Sinita ran Pupangulo nin Israelita a Kanepegan na ni Jesus
20
Sayay awro, sin kapresan nay mampangyakay ni Jesus konran tutawodtaw sa luob nin sakop nan Timplo tan manꞌipatandaꞌ nay Mabistan Patandaꞌ, kinmadani sara kona a Pupangulon Pupadiꞌ tan saray Madudunong sa Gugan-gan a kalamoꞌ rasaray Mangatuntawo ran Judio. 2 Tinepet ra kona, “Ibaritaꞌ mo pa komi no ani a kanepegan mon mangwaꞌ nin sain say man-gawꞌen mo. Siꞌnoy nami komo nin pakayadiꞌ nin gawꞌen mo in?”3 Niꞌbat na ni Jesus, “Main anamaet nin itepet ko komoyo. Ibaritaꞌ moyo pa kongko, 4 siꞌnoy namin kanepegan nan mamawtismo ni Juan, si Dios para o say tawo?”
5 Niiirgo sara yapoꞌ sa saya tan saya a wanra, “Ani kadiꞌ a iꞌbat tamo? No ibaritaꞌ tamon ‘si Dios,’ ibaritaꞌ na kontamo, ‘Mayin edet a kai moya nin timper si Juan?’ 6 Ket no ibaritaꞌ tamo anamaet, ‘Say tawo,’ pihon kudas-kudasen ratamo anggan mati atamo nin sarain a tutawo banaꞌ ta mamper sara a si Juan ket saya yan prupita.” 7 Kanyaꞌ nin niꞌbat ra tana kona ni Jesus, “Kai mi nin tandaꞌ.”
8 Ket wana ni Jesus konra, “Kai ko anamaet nin ibaritaꞌ komoyo no ani a kanepegan kon mangwaꞌ nin say man-gawꞌen ko.”
Annas Questions Jesus's Authority
9 Ket kinairgo nasara anamanaet a tutawo ni Jesus yupaꞌ sa sayay pangingiyarig. Wana, “Main nin sayay tawon nangmula nin ubas sa lutaꞌ na miꞌsa nipagamet nay pangangalilaꞌ konran umno ray padalos tan nibwat yan nako sa sayay adayoꞌ a lugar ket itaw yan umnoy taon. 10 Sin narateꞌ anay panaon nin pammutin bunga, nangibakiꞌ yan sayay tawo na itaw konran padalos nin kalapen nay tao na. Baleꞌ saray padalos, tinasu-taso raya tan pinasubliꞌ rayan kal-la gamet. 11 Sin wanin, nangibakiꞌ ya anaet nin sakalako ket binugbu-bugbog rayan lamang tan pinadi-padingꞌeyan raya et tan pinalakwan rayan kal-la gamet. 12 Sawanin, nangibakiꞌ ya et nin ikatlo, ket sinugat-sugat rayayti miꞌsa ginuruy-guroy rayan niliwaꞌ.
13 Banaꞌ ta wanin, wana nin main ikon nin kaubasan, ‘Ani baleꞌ a gawꞌen ko? Wanti e: Si anak ko nin kawaꞌnan ko a ibakiꞌ ko. Siguradon kabilangan raya,’ wana.
14 Ket sin naꞌkit rayan saray padalos a anak na niiirgo sara nin wanra, ‘Siti liꞌ a manawir. Patyen tamoya ta pigaw nin maikon tamo a tawiren na liꞌ!’ 15 Ket nirikor rayadtaw sa kaubasan tan pinati raya.
Sawanin,” wanan nituloy ni Jesus, “ani kadiꞌ a gawꞌen nan sitin main nin ikon nin kaubasan konran saray padalos? 16 Kasan sapo nin mako yadtaw ket patye-patyen nasara. Miꞌsa ipagaꞌgetan nayayna a kaubasan na sa raruma.”
Sin narngeꞌ ra in nin saray tutawo, wanra, “Andiꞌ na tana kumon nin aburuyan nin Dios a mangyadiꞌ in!”
17 Ket pinastang nasara baꞌyo nasara tinepetan ni Jesus, “No wanin, ani edet a rabay nan ibaritaꞌ nin sitin wanadtaw sa Masanton Kasuratan,
‘Sitaw si bato a nibilang ran kai nin mausar nin saray mammanday,
sitaw nin diri nin bato a nagꞌin nin sangkaimpurtantiwan sa pammaꞌdeng.’a
18 Konan siin nin bato, si siꞌnuman nin manaboꞌ, mangababariꞌ ya tan si siꞌnuman a madagꞌanan nan siin a bato, marekrek ya.”
19 Ket nataros ran saray Madudunong sa Gugan-gan tan saray Pupangulon Pupadiꞌ a nipuntirya ya konra a nibaritaꞌ na ni Jesus. Kanyaꞌ nin rabay rayayna kumon nin ipadakep nin tampor si Jesus baleꞌ maliꞌmo sara konran tutawo.
Parable of the Vineyard and Tenants
Kalꞌuten raya Kumon nin saray Pupangulo si Jesus sa Pagꞌiirgo na
20 Ket tinmaꞌgan sara sa pagkanawanawa ran maipadakep ya si Jesus. Nangupaꞌ saran umno ran lulalaki ta pigaw nin keen raya nin tepetan si Jesus tan magwadiꞌ-wadiꞌ saran matunong saran tutawo nin mantumulok sa gugan-gan nan Dios. Baleꞌ say katutuꞌwan ket rabay rayan makalꞌot si Jesus sa pagꞌiirgo na, ta pigaw nin maipagamet raya konan gubirnador, a sya a main nin pakayadiꞌ nin manintinsya. 21 Sin itaw sarayna, tinepetan rayaynaod si Jesus a wanra, “Maistro, tandaꞌ mi a kai ka gapo nin mamiliꞌ nin tutawo tan say manꞌibaritaꞌ tan manꞌiyakay mo ket kusto. Say pangangakay mo anamaet nin no ani a rabay nan Dios nin gawꞌen ran tutawo ket tutuo. 22 Ket, rabay miyaytin tepeten komo: Maitukoy para, o kai, sa Gugan-gan tamo no mamayad atamon buis konan Impirador nan Romab?”
23 Baleꞌ nadlaw na ni Jesus nin dukaꞌ a gagara ra kanyaꞌ nin wana konra, 24 “Mangipaꞌkit kamo pa kongko nin kwartan plata.” Sin nakailiwaꞌ saraynan plata, wana ni Jesus konra, “Siꞌno ya in rupa tan ngaran si isen konan plata?”
“Si Impirador nan Roma,” niꞌbat ra.
25 Sawanin, wana ni Jesus konra, “No wanin edet, isubliꞌ moyo konan Impirador a ikon na, tan isubliꞌ moyo anamaet konan Dios a ikon na.”
26 Ket kasan maibaritaꞌ ra ta angga tanan nakaꞌngap sara sa wantin niꞌbat na ni Jesus. Kasan naipakasalanan ra kona mangibwat sa niꞌbat na sa adapan ran tutawo.
Paying Taxes to Caesar
Kalꞌuten ya Si Jesus Yupaꞌ sa Maipaꞌkaꞌ sa Isusubliꞌ nin Mabyay
27 Main anamaet nin umno ray Saduseo nin nako kona ni Jesus ta tepetan raya. Sarayti saray Saduseo kai ra nin tepren a mapasubliꞌ sara liꞌ nin mabyay a nunati ana. 28 Wanra kona, “Maistro, nisurat na ni Moises sa Gugan-gan tamo a no main nin mitraasawa ket nati yay lalaki nin kasan anak ra, manepeg a si busat na nin lalaki ket ikasal nayay babayi ta pigaw nin manganak sara nin ikwintan anak nan sitaw si nati.”c
29 Nituloy ran Saduseo a wanra, “Ket, main intaw nin pito ray mibubsat a lulalaki. Nangasawa yay kaka baleꞌ nati ya nin kasan anak. 30 Kanyaꞌ nin si aryen na nikasal nayay babayi ket nati ya anamaet nin kasan anak ra. 31 Sinmunor, nikasal naya anamanaet nin si ikatlo anggan saray piton mibubsat a lulalaki ket nagꞌin asawa rayay babayi ket pari-pariho saran nati nin kasan anak ra. 32 Kalansuyutan, nati ya anamaet ana a babayi. 33 Ket sawanin, no napasubliꞌ sarayna liꞌ nin mabyay a nunati, siꞌno edet liꞌ a main nin asawa kona ey, ta saray pito nagꞌin nin asawa raya?”
34 Wana ni Jesus konra, “Konan sitin byay iti sa lutaꞌ, saray tutawo, sumrep sara sa istado. 35 Baleꞌ no pinasubliꞌ sarayna liꞌ nin mabyay a lulalaki tan bubbayi nin ikwinta nan Dios nin kumanaꞌ nin ipaisirong sa pagꞌaadiꞌ nadtaw sa langit, amboꞌ saraynan iti sa kapapaꞌsar nin iti sa istado. 36 Anaod, kai sarayna nin mati no kai edet, mabyay saraynan kapada rasaran uanghil. Uaꞌnak nasarayna nin Dios a pinasubliꞌ nan mabyay.
37 Sawanin, say maipaꞌkaꞌ sa katutuꞌwan anamaet sa pammasubliꞌ nin mabyay konran nunati, mataman si Moises ket pinatutuꞌwan nan maong a saray nunati, mapasubliꞌ saran mabyay sin nisurat na a maipaꞌkaꞌ sa wanan Dios kona sa mandumtan kayo. Ket nibaritaꞌ nadtaw kona ni Moises a sya et a lamang a Dios na ni Abraham, si Dios na ni Isaac tan si Dios na ni Jacob mataman no nati sarayna sin saytaw.d 38 Syimpri a, si sayay nati ana, kai yayna nin makapangrayo konan Dios. Edet, mangkabyay sara in et saray nibaritaꞌ nan Dios a syay Dios ra. Kibyay sarayna ngaꞌmin kona.”
39 Sin sain, wanran saray umno ran Madudunong sa Gugan-gan, “Maistro, mabista in say ubat mo.” 40 Kayadiꞌ sayti, kasayna gapo nin nakatpel nin nanepet-tepet et kona ni Jesus.
Amboꞌ ya tamoꞌ nin Puri na ni Adiꞌ David a si syay Cristo
41 Sin sain, tinepetan nasara anamaet ni Jesus, “Mayin kadiꞌ a wanran tutawo ket si syay Cristo a nipangakoꞌ ket mangibwat ya kano sa puri na ni Adiꞌ David? 42 Anta mismon si Adiꞌ David ket nisurat nadtaw sa parti nan Libro nin Kukanta sa Masanton Kasuratan a,
‘Wanan Dios konan Uunuren ko:
Tumekreꞌ kadti e sa pawanan ko
43 mintras nin mampasukuen kosara komo a sarba ran kukalaban mo.’e
44 Sawanin,” wana et ni Jesus, “no si Adiꞌ David a mismo ket tinawag naya nin Uunuren a Cristo nin nipangakoꞌ kona, edet, si Cristo ket amboꞌ yan basta puri na tamoꞌ ni Adiꞌ David!”
Say Nipamau-pauꞌna na ni Jesus Kuntra sa Pirarayo
45 Leleg nin mampangrengeꞌ saray sarban tutawo kona ni Jesus, wana konran saray tumutumbok na, 46 “Pakandaꞌ kamo nin kai kamo magꞌin nin bilang konran saray Madudunong sa Gugan-gan a rabay-rabay ray magpasyar nin anununro a aysing ra tan say pagalangan rasaran tutawo sa publiko. Rabay-rabay ray tumekreꞌ sa tekrean para konran impurtantin tutawo sa sinaguga. Wanin et a lamang no mako sara sa punsya. 47 Kai sara nin madingꞌey nin sauren rasaray bubbayin balo maipaꞌkaꞌ sa sarban kamamain ra, ket ta pigaw nin sa wanran tutawo ket mapteg sara, paanunrwen ray dasal ra. Anaod, pinasyan byat liꞌ nin dusa nan Dios konra.”