Matalag saray Kumanaꞌ nin Sinagyat sa Pagꞌadian
22
Nami ya anamanaet konra nin sayay pangingiyarig si Jesus. Wana, 2 “Say pagꞌaadiꞌ nan Dios ket maiyarig sa nangyadiꞌ iti konan sitin isturya. Main nin sayay adiꞌ a nanadyaꞌ ya para sa alakin punsya ta ikasal yay anak nan lalaki. 3 Nibakiꞌ nasaray aripen na nin keen rasara kayaban taw saray tutawon sinagyat naynan gindat, baleꞌ saraytin sinagyat na ket kai ra rabay a mako. 4 Ket nangibakiꞌ ya anamanaet nin raruman aripen na a wana konra, ‘Ibaritaꞌ moyo konran saraytaw saray sinagyat ko a narateꞌ anay bansal. Napati saraynay baka tan saray raruma et nin sinunson nin uayep tan nakasadyaꞌ anay sarba. “Tamoyna sa bansal,” wamoyo.’5 Baleꞌ saraytin tutawon sinagyat kai sara nin nangasikaso. Nituloy ra no ani a man-gawꞌen ra. Main nin sayan nako sa gagawaꞌ na, tan main anamaet nin sayan nako sa kumirsyo na. 6 Saray raruma baleꞌ, dinakep rasaray raruma konran aripen, tinuyaꞌ-tuyaꞌ rasara miꞌsa rasara nin pinati. 7 Say sager nan adiꞌ! Nibakiꞌ nasaray susundaloꞌ na nin patyen rasaraytaw saray nangmati konran aripen na tan puuran rayay syudad ra. 8 Kaaram, dininep nasara nin adiꞌ a uaripen na tan wana konra, ‘Nakasadyaꞌ anay sarba para sa bansal baleꞌ saray tutawon sinagyat ko, kai sara maikanaꞌ nin sinagyat konan sitin bansal. 9 Kanyaꞌ nin mako kamo sa dudalan tan sagyaten moyo sara ngaꞌmin a tutawon maꞌkit moyo.’ 10 Ket nako saray aripen sa dudalan tan sinagyat rasara ngaꞌmin a tutawon naꞌkit ra, maong man o dukaꞌ a tutawo. Ket napnoꞌ yan bisita a luob nan palasyo nan adiꞌ.
11 Nako yay adiꞌ sa kamiꞌnan ran bisita nin kikiten nasara. Main nin sayan naꞌkit nan kai nin nisket nin seket kibansal. 12 Ket wana kona, ‘Amigo, kai ka nin nisket nin seket kibansal. Paꞌno nin nikasrep mo?’ Ket si tawo kai ya nin nakaꞌbat. 13 Kanyaꞌ nin wanan adiꞌ konran katulong na, ‘Baruren moyoy ayi tan gamet na tan itampal moyadtaw sa rikor nin pinasyan dedlem; itaw ket main nin umasisit tan umagrem tan ngumaretenget a ngipen ra banaꞌ sa pakapaidap tan bereng.’ ” 14 Wanan nilamoꞌ ni Jesus, “Pageꞌ a abaw saray sinagyat nan Dios, baleꞌ daikleng saray napiliꞌ nan makasrep sa Pagꞌadian na.”
Kalꞌuten raya Kumon a Cristo nin saray Pupangulo
15 Nibwat saray Pariseo tan niplano ra no paꞌno rayan makalꞌot si Jesus sa pagꞌiirgo na. 16 Say ginwaꞌ ra, nibakiꞌ rasara kona ni Jesus a umno ra konran tumutumbok ra nin kalamoꞌ rasaray umno ran tawon ayon kona ni Adiꞌ Herodes. Mikuntra saraytin pulitiko ket wanra kona ni Jesus, “Maistro, tandaꞌ mi nin matunong kan tawo. Say pangangakay mo nin no ani a rabay nan Dios nin gawꞌen ran tutawo ket tutuo, tan kasan tawon ikaliꞌmo mo ta mampari-parihwen moy tutawo. 17 Ket, rabay miyaytin tepeten komo: Maitukoy para, o kai, sa Gugan-gan tamo no mamayad atamon buis konan Impirador nan Romaa?”
18 Baleꞌ tandaꞌ na ni Jesus nin dukaꞌ a gagara ra, kanyaꞌ nin wana konra, “Siꞌkamon miwadiꞌ-wadiꞌ! Mayin ta mansubuken rako? 19 Ipaꞌkit moya in pa kongko si platan ipamuis!”
21 “Si Impirador nan Roma,” niꞌbat ra.
“No wanin edet,” wana ni Jesus konra, “isubliꞌ moyo konan Impirador a ikon na, tan isubliꞌ moyo anamaet konan Dios a ikon na.”
22 Nakaꞌngap sara sa wantin niꞌbat na ket nibwat sara.
23 Konan sitaw a lamang nin awro, main nin Saduseo nin nako kona ni Jesus ta tepetan raya. Sarayti saray Saduseo ket kai ra nin tepren a mapasubliꞌ sara liꞌ nin mabyay a nunati ana. 24 “Maistro,” wanra kona, “niyakay na ni Moises sa nisurat na a no main nin mitraasawa ket nati yay lalaki nin kasan anak ra, manepeg a si busat na nin lalaki ket ikasal nayay babayin nabalo ta pigaw nin manganak saran ikwintan anak nan sitaw si nati.b 25 Sawanin, main intaw nin pito ray mibubsat nin lulalaki. Nangasawa yay kaka baleꞌ nati ya nin kasan anak. Ket si aryen na nikasal nayay babayi, 26 baleꞌ nati yayti anamaet a lamang nin kasan anak ra. Wanin anamaet a ginwaꞌ ran raruma, si ikatlo anggan si ikapito, baleꞌ pari-parihon lamang a nangyadiꞌ konra, nati saran kasan anak. 27 Kalansuyutan, si babayi anamaet a nati. 28 Ket sawanin, no napasubliꞌ sarayna liꞌ nin mabyay a nunati, siꞌno edet liꞌ konra a main nin asawa kona ey, ta saray pito ket nagꞌin nin asawa raya?”
29 Wanan niꞌbat konra ni Jesus, “Mangkalingo kamo! Paꞌno ket kai moyo nin mangkataros a wana sa Kasuratan o say maipaꞌkaꞌ sa pakayadiꞌ nan Dios! 30 Anaod, no napasubliꞌ sarayna liꞌ nin mabyay a nunati, baraꞌmo sarayna liꞌ nin uanghil itaw sa langit a kai sarayna nin mangalamoꞌ o kikalamoꞌ. 31 Ket say maipaꞌkaꞌ sa katutuꞌwan nin isusubliꞌ nin mabyay, kai moyo para nin nabasa-basaytin wana nin Dios komoyo sa Masanton Kasuratan maipaꞌkaꞌ konran pupuon moyo? 32 Wana, ‘Siꞌko et a lamang a Dios na ni Abraham, si Dios na ni Isaac, tan si Dios na ni Jacob.’c Syimpri a, si sayay nati ana, kai yayna nin makapangrayo konan sayay dios. Kanyaꞌ nin mangkabyay sara in et saray nibaritaꞌ nan Dios a syay Dios ra.”
33 Pinasyan nipakaꞌngap ran tutawon nakarngeꞌ sa wantaw a wana ni Jesus.
34 Saray Pariseo, sin natandaan ran kasan nagwaan ran Saduseo kona ni Jesus, nagꞌiirgo sara anamanaet. 35 Ket saya konra nin abugado sa Gugan-gan a nako nin nanepet kona ni Jesus ta pigaw nin usisaen naya. 36 Wana, “Maistro, sa sarban Gugan-gan a nisurat nin nibi na ni Moises, ani ya a sangkaimpurtantiwan nin matkap nin tukiden?”
37 Niꞌbat na ni Jesus,
“ ‘Aduen may Uunuren a si Dios mo nin intiron kanakman mo, nin intiron byay mo, tan nin intiron kaisipan mo.’d
38 Siin a sangkaimpurtantiwan tan sangkauꞌnawan nin matkap nin tukiden a gan-gan. 39 Main et nin saya nin kapada nan lamang nin siin. Wana,
‘Aduen moy kapada mon tawo nin kapada nin pangangadoꞌ mo sa lalaman mon diri.’e
40 Sa saytin gugan-gan, naipatukdoꞌ a intiron Gugan-gan a nisurat na ni Moises tan say uakay ran prupita.”
Siꞌno ya nin Puri a Cristo
41 Sin nadinep sara et a Pariseo, wanan nitepet ni Jesus konra, 42 “Ani a iti sa wamoyo maipaꞌkaꞌ konan Cristo? Siꞌno ya nin puri?”
“Puri naya ni Adiꞌ David,” wanran niꞌbat.
43 “Ket no wanin, mayin edet a ‘Uunuren’ a nipanawag na ni David kona sa nipaninreg nan Ispirito nan Dios? Sayti a wana ni David,
44 ‘Wanan Dios konan Uunuren ko:
“Tumekreꞌ kadti sa pawanan ko
mintras nin mampasukuen kosara komo a sarba ran kukalaban mo.” ’f
45 Si Adiꞌ David a mismo, tinawag naya nin Uunuren a Cristo nin nipangakoꞌ kona, ket paꞌno edet a sya ket puri naya ey?”
46 Ket kasa gapo nin nakaꞌbat kona ni Jesus. Edet, nangibwat ana sin sain, kasayna gapo nin nakatpel nin nanepet-tepet kona.