Say Iluluob na ni Jesus sa Jerusalem
11
Ket adani sarayna si Jesus sa syudad nin Jerusalem ta itaw sarayna sa bandan baryo nin Betfage tan Betania nin adani sa Talugtog Olibo. Ket pinauꞌna nasaray rwa konran tumutumbok na. 2 Wana konra, “Mako kamo sa baryo a manꞌadapen moyo. Ket karateꞌ moyodtaw, main nin tampor nin maꞌkit moyon nipuged a sayay uybon nin asno nin kai et gapo nin naruranan. Usbagen moya sa nakaipugedan na tan iꞌras moyadti kongko. 3 No main nin manita komoyo no ambaleꞌ nin man-gawꞌen moyo in, ibaritaꞌ moyo kona, ‘Matkap nayayti nin Uunuren. Ipaisubliꞌ nayadti liꞌ a lamang kainsanan.’ Ket tampor a umaburoy yan kalapen moya.”4 Ket nako sarayna, ket pageꞌ a main nin naꞌkit ran uybon nin asno. Itaw ya sa dalan nin nipuged ya sa rikor nin purtan bali. Ket sin manꞌusbagen rayayna sa nakaipugedan na, 5 wanran saray itaw, “Ambaleꞌ nin manꞌusbagen moya in?”
6 Ket say niꞌbat ra ket saytaw say bibilin na ni Jesus konra, ket pinauryan rasaraynan nituloy ray man-gawꞌen ra. 7 Ket niꞌras raya kona ni Jesus a uybon. Nisapin ray kapa ra kona, ket rinmuran ya si Jesus. 8 Abaw sara konran tutawodtaw a banaꞌ sa alakin pangingigalang ra kona ni Jesus ket niyapra-aprak ray kukapa ra sa dalanan na tan nampi-nampiꞌ saran susangan kukayo sa gagawaꞌ tan niyapra-aprak raynamaet a lamang sa dalanan na. 9 Saray tutawo ket iti sara sa uꞌna tan sa suyot na ni Jesus. Mantumaꞌwa-taꞌway sara ngaꞌmin a wanra,
“Marayo ya!
Nabindisyunan nayan Dios a nibakiꞌ na nin manrumateꞌ anadti sawanin kontamo!a”
10 “Binindisyunan naynan Dios a pagꞌaadiꞌ na nin bilang sa nipagꞌadiꞌ na ni puon tamon si David sin saytaw!”
“Marayo yay Dios itaw sa langit!”
11 Ket nakarateꞌ saraynadtaw si Jesus sa Jerusalem tan nako ya nin linmuob sa sakop nan Timplo. Nayadiꞌ ya nin kinmikit-kikit itaw, nibwat yan nako sa Betania, pati saray labinrwan tumutumbok na, ta yabinayna.
Nisamba naya ni Jesus a Kayon Kasan Bunga
12 Ket kinabuklasan, sin mansumubliꞌ sarayna si Jesus nin ibat sa Betania, ginmitil ya. 13 Natamuraw nayay sayay kayon igos a mabulong.b Nako yadtaw sa kamiꞌnan na ta pigaw nin kiten na no ginmunga yayna. Anaod, amboꞌ et nin panaon nin katutua. Ket sin nirateꞌ yadtaw, kasa gapo nin maꞌkit na nin bunga no kai kal-la bulong tamoꞌ. 14 Ket wana konan kayo, “Anggan makaꞌnuman ket kasayna gapo nin makapangan nin bunga mo!”
Ket narngeꞌ rayti nin tumutumbok na.
Si Timplo, Kai ya nin Nikanaꞌ sa Pangrarayo
15 Sin nakarateꞌ sara sa Jerusalem, linmuob ya si Jesus sa sakop nan Timplo nan Dios baleꞌ itaw naratꞌanan nasaray mampaglakoꞌ. Ket pinala-palakwan nasara tan saray mampanaliw itaw nin say bubagay a idaꞌton konan Dios tan tinali-talimbwag nay lulamisawan ran maninilin kwarta, tan say tutekrean ran maglalakoꞌ nin kalapati. 16 Niyawaꞌ na et a lumabas itaw sa sakop nan Timplo a siꞌnuman nin main nin awit-awit. 17 Miꞌsa niyakay nasaray tutawo nin itaw. Wana, “Kai para naisurat a wanan Dios,
‘Si Bali ko ket pangaranan raya nin lugar nin dadasalan ran sarban tutawo kongko’c?
Baleꞌ siꞌkamo, ginwaꞌ moyan pididinepan ran mannakaw!”
18 Natandaan ran Pupangulon Pupadiꞌ tan saray Madudunong sa Gugan-gan a maipaꞌkaꞌ sa sayti. Ket mampaningkap sarayna nin padalan no paꞌno raya nin maipapati ta ikaliꞌmo raya si Jesus ta mangkaayat nay nakem ran tutawo sa akay na.
19 Sin yabi sin sain, nibwat sara anamanaet sa syudad si Jesus.
Say Akay Mangibwat konan Kayon Igos
20 Kinabuklasan sin lumabas sara, naꞌkit rayaytaw si kayon igos nin nati ya anggan yamot. 21 Si Pedro napanemtem nay nangyadiꞌ intaw ket wana, “Maistro, kikiten may kayon igos nin nisamba mo. Nati ya!”
22 Ket wana ni Jesus konra, “Matkap a magmatalek kamo konan Dios. 23 Ibaritaꞌ koyti komoyo: No tepren moyo nin kai kamo nin magdwadwa a say ibaritaꞌ moyo ket mangyadiꞌ, magwaꞌ moyon ibaritaꞌ konan sitin talugtog, ‘Gumlat kadsen tan mako ka sa taaw,’ ket mangyadiꞌ a wamoyo. 24 Kanyaꞌ nin ibaritaꞌ ko komoyo, animan a dawaten moyo konan Dios, matkap a magmatalek kamo nin marisibi moyo ket talagan marisibi moyo. 25-26 No dumasal kamo ket main wadiꞌ nin sakit nin nakem moyo sa siꞌnuman, pirdunawen moya yapoꞌ ta pigaw nin pirdunawen nakamo anamaet nin Ama tamo sa langit sa kasalanan moyo.d”
Si Tepet ran Pupangulo kona ni Jesus Maipaꞌkaꞌ sa Kanepegan na
27 Ket nakarateꞌ saraynaet si Jesus sa Jerusalem. Ket sin manlumala-lalako yadtaw sa sakop nan Timplo, kinmadani sara kona a Pupangulon Pupadiꞌ, saray Madudunong sa Gugan-gan ran Judio tan saray Mangatuntawo ran Judio. 28 Ket nitepet ra kona, “Ani a kanepegan mon mangwaꞌ nin sain say man-gawꞌen mo? Siꞌnoy nami komo nin pakayadiꞌ nin gawꞌen mo in?”
29 Ket niꞌbat na ni Jesus, “Ibaritaꞌ ko komoyo no ani a pakayadiꞌ ko nin gumwaꞌ nin saytin bubagay no ubatan moyayti si tepet ko. 30 Siꞌnoy namin kanepegan nan mamawtismo ni Juan, si Dios para o say tawo? Ani a ubat moyo?”
31 Ket nagꞌiirgo sara a wanra, “Ani kadiꞌ a iꞌbat tamo? No ibaritaꞌ tamon ‘si Dios’, ibaritaꞌ na kontamo, ‘Mayin edet a kai moya nin timper si Juan?’ 32 Ket no ibaritaꞌ tamo anamaet, ‘Say tawo,’ makapasalak.” Wanin a wanra ta pinasyan liꞌmo ra konran tutawo ta tepren ran sarayti a si Juan ket saya yan talagan prupita. 33 Kanyaꞌ nin niꞌbat ra kona ni Jesus, “Kai mi nin tandaꞌ.”
Ket wana anamaet ni Jesus konra, “No wanin, kai koynamaet nin ibaritaꞌ komoyo no ani a kanepegan kon mangwaꞌ nin man-gawꞌen ko.”