Paꞌgeten nan Dios a Nipamakiꞌ na kona ni Jesus
17
Napalabas a aꞌnem a awro, nitagad nasara ni Jesus nin nuliꞌ sa sayan ataꞌgay nin talugtog si Pedro tan saray mibsat a Santiago tan Juan. Sara-sara tamoꞌ itaw. 2 Itaw, nanguman a bakas na ni Jesus nin nabantayan ra. Sinumlag a rupa na nin pinasyan salag a kapada na nin awro, tan say seket na ket nagꞌin nin maputiꞌ a makapulag sa putiꞌ. 3 Kapingmatan ket pinaipadar sara si Moises tan si Eliasa nin mangkiirgo kona ni Jesus. 4 Wanan nagꞌirgo ni Pedro, “Catawan, mabista ta iti atamoyna. No rabay mo, mamaꞌdeng akon tulo ray abung-abong iti; saya para komo, saya para kona ni Moises, tan saya para kona ni Elias.”5 Mampagꞌirgo ya et si Pedro sin bigraꞌ nin nasirungan saran maslag nin gunem tan main nin busis nin nangibwat sa gunem a narngeꞌ ra nin wana, “Siti a Anak ko nin mangkawa-kawaꞌnanen ko. Sya a pakaririketan kon tuloy. Rengꞌen moya.”
6 Pinasyan liꞌmo ran tumutumbok sin narngeꞌ rayay busis ket linmukbob sara sa lutaꞌ. 7 Inmarak ya si Jesus konra. Kinudit nasara tan wana konra, “Mibangon kamo. Andiꞌ kamo nin maliꞌmo.” 8 Sin kinmikit sara sa libed ra, bukud-bukod nayna ni Jesus a naꞌkit ran kalamoꞌ radtaw.
9 Sin mampanaoy sarayna sa talugtog, nibibilin nan mairot konra, “Sayti nin naꞌkit moyo, andiꞌ moyo gapo nin ibari-baritaꞌ abirno nin siꞌno angga nin siꞌkon si Pinaitawo ket pinasubliꞌ akoyna nin mabyay.”
10 Wanra nin tumutumbok na kona, “Wanra baleꞌ nin Madudunong sa Gugan-gan ket matkap a rumateꞌ ya yapoꞌ si prupita Elias miꞌsa sitaw si sayan nipangakoꞌ nan Dios?”
11 Wanan niꞌbat ni Jesus, “Pageꞌ a rumateꞌ ya yapoꞌ si Elias ta pigaw nin isadyaꞌ nay sarba para konan si nipangakoꞌ nan Dios.b 12 Baleꞌ ibaritaꞌ ko sawanin komoyo: Say katutuꞌwan ket si Elias, rinmateꞌ yaynadti baleꞌ kai raya nin nadlaw nin tutawo ket ginwaꞌ ra kona a sarbaynan kadukaan a rabay ra. Wanin liꞌ anamaet a lamang kongko nin siꞌkon si Pinaitawo ta padyaꞌdyaen rako liꞌ anamaet.”
13 Sin sain ket nataros ran tumutumbok a si Juan a Mammawtismo a rabay nan irgwen ni Jesus.
Kasan Pakayadiꞌ no Kasan Pagmamatalek
14 Sin nakarateꞌ sara si Jesus konran abaw nin tutawo, main nin sayay lalakin inmarak kona tan nanalimukod ya sa adapan na, a wana, 15 “Maistro, kaꞌdwan may anak kon tumububaꞌyo. Matin-binulan ya ket mangkapaidap yan maong ta no kumaro ya ket kasabyan manaboꞌ ya sa raranom o mairaꞌpog ya sa apoy. 16 Nipaꞌkit koya konran tumutumbok mo baleꞌ kai raya nin napaandaꞌ.”
17 Wana ni Jesus konra, “Abagay kamoyna! Ambaleꞌ a kasan pammemper moyo tan matikoꞌ a pangingisip moyo? Anggan kaꞌno ako kadiꞌ matkap nin kikalamoꞌ komoyo? Anggan kaꞌno katamo nin anusan sa pigagawaꞌ moyo? Iꞌras madti a anak.” 18 Ginan-gan naya ni Jesus a ispiriton dukaꞌ a tegnan nayaynan paidapen a anak tan lakwanan naya anayti, ket konan sitaw a lamang nin udas inmandaꞌ yay anak.
19 Kinmadani saray tumutumbok na ni Jesus tan nitepet ran sara-sara tamoꞌ a nakarngeꞌ, “Mayin baleꞌ a kai miya nin napalakwan taw si ispirito?”
20-21 “Banaꞌ ta kurang a pagmamatalek moyo,” niꞌbat na ni Jesus. “Ibaritaꞌ koyti komoyo a no magꞌin tana kumon nin bilang kaalakin bikoy nin mustasa a pagmamatalek moyo konan Dios, maibaritaꞌ moyo konan sitin talugtog a umalis ya sa kamiꞌnan na ket umalis yan pageꞌ. Kasa gapon kai moyo nin magwaꞌ nin mapangyadiꞌ.c”
Ibaritaꞌ nan Cristo a Patyen rayan Mampagꞌuray iti sa Mundo
Marcos 9:30-32; Lucas 9:43b-45
22 Sin nadinep saradtaw sa Galilea a tumutumbok wana ni Jesus konra, “Amboꞌ nin maꞌteng, siꞌkon si Pinaitawo ket maipagamet ako konran magꞌuray 23 ket patyen rako, baleꞌ sa ikatlo liꞌ nin awro pasublien ako nin mabyay.” Ket ginmereng saran maong a tumutumbok.
Libri sara sa Buis a Aꞌnak nan Adiꞌ sa Pagꞌadian Na
24 Rinmateꞌ ya si Jesus tan saray tumutumbok na sa Capernaum. Ket nako sara kona ni Pedro a maniningir nin buis para konan Timplo nan Dios. “Siin si maistro moyo, mampamayad ya para nin buis para kona nin Timplo nan Diosd?” wanran nitepet kona.
25 “Oꞌ,” wanan niꞌbat ni Pedro.
Ket sin sinumrep yayna sa bali tinepetan nayan tampor ni Jesus. Wana, “Pedro, ani a iti sa wamo? Saray uadiꞌ iti sa lutaꞌ, siꞌnoy pamuisen ra, saray aꞌnak ra o saray sakalakon tawo?”
26 Wana ni Pedro, “Saray raruman tawo.”