Subuk-subuken yay Cristo
4
Kaaram, nikaꞌ nayan Ispirito nan Dios si Jesus sa kasan katawu-tawon lugar ta pigaw nin sugsugen nayan magkasalanan nin Dimunyo. 2 Sin napalabas a aꞌpat a puloꞌ a awro a kai ya nin nangan si Jesus, pinasyan bitil nayna. 3 Kinadanyan nayan Mannugsog ket wana kona, “Banaꞌ ta siꞌkay peteg a Anak nan Dios, pagbaliwen mon tinapay ti say bato.”4 Baleꞌ niꞌbat na ni Jesus, “Wana sa Masanton Kasuratan,
‘Amboꞌ a say kanen tamoꞌ a ikabyay nan tawo no kai matkap na a barang saritaꞌ a mangibwat konan Dios nin ikabyay.’a ”
5 Kaaram, nikaꞌ naya nin pinaꞌdeng nin Dimunyo si Jesus sa sangkataꞌgayan a parti nan Timplo nan Dios sa Jerusalem, si Masanton Syudad. 6 Wanan Dimunyo, “Banaꞌ ta siꞌkay peteg a Anak nan Dios, painaboꞌ kadti. Tutal, wana sa Masanton Kasuratan,
‘Bibilinen nasaran Dios a uanghil na a pagawan raka,
tan salanggawen raka liꞌ ta pigaw nin kai gapo nin masakitan a ayi mo nin bato.’b ”
7 Niꞌbat na ni Jesus, “Oꞌ, baleꞌ wana et a lamang sa Masanton Kasuratan,
‘Andiꞌ ka mangwaꞌ nin padalan nin ipanubok mo konan Uunuren a syay Dios mo.’c ”
8 Kaaram, nikaꞌ naya et nin Dimunyo si Jesus sa pinasyan kataꞌgayan nin talugtog tan nipaꞌkit na ngaꞌmin kona a sarban nunasyon sa intiron mundo tan sarban kukayamanan tan pupakayadiꞌ ra, 9 a wana kona ni Jesus, “Sarban sain ibi ko komo no tumwek ka kongko ket unuren nako.”
10 Niꞌbat na ni Jesus kona, “Lumakwan kadti, Satanas! Wana anaod sa Masanton Kasuratan,
‘Si Uunuren a Dios mo tamoꞌ a unuren mo tan pagsirbyan mo.’d ”
11 Linmakwan yaynay Dimunyo ket rinmateꞌ saray uanghil tan inasikaso raya si Jesus.
Say Pakatandaan nin Maipaꞌkaꞌ sa Pagꞌadian nan Cristo
12 Sawanin, dinakep tan nipriso ya si Juan. Sin natandaan nayti ni Jesus, sinmubliꞌ ya sa prubinsyan Galilea. 13 Nako ya sa Nazaret baleꞌ amboꞌ yadtaw nin niikap no kai nako ya sa syudad nin Capernaum a iti sa rigrig nan Baybay Galilea a sakop nin lugar ran puri na ni Zabulon tan puri na ni Neftali. 14 Nangyadiꞌ ti nin pakatukidan nin nipadles na ni Prupita Isaias a wana,
15 “Sa lugar nin Zabulon tan Neftali,
iti sa dalan a adap sa taaw,
tan itaw sa rubariꞌ nan Ilog Jordan
tan sa parti nan Galilea a lutaꞌ ran amboꞌ nin Judio,
16 saray tutawodtaw, baraꞌmo saran mampiikap sa dedlem.
Say paꞌsar ra et ket baraꞌmon nati sarayna ta naisyay sara konan Dios.
Baleꞌ, maꞌkit ra liꞌ a baraꞌmon sangkaslagan nin palaway,
ta nasiraan saradtaw nin siin nin palaway a say pangingisalba nan Dios.”e
17 Ket nangibwat sin rinmateꞌ yadtaw sa Galilea, tinaranaan nayna ni Jesus a mamari-baritaꞌ konran tutawo, a wana, “Pagbabawian tan gurutan moyoynay kukasalanan moyo ta adani yayna nin magꞌadiꞌ a Dios.”
Say Nipanawag konran Tumutumbok nan Cristo
18 Sawanin, manlumalako ya sa rigrig nan Baybay Galilea si Jesus sin naꞌkit nasaray mibsat nin maninilay a sara si Simon nin say sakalakon ngaran na ket Pedro, tan si Andres. Sin sain ket mampangikatkat saran eket. 19 “Kikalamoꞌ kamo kongko,”f wana ni Jesus, “ta gawꞌen katamon maninilay, amboꞌ nin kunaꞌ no kai edet, nin tutawo.” 20 Ket tampor linakwanan ray eket ra tan nikikalamoꞌ sarayna kona.
21 Kai sara et nakakadayoꞌ nin tuloy, naꞌkit nasara et a mibsat a aꞌnak na ni Zebedeo a si Santiago tan si Juan. Itaw sara sa baluto ra a kalamoꞌ raya si tatay ra nin mampangunong nin eket ra. Kinayaban nasara ni Jesus a mibsat, 22 ket tampor a linakwanan rayay baluto ra tan mataman si tatay ra tan nikikalamoꞌ sara kona ni Jesus.
Abaw saray Mantumumbok konan Cristo banaꞌ sa Pakayadiꞌ na
23 Ket nako ya sa intiron prubinsya nan Galilea si Jesus nin nako naya nin nipata-patandaꞌ sa susinagugag a Mabistan Patandaꞌ nin maipaꞌkaꞌ sa pagꞌaadiꞌ nan Dios, tan pinaandaꞌ nasaray main nin bungat anan klasi nin masakit.
24 Natandaan a maipaꞌkaꞌ kona ni Jesus sa intiron prubinsya nin Siria. Kanyaꞌ nin saray tutawo ket nikaꞌ rasara kona a main nin sarba anan klasin masakit tan saray main nin ingar-ingaren bilang saray nasrepan nin ispiriton dukaꞌ, saray matin-binulan, tan saray paralitiko, ket pinaandaꞌ nasara ngaꞌmin ni Jesus. 25 Banaꞌ sa wanin pinasyan kaꞌbawan ran tinmumbu-tumbok kona ni Jesus. Main nin nangibwat sa Galilea, sa Decapolis, sa Jerusalem, sa Judea tan sa lulugar sa rubariꞌ nan Ilog Jordan.