2 Nangayab yan sayay anak si Jesus tan pinaꞌdeng nayayti sa adapan ran tumutumbok na. 3 Wana konra, “Abas a pangingisip moyo, ket ibaritaꞌ koyti komoyo: No kai moyo nin silyan ta pigaw nin magꞌin kamon baraꞌmon konan sayay anak, kai kamo gapo nin makakiramaꞌ sa pagꞌaadiꞌ nan Dios. 4 Si mamaayupaꞌ sa lalaman nan diri a kapada kaayupaꞌ nin kapapaꞌsar nan sitin anak, siin a sangkataꞌgayan sa Pagꞌadian nan Dios. 5 Si siꞌnuman a mampangilalaman kongko a mangakoꞌ konan sayan wantin anak, siꞌkoyna a inakoꞌ nan lamang.”

6 “Maong et konan sayay tawo a katinan yan mabyat nin baton gigilingan sa liey tan irebreb ya sa taaw dyan si magꞌin syay puon nin pakasidaꞌ nin pagmamatalek na kongko nin saya konran sarayti nin maayupaꞌ a pammemper ra.

7 Kadoꞌ saray tutawo ta abaw iti sa mundo a tukso nin pangibwatan nin masidaꞌ a pammemper ra kongko. Kai nin maglat a matukso yay sayay tawo, baleꞌ kadoꞌ yaynay tawo nin syay puon nin masidaꞌ a pagmamatalek ran tutawo kongko. 8 Ket no si gamet o ayi mo a puon nin masidaꞌ a pagmamatalek mo, putulen ma tan itampal ma. Maong anay pukol ka baleꞌ magkamain kan byay a iti konan Dios dyan si kumplito yan pageꞌ a lalaman mo baleꞌ maikaꞌ ka sa burung-burong nin apoy a kai gapo nin maꞌrep. 9 No si mata mo anamaet a puon nin masidaꞌ a pagmamatalek mo, sukiten ma tan itampal ma. Maong anay saya tamoꞌ a mata mo baleꞌ magkamain kan byay a iti konan Dios dyan si rwa ran pageꞌ a mata mo baleꞌ maikaꞌ kadtaw nin madusa sa apoy nin impyirno.”

10-11 “Ilagen moyon andiꞌ nin kai baga-bagawen a ni saya konran saraytin uaꞌnak, ta ibaritaꞌ ko komoyo, saray uanghil ra ket manꞌiyadap ran pirmi a maipaꞌkaꞌ konra konan Ama ko nin itaw sa langit.^a

12 Ani kadiꞌ a gawꞌen nan sayay tawon main nin sanyasot saray karniro na ket si saya nabarang ya? Kai nasara kasi nin lakwanan taw saray syam a puloꞌ tan syam nin mampangan sa rigrig nin purod ta pigaw nin keen naya karapen a nabarang? 13 Ket ibaritaꞌ koyti komoyo a no nadumog nayayti liꞌ, mas maririket ya banaꞌ konan siin a sayan napasubliꞌ dyan banaꞌ konran kai nin nabarang nin syam a puloꞌ tan syam. 14 Wanin anamaet kona nin Ama tamo nin itaw sa langit, kai na nin rabay a main nin mabarang ni saya man konran saraytin aꞌnak nin mammemper kongko.

15 No magkasalanan ya komo a busat mo^b sa pammemper, mako ka kona tan kairgwen ma nin siꞌkamo-siꞌkamo tamoꞌ maipaꞌkaꞌ sa kasalanan na. No akuen na a nagkasalanan ya komo, sumubliꞌ sa gindat a pikakalamoꞌ moyon mibsat sa pammemper. 16 Baleꞌ no kai na nin akuen, mangawit kan saya o rwa ra nin tawo ta pigaw nin matistigusan ray sarban pagꞌirgwan moyo.^c 17 No kai na et nin akuen, ibaritaꞌ moy maipaꞌkaꞌ sa sain sa dupong moyon mammemper ket no kai na et a lamang nin akuen, ibilang maynan sayan dukaꞌ nin tawo nin iti sa rikor nin dupong tan sayay maniningir nin buis.

18 Ket, ibaritaꞌ ko komoyo, say aburuyan moyodti sa lutaꞌ nin magwaꞌ nin gawꞌen, aburuyan nan Dios, tan say kai moyo nin aburuyan iti sa lutaꞌ nin magwaꞌ nin gawꞌen, kai na aburuyan nin Dios.^d

19 Wanin anaod, no main nin pipagketan ran dawaten nin rwa radti komoyo sa lutaꞌ, si Ama ko nin itaw sa langit ket ipagaꞌmor na 20 ta no main nin rwa o tulo ra nin nididinep ta mikakalamoꞌ sara banaꞌ kongko, itaw ako sa pisasaꞌlean ra.”

21 Kaaram, kinmadani ya si Pedro kona ni Jesus tan tinepet na, “Uunuren, miꞌno ya nin magkasalanan kongko a kapada kon mammemper tan pirdunawen koya et a lamang? Anggan mipito?”

22 Niꞌbat na ni Jesus, “Amboꞌ tamoꞌ nin mipito, no kai edet, pipituwen may pitumpuloꞌ 23 ta say pagꞌaadiꞌ nan Dios ket maipada konan sayay adiꞌ a nidisisyon nay kikwintawan konran upisyalis na. 24 Kapresan nan mangkikwintawan konran upisyalis na sin main nin nirateꞌ ra kona nin sayay upisyal na nin nangibulsan milyu-milyon nin pisos^e a kwarta nan adiꞌ. 25 Kai nayti nin maisubliꞌ kanyaꞌ nin nigan-gan nan adiꞌ a ilakoꞌ ya bilang aripen, tan si asawa na, tan saray aꞌnak na, tan sarba nin kayadian na ta pigaw nin maisubliꞌ na. 26 Linmukob yay upisyal sa adapan nan adiꞌ tan nipaingangaꞌdo na nin wana, ‘Anusan rako kadiꞌ ta ipamuspusan kon maisubliꞌ liꞌ ngaꞌmin.’ 27 Iningangaꞌdo naya nin adiꞌ tan kai nayna nin nipasubliꞌ ket binulusan nayayna.

28 Nibwat yaynay upisyal ket nakasnaꞌ yan sayay upisyal na anamaet lamang nin adiꞌ a main nin daiteꞌ^f nin utang kona. Nipukpok naya miꞌsa naya nin binikkel tan wana kona, ‘Bayadan moy utang mo!’

29 Tinmalimukod ya sa adapan na a kapada nan upisyal tan dinawat na kona, ‘Anusan nako kadiꞌ ta ipamuspusan kon maisubliꞌ.’ 30 Baleꞌ kai nayayti nin kinaꞌdwan tan nipapriso naya legꞌan nin kai na nin mabayadan a utang na.

31 Sin naꞌkit ran raruman upisyalis a ginwaꞌ na, pinasyan sakit nin nakem ra ket nako sara konan adiꞌ tan nibaritaꞌ ra kona a sarba nin nangyadiꞌ. 32 Nipakayaban nayan adiꞌ taw si upisyal tan wana kona, ‘Siꞌkaynay maraet! Nikidawat kan ingangaꞌdo ket pinirduna kata sa intiron utang mo. 33 Sawanin, mayin ta kai ma nin kinaꞌdwan a kapada mon upisyal bilang nin siꞌko ket iningangaꞌdo kata?’ 34 Pinasyan sager nan adiꞌ ket nipadusa naya ta pigaw nin isubliꞌ na a sarban kinalap na.”

35 Wana ni Jesus, “Wanin anamaet a gawꞌen na nin Ama ko nin itaw sa langit sa siꞌnuman komoyo a kai nin makapamirduna nin liso konan kapada nan tawo.”