3 Banaꞌ ta wanin, nibaritaꞌ nayayti ni Jesus nin pangingiyarig: 4 “No wadiꞌ ta main nin saya komoyo a main nin sanyasot a karniro, miꞌsa nabarang yay saya, piho nin ibatiꞌ nasaray syam a puloꞌ tan syam itaw sa mampamasturan na, ta keen naya nin tikapen taw si saya nin nabarang anggan madumog naya. 5 Miꞌsa, no nadumog nayayna, balatayen nayan siririket nin isubliꞌ nayaynadtaw sa kamiꞌnan ra. 6 Ket no rumateꞌ yadtaw sa bali ra, kayaban nasaray uamigo na tan kukabaraybay na a wana, ‘Rumiriket a saya tan saya kontamo ta nadumog koyaynay nabarang nin karniro ko.’ ” 7 Ket wana et ni Jesus, “Ibaritaꞌ koyti komoyo, wanin a lamang a mas maririket saray itaw sa langit, no si sayay tawon makasalanan ket pagbabawian nayna a kukasalanan na, dyan banaꞌ konran syam a puloꞌ tan syam nin matunong kano nin manꞌipaꞌkaꞌ ra a kai rayna nin matkap a magbabawiꞌ.”

8 “Anamaet a lamang, no wadiꞌ ta main nin sayay babayi a main nin mapuloꞌ ray kwartan pirak^a, miꞌsa naꞌmet nayay saya, piho nin manulsol yan lampadawan tan mamanis ya ta tikapen nayan maong a naꞌmet nan kwarta angga nin madumog naya. 9 Ket no nadumog nayayna liꞌ, kayaban nasaray uamiga na tan kukabaraybay na tan wana, ‘Rumiriket a saya tan saya kontamo ta nadumog koyaynay naꞌmet kon kwarta ko.’ ” 10 Ket wana et ni Jesus, “Ibaritaꞌ koyti komoyo, wantin lamang konran saray uanghil nan Dios a rumiriket sara anamaet no main nin sayay makasalanan a pagbabawian nayna a kukasalanan na.”

11 Wana et ni Jesus, “Main nin sayay ama a main nin rwa ray aꞌnak nan lulalaki. 12 Wanan buridek konan ama na, ‘Tay, ibi mo paynay tao kon syay kanepegan nin tawiren ko.’ Kanyaꞌ nin nibi na anaod nin ama a tao nin saya tan saya konran rway aꞌnak na.

13 Ket napalabas a umnoy awro, nilakoꞌ nan sitin buridek a sarban tao na tan nako ya sa sayay adayoꞌ a lugar. Pinirdi-pirdi nadtaw a kwarta na sa pagkabyay a kasan kabalikasan. 14 Sin naꞌpos nayna a kwarta na, nibansag et a nagkamain nin grabin bitil itaw sa lugar nin kamiꞌnan na, ket mangkapaidap yaynan tuloy. 15 Kanyaꞌ nin pinatawo ya konan sayay tagadtaw ket nibakiꞌ yan mangasikaso konran baboy^b itaw sa pammasturan. 16 Sa bitil naynan tuloy, mataman nin say ipamakan konran baboy ket rabay nayna kumon nin kanen, baleꞌ kasa nin mami kona.

17 Sin paꞌsar naimunawan ya, ket wana sa nakem na, ‘Sarba ran mampatawo kona ni tatay ket subra-subray mangkanen ra. Baleꞌ iti ako a mangkamati ana sa bitil! 18 Mako akoyna pa nin sumubliꞌ kona ni tatay ta ibaritaꞌ ko a nagkasalanan ako konan Dios tan wanin et kona. 19 Akuen ko kona nin kai akoyna anaod nin kumanaꞌ nin tawagen nin anak na, no kai edet, ikwinta nako tanan saya konran mampatawo kona.’ 20 Sin sain, nibwat ya anaod ana nin sumubliꞌ yadtaw konra.

Adayoꞌ ya et a lamang sa bali ra, natamuraw nayayna nin ama na. Nanaboꞌ a ingangaꞌdo na kona, kanyaꞌ nin nalayo yan sinumnaꞌ, miꞌsa yinakap tan inarkan naya. 21 Wanan sitin anak konan ama na, ‘Tay, nagkasalanan ako konan Dios tan wanin et komo. Kai akoyna edet nin kumanaꞌ nin tawagen et nin anak mo.^c’

22 Baleꞌ kinayaban nasara nin ama a kukatulong na a wana, ‘Madaliꞌ kamo. Awiten moyodti a sangkabistawan nin aysing ta isulot moyo kona. Miꞌsa singsingan tan sapatusan moya. 23 Anamaet lamang, keen moya kalapen a pinatabaꞌ nin baka ta patyen moya. Miꞌsa, magpunsya atamo tan rumiriket atamo 24 banaꞌ ta sitin anak ko a manꞌipaꞌkaꞌ kon nati ana ket bilang yan sinmubliꞌ nin mabyay. Sin saytaw, paꞌsar nay nabarang, baleꞌ sawanin sinmubliꞌ yaynadti!’ Kanyaꞌ nin nitaranaꞌ ray piririga tan pagpupunsya ra.

25 Sin sain, si anak nin kaka ket itaw ya sa gagawaꞌ. Sawanin, sumubliꞌ yayna sa bali ra ket sin adani yayna, narngeꞌ nay tunoy nin piririga. 26 Kanyaꞌ nin kinayaban nayay sayay alilaꞌ ra tan tinepetan naya a wana, ‘Ansain? Ani a mampangyadiꞌ?’ 27 Ket wanan katulong, ‘Sinmubliꞌ yaynay ari mo, kanyaꞌ nin nipapati naya ni tatay moyo a pinatabaꞌ nin baka banaꞌ kona ta marigsa yan rinmateꞌ.’

28 Banaꞌ sa saytaw nin narngeꞌ na, sinmesꞌew ya a kaka tan kai na nin rabay a kiriga konra. Kanyaꞌ nin, kinuyong naya ni tatay na a lumuob yayna sa bali ra. 29 Ket wanan niꞌbat kona ni ama na, ‘Isipen moyoyti, umnoy taon koynan mampagsirbi komoyo, tan kai ako gapo nin sinmubag ni niꞌsa sa sarban nigan-gan moyo kongko. Ket mataman ni niꞌsa, kai nako binyan ni saya tana nin kanding ta pigaw nin miririga kami nin saray uamigo ko. 30 Baleꞌ sin rinmateꞌ yayti nin anak moyon namirdi-pirdi nin kayamanan moyo konran bubbayin dukaꞌ, nipapati moya et taw si pinatabaꞌ a baka para kona!’

31 Ket wanan ama kona, ‘Anak ko, siꞌka, pirmi kan iti sa dani ko, tan sarban ikon ko, ikon mo anaod. 32 Talagan manepeg nin miririga tan magpunsya atamo ta siti nin ari mon say paꞌsar na ket nati ana, sinmubliꞌ yan mabyay; nabarang ya baleꞌ nakasubliꞌ yan lamang.’ ”