3 Ket wanan ingkargado sa nakem na, ‘Ani kadiꞌ a gawꞌen ko? Galten akoyna, ket amboꞌ akon magsen nin mangadado tan madingꞌey akon kipayabor. 4 Ay! Tandaꞌ koynay gawꞌen ko ta pigaw nin taman no maglat akoyna, main nin mangakoꞌ kongko sa bali ra.’

5 Kanyaꞌ nin, kinayaban nasaran saꞌsa-saꞌsa a main nin utang konan amo na. Wana konan nuꞌna, ‘Umnoy utang mo konan amo ko?’ 6 ‘Walunyasot a galon nin ladak,’ niꞌbat na. Ket wana kona, ‘Sya ey listawan mo. Daliꞌ-dalien mo, tumekreꞌ kadti e tan isurat mon aꞌpat a yasot.’

7 Miꞌsa wana konan ikarwa, ‘Siꞌka, umnoy utang mo?’ Niꞌbat na, ‘Sanribon kaban nin irik.’ Wana kona, ‘Sya ey listawan mo. Isurat mon walunyasot.’

8 Ket sin natandaan nan amo nayti say man-gawꞌen nan sitin masaor a ingkargado, rinayo naya sa kasiriban na. Oꞌ tutuo a mas masirib saray makamundo dyan saray makaDios.” 9 Nituloy nay nagꞌirgo ni Jesus a wana, “Ibaritaꞌ koyti komoyo, usaren moyoy kayamanan moyodti sa lutaꞌ para sa kaabigan ran tutawo ket no rumateꞌ a awro a kasaynan kausaran nin kwarta, maakoꞌ kamodtaw liꞌ sa lugar a piikapan anggan-angga.

10 Si kapagpyawan sa daiteꞌ, kapagpyawan ya anamaet sa abaw. Ket si masaor sa daiteꞌ, masaor ya anamaet sa abaw. 11 Oꞌ no kai kamo nin kapagpyawan sa kayamanan iti sa lutaꞌ, paꞌno kamon pyawen sa peteg a kayamanan itaw sa langit? 12 Wanin anamaet, no kai kamo nin mapyan mangaꞌget nin ikon ran raruma, kai kamo mabyan nin magꞌin ikon moyon diri.” 13 Wana et ni Jesus, “Kai nasara mapagsirbyan nin kusto nin sayay magsisirbi a rway niduman amo na, ta no rwa ray amo na, mas kawaꞌnanen nayay saya dyan si saya, ket mas tutuo ya konan saya dyan konan saya. Wanin anamaet, kai moyo nin mapirngan a magsirbi konan Dios tan say umagawa kamon maningkap.”

14 Narngeꞌ ra a nibaritaꞌ na ni Jesus nin saray Pariseo nin itaw, ket tinuyaꞌ-tuyaꞌ raya banaꞌ ta mablin tuloy konra a kwarta. 15 Ket wana ni Jesus konra, “Say manꞌipaꞌkit moyo sa tawo ket si mapteg kamo baleꞌ tandaꞌ nan Dios a kanakman moyo. Oꞌ, si mas maalaga sa tawo, ket makaparmay ya konan Dios. 16 Oꞌ, say Gugan-gan nin nibi na ni Moises tan say nisurat ran prupita ket manꞌipatumbok angga sin ityayna si Juan a Mammawtismo. Anaod sawanin manꞌipata-patandaꞌ yay Mabistan Patandaꞌ no paꞌnon paisirong sa pagꞌaadiꞌ nan Dios, ket manꞌipasuet ray mairanod nin saray abaw a tawo.

17 Wanin man, mampagkuri et a Gugan-gan. Anaod, makasa yapoꞌ a langit tan lutaꞌ, baꞌyo a sayay gurit nin Masanton Kasuratan. 18 Oꞌ si sayay lalaki nin isyay nayay asawa na miꞌsa ya mangalamoꞌ nin sakalako, konan siin mampamabayi ya. Wanin a lamang, si lalakin mangalamoꞌ konan sayay babayin nisyay nan asawa na, mampagkasalanan yan mampamabayi.

19 Sayti et:

Main nin sayay mayaman nin say seket na ket sangkablyan, tan pirmi yan mamapunsya. 20 Sa serpan sa pukok na ket main nin nipaidaꞌ itaw nin sayay kipayabor a say ngaran na Lazaro. Napnoꞌ yan gilgil. 21 Mampilalo ya tana nin mabyan sa itampal nin natraꞌ sa kinnan nan mayaman. Ket makaluod et sa kapapaꞌsar na, saray maatap a aso, keen ra dildi-dildilan a gilgil na. 22 Sayay awro, nati ya si Lazaro ket niꞌras rayadtaw nin uanghil sa dani na ni Abraham. Kaaram, nati ya anamaet a mayaman, ket nitabon ya. 23 Ket nikaꞌ ya sa Hades^a nin itaw ket mampangirangep yan dyaꞌdyaꞌ. Tinmangar ya ket natamuraw nayadtaw sa adayoꞌ si Abraham nin iti ya sa dani na si Lazaro.

24 Ket nitaꞌway na, ‘Ama Abraham, pangingaꞌdo mo. Ibakiꞌ ma pa si Lazaro nin ilbet nayay tamudoꞌ na sa ranom ket turuan nayan maparayꞌepan a dilaꞌ ko ta dyaꞌdyaꞌ koynan tuloy iti sa apoy.’

25 Baleꞌ niꞌbat na ni Abraham, ‘Anak ko, panemtemen mo a leleg mon nabyay itaw sa lutaꞌ ket nipapdaꞌ ka, baleꞌ si Lazaro ket nangirangep yan dyaꞌdyaꞌ. Ket sawanin, syay mampainawnan iti ket siꞌka anamaet a mampadyaꞌdyaen, 26 tan amboꞌ in tamoꞌ ta, main nin sangkaararman tan sangkaalawangan nin bwang sa pisaꞌlean tamo. Ket saray iti, kai sara makarubariꞌ isen tan sara anamaet a isen, kai sara makarubariꞌ iti.’

27 Ket wanan mayaman, ‘No wanin edet, Ama Abraham, ibakiꞌ ma tana pa si Lazaro itaw konra ni tatay ko 28 ta itaw, main nin lima ray bubsat kon lulalaki ket pauꞌnawan nasara ta pigaw nin kai sara maikaꞌ iti sa pakapadyaꞌdyaan.’

29 Ket niꞌbat na ni Abraham, ‘Main anaytaw say nisurat na ni Moises tan ran saray prupita; matkap ra tana nin tepren.’

30 Ket wanan mayaman, ‘Kai ra nin tepren, Ama Abraham; baleꞌ no main nin sinmubliꞌ nin mabyay nin mako konra, pagbabawian raynay kukasalanan ra.’

31 Niꞌbat na ni Abraham, ‘No kai ra nin tepren a nipaisurat nan Dios nin niyakay ra ni Moises tan saray prupita, mataman et no main nin saya a sinmubliꞌ nin mabyay, kai saran lamang nin mamper.’ ”