꞌsa wana, “Mayin baleꞌ a wanin? Mayin a saray tutawo sawanin ket kidawat saran makapakaꞌngap nin pakaꞌkitan? Ibaritaꞌ ko komoyo, kasa gapon pakaꞌkitan nin ipaꞌkit konra.”
13 Nayadiꞌ na nin nibaritaꞌ in, linakwanan nasarayna tan rinmuran saraynaet si Jesus sa baluto nin mako sa rubariꞌ.
14 Sawanin, nalingwanan ran tumutumbok na a nibalon ket main tamoꞌ nin sayan-sayay tinapay itaw sa baluto. 15 Pinau-pauꞌnawan nasara ni Jesus, “Pakailag kamon maong sa pammakbo ran Pariseo tan sa pammakbo na ni Herodes,” wana.
16 Ket nagꞌiirgwan rayaytaw nin tumutumbok na si wana. Wanra, “Wantaw a wana banaꞌ ta kasan balon tamon tinapay.”
17 Nataros na ni Jesus no ani a mampagꞌiirgwan ra ket wana konra, “Ambaleꞌ nin sain a mampagꞌirgwan moyo si kasan balon moyon tinapay? Ani anggan sawanin ket kai moyo et nin mapibarawes tan matarusan? Kai et para nin maabot nin pakataros moyo? 18 Main nin mata moyo baleꞌ bilang nin kai kamo nin makaꞌkit; main nin tutulyan moyo baleꞌ bilang nin kai kamo nin makarngeꞌ. Nalingwanan moyoyna para 19 sin tinau-tao kosaray liman tinapay nin nipamakan konran limanribon lulalaki? Umnoy balyag a taraꞌ?” wana.
“Labinrwa,” wanra kona.
20 “Sin tinau-tao kosaray piton tinapay nin nipamakan konran aꞌpat a ribon tutawo, umnoy gagaban a nadinep moyon taraꞌ?” wana.
“Pito,” wanra kona.
21 Wana, “Ket kai moyo et para nin matarusan a pipaꞌkaan nan si alimbawaꞌ nin nibaritaꞌ ko?”
Pinaandaꞌ naya ni Jesus a Sayay Tawon Bulag
22 Nakarateꞌ yadtaw si Jesus tan saray tumutumbok na sa Betsaida. Main nin tutawodtaw nin nangiyater kona nin sayay lalakin bulag tan dinawat ra nin ipababo nay gamet na konan sitin lalaki ta pigaw nin makaꞌkit ya. 23 Ket anaod, tinabin naya ni Jesus a bulag nin nirikor naya sa babali. Mayadiꞌ na nin linudaan a mata nan bulag nin pananambar na kona, nipababo nay gamet na kona tan nitepet na, “Makaꞌkit kayna para?”
24 Kinmikit ya ket wana, “Oꞌ, makaꞌkit akon tutawo a baraꞌmo saran kukayo baleꞌ manlumalako sara!”
25 Nipababo naynaet a gamet na ni Jesus sa mata nan bulag. Kinmikit yay tawo ket inmandaꞌ yaynan maong; mapalaway ana nin tuloy a pangingikit na. 26 Pinaibwat nayayna ni Jesus a tawo nin mako ana sa bali na tan wanan nibibilin kona, “Andiꞌ kayna nin dumalan sa babali.”
Say Nipangalilbiꞌ na ni Pedro kona ni Jesus
27 Sinmunor, nako ya si Jesus, kalamoꞌ nasaray tumutumbok na, sa bubaryo nan Cesarea-Filipos. Sin legꞌan ran manlumalako, tinepetan nasara a wana, “Ani a manꞌibari-baritaꞌ ran tutawo maipaꞌkaꞌ kongko? Siꞌno ako kano a wanra?”
28 Ket wanra nin niꞌbat, “Si Juan a Mammawtismo; wanran raruma si Elias; saray raruma et wanra a saya ka konran saray prupita sin nuꞌna.”
29 “Ket siꞌkamo anamaet, siꞌno ako sa wamoyo?”
Niꞌbat na ni Pedro a wana, “Siꞌkay Cristo a nipangakoꞌ nan Dios.”
30 Ket binibilin nasara nin andiꞌ rayti gapo nin ibaritaꞌ nin maipaꞌkaꞌ kona sa siꞌnuman.
Ibaritaꞌ na ni Jesus a Maipaꞌkaꞌ sa Patiti na
31 Ket sin sain, tinaranaan nayna ni Jesus nin nipatandaan konran tumutumbok na a adapen anan mangyadiꞌ kona. Wana, “Siꞌkon si Pinaitawo ket matkap a mangirangep akon abaw nin pammadyaꞌdyaꞌ. Oꞌ a ta ipulisay rako nin saray Mangatuntawo tamo tan saray Pupangulon Pupadiꞌ tan saray Madudunong sa Gugan-gan tamo tan patyen rako liꞌ. Baleꞌ marateꞌ a ikatlon awro, pasublien ako liꞌ nin mabyay.” 32 Nibaritaꞌ naytin mapala-palaway konra. Kanyaꞌ nin nikadayoꞌ naya ni Pedro tan inimaꞌno naya sa sain a nibaritaꞌ na. 33 Ket nibring ya si Jesus nin inadap nasaray tumutumbok na tan kinasagran naya si Pedro a wana, “Satanas, lumakwan kadti! Anaod, say iti sa nakem mo ket amboꞌ nin kumpruntado sa karabayan nan Dios, no kai edet, sa pangingisip nin tutawo.”
34 Pinakadani nasara ni Jesus a tutawo tan saray tumutumbok na kona, miꞌsa wana, “Si sayan marabay nin magꞌin nin tumutumbok ko, matkap a galten nayna sa kaisipan na a karabayan nan bukod. Oꞌ a, matkap nayan balatayen a kudos na nin ipulisay nay lalaman nan diri ket tumbuken nakon pirmi. 35 Wanin ta si siꞌnuman a say byay nadti tana a mampagawan na, mati ya liꞌ et a lamang, baleꞌ si tawo nin gurutan nay byay nadti banaꞌ sa pammabli na kongko tan konan Mabistan Patandaꞌ, mabyay ya nin iti konan Dios. 36 Ani wadiꞌ a magun-guna nan sayay tawo no maikon nay intiron kayamanan sa babon lutaꞌ, baleꞌ nibayad nay byay na sa sain! Kasa gapo! 37 Kasa gapo nin magwaꞌ nan ipambot nin sayay tawo sa byay a naꞌmet na. 38 Saray tutawo konan sitin panaon, makasalanan saran tuloy tan malamang sara konan Dios. Ket si siꞌnuman nin mangidingꞌey a tumutumbok ya kongko nin siꞌkon si Pinaitawo tan sa akay ko, idingꞌey koya liꞌ anamaet no sumubliꞌ ako nin main nin pakayadiꞌ tan kagalangan nan Ama ko tan kalamoꞌ kosara liꞌ a uanghil nin naitalaga kona.”