No Ani-ani a Maalaga sa Pagꞌadian nan Cristo
5
Naꞌkit nasara ni Jesus a pinasyan kaꞌbawan nin tutawo ket tinmangkar ya sa purod tan itaw ya tinmekreꞌ nin mangyakay. Inmarak sara kona a tumutumbok na, 2 ket tinmaranaꞌ yayna a wana,3 “Makarmaꞌ saray mangalilbiꞌ a main nin mampagkurangan ra,
ta magꞌin nin ikon ra a say iti sa Pagꞌadian nan Dios.
4 Makarmaꞌ saray mabereng banaꞌ sa dukaꞌ a gawaꞌ-gawaꞌ a mangkaꞌkit ra sawanin
ta si Dios ket liwaliwawen nasara liꞌ.
5 Makarmaꞌ saray amboꞌ nin mabayani a piuugaliꞌ ra
ta risibyen ra liꞌ a nipangakoꞌ nan Dios.
6 Makarmaꞌ saray makaingar sa pakatkapan ran mangwaꞌ nin maabig sa pangingikit nan Dios,
ta papdaen nasara nin Dios nin mangwaꞌ nin sain.
7 Makarmaꞌ saray mapaingangaꞌdo,
ta kaꞌdwan nasara liꞌ nin Dios.
8 Makarmaꞌ saray napasayay nakem ra sa panunumbok konan Dios,
ta maꞌkit raya liꞌ nin peteg a Dios.
9 Makarmaꞌ saray mamitunon miguguraꞌ,
ta patutuꞌwan na liꞌ nin Dios a aꞌnak nasara nin kabakas-bakas na.
10 Makarmaꞌ saray mangirangep nin pammaidap ran tutawo konra banaꞌ sa pangngawaꞌ ran maabig sa pangingikit nan Dios,
ta mampagꞌadiꞌ yay Dios konra.
11 Makarmaꞌ kamo no banaꞌ ta mantumumbok kamo kongko ket pagsari-saritaan rakamo tan paidapen rakamo tan mamabrika saraynan sarban bulaꞌ-bulaꞌ maipaꞌkaꞌ komoyo. 12 Wanin anamaet a lamang a ginwaꞌ ra nin tutawo konran prupita nan Dios sin nuꞌna. Kanyaꞌ nin rumiriket kamon maong ta pinasyan andaꞌ nin gun-gunan manꞌisadyaꞌ na anamaet nin Dios komoyodtaw sa langit.”
13 “Siꞌkamo, baraꞌmo kamon asin para konran tutawodti sa mundo. Baleꞌ no bilang wadiꞌ ta tinmabꞌang anay asin, kai ana gapo nin maisubliꞌ a taway nin maꞌsin. Kasaynan kabalikasan, ket itampal ana tan daꞌda-daꞌdaan tana.
14 Baraꞌmo kamon tyoꞌ a mamalaway konran sarban tutawo. Si syudad a iti sa ataꞌgay nin lugar ket kai ya nin maiyadi. 15 Kasa anamaet nin manulsol nin tyoꞌ miꞌsa naya nin sakban, no kai edet, ikwa naya sa sayay pangngitukduan ta pigaw nin mapalawayan sara ngaꞌmin a iti sa bali. 16 Wanin anamaet a maabig a gugawaꞌ moyo ta pigaw nin banaꞌ sa sain ket raywen rayay Dios a Ama moyo nin itaw sa langit.”
Nitandudoꞌ nan Cristo a Gugan-gan
17 “Andiꞌ moyo nin ipaꞌkaꞌ a nako akodti sa lutaꞌ ta pigaw nin gawꞌen kon kai ana nin magkuri a Gugan-gan nin nibi na ni Moises tan say akay ran prupita nan Dios, no kai edet, nako akodti ta pigaw nin ipapalaway tan tukiden ko a niyakay ra. 18 Ibaritaꞌ koyti komoyo: Mintras nin iti et a langit tan lutaꞌ ni sayay litra o sayay partin litra sa Masanton Kasuratan ket kai nin magkurang no kai et nin matukid ngaꞌmin a naisurat. 19 Kanyaꞌ anaod nin sangkaayupaan sara liꞌ sa Pagꞌadian nan Dios a tawon mangwaꞌ nin kasan kwinta konan wanra a sangkabugaan nin impurtanti nin gan-gan nan Dios tan iyakay nasara et a raruma nin gawꞌen raya anamaet nin kasan kwinta. Baleꞌ si manukid sa gan-gan nan Dios tan iyakay nasara et a raruma nin manukid anamaet, sangkataꞌgayan sara liꞌ sa Pagꞌadian nan Dios. 20 Tukiden moyon maong ngaꞌmin ta ipangakoꞌ ko komoyo a kai kamo gapo nin makasrep sa Pagꞌadian nan Dios no kai moyo sara nin mapasurukan sa pangngawaꞌ nin matunong a Pariseo tan saray Madudunong sa Gugan-gan.”
Say Maipaꞌkaꞌ sa Sager
21 “Bilang sa wanti e: Tandaꞌ moyo a niyakay konran lulaking tan bubaying tamo sin nuꞌnan panaon a andiꞌ sara nin mangmati ta si siꞌnuman a mangmati nin kapada nan tawo ket umbat ya sa husgado.a 22 Baleꞌ, siꞌko, ibaritaꞌ koyti komoyo: Si manguraꞌ sa kapada nan tawo, umbat ya et a lamang sa husgado tan si siꞌnuman a magꞌirgon mabyat sa kapada nan tawo a wana, ‘Waweng ka!’b umbat ya et sa sangkataꞌgayan a husgado; tan si siꞌnuman a mangibaritaꞌ konan kapada nan tawo nin wana, ‘Kasa gapo nin sirbi mo!’ umbat ya liꞌ sa apoy nin impyirno. 23 Kanyaꞌ nin no manꞌidaꞌton moyna sa altar a daꞌton mo konan Dios, ket napanemtem mon main nin masakit a nakem komo, 24 ibatiꞌ mo yapoꞌ itaw a daꞌton mo tan mako ka kidunong konan nagkasalananan mo miꞌsa moyna nin ituloy a pangingidaꞌton mo konan Dios.
25 No main nin mangidimanda komo, mako kan tampor nin kiariglo kona mintras nin iti kamo et sa dalan, baꞌyo ka nin maiyadap sa kurti, ta no kai, ipagamet nakan hwis konran pulis ket ipriso raka, 26 tan, ibaritaꞌ ko komoyo, buruken rakadtaw sa tana a mabayadan mo ngaꞌmin a multa mo.”
Say Pakatkapan a Andiꞌ ya nin Lamangen a Asawa
27 “Tandaꞌ moya a akay et a wana, ‘Andiꞌ ka nin kiraray sa amboꞌ mon asawa.’c 28 Siꞌko baleꞌ, ibaritaꞌ koyti komoyo: Si lalakin namastang tamoꞌ nin main nin pangangapes konan sayay babayi, nagkasalanan yaynan kapada a namabayi ya.
29 Ket, no si mata moy puon nin pakasidaꞌ nin pammemper mo, sukiten ma tan itampal ma. Maong anay makasawan kan sayay parti nin lalaman mo dyan si kumplito yan pageꞌ a lalaman mo baleꞌ maikaꞌ ka sa impyirno. 30 No si wanan nin gamet mo a puon nin pakasidaꞌ nin pammemper mo, putulen ma tan itampal ma. Maong anay makasawan kan sayay parti nin lalaman mo dyan si kumplito yan pageꞌ a lalaman mo baleꞌ maikaꞌ ka sa impyirno.”
31 “Niyakay ra et nin naꞌteng ana a no main nin lalakin isyay nayay asawa na, matkap nayan byan ti nin kasuratan nin pisyayan rad. 32 Baleꞌ siꞌko, ibaritaꞌ koyti komoyo: No isyay nayan lalaki a asawa na a kai ya anamaet nin nikilalaki, pagkasalananen naya no kikalamoꞌ ya sa sakalakon lalaki. Ket si siꞌnuman a mangalamoꞌ konan babayi magkasalanan yaynamaet.”
Say Maipaꞌkaꞌ sa Kasasamba
33 “Tandaꞌ moyon lamang a main yayti et e nin akay konran lulaking tan bubaying tamo a wana, ‘Andiꞌ mo nin kai sustinyen a sinambawan mo, no kai edet, tukiden moy sinambawan mo konan Catawan.’e 34 Baleꞌ siꞌko, ibaritaꞌ koyti komoyo: Andiꞌ moyo gapo nin sambawan a nipangakoꞌ moyo. Andiꞌ moya usaren nin sumamba a langit ta itaw yay truno nan Dios, 35 tan a lutaꞌ ta siti a tukduan na. Andiꞌ moya anamaet a lamang nin usaren a syudad nin Jerusalem ta siti a syudad nan Sangkataꞌgayan nin Adiꞌ nin sarba. 36 Ni andiꞌ moyo usaren nin sumamba a byay moyo a bilang nin siꞌkamoy main nin pakauray sa sayti ta ni si sayay sabot sa ulo moyo ket kai moya nin mapauban o mapangisit. 37 ‘Oꞌ,’ wamoyo tamoꞌ no mangipangakoꞌ kamo; o ‘Kai,’ tamoꞌ no andiꞌ kamo, ta animan et a ibaritaꞌ moyon ipaaluyon sa kasasamba moyo, ibat ana konan si sya a Kadukaan.”
Say Maipaꞌkaꞌ sa Pammaleꞌ
38 “Tandaꞌ moya a akay et a wana, ‘Si nakabulding nin kapada nan tawo, buldingen ya anamaet. Si nakaburas nin ngipen nan kapada nan tawo, burasen anamaet a ngipen na.’f 39 Baleꞌ siꞌko, ibaritaꞌ koyti komoyo: Andiꞌ kamo nin gumaleꞌ konran mangwaꞌ nin dukaꞌ komoyo. No rampaen rayay wanan nin rupa moyo, iyadap moyay wiri nin rampaen ra et. 40 No idimanda rakamo ta rabay rayan makalap a mabistan aysing moyo, ibi moya et a mas mabli nin aysing moyo. 41 O, no main nin sundaloꞌ nin mamabalatay komoyo nin sayay kilumitro sa kargada na, awiten moya nin rway kilumitro. 42 No main nin kidawat komoyo, byan moyo sara; no main nin mangdam komoyo, paꞌdaman moyo sara.
43 Main et nin akay a wana, ‘Aduen mosaray uamigog mo tan guraen mosaray kalaban mo.’ 44 Baleꞌ siꞌko, ibaritaꞌ koyti komoyo: Aduen moyo saray kalaban moyo tan idasalan moyo saray mampamaidap komoyo. 45 Sa pangngawaꞌ moyon siin, maꞌkit a baraꞌmo kamon si Dios a Ama moyo nin itaw sa langit ta si Dios, pari-parihwen nayan pasiraen a awro para konran maong a tutawo tan para konran dukaꞌ a tutawo, tan parapegen naya para konran matunong a tutawo wanin anamaet para konran maraet a tutawo. 46 Main paran gun-gunan matagaꞌnan moyo konan Dios no sara tamoꞌ a mampangawaꞌnan komoyo a kawaꞌnanen moyo? Kasa! Saray maniningir nin buis, a wamoyon saray sangkadukaan nin tutawo, wanin a pigagawaꞌ ra. 47 Wanin anamaet, no masami-sami kamo tamoꞌ konran kukamuko moyo, ani a ipaꞌkit nin naiduman kamaungan moyo nin sain? Kasa! Wanin anamaet lamang a ugaliꞌ ran tutawon kai nin magtandaꞌ konan Dios. 48 Matkap anaod a magꞌin kamon baraꞌmon konan si Dios a Ama moyon itaw sa langit a kasan pagkurangan na.”