Say Pisasangkinian Maipaꞌkaꞌ sa Pakiasawa
19
Sin nayadiꞌ nayna nin nibaritaꞌ in nin uakay ni Jesus, linmakwan yayna sa Galilea tan nako ya sa lugar a sakop nan Judea nin itaw sa rubariꞌ nin rigrig nan Ilog Jordan. 2 Pinasyan kaꞌbawan ran tutawon tinmumbok kona ket pinaandaꞌ nasaray main nin masakit.3 Main nin Pariseo nin nako kona ni Jesus. Mampangkit saran puon nin pamarsawan ra kona kanyaꞌ nin wanra nin nitepet kona, “Iyaburoy para nin Gugan-gan tamo a isyay nayan sayay lalaki a asawa na sa basta bungat anan nangibwatan?”
4 Niꞌbat na konra, “Kai moyo para nin nabasa-basa sa Masanton Kasuratan a sin saytaw sin pinarsa a sarba, si Namarsa, pinarsa nay tawo nin lalaki tan babayi,a 5 ket banaꞌ konan siti nin ginwaꞌ na, si sayay lalaki, lakwanan nasara si ama na tan si ina na ta kipasaya ya konan asawa na ket saran rwa, magꞌin saran sayan-saya?b 6 Kanyaꞌ nin saray mitraasawa ket amboꞌ saraynan rwa no kai edet, sayan-saya saraynan lalaman. Edet, banaꞌ ta wanin, saray rwa a pinipasaya nan Dios, amboꞌ nin manepeg a pisyayen saran tutawo.”
7 Wanra et nin Pariseo, “No wanin a pageꞌ, ambaleꞌ edet a si Moises, nigan-gan na a matkap nayan byan nin kasuratan nin pisyayanc ra no rabay nayan isyay nin sayay lalaki a asawa na?”
8 Ket niꞌbat na ni Jesus, “Si Moises, banaꞌ sa tibꞌey nin ulo moyo, inaburuyan na nin magwaꞌ moyo saran isyay a asawa moyo. Baleꞌ sin taranaꞌ, sin pinarsa a sarba, kai nin nigagaran wanin. 9 Kanyaꞌ nin siꞌko, ibaritaꞌ ko komoyo, si lalaki nin mangisyay konan asawa na nin si rason ket amboꞌ nin banaꞌ ta nikilalaki yay asawa na, miꞌsa ya nin kikalamoꞌ sa sakalako, konan siin mampamabayi yad.”
10 Wanra nin tumutumbok kona ni Jesus, “No wanin a kapapaꞌsar nin sumrep sa istado, maong anay andiꞌ nin sumrep.”
11 Baleꞌ niꞌbat na ni Jesus, “Kai magwaꞌ nin sarban tawo a kikumpurmi konan siin, no kai sara tamoꞌ a tulungan nan Dios. 12 Nagsikabarang a rason no ambaleꞌ a main nin kai nin sumrep sa byay a main nin asawa. Main nin banaꞌ ta main nin dipirinsya ran nikiyanak ra; main anamaet nin banaꞌ ta kapon sara; tan main et nin kai nin sumrep sa byay a main nin asawa ta pigaw nin makatulok saran liso sa nigan-gan nan Dios maipaꞌkaꞌ sa pagꞌaadiꞌ na. Si tawon makaakoꞌ konan siti nin akay, akuen na.”
Siꞌnoy iti sa Sirong nin Pagꞌaadiꞌ nan Cristo
13 Main nin tutawon nangiꞌras nin uaꞌnak kona ni Jesus ta pigaw nin ipababo nay gamet na sa ulo ran sarayti tan idasalan nasara nin bindisyunan nasara. Baleꞌ saray tumutumbok na, inimaꞌno rasara. 14 Baleꞌ wana ni Jesus konran tumutumbok na, “Pauryan moyo saran umarak kongko a uaꞌnak. Andiꞌ moyo sara nin imaꞌnwen, ta si tawon say kanakman na ket kapada nin saraytin uaꞌnak, aburuyan nayan Dios nin kipagꞌadiꞌ kona.” 15 Ket nipababo nay gamet na sa ulo ran uaꞌnak nin pammindisyon na konra. Sin nayadiꞌ, linmakwan yadtaw.
16 Niꞌsa, main nin lalaki nin nako kona ni Jesus. “Maistro,” wana, “ani a maong nin gawꞌen ko ta pigaw nin magaꞌmuran koy anggan-angga nin byay a iti konan Dios?”
17 Wana nin niꞌbat ni Jesus, “Ambaleꞌ a tepeten mo kongko no ani a maong, ta kasan sakalako no kai si Dios tamoꞌ a maong. Baleꞌ say maipaꞌkaꞌ sa byay a iti konan Dios, no rabay mon magaꞌmuran, tukiden moy Gugan-gan nan Dios.”
18 “Aya nin gugan-gan?” nitepet nan lalaki.
Niꞌbat na ni Jesus, “Andiꞌ ka nin mangmati. Andiꞌ ka nin mamabayi o kilalaki. Andiꞌ ka nin manakaw. Andiꞌ ka nin magtistigos nin amboꞌ nin tutuo. 19 Igalang mosara si ama mo tan si ina mo. Aduen moy kapada mon tawo nin kapada nin pangangadoꞌ mo sa lalaman mon diri.”e
20 Wana nin sitin lalakin iti et sa kalaguꞌ-laguan na, “Sarban sain, mantukiden koyna. Ani et a pagkurangan ko?”
21 Wana ni Jesus kona, “No rabay mon liso kan maikanaꞌ nin makagaꞌmor nin kasan anggawan a byay, mako kayna tan ilakoꞌ mo a main mo tan say naglakuan, ibi mo konran pubri, ket magkamain kan kayamanan itaw sa langit. Kayadiꞌ mon gawꞌen ti, sumubliꞌ kadti kongko tan magꞌin kan tumutumbok ko.”
22 Sin narngeꞌ nan lalaki in nin nibaritaꞌ na ni Jesus nibwat ya nin pinasyan bereng. Mainan yan tuloy ket!
23 Wana ni Jesus konran tumutumbok na, “Ibaritaꞌ koyti komoyo! Pinasyan idap ran ipaisirong nin mumayaman a lalaman ran diri sa pagꞌuuray nan Dios. 24 Ibaritaꞌ koynaet komoyo, mas mainumꞌay ya et nin lumbot a kamilyo sa ubot nin kadayem dyan si sayan mayaman ket makakibiang ya sa pagꞌaadiꞌ nan Dios.”
25 Wanin anay nipakaꞌngap ran tumutumbok na sin narngeꞌ ra in nin wana maipaꞌkaꞌ konran mayaman, ket wanra kona, “Ya! Siꞌno edet no wanin a maisalba?”
26 Pinastang nasaran maong ni Jesus miꞌsa wana konra, “Peteg a impusiblin makagaꞌmor nin kasan anggawan nin byay a tutawo, baleꞌ say sarban bagay ket magwaꞌ nan Dios.”
27 Nagꞌirgo ya si Pedro a wana, “Ket siꞌkami pa edet, pinauryan mi anay sarba ta pigaw nin nikikalamoꞌ kami komo. Ani liꞌ a gun-guna mi?”
28 “Oꞌ a, ta ibaritaꞌ koyti komoyo: Rumateꞌ liꞌ a awro a si Dios ket pabaꞌyuwen nayayti nin mundo, tan siꞌkon si Pinaitawo, tumekreꞌ ako liꞌ sa truno ko ta pigaw nin magꞌuray akon makapangyayadiꞌ. Ket no saytaw liꞌ, siꞌkamon nikikalamoꞌ kongko, tumekreꞌ kamo liꞌ anamaet sa labinrwa nin truno ket kipagꞌuray kamo liꞌ konran labinrway grupo ran puri na ni Israel. 29 Si siꞌnuman a manglakwan nin pammali na, bubsat na, ama na, ina na, aꞌnak na, o binis na banaꞌ kongko, magun-gunawan ya liꞌ nin misanyasot nin kaꞌbaw dyan say linakwanan na tan mabyan ya et a lamang liꞌ nin anggan-angga nin byay a iti konan Dios. 30 Baleꞌ konan sitaw liꞌ nin awro, main konran iti anan nuꞌna a maikayupaꞌ liꞌ, tan main konran masusuyot a uꞌnawen liꞌ.”