Nibakiꞌ nasara ni Jesus nin Main Pakayadiꞌ a Pitumpuloꞌ tan Rwa
10
Sawanin, namiliꞌ ya si Jesus a Uunuren nin pitumpuloꞌ tan rwaa et a tutawo ta pigaw nin ibakiꞌ nasara. Miꞌsa nasara pinauꞌnayna nin sirwarwa sa barang babali tan lugar a keen na liꞌ.2 Sin sain, wana konra, “Abaw saray nasadyaꞌ nin masagyat nin sumrep sa Pagꞌadian. Wanin man, matalag saray mangyayatab, kanyaꞌ edet nin idasal moyo konan Dios a syay main nin ikon sa yayataben a mangibakiꞌ ya et nin saray trabahador nin kiyatab. 3 Mako kamoyna, baleꞌ pakandaꞌ kamo ta ibakiꞌ katamo nin baraꞌmo kamo liꞌ nin karniro nin nalibed ran mabayanin atap a uayep banaꞌ ta abaw sara liꞌ a tutawon kumuntra komoyo. 4 Andiꞌ kamo mangiꞌras nin pitaka o bag o sapatos; tan andiꞌ kamo paabaraꞌ nin kiirgo sa masnaan moyo sa dalan.
5 Sa adtiman a bali nin luuban moyo, wamoyo yapoꞌ, ‘Sapa kumon ta say bindisyon nan Dios ket magkamain konran mampiikap iti.’ 6 No maikanaꞌ saran mangrisibi, mangyadiꞌ in, baleꞌ no kai, magꞌin nin kasan kakanaan nan siin a bindisyon konra. 7 Sa balin mangrisibi komoyo, itaw kamo nin magtuloy ket andiꞌ kamo nin mangruba-rubariꞌ nin pagtuluyan. Kanen tan inumen moyoy animan a ipadungo ra komoyo, banaꞌ ta si sayay mampagtrabaho, manepeg a tubaleen ya. 8 Sa babalin keen moyo a akuen rakamo, kanen moyo no ani a ipadungo ra komoyo, 9 paandaen moyo saray main nin masakit konan sitaw a lugar, tan ibaritaꞌ moyo a adani anay pagꞌaadiꞌ nan Dios konra.
10 Ket sa babalin keen moyo a kai rakamo nin akuen, mako kamo sa kalsada ket wamoyodtaw, 11 ‘Mataman et say taꞌpok nan babali moyo a dinmalit sa ayi mi ket pagpagen mi nin mangipaꞌkit a siꞌkamon diri a mangikaꞌ nin lalaman moyon diri sa pakadusawan. Sigurado yayti baleꞌ: Adani anay pagꞌaadiꞌ nan Dios.’ 12 Ibaritaꞌ koyti komoyo: Sa awro nin paninintinsya nan Dios, mas mabyat liꞌ a dusan ibi na konran tutawo sa sayay babalin kai nin mangakoꞌ komoyo dyan sa dusan nibi na konran saray tutawo sa syudad nin Sodomab sin nuꞌnan panaon.
13 Ay anaod, kadoꞌ kamoyna, siꞌkamon tagadti sa Corazin tan siꞌkamon tagadti sa Betsaida! Oꞌ, abaw a mumilagron ginwaꞌ iti komoyo baleꞌ kai moyo nin nagbabawian a kukasalanan moyo. No itaw kumon nin ginwaꞌ in a mumilagro sa Tiro tan Sidon ket naꞌteng sarayna kumon nin nisulot nin langgutsi tan tinmekreꞌ sa abunsyang a tutawodtawc nin mangipaꞌkit nin pagbababawiꞌ ra sa kukasalanan ra. 14 Sawanin edet, ibaritaꞌ ko komoyo, sa Awro liꞌ nin Manintinsya yay Dios, mas mabyat liꞌ a dusa nin ibi na komoyo dyan konran taga Tiro tan taga Sidon. 15 Siꞌkamo anamaet nin tagadti sa Capernaum, ipaꞌkaꞌ moyo layin raywen rakamo sa langit! Kai gapo! Kasan sapon itampal rakamo sa impyirno!”
16 Ket wana et ni Jesus konran tumutumbok na, “Edet, saray rumngeꞌ sa minsahi moyo, siꞌkoy rinngeꞌ ra. Saray kai nin mangakoꞌ komoyo, siꞌkoy kai ra nin inakoꞌ. Ket saray kai nin mangakoꞌ kongko, parihoynan lamang nin kai raya nin inakoꞌ a namakiꞌ kongko.”
17 Sin sinmubliꞌ saraynay pitumpuloꞌ tan rwa kona ni Jesus, maririket saran tuloy tan wanra, “Uunuren, mataman nin saray ispiriton dukaꞌ ket tinmulok sara komi sin nigan-gan misara nin inusar mi a pakayadiꞌ nin nibi mo komi sa pannawag mi nin ngaran mo.”
18 Wana konra sin sain, “Naꞌkit koy nikanaboꞌ na sa nikatalo na ni Satanas nin bilang kimat sa langit. 19 Oꞌ, binyan katamon pakayadiꞌ nin madaeg moyoy nasakupan nin pakayadiꞌ nan sitin kalaban. Ket kai kamo nin mangno mataman no makadaꞌdaꞌ kamon ulay o sipitan. 20 Wanin man, amboꞌ ta mapasukoꞌ moyoy ispiriton dukaꞌ ket rumiriket kamo, no kai edet, ta nailista a ngaran moyodtaw sa langit.”
Napaririket ya si Jesus nin say Nagwaan ran Tumutumbok na
21 Banaꞌ sa nibaritaꞌ ran nangya-nangyadiꞌ yupaꞌ sa pakayadiꞌ nan Ispirito nan Dios, dinmasal ya si Jesus sa ririket na a wana, “Ama ko a Uunuren sa langit tan sa lutaꞌ, raywen kata ta kai mo nin nipatandaan konran madudunong tan di-adal nin tutawo a kukatutuꞌwan, no kai edet, nipatandaan moyti konran saray maayupaꞌ. Oꞌ a ta wanin a makapaririket komo, Ama.”
22 Sawanin, wana ni Jesus konran tutawo, “Nipagamet nayna kongko nin Ama ko nin gawꞌen tan tandaen a sarba. Kasan makatandaꞌ nin peteg kongko a siꞌkon si Anak na no kai syan si Ama ko tamoꞌ. Kasa anamaet nin katandaꞌ ya a Ama no kai siꞌkon si Anak na tan saray pilien kon pangipadaran kona.”
23 Sin sara tanay tumutumbok na a kaadap na ni Jesus, wana konra, “Makarmaꞌ kamo ta mangkaꞌkit moyoy bubagay a mampangyadiꞌ sawanin! 24 Ibaritaꞌ koyti komoyo, abaw saray prupita nan Dios tan uadiꞌ intaw a masulit ran maꞌkit tan marngeꞌ ti nin bilang sa pakaꞌkit tan pakarngeꞌ moyo sawanin kongko, ket kai nin nangyadiꞌ ti sin panaon ra.”
Maipaꞌkit no Paꞌnoy Mangadoꞌ Yupaꞌ konan Sayay Taga Samaria
25 Sayay awro, saya konran abugado sa Gugan-gan a nako kona ni Jesus nin mangusisaꞌ kona. Kanyaꞌ nin nitepet na, “Maistro, ani a gawꞌen ko ta pigaw nin magaꞌmuran koy anggan-angga nin byay a iti konan Dios?”
26 Ket wanan niꞌbat ni Jesus, “Ani a nisurat na ni Moises itaw sa Libron Gugan-gan? Ani a tandaꞌ mo nin manꞌigan-gan itaw?”
27 Ket wanan ubat nan sitin abugado, “Aduen may Uunuren a si Dios mo nin intiron kanakman mo, nin intiron byay mo, nin intiron pakababaꞌ mo tan nin intiron kaisipan mo, tan aduen moy kapada mon tawo a kapada nin pangangadoꞌ mo sa lalaman mon diri.”d
28 Wana ni Jesus, “Kusto a ubat mo; wanin a gawꞌen mo ket main nin anggan-angga nin byay mon iti konan Dios.”
29 Ket sitin saya konran abugado, banaꞌ ta rabay nan sustinyen a iti ya sa katunungan, tinepetan nayaynaet si Jesus a wana, “Siꞌno a kapada kon tawo nin matkap kon kawaꞌnanen?”
30 Wanan niꞌbat ni Jesus a nipadalan sa sayay alimbawaꞌ, “Main nin sayay lalakin kapada tamon Israelita nin ibat sa Jerusalem a manlumusong yan mako sa Jerico. Ket sinaneban rayan tulisan sa dalan. Sinamsam ray seket na, binalba-balbal raya miꞌsa linakwanan rayan mangkamati.
31 Sin sain, naibansag a dinmalan yadtaw a sayay padiꞌ a kapada nan Israelita. Ket sin naꞌkit nayaytaw si mampangirangep nin sakit nin sugat na, pinalꞌisan nayan nituloy nay nako sa keen na.
32 Main anamaet nin sayay katulungan ran pupadiꞌe nin dinmalan itaw. Naꞌkit nayay tawon binalba-balbal baleꞌ linabasan nayan lamang.
33 Kaaram, main et nin sayay lalakin linmabas baleꞌ taga Samaria ya. Sin naꞌkit nayay lalakin mangkapaidap, nanaboꞌ a ingangaꞌdo na kona. 34 Kinadanyan naya tan tinambar nan arak tan ladak a sugat na miꞌsa na nin binerber. Kayadiꞌ, niruran naya konan asno na miꞌsa naya niyater sa sayay balin pagtuluyan tan nipaasikaso naya. 35 Sin sumunor a awro, nami yan kwartaf konan main nin bali tan wana, ‘Alilaen maytin tawo ket no magkurang ti sa magastos mo kona, bayadan ko liꞌ no sumubliꞌ ako.’ ”
36 Sawanin, tinepetan naya ni Jesus tin abugado a wana, “Siꞌno kadiꞌ konran tuloy tawon linmabas sa angan-angan mo a main nin pangangadoꞌ konan sinaneban ran tulisan?”
37 Wanan niꞌbat nin abugado, “Sitaw si nangipaꞌkit nin ingangaꞌdo kona.”
Ket wana ni Jesus, “Kusto a wamo. Mako kayna ket mangadoꞌ ka nin wanin.”
Parable of the Good Samaritan
Piniliꞌ na ni Maria a say Mas Maalaga
38 Nituloy na ni Jesus tan saray tumutumbok na a pako ra sa Jerusalem ket nakarateꞌ sara sa sayay babali. Ket itaw pinagtuloy nasara sa bali ra nin sayay babayi nin say ngaran na ket Marta. 39 Main nin busat na ni Marta a say ngaran na ket Maria. Ket tinmekreꞌ yayti sa danin ayi na ni Jesus ta rengꞌen nay iyakay na. 40 Baleꞌ si Marta, itaw yan pinasyan paga na sa abaw a gawꞌen nan pangngisadyaꞌ ket nako ya kona ni Jesus tan wana, “Ser, kai moyo layi nin mangkaasikaso a man-gawꞌen koyna ngaꞌmin nin bukud-bukod a sarban gawaꞌ? Sapa no ibaritaꞌ moyo konan busat ko nin tulungan nako anamaet.”