Igalang rayan Tutawo nin Bilang sayay Adiꞌ a Cristo
21
Ket adani sarayna si Jesus sa syudad nin Jerusalem ta itaw sarayna sa bandan baryon Betfage nin adani sa Talugtog Olibo. Ket pinauꞌna nasaray rwa konran tumutumbok na, 2 a wana konra, “Mako kamo sa baryo a manꞌadapen moyo. Ket karateꞌ moyodtaw main nin tampor nin maꞌkit moyon naipuged nin asno a kalamoꞌ nayay uybon na. Usbagen moya sara sa nakaipugedan na tan iꞌras moyo saradti kongko. 3 No main nin manita komoyo sa man-gawꞌen moyo, ibaritaꞌ moyo kona, ‘Matkap nasarayti nin Uunuren,’ ket tampor a umaburoy yan kalapen moyo sara.”4 Sain, nangyadiꞌ ta pigaw nin matukid a nipaibaritaꞌ naynan naꞌteng nin Dios konan prupita a wana,
5 “Ibaritaꞌ moyo konran taga Siona,
‘Syayna e a adiꞌ moyo!b
Maayupaꞌ a nakem na, ket sya manrumateꞌ yan
rinmuran tamoꞌ sa ayep nin ipammaguroy,
sayay uybon nin asno.’ ”c
6 Ket nako saraynay nibakiꞌ tan ginwaꞌ ray nipagwaꞌ na ni Jesus konra. 7 Niꞌras raya konay asno tan si uybon na. Nisapin ray kapa ra konra ket rinmuran ya si Jesus. 8 Abaw sara konran tutawodtaw a banaꞌ sa alakin pangigalang ra kona ni Jesus ket, niyapra-aprak ray kukapa ra sa dalanan na, tan saray raruma ket nampi-nampiꞌ saran susangan kukayo tan niyapra-aprak ra anamaet a lamang sa dalanan na. 9 Pinasyan kaꞌbawan ran tutawo, saray raruma iti sara sa uꞌna na ni Jesus tan sakalako saray mantumumbok kona. Wanra nin nitaꞌwa-taꞌway,
“Marayo yay si puri na ni Adiꞌ David!
Nabindisyunan nayan Dios a
nibakiꞌ na nin manrumateꞌ anadti sawanin kontamo!+\xo.
Marayo yay Dios itaw sa langit!”
10 Sin rinmateꞌ yadtaw si Jesus sa Jerusalem, sabtan nipakaꞌngap ra ngaꞌmin nin tutawodtaw. Pittepet ra, “Siꞌno ya in?”
11 “Sya si Jesus a sayay prupita nin taga Nazaret itaw sa Galilea,” wanran niꞌbat nin saray abaw nin tutawon nikialuyon kona ni Jesus.
Nipatunong nan Cristo a Kapapaꞌsar sa Timplo nan Dios
12 Nako ya nin linmuob sa sakop nan Timplo nan Dios si Jesus baleꞌ itaw naratꞌanan nasaray mampaglakoꞌ. Ket pinala-palakwan nasara tan saray mampanaliw itaw nin say bubagay a idaꞌton konan Dios tan tinali-talimbwag nay lulamisawan ran maninilin kwarta tan say tutekrean ran maglalakoꞌ nin kalapati. 13 Wana konra, “Kai para naisurat a wana nin Dios, ‘Si Bali ko, ket pangaranan raya nin lugar nin dadasalan.’d Baleꞌ siꞌkamo,” wana ni Jesus konra, “man-gawꞌen moyan pididinepan ran mannakaw!”e
14 Nako saradtaw kona ni Jesus sa sakop nan Timplo nan Dios a bulag tan saray pilay ket pinaandaꞌ nasara. 15 Saray Pupangulon Pupadiꞌ tan saray Madudunong sa Gugan-gan, masager saran tuloy kona ni Jesus sin naꞌkit ray mumilagro nin ginwaꞌ na tan sin narngeꞌ ray wanran uaꞌnak itaw nin nitaꞌwa-taꞌway, “Raywen tamoya si puri na ni Adiꞌ David!” 16 Kanyaꞌ nin wanra kona, “Mangkarngeꞌ mo in para say manꞌitaꞌwa-taꞌway ran uaꞌnak?”
“Oꞌ, mangkarngeꞌ ko,” wanan niꞌbat ni Jesus. “Kai moyo para nin nabasa-basayti nin wana sa Masanton Kasuratan? Wana, ‘Si Dios, niyakay nasaray uaꞌnak tan mataman nin saray uabing nin mangrayo nin tutuo kona.’f ”
17 Miꞌsa linakwanan nasara ni Jesus. Nibwat ya sa syudad tan nako ya sa Betania tan itaw ya nin naꞌlek konan sitaw a yabi.
Pangipatukduan a Pagmamatalek sa say Gawaꞌ sa Pagꞌadian
18 Kinabuklasan, sin mansumubliꞌ yayna si Jesus sa Jerusalem, ginmitil ya. 19 Sa rigrig nin dalan ket nakaꞌkit yan kayon igos. Nako yadtaw sa kamiꞌnan na baleꞌ kasa gapo nin maꞌkit nan bunga na no kai kal-la bulong tamoꞌ, kanyaꞌ nin wana konan kayo, “Anggan makaꞌnuman kai kayna gapo nin gumunga.” Amboꞌ nin naꞌteng, nalanes yay kayo.
20 Nakaꞌngap saray tumutumbok sin naꞌkit ra a nangyadiꞌ konan kayo. Wanra, “Paꞌnon nangyadiꞌ a nalanes yan bigraꞌ ti si kayo?”
21 Wanan niꞌbat ni Jesus konra, “Ibaritaꞌ koyti komoyo a no magmatalek kamo konan Dios tan kai kamo gapo nin magdwadwa, magwaꞌ moyo anamaet a ginwaꞌ ko konan sitin kayo. Amboꞌ tamoꞌ in. Magwaꞌ moyo et nin ibaritaꞌ konan sitin talugtog, ‘Gumlat kadsen tan mako ka sa taaw,’ ket mangyadiꞌ a wamoyo. 22 Anaod, animan a dawaten moyo konan Dios, no magmatalek kamo nin ibi na, gawꞌen na.”
Ipaꞌkaꞌ ran Pupangulo a Kasan Biang na ni Jesus sa Nasakupan ra
23 Nako ya anamanaet itaw sa sakop nan Timplo nan Dios si Jesus tan nangyakay ya konran tutawo. Sin kapresan nay mampangyakay, kinmadani sara kona a Pupangulon Pupadiꞌ tan saray Mangatuntawo tan nitepet ra kona, “Ani a kanepegan mon mangwaꞌ nin sain say man-gawꞌen mo? Siꞌnoy nami komo nin pakayadiꞌ nin gawꞌen mo in?”
24 Niꞌbat na ni Jesus, “Ibaritaꞌ ko komoyo no ani a pakayadiꞌ ko nin gumwaꞌ nin saytin bubagay no ubatan moyayti si tepet ko. 25 Siꞌnoy namin kanepegan nan mamawtismo ni Juan, si Dios para o say tawo?”
Nagꞌiirgo sara nin wanra, “Ani kadiꞌ a iꞌbat tamo? No ibaritaꞌ tamon ‘si Dios’, ibaritaꞌ na kontamo, ‘Mayin edet a kai moya nin timper si Juan?’ 26 Ket no ibaritaꞌ tamo anamaet, ‘Say tawo,’ makapaliꞌmo ta bangliꞌ no ani a gawꞌen ran tutawo banaꞌ ta tepren ran saya yan prupita si Juan.” 27 Kanyaꞌ nin niꞌbat ra kona ni Jesus, “Kai mi nin tandaꞌ.”
Ket wana anamaet konra, “No wanin, kai koynamaet nin ibaritaꞌ komoyo no ani a kanepegan kon mangwaꞌ nin man-gawꞌen ko.”
Maipwira saray Nangipyawan nan Pagꞌadian nan Dios
28 Wana ni Jesus konra, “Ani a maibaritaꞌ moyo konan siti e? Main nin sayay ama nin main nin rwa ray aꞌnak na. Nako ya konan saya tan wana kona, ‘Andoy, mako ka nin magtrabaho sa gagawaꞌ konan sitin awro.’
29-30 ‘Oꞌ, Tatay,’ wanan niꞌbat nin anak, baleꞌ kai yan lamang nin nako. Nako ya anamaet a ama konan ikarwa tan nibaritaꞌ naytaw nin lamang say nibaritaꞌ na konan saya.
‘Andyak,’ wanan niꞌbat, baleꞌ nainsanan nin bugaꞌ, nakapanemtem ya ket nako yan lamang. 31 Sawanin, siꞌno ey a tinmulok sa karabayan nan ama ra?” nitepet na ni Jesus.
Niꞌbat ra kona, “Sitaw si nako nin lamang.”g
Ket wana ni Jesus konra, “Ibaritaꞌ koyti komoyo a saray dukaꞌ a tutawo a bilang saray maniningir nin buis tan saray dukaꞌ a bubbayi, uꞌnawen nasaran pagꞌurayan nin Dios dyan siꞌkamo, 32 ta nako yadti si Juan a Mammawtismo tan niyakay na komoyo a mapteg nin dalan nin pagkabyay ket kai moya nin timper. Sara baleꞌ a maniningir nin buis tan saray dukaꞌ a bubbayi, timper raya. Siꞌkamo anamaet baleꞌ, mataman nin tandaꞌ moyo nin nangyadiꞌ in, kai kamo et nin nanguman tan namper kona.”
33 “Rengꞌen moyayti et nin pangingiyarig. Main nin sayay tawon nangmula nin ubas sa lutaꞌ na. Dinarekdek naya, tan nangali yan ubot sa sayay alakin bato ta pigaw nin pamespesan yan ubas. Namaꞌdeng yan ataꞌgay a kamiꞌnan ran bantay. Miꞌsa nipagamet nay pangangalilaꞌ sa mula na konran umno ray padalos tan nibwat yan nako sa sayay adayoꞌ nin lugar. 34 Sin narateꞌ anay panaon nin pammutin bunga, nangibakiꞌ yan tutawo na nin kalapen ray tao na. 35 Baleꞌ saray padalos, dinakep rasara, ket tinasu-taso rayay saya, pinati rayay saya tan kinudas-kudas raya nin bato a saya et. 36 Nangibakiꞌ ya anamanaet nin tutawo na a main ikon tan sawanin ket abaw sara dyan saray nuꞌna. Baleꞌ saray padalos wantaw nin lamang a ginwaꞌ ra konran saraytaw saray nuꞌna. 37 Sin kalansuyutan, si anak nayna a nibakiꞌ na. Wana sa nakem na, ‘Kai magwaꞌ a kai raya nin kabilangan a anak ko.’
38 Baleꞌ saray padalos, sin naꞌkit rayay anak na, wanra, ‘Siti liꞌ a manawir. Patyen tamoya ta pigaw nin maikon tamo a tawiren na liꞌ!’ 39 Ket dinakep raya, nirikor raya sa darekdek tan pinati raya.
40 Sawanin, no rumateꞌ yaynay main nin lutaꞌ, ani kadiꞌ a gawꞌen na konran saraytin padalos?” tepet na ni Jesus.
41 Wanra nin inumbat, “Kasan sapon patyen nasara in a dukaꞌ nin tutawo, tan si lutaꞌ na ipagaꞌgetan naya sa sakalakon padalos nin mamin tao na tepeꞌ nin pammutin bunga.”
42 Wana ni Jesus, “Kai moyo para gapo nin nabasa-basa a wana sa Masanton Kasuratan? Wana,
‘Sitaw si bato a nibilang ran
kai mausar nin saray mammanday,
sitaw nin diri nin bato a nagꞌin nin
sangkaimpurtantiwan sa pammaꞌdeng.
Say nipagꞌin nin wanin ket gawaꞌ nan Catawan.
Ket sa pangingikit tamo peteg a makapakaꞌngap!’h
43 Ket ibaritaꞌ ko komoyo a banaꞌ ta wanin, amboꞌ anan siꞌkamon Judio a Pagꞌadian nan Dios no kai edet, saray tutawon sumunor sa karabayan na. 44 Konan siin nin bato, si siꞌnuman a manaboꞌ, mangababariꞌ ya tan si siꞌnuman a madagꞌanan nan siin a bato, marekrek ya.i”