3 Sin sain, nangalap ya si Maria nin kapikngaꞌ litro nin pinasyan bili nin puron banglo a say ngaran ket nardo. Niyapros nayti sa ayi na ni Jesus mintras nin mampunasan nan sabot nay ayi na. Ket inmupuop sa intiron bali a banglo.

4 Ket si Judas Iscariote, a syay tumutumbok na ni Jesus nin magtraidor kona wana, 5 “Ya, nilakoꞌ in kumon nin banglo, miꞌsa nin nibi konra nin pubri a naglakuan ta gumli ana in nin ribu-ribo^a.” 6 Wanin a nibaritaꞌ na amboꞌ nin banaꞌ ta mangkapagawan nasaray pubri no kai edet, banaꞌ ta matakaw ya. Sya a mampangaꞌget nin kwarta ra ket mampangalap-kalap yan dai-daiteꞌ.

7 Konan siin, niꞌbat na ni Jesus, “Pauryan moya, ta niyator na in nin banglo nin iyamris kongko para sa tabon ko. 8 Saray pubri, pirmi moyo sara nin makalamoꞌ, baleꞌ siꞌko, amboꞌ anan maꞌteng a iti ako et komoyo.”

9 Abaw saray Judio nin nakarngeꞌ a itaw ya sa Betania si Jesus. Kanyaꞌ nin abaw saray nakodtaw, amboꞌ tamoꞌ banaꞌ nin kona, no kai ta pigaw et nin maꞌkit raya si Lazaro a si pinasubliꞌ na nin mabyay. 10 Sin wanin, saray Pupangulon Pupadiꞌ, nipapagketan ra a ipapati raya anamaet si Lazaro 11 ta, banaꞌ sa nangyadiꞌ kona, abaw sarayna a Judio nin nikisyay konra ta pigaw nin magmatalek sara kona ni Jesus.

12 Sin sinmunor nin awro, saray pinasyan kaꞌbawan nin nako nikipista, natandaan ra nin adap nadtaw sa Jerusalem ni Jesus. 13 Kanyaꞌ nin rinmikor saran nako namukan nin palaꞌpaꞌ nin kayon bilang nin ungot ta pigaw nin sanaen raya. Wanra nin nitaꞌwa-taꞌway,

14 Nakaruran ya si Jesus konan uybon nin asno nin nipakalap na. Bilang sa wanin a mabasa sa Masanton Kasuratan a wana,

16 Saray tumutumbok na ni Jesus, kai ra et nin natarusan a pipaꞌkaan nin sayti nin mampangyadiꞌ sin sain, no kai saytaw liꞌ no nipataꞌgay tan pinagalangan yayna, saytaw rayna nin matarusan a sayti a nikatukid nin say naisurat a wanan Dios maipaꞌkaꞌ kona ni Jesus tan sayti anaod a ginwaꞌ ra kona.

17 Edet, nipata-patandaꞌ ray nabantayan ra nin saraytaw saray tutawo nin nakabantay nin tinawag naya ni Jesus si Lazaro nin lumiwaꞌ sa nanabunan kona sin pinasubliꞌ nayan mabyay. 18 Siin a rason a saray pinasyan kaꞌbawan nin tutawo ket sinnaꞌ raya si Jesus, banaꞌ ta natandaan ra in a ginwaꞌ nan mangipaꞌkit a nangibwat ya konan Dios. 19 Ket saray Pariseo, wanra sa saya tan saya, “Kasayna, nadaeg natamoyna! Kiten moyo, tumutumbok nasarayna a sarban tawo!”

20 Main anamaet nin amboꞌ nin Judio nin nikikalamoꞌ konran saray nako nikipista ta pigaw nin mangrayo sara konan Dios. 21 Ket nako sarayti kona ni Felipe a taga Betsaida sa prubinsyan Galilea tan wanra kona, “Ser, rabay miya kumon nin makaadap si Jesus.” 22 Nikaꞌ na nin nibaritaꞌ ti ni Felipe kona ni Andres, ket nako sara kona ni Jesus tan niparateꞌ raytin kadawatan kona.

23 Ket, wana ni Jesus, “Sawanin ana a siꞌkon si Pinaitawo ket maipataꞌgay ako yupaꞌ sa mangyadiꞌ kongko. 24 Anaod, isipen moyoyti nin maong: No si sayay bikoy ket kai ya nin imula ta pigaw nin no wanin ket nati ya yapoꞌ miꞌsa ya nin rumsik, magnayon ya nin sayan-saya tamoꞌ. Baleꞌ no imula ya ket no wanin nati ya, rumsik ya tan gumunga ya liꞌ nin abaw. 25 Si sayay tawo anamaet a lamang nin kumpunyen na nin maong a byay na, sidaen ya in liꞌ nin lamang. Baleꞌ no si tawo ket, ikwinta nay byay nadti sa lutaꞌ nin amboꞌ nin maalaga, mamprutiksyunan nan mismo ta pigaw nin mabyay ya liꞌ anggan-angga nin iti konan Dios. 26 Anaod, si siꞌnuman a magsirbi kongko, matkap a siꞌko a lawas nin sunuren na ket abirno nin adti ako man, itaw ya anamaet liꞌ tan pagalangan naya liꞌ nin Ama koyti si magsirbi kongko. 27 Sawanin ana, manꞌumaburido ako nin maong a no ani wadiꞌ a ibaritaꞌ ko konan Ama ko. Wangko para ket, ‘Ama ko, isalba nako sa dyaꞌdyaꞌ a adapen ko nin irangep?’ Kai, banaꞌ anaod ta sitin diri a gagara a nako akodti, si mangirangep akon sarban saytin dyaꞌdyaꞌ.”

28 Sin sain, wana konan Dios, “Ama ko, sisisibulot a nakem kon usaren nako sa pangipadar mon mabistan gawaꞌ mo.”

Ket main nin busis nin nangibwat sa langit a wana, “Naipadar koyna tan ipadar ko liꞌ anamanaet.”

29 Narngeꞌ raya anamaet nin abaw nin tawodtaw a busis ket, say wanra nin raruma, kinmudor, baleꞌ saray raruma anamaet wanra, “Nagꞌirgo ya kona a sayay anghil.”

30 Sin sain, wana ni Jesus konra, “Saytaw say narngeꞌ moyo, kai taw nin inirgo para sa kaabigan ko no kai para sa kaabigan moyo. 31 Mangyadiꞌ ana sawanin a manepeg a pamatukduan nin pangungukom konran tutawodti sa mundo. Sawanin ana a panaon nin pakadaeg na ni Satanas a syay mampagꞌuray iti sa mundo. 32 Wanin ta, siꞌko, no naitaꞌgay akoyna liꞌ sa kudos^e, ket paaraken ko a sarba nin tawo nin paisirong sara kongko.” 33 Wanin a nibaritaꞌ na ni Jesus ta pigaw nin ipatarusan na no paꞌno ya nin mati.

34 Konan siin, wanra nin tutawo, “Ambaleꞌ a wamo ket maitaꞌgay ya a si Pinaitawo? Wana sa Masanton Kasuratan ket si Nipangakoꞌ nan Dios nin rumateꞌ iti ket mabyay ya anggan-angga. Siꞌno yayti ket si Pinaitawo?”

35 Ket, wana ni Jesus konra, “Amboꞌ ana nin maꞌteng nin kalamoꞌ moya et a palaway. Kanyaꞌ nin sunuren moya a napalawayan nin dalan antaran iti ya et a palaway komoyo ta no kai ket, madedleman kamo. Wanin ta, si saya nin manlumalako sa madedlem, kai na nin tandaꞌ no adti a piugutan na. 36 Magmatalek kamo anaod kona nin syay palaway antaran iti ya et komoyo, ta pigaw nin magꞌin kamon tutawon napalawayan nan si palaway.”

Kayadiꞌ na nin nibaritaꞌ ti ni Jesus, linakwanan nasara tan kai yayna yapoꞌ nin nipaꞌki-paꞌkit.

37 Mataman nin nangwa-nangwaꞌ yayna si Jesus nin makapakaꞌngap nin pammatutuo nin maipaꞌkaꞌ kona, kai sara et a lamang nin magmatalek a tutawo kona. 38 Sa wanin ket, natukidtaw si nipadles na ni Prupita Isaias a wana,

42 Wanin man, abaw sara anaod konran pupangulo ran Judio a namper no siꞌno ya si Jesus baleꞌ, kai rayti nin manꞌipadar. Wanin banaꞌ sa liꞌmo ra konran Pariseo a dusawen rasara nin galten ana sa dupong ran Judio 43 ta mas maalaga konra a rabay-rabay rasaran tutawo dyan si rabay-rabay nasaran Dios.

44 Ket, wana nin nipaksaw ni Jesus, “Si siꞌnuman a magmatalek kongko, amboꞌ ako tamoꞌ a nagmatalkan na no kai pati si namakiꞌ kongko. 45 Si nakaꞌkit kongko, naꞌkit nayaynan lamang a namakiꞌ kongko. 46 Nako akodti nin magsirbin palaway ran tutawodti ta pigaw nin si siꞌnuman a magmatalek kongko ket kai ya nin manangkeꞌ sa dedlem.

47 Ket kona nin nakarngeꞌ nin manꞌibaritaꞌ ko baleꞌ kai na nin sunuren, amboꞌ ako a manintinsya, ta kai ako nin nakodti sa lutaꞌ ta pigaw nin sintinsyawan kosaray tutawo, no kai edet, ta pigaw nin isalba kosara. 48 Baleꞌ main nin manintinsya konan si tawo nin andiꞌ nin mangalilbiꞌ kongko nin kai mangakoꞌ sa manꞌibaritaꞌ ko. Sayti nin diri nin bubagay nin manꞌibari-baritaꞌ ko a manintinsya liꞌ kona no marateꞌ a awro. 49 Wanin ta kai ko nin manꞌibari-baritaꞌ ti nin bubagay nin nangibwat sa kaisipan ko nin bukod no kai edet, si Ama ko nin si nangibakiꞌ kongko ket nigan-gan na no ani a ibaritaꞌ ko tan no paꞌno nin pammaritaꞌ ko. 50 Kanyaꞌ nin say manꞌibari-baritaꞌ ko tamoꞌ ket say nigan-gan nan Ama ko banaꞌ ta tandaꞌ ko a say nigan-gan na ket pangibwatan nin anggan-angga nin byay a iti kona.”