2 Wana ni Jesus konra, “Wanti e no dumasal kamo:

5 Ket wana et konra, “Bilang wadiꞌ, main nin saya komoyo a nako sa bali nan sayay amigo na sa kapikngaꞌ nin yabi tan wana kona, ‘Amigo, paꞌdaman nako pan magwaꞌ kon ipamakan 6 ta main nin amigo kon rinmateꞌ nin ibat nagbyahi. Ket kasan maipadungo ko kona.’ 7 Ket magwaꞌ a iꞌbat na nin itaw ya sa luob nin bali na, ‘Andiꞌ nako nin isturbwen ta nakatalak yaynay purta mi. Mampidaꞌ kami ana nin saray aꞌnak ko, tan idapen koynay mibangon ta pigaw nin byan katan animan.’ 8 Ibaritaꞌ koyti komoyo, mataman nin kai ya nin mibangon tan mami a main nin bali banaꞌ sa piamigo ra, wanin man no mapasuet yan kadadadaꞌ na nin amigo na ket mibangon yan lamang ta pigaw nin ibi nay matkap na.

9 Kanyaꞌ anaod nin, kidawat kamo konan Dios nin say matkap moyo ket byan nakamo. Ituluy-tuloy moyoy manumog kona ket tulungan nakamon manumog sa mantikapen moyo. Kumutana kamo ket pasrepen nakamo. 10 Anaod, sarba ran kidawat, mabyan sara. Sarba ran manumog, makadumog sara; tan sarba ran kumutana, pasrepen sara. 11 Bilang wadiꞌ, saya kan ama, ani byan man ulay^c a anak mo no kidawat yan kunaꞌ? 12 O, byan man sipitan no kidawat yan salay? 13 No siꞌkamo nin tawo nin sikakasalanan ket tandaꞌ moyoy mamin mabistan bubagay konran aꞌnak moyo, lalo yayna si Ama a itaw sa langit. Ibi ta ibi nayan Dios a Ispirito na konran manawat kona.”

14 Niꞌsa, mampalakwanen naya ni Jesus a ispiriton dukaꞌ nin namaumel konan sayay lalaki. Sin napalakwan nayaynayti, nakapagꞌirgo yayna a tawon naumel ket nakaꞌngap sara ngaꞌmin a tutawodtaw. 15 Baleꞌ wanran raruma, “Banaꞌ ta si Beelzebul a syay uunuren ran uispiriton dukaꞌ ket binyan nayan pakayadiꞌ na, makapalakwan yan ispiriton dukaꞌ.” 16 Saray raruma anamaet, sinariꞌ ran dinawat kona ni Jesus a mangwaꞌ yan pakaꞌkitan a sya ket nibakiꞌ nayan Dios.

17 Baleꞌ si Jesus, tandaꞌ na a iti sa nakem ra kanyaꞌ nin wana konra, “No si sayay nasyon ket matau-tao tan milalaban saray tutawo na, kai ya nin magnayon. Wanin anamaet, no sa sayay pamilya ket mapuruk-purok nin mikukuntra a saya tan saya, misisyay liꞌ a piratꞌanan ra. 18 Wanin anamaet kona ni Satanas tan saray kalalamoꞌ na; no mikukuntra sara, paꞌno a katutuloy nin pagꞌaadiꞌ na?

Anaod, wamoyo a mamalakwan akon uispiriton dukaꞌ yupaꞌ kona ni Beelzebul. 19 No wanin, sara pa a tumutumbok moyo, sa siꞌno edet nin pakayadiꞌ sara mamalakwan nin uispiriton dukaꞌ? Saran mismo a mamatutuo nin abas kamo sa manꞌiparsa moyo kongko! 20 Ket sawanin, ta say pakayadiꞌ kon mamalakwan nin ispiriton dukaꞌ ket ibat konan Dios, ipadar nin sayti a rinmateꞌ anay udas nin magꞌadiꞌ yaynadti a Dios.

21 Si Satanas, bilang yan sayay tawon maksaw a di-armas ket no gwardyawan nayay palasyo na, kai gapo nin mangno a main na. 22 Baleꞌ, no si sayan mas maksaw dyan sya ket kalabanen tan daegen ya, galten nan siti a armas nin nagpyawan na ni Satanas, miꞌsa na nin tawꞌe-tawꞌen a main na.”

23 Sawanin, wana et ni Jesus, “Si siꞌnuman a kai nin kiayon kongko, kuntra ya kongko. Si kai nin kipaninep kongko, mamisisyak ya.”

24 Ket nituloy na ni Jesus nin wana, “No napalakwan yaynay ispiriton dukaꞌ a nakasrep sa sayay tawo, mako ya nin mikadaw sa makrang nin lugar nin maningkap nin piikapan na. No kasan maꞌkit na ket wana sa nakem na, ‘Sumubliꞌ akodtaw pa sa ibwatan ko.’ 25 Ket sumubliꞌ ya anaod tan marateꞌ nayan naringgasan tan nasider. 26 Edet, mako ya managyat nin pito ra et nin ispiriton mas dukaꞌ et dyan sya miꞌsa sumrep saran miikap konan sitaw a tawon ibwatan na. Anaod, mas grabi et liꞌ a kapapaꞌsar nan siin a tawo dyan sin nuꞌna.”

27 Sin sain, sin kapresan nan mampagꞌirgo ni Jesus, main nin sayay babayin tinmaꞌway a wana, “Makarmaꞌ ya anaod si ina mo nin nangiyanak tan namasuso komo.”

28 Baleꞌ wana ni Jesus, “Mas makarmaꞌ ya baleꞌ a mampangrengeꞌ tan mantumulok sa manꞌibaritaꞌ nan Dios.”

29 Sin manꞌaribungbungan rayaynan abaw nin tutawo, wanan nituloy ni Jesus, “Siꞌkamon tutawo sawanin, sabtan kadukaan moyo. Kidawat kamon pakaꞌkitan a say pakayadiꞌ ko ket ibat kona nin Dios baleꞌ kasan pakaꞌkitan a ipaꞌkit komoyo no kai kal-la tamoꞌ kapadan si naꞌkit a nangyadiꞌ kona ni Jonas^d sin saytaw. 30 Say nangyadiꞌ kona ni Jonas ket pammatalad nan Dios konran taga Ninive. Wanin anamaet, say mangyadiꞌ kongko nin si Pinaitawo ket pammatalad nan Dios komoyon tutawo sawanin.

31 No Awro liꞌ nin Manintinsya yay Dios, mataman nin si Rina a taga Sheba ket magtistigos ya liꞌ a manepeg nin dusawen kamo, ta ibat sa adayoꞌ ket mako na nin rengꞌen a madudunong nin akay na ni Adiꞌ Solomon. Baleꞌ siꞌkamo, anta iti yayna sawanin komoyo a mas et a kadunungan na dyan si Solomon ket kai moya gapo nin akuen. 32 No Awro liꞌ nin Manintinsya yay Dios, umadap sara liꞌ a taga Ninive ket ibaritaꞌ ra liꞌ a manepeg nin dusawen kamo, ta sara, sin narngeꞌ ray nipata-patandaꞌ na ni Jonas, nagbabawiꞌ sara tan ginurutan raynay dukaꞌ a pigagawaꞌ ra. Siꞌkamo baleꞌ, iti ya sawanin komoyo a mas ataꞌgay et a pakataros dyan si Jonas baleꞌ kai moyo nin manꞌakuen a akay na.”

33 Nagꞌirgo yaynaet si Jesus konra a wana, “Kasan siꞌnuman a manulsol nin tyoꞌ miꞌsa ikwa naya sa maadin lugar o sakban nayan salop, no kai edet, ikwa naya sa pangngitukduan ta pigaw nin sarba ran sumrep sa bali ket mapalawayan sara. 34 Say mata mo anamaet ket bilang tyoꞌ nin lalaman mo. No limpyoy pangingikit mo ket, si intiron lalaman mo baraꞌmon lison mapalaway ya. Baleꞌ no main nin dipikto, bilang nin si intiron lalaman mo ket nadedleman ya. 35 Anaod, siguradwen moyon say palaway nin mampalawayan kamo ket kai nin mandumedlem iti komoyo. 36 Sawanin, no say intiron kanakman moyo ket mapalaway tan kasa gapon madedlem a parti, mapalaway anamaet a intiron kinatawo moyo ket, mapalaway a bilang sa sayay lampadawan nin say salag na mamalaway komoyo.”

37 Legꞌan nan mampagꞌirgo ni Jesus, main nin sayay Pariseo nin nanagyat konan mangan itaw konra, kanyaꞌ nin nako yadtaw konra si Jesus tan dinmungo yaynan mangan. 38 Baleꞌ nakaꞌngap yay Pariseo sin naasikaso nan kai na nin tinumbok ni Jesus a ritwal nin manguyas yapoꞌ nin gamet baꞌyo nin mangan.^e 39 Ket wana ni Jesus kona, “Siꞌkamon Pariseo, man-gawꞌen moyon maong a kaugalian moyo bilang sa pangriringgas moyon rikor nin tasa tan lipong moyo, baleꞌ say kanakman tan pigagawaꞌ moyo ket napnoꞌ nin kaaguman tan kadukaan. 40 Kalawakaw kamo! Amboꞌ para a si Dios a syay nangwaꞌ nin lalaman tamo ket syan lamang a nangwaꞌ nin kanakman tamo? 41 Kanyaꞌ nin palinisen moyo yapoꞌ a iti sa kanakman moyo, miꞌsa mangibwat sa malinis a kanakman moyo ket mami kamo konran makatkap, ket malinis kamo anaod.

42 Kadoꞌ kamoyna, siꞌkamon Pariseo! Wanin ta manꞌibi moyo konan Dios pati say kakapuloꞌ nin mula moyon ipangrikado moyo tamoꞌ, baleꞌ mampauryan moyoy mas maalagan ipagwaꞌ nin Gugan-gan bilang say pangwaꞌ moyon mapteg tan say pangangadoꞌ konan Dios. Sayti a manepeg nin gawꞌen moyo legꞌan moyon gawꞌen lamang a raruma.

43 Kadoꞌ kamoyna, siꞌkamon Pariseo! Wanin banaꞌ ta maalaga komoyoy tumekreꞌ sa tekrean para konran impurtantin tutawo sa sinaguga tan say pagalang-galangan ran tutawo sa publiko.

44 Kadoꞌ kamoyna! Bilang kamon nanabunan a kasan marka kanyaꞌ nin mangkadaꞌda-daꞌdaan ran tutawo ket kai ra tandaꞌ nin nadulingatan^f sarayna.”

45 Sin sain, main nin saya konran abugado sa Gugan-gan a inumbat kona ni Jesus a wana, “Ser, sa sain a nibaritaꞌ mo ket masakitan anamaet a nakem mi a.”

46 Ket wana ni Jesus, “Oꞌ, kadoꞌ kamoyna anamaet, siꞌkamo nin abugado! Wanin ta mampabyaten moyoy ipatumbok moyo konran tutawo nin dandani kai nin maꞌwit, baleꞌ ni bugaꞌ ket kai kamo tumulong.

47 Kadoꞌ kamoyna ta mampangwaꞌ kamon alalakin lapida banaꞌ ta napati sarayna a prupita a saran lamang a nipapati ran saray pupuon moyo. 48 Mapatnag a kiayon kamo sa ginwa-ginwaꞌ ra ta sara anaod a namapati konran saray prupita, miꞌsa siꞌkamo anamaet a mampangwaꞌ nin mabibistan lapida ra. 49 Ket si Dios a sangkadunungan ya wana maipaꞌkaꞌ komoyo, ‘Ituloy koy mangibakiꞌ konra nin prupita tan ibabakiꞌ ko ket main sara konray patyen ra tan saray raruma ket duksaen rasara.’ 50 Kanyaꞌ nin, siꞌkamon tutawo konan sitin panaon, tandaan moyo et a lamang nin dusawen ta dusawen nakamon Dios banaꞌ sa nipangmati ran pupuon moyo konran sarba ran prupita nangibwat ana sin pinarsa yaytin mundo, 51 nangibwat sa nipangmati kona ni Abel angga kona ni Zacarias a pinati sa pisaꞌlean nin altar tan Timplo. Oꞌ, siꞌkamon tutawo konan sitin panaon a umbat sa sarban sayti.”

52 Wana et ni Jesus, “Kadoꞌ kamoynan talaga, siꞌkamon abugado maipaꞌkaꞌ sa Gugan-gan, ta ginlat moyo in konran tutawo si baraꞌmon tumbok sa pakataros sa maipaꞌkaꞌ sa pakaisalba a mangibwat konan Dios. Siꞌkamo, kai moyon lamang inakoꞌ in a pakaisalba. Wanin et a sidaen moyoy kaisipan ran tutawo ta pigaw nin kai raytin lamang nin mataros.”

53 Sin nibwat yaynadtaw si Jesus sa bali, masager sara kona. Ket manꞌipamuspusan raynan saray Pariseo tan Madudunong sa Gugan-gan a mapagꞌirgo raya maipaꞌkaꞌ sa nagsikabarang a bubagay, 54 ta laꞌwanen raya awaꞌ a magkabisoꞌ ya sa pagꞌiirgo na ket main nin ipakasalanan ra kona.