Say Maipaꞌkaꞌ sa Mabistan Gawaꞌ
6
“Ilagen moyon amboꞌ nin parayo sa tawo a rason moyon mangwaꞌ nin mabista, ta no wanin a rason moyo ket kai nakamo gun-gunawan nin Dios a Ama moyo nin itaw sa langit.2 Bilang no mami kamo konan sayay makatkap, kai moyoyna nin matkap et nin ipata-patandaꞌ a bilang sa gawaꞌ ran masantos kano wadiꞌ a itaw sara mami sa sinaguga tan sa dalan ta pigaw nin raywen rasara nin tutawo. Ibaritaꞌ ko komoyo, banaꞌ ta rinayo rasaraynan tutawo, kasaynan risibyen ran mangibwat konan Dios. 3 No mami kamo andiꞌ moyoyna nin ipatandaꞌ et abirno konan sangkaadanyan nin amigo moyo.a 4 Sikritoy pammi moyo ket si Ama tamon itaw sa langit, a syay makaꞌkit nin sarban sikriton man-gawꞌen, gun-gunawan nakamo.”
Say Maipaꞌkaꞌ sa Kadadasal
5 “Ket no dumasal kamo andiꞌ moyo sara nin arigen a kano wadiꞌ ket masantos sara. Rabay-rabay ray dumasal nin nakaꞌdeng sa sinaguga tan iti sa dadalanan ta pigaw nin maꞌkit rasaran tutawo ket raywen rasara. Ibaritaꞌ ko komoyo, banaꞌ ta rinayo rasaraynan tutawo, kasaynan risibyen ran mangibwat konan Dios. 6 Baleꞌ siꞌkamo, no dumasal kamo, lumuob kamo sa kwarto moyo tan isadaꞌ moyay purta. Itaw dumasal kamo konan Dios a Ama moyo nin kai nin maꞌkit, a sya tamoꞌ a makaꞌkit, ket gun-gunawan nakamo.
7 No dumasal kamo, andiꞌ moyo nin paanrwen sa kasan kabalikasan a panguman-uman moyon saritaꞌ a kapadan gawaꞌ ran kai nin magtandaꞌ konan Dios. Ipaꞌkaꞌ ran rengꞌen nasaran Dios banaꞌ sa abaw a saritaꞌ ra. 8 Andiꞌ moyo sara nin arigen, ta baꞌyo moyo et nin dawaten, si Dios a Ama moyo, tandaꞌ nayna a matkap nin barang saya komoyo.
9 Bilang sa wanti ey dasal moyo:
O Dios, Ama mi nin isen sa langit,
mapagalangan ka kumon nin liso.
10 Magꞌadiꞌ kayna kumon sa sangkamundwan.
Maunor kumon a karabayan mo iti sa lutaꞌ
kapadan pakaunor isen sa langit.
11 Byan rakami kumon nin kanen min inawru-awrob.
12 Pirdunawen rakami kumon sa kukasalanan mi kapada nin
pammirduna mi anamaet konran nagkasalanan komi.
13 Andiꞌ rakami nin iyadap sa mabyat tuloy a panunubok tan
ikadayoꞌ nakami konan si sya a Kadukaan.c
14 Wanin, no pirdunawen moyo saray nagkasalanan komoyo, pirdunawen nakamo anamaet nin Dios a syay Ama moyo nin itaw sa langit. 15 Baleꞌ no kai moyo sara nin pirdunawen a nagkasalanan komoyo, kai nakamo anamaet lamang nin pirdunawen nin Ama tamo sa langit.”
Say Maipaꞌkaꞌ sa Pagkukulasyon
16 “Anamaet, no magkulasyond kamo, andiꞌ moyo nin ipaꞌkit sa bakas moyo nin bilang konran masantos kano wadiꞌ. Mabereng a bakas ra tan misket saran nikasamaꞌ tan kai sara nin mangusay ta pigaw nin ipaꞌkit ran mampagkulasyon sara. Ibaritaꞌ ko komoyo, banaꞌ ta rinayo rasaraynan tutawo kasaynan risibyen ran gun-guna mangibwat konan Dios. 17 Baleꞌ siꞌkamo, no magkulasyon kamo, kai kumon nin maꞌkit sa bakas moyo; magraꞌmos tan mangusay kamo, 18 ta pigaw nin kasan makatandaꞌ a mampagkulasyon kamo. Si Dios nin Ama moyo a kai nin maꞌkit, a sya tamoꞌ a makaꞌkit, ket gun-gunawan nakamo.”
Say Maipaꞌkaꞌ sa Uapes
19 “Andiꞌ kamo nin maninep nin kayamanan iti sa lutaꞌ ta say kayamanan iti ket tumaey tan maetꞌet ran insikto tan matakaw sa naninepan, 20 no kai edet, say kayamanan nin itaw sa langit a dinepen moyo ta kai nin tumaey tan kai nin maetꞌet nin insikto tan kasan makatakaw itaw. 21 Ket maninep kamodtaw anaod ta, no adti a kamiꞌnan nin mabli komoyo ket itaw anamaet a nakem moyo.”
22 “Say mata anamaet, baraꞌmo nin tyoꞌ nan lalaman. No maslag a mata nan sayay tawo, baraꞌmon mapalaway ya ngaꞌmin a intiron lalaman na. 23 Baleꞌ no makapoy a pangingikit na baraꞌmon nadedleman yay intiron lalaman na. Ket, no si palaway kumon nin kanakman na ket nagꞌin anan dedlem banaꞌ sa abas a uapes na, ani ana nin dedlem nin kabibyay na.”
24 “Kai nasara anamaet nin mapagsirbyan nin kusto nin sayay alilaꞌ a rway niduman amo na, ta no rwa ray amo na, mas kawaꞌnanen nayay saya dyan si saya, ket mas tutuo ya konan saya dyan konan saya. Wanin anamaet, kai moyo nin mapirngan a magsirbi konan Dios tan say umagawa kamon maningkap.
25 Kanyaꞌ edet nin ibaritaꞌ koyti komoyo: Andiꞌ kamo nin umaburido maipaꞌkaꞌ sa matkap moyo konan sitin byay a bilang say ikabyay, inumen, tan isket moyo. Say pipaꞌkaan nin byay moyo ket mas ararem dyan say pangangan tan pisisket.
26 Kiten moyo saray manuk-manok: Kai sara nin mampangmula ni mampangyatab o maninep nin kanen ra, baleꞌ mampagawan nasara nin Ama moyon itaw sa langit. Kai kamo para nin mas mabli kona dyan saray manuk-manok? 27 Anaod, mapaanro moyo kasi a byay moyo mataman nin sayay udas tamoꞌ no umaburido kamo?
28 Oꞌ a, ambaleꞌ a aburido kamo maipaꞌkaꞌ sa isket moyo? Imatunan moyo pan gumista a bakas nin buburak nin dikot. Kai nin magtrabaho o mangabel nin isket ra. 29 Baleꞌ ibaritaꞌ ko komoyo, abirno aninay pupustura nin seket na ni Adiꞌ Solomon ta wanin anay yaman na, kai ya et nakapisket nin kapadan bista nan mataman saya tamoꞌ sa sain nin buburak. 30 Ket no mapasketan nan wanin kabista nin Dios a dudikot a isen sawanin baleꞌ dilap ket magwaꞌ a ipuor tamoꞌ sa syang, kai na kasi nin ibi a isket moyo? Aninay kababwan nin pagmamatalek moyo!
31 Kanyaꞌ nin, andiꞌ kamo nin umaburido maipaꞌkaꞌ sa ikabyay moyo, a no adti kamo mangalap nin inumen, kanen, tan isket moyo. 32 Sain nin bubagay a iti tanan pirmi sa nakem ran tutawon kai nin magtandaꞌ konan Dios. Anaod, main ya a Ama moyo sa langit nin magtandaꞌ a matkap moyo in nin bubagay. 33 Siꞌkamo baleꞌ, matkap a say muꞌna-muꞌna nin iti sa kanakman moyo ket say maiyadilanta a maipaꞌkaꞌ sa pagꞌaadiꞌ nan Dios tan say pangngawaꞌ moyo nin say mapteg para kona, ket ibi nayti ngaꞌmin nin matkap moyo.
34 Kanyaꞌ nin andiꞌ moyo nin kaaburidwan a mangyadiꞌ sa adapen a awro; adapen moyoyna liꞌ no isen ana. Kustoynay matkap moyon adapen sawanin.”