5 Sin naipatben yaynaod si Jesus itaw sa kamiꞌnan na ni Zaqueo, tinmangar ya ket wana, “Zaqueo, apurawen mo, manaoy kadsen! Anaod, matkap nin itaw ako nin kipagtuloy sa bali moyo!”

6 Inapura naynaod ni Zaqueo a nanaoy tan maririket nayan inakoꞌ si Jesus itaw sa bali ra. 7 Sara baleꞌ a tutawodtaw nin nakaimaton, bere-bere sara a wanra, “Sukat nin kipagtuloy ya sa bali nan sayay makasalanan!”

8 Ket inumdeng ya si Zaqueo tan wana kona ni Jesus, “Uunuren, wanti e: Say kapikngaꞌ nin kayamanan ko ket ibi ko konran pubri, tan isubliꞌ koynamaet nin miꞌpat nin kaꞌbaw konran sinaur-saor ko a sinaor ko konra.”

9 Ket wana ni Jesus kona, “Konan sitin awro, siꞌka tan saray pamilya mo ket naisalba kamo ta saya ka anamaet nin nagꞌin nin peteg a puri na ni Abraham banaꞌ sa pammemper mo. 10 Anaod, siꞌkon si Pinaitawo ket nako akodti sa babon lutaꞌ, ta pigaw nin tikapen tan isalba kosaray tutawon adayoꞌ konan Dios”

11 Sawanin, leleg ran mampangrengeꞌ nin tutawo sa manꞌibaritaꞌ na ni Jesus, nituluy-tuloy nay nangyakay yupaꞌ sa sayay pangingiyarig. Wanin a ginwaꞌ na banaꞌ ta adani sarayna sa syudad nin itaw sara nin nagꞌadiꞌ a uadiꞌ sin saytaw^a, tan ta pigaw nin ikusto na a manꞌipaꞌkaꞌ ran tutawo a tumaranaꞌ ana a pagꞌaadiꞌ nan Dios no rumateꞌ yadtaw. 12 Ket wana ni Jesus konra, “Main nin sayay lalakin ataꞌgay a nikatawo na nin mako sa sayay adayoꞌ nin lugar ta itaw ya suyuen nin adiꞌ, ket mayadiꞌ sumubliꞌ ya liꞌ nin magꞌuray sa nasyon nan diri. 13 Sin adapen na a mibwat, kinayaban nasaray mapuloꞌ a kukatulungan na ta pigaw nin batian nasara nin saꞌsan plata nin balitok^b tan wanan nibibilin konra, ‘Leleg a kasa ako, ikumirsyo moyo in.’

14 Baleꞌ saray lumugar itaw sa pagꞌurayan na liꞌ, guraꞌ raya kanyaꞌ nin sin nakaibwat yayna, namasunor saran mako nin mangibaritaꞌ konan si manuyoꞌ a kai ra nin rabay a syay magꞌadiꞌ konra. 15 Wanin man, sinuyoꞌ ya et a lamang nin magꞌadiꞌ ket sinmubliꞌ yayna sa nasyon na.

Ket nipakayaban nasaray sarban katulungan na nin binatian nan kwarta ta tepetan nasara no umnoy naganansya ra. 16 Wanan si uꞌnan nako kona, ‘Sinyor Adiꞌ, si kwarta moyo ket nakaganansya yan mipuloꞌ nin kaꞌbaw.’

17 ‘Mabistay ginwaꞌ mo!’ wanan adiꞌ. ‘Manakem kan katulungan! Banaꞌ ta kapagpyawan ka sa taman nin daiteꞌ tamoꞌ, gawꞌen katan pangulo sa mapuloꞌ nin syudad.’

18 Wana anamaet nin ikarwan nako kona, ‘Sinyor Adiꞌ, si kwarta moyo ket nakaganansya yan milima nin kaꞌbaw.’

19 Ket wana anamaet nin adiꞌ kona, ‘Siꞌka anamaet, gawꞌen katan mangipangulo sa lima nin syudad.’

20 Ket main anaet nin sayay nako kona a wana ‘Sinyor Adiꞌ, sya ey kwarta moyo nin pinunggos koyan panyoꞌ tan niyator koya, 21 ta linmiꞌmo ako komoyo banaꞌ ta tandaꞌ kon istrikto kamo. Maningkap kamo sa amboꞌ nin siꞌkamoy nangator tan yataben moyoy amboꞌ nin siꞌkamoy nangmula.’

22 Ket inumbat yay adiꞌ a wana, ‘Dukaꞌ kan katulungan! Kanyaꞌ nin dusawen kata sa sain nin dirin irgo mo. Tandaꞌ mo anamain nin istrikto ako tan maningkap ako nin say amboꞌ nin siꞌkoy nangator tan yataben koy amboꞌ nin siꞌkoy nangmula. 23 Mayin edet a kai ma nin nikwa sa bangko a kwarta ko ta pigaw kumon nin no rumateꞌ ako ket makalap ko pati ganansya na?’ 24 Sawanin, wanan adiꞌ konran saray raruman tutawodtaw, ‘Sigi, kalapen moyo a kwartan nibatiꞌ ko kona ta ibi moyo konan si nakaganansya nin mipuloꞌ nin kaꞌbaw.’

25 Ket wanran tutawo kona, ‘Sinyor Adiꞌ, mapuloꞌ rayna baleꞌ a platan balitok nin ikon na.’

26 Ket wana anamaet nin adiꞌ, ‘Ibaritaꞌ koyti komoyo, si siꞌnuman a main kona a sayay bagay, malamuꞌnan ya nin umabaw yaynan umabaw. Baleꞌ mataman nin si daiteꞌ nin main kona, maglat et liꞌ konan si siꞌnuman a kai nin mangusar sa naipya kona. 27 Sawanin, sara anamaet a kuntra kongko nin kai marabay nin magꞌadiꞌ ako konra, iꞌras moyo saradti ta patyen sara sa adapan ko.’ ”

28 Kayadiꞌ na nin nibaritaꞌ in ni Jesus, nituloy raynay tinmangkar nin mako sa Jerusalem a iti ya sa uꞌna si Jesus. 29 Sin nakarateꞌ sarayna si Jesus itaw sa banda ran baryon Betfage tan Betania nin iti sa rigrig nan Talugtog Olibo, pinauꞌna nasaray rwa konran tumutumbok na nin 30 wana, “Mako kamo sa baryo a manꞌadapen moyo. Ket karateꞌ moyodtaw, main tampor nin maꞌkit moyon nipuged a sayay uybon nin asno a kasa et gapo nin rinmuran kona. Usbagen moya sa nakaipugedan na tan iꞌras moyadti. 31 No main nin manita komoyo no mayin nin manꞌusbagen moya, basta ibaritaꞌ moyo, ‘Matkap nayayti nin Uunuren.’ ”

32 Sin sain, nako saraynadtaw a rway tumutumbok na. Tutuon pageꞌ a nadumog rayaytaw si nibaritaꞌ na ni Jesus konra. 33 Sin manꞌusbagen rayayna sa nakaipugedan na, sinita nasaran main nin ikon a wana, “Mayin nin manꞌusbagen moya in?”

34 Wanran niꞌbat, “Matkap nayayti nin Uunuren.” 35 Ket niꞌras rayaynay uybon kona ni Jesus tan sinapinan rayan kapa ra baꞌyo raya pinaruran si Jesus kona. 36 Leleg nin manruranan naya ni Jesus, niyapra-aprak ran tutawo a kukapa ra sa dalanan na.

37 Sin adani sarayna si Jesus sa Jerusalem ta iti sarayna sa dalan nin lumusong sa Talugtog Olibo, itaw saraynay kaꞌbawan ran tumutumbok na nin sabtan ririket ra tan manꞌitaꞌwa-taꞌway ray pangrarayo ra konan Dios banaꞌ sa sarban milagro a ginwa-ginwaꞌ na nin naꞌkit ra. 38 Wanra,

39 Main anamaet nin Pariseo nin nayi konran saray abaw nin tutawo tan wanra kona ni Jesus sin sain, “Maistro, pisasaeten mosara in pa saray tumutumbok mo.”

40 Ket wanan niꞌbat ni Jesus konra, “Ibaritaꞌ koyti komoyo, no kai ra nin ibusngaw in say pangrarayo ra, pihon saytin diri say bubatodti sa dalan a tumaꞌway nin mangrayo kongko.”

41 Sin adani sarayna si Jesus sa Jerusalem nin matamuraw nayayna a syudad, banaꞌ sa pangungundoꞌ na ket niyakis na. 42 Wana “Abagay kamoyna, siꞌkamon taga Jerusalem! No tandaꞌ moyo tamoꞌ kumon sawanin no ani a matkap ta pigaw nin makakituno kamoyna konan Dios; baleꞌ angga anaod nin sawanin ket kai moyo et nin maalilbiꞌ! 43 Anaod, kaudaꞌdwan kamo liꞌ no rumateꞌ a awro nin saray kukalaban moyo ket bungtu-bungtunen ra a lutaꞌ tan bubato sa libed nan syudad ta pigaw nin makaluob sara. Ket kubkuben rakamo, ta pigaw nin kai kamoyna nin makaliwaꞌ. 44 Sidaen raya nin liso a syudad moyo tan patye-patyen rakamo. Kasa liꞌ ni saya nin baton matraꞌ nin naitaꞌlen sa saya. Mangyadiꞌ a wanin banaꞌ ta inandian moyo a pagkanawanawa sin nako yadti a Dios ta pigaw nin isalba nakamo kumon.”

45 Sin nakarateꞌ saraynadtaw si Jesus sa Jerusalem, sinumrep ya sa sakop nan Timplo nan Dios baleꞌ itaw naratꞌanan nasaray mampaglakoꞌ, ket pinala-palakwan nasara. 46 Wana konra, “Kai para a naisurat a wana nin Dios,

47 Ket nangibwat sin sain, inawru-awro yaynan nangyakay si Jesus itaw sa sakop nan Timplo. Ket saray Pupangulon Pupadiꞌ, Madudunong sa Gugan-gan tan saray pupangulo ran tutawo, manꞌirimidyo ray pammapati kona. 48 Baleꞌ kai ra et nin magwaꞌ in banaꞌ ta matetek saran manrumngeꞌ ngaꞌmin a tutawo kona.