Say Daꞌton nan Babayin Balon iti sa Pinasyan Kaidapan
21
Leleg nin itaw ya si Jesus sa Timplo, linmingap-lingap ya ket naꞌkit nasaray mumayaman nin mampangnaboꞌ nin daꞌton radtaw sa pangnanabuan nin kwarta. 2 Ket sin sain, naasikaso nayay sayay pubrin babayin balo nin nanginaboꞌ nin rwa ray plata nin sangkadaitean a alaga. 3 Wana ni Jesus konran tumutumbok na, “Ibaritaꞌ koyti komoyo, sitin pubrin babayin balo, mas abaw a ninaboꞌ na dyan say sarban ninaboꞌ ra nin saray raruma 4 ta say subra-subra tamoꞌ konra a nibi ran daꞌton ra. Si balo baleꞌ, sa busel nin kaidapan na, nibi nay kapagkapag a main na.”
Widow's Offering
Nibaritaꞌ na ni Jesus a Yubaen ya liꞌ a Timplo
5 Main nin umno ray tumutumbok na ni Jesus a mampagꞌiirgo maipaꞌkaꞌ sa andaꞌ na nin Timplo, banaꞌ sa nikagwaꞌ na sa mabistan bubato tan naarkusan yan mabibistan bubagay a nidaꞌton para konan Dios. Baleꞌ wana ni Jesus konra, 6 “Main liꞌ nin awro nin sarban sayti nin paꞌdeng a mangkaꞌkit moyo ket maybaꞌ, ket kasayna liꞌ gapo ni sayay bato nin isen a maꞌkit nin naitaꞌlen et konan saya et.”
7 Tinepetan raya si Jesus nin tumutumbok na, “Maistro, kaꞌno nin mangyadiꞌ in si wamoyon yubaen ya a Timplo? Ani liꞌ a pakatandaan no dandani anayti nin mangyadiꞌ?”
8 Ket wanan niꞌbat konra, “Pakatalad kamo a kai kamo nin malingon tepren moyoy bulaꞌ ta abaw sara liꞌ a mangusar nin titulo ko a wanra ket sara a Cristo nin nipangakoꞌ nan Dios, tan ibaritaꞌ ra et a mantumaranaꞌ anay pagꞌaadiꞌ na baleꞌ andiꞌ kamo nin mamper konra. 9 No marngeꞌ moyo a main nin pigigira tan pigugulo, andiꞌ kamo nin sumalak ta saytin bubagay ket matkap nin mangyadiꞌ yapoꞌ. Baleꞌ amboꞌ et nin iyayangga ana nin kapresan a pagꞌuuray iti sa mundo. 10 Milalaban liꞌ sa saya tan saya a nunasyon tan wanin a lamang sa pupagꞌadian. 11 Magkamain liꞌ nin maksaw nin rayon, bitil tan sarot sa abaw a lulugar. Magkamain et liꞌ nin makapaliꞌmo tan makapakaꞌngap nin bubagay a maꞌkit sa kalangitan.
12 Baleꞌ baꞌyo liꞌ nin mangyadiꞌ a sarban sayti, dakpen tan padyaꞌdyaen rakamo. Iꞌras rakamo liꞌ konran pupangulon rilihyon ta pigaw nin usisaen miꞌsa ipapriso, tan iyadap rakamo et liꞌ konran mampagꞌuray tan konran uadiꞌ banaꞌ ta tumutumbok katamo. 13 Ket pagkanawanawa moyoynayti nin maiparateꞌ konra a maipaꞌkaꞌ kongko. 14 Kanyaꞌ nin ipasaya moyoy kanakman moyo nin andiꞌ moyo nin kapagawan no paꞌno moyo liꞌ nin idipinsa a lalaman moyon diri, 15 ta byan katamo liꞌ nin pakababaꞌ nin magꞌirgon main nin kadunungan a kai ra nin maubatan o masurnang nin saray mangkumuntra komoyo. 16 Mataman et liꞌ nin saray mismon mangatua, bubsat, kukanayon tan uamigo moyo, pagtraiduran rakamo liꞌ tan saray raruma komoyo ket ipapati rasara liꞌ. 17 Guraen rakamo liꞌ nin sarban tutawo banaꞌ ta mantarigꞌenan moyoy mangkikalamoꞌ kongko. 18 Wanin man, pagawan nakamo liꞌ nin Dios ta pigaw nin mataman ni sayay sabot nan ulo moyo ket kai gapo nin maurot. 19 Kanyaꞌ nin tumarigꞌen kamon tumulok kongko ta no wanin a gawꞌen moyo, magaꞌmuran moyoy byay a iti konan Dios.
20 No maꞌkit moyayna liꞌ a Jerusalem nin nalibed rayaynan sundaloꞌ ran kalaban, sa sayti matandaan moyo a say pakasidaꞌ na ket dandani ana. 21 Ket no wanti ana liꞌ a mampangyadiꞌ, saray itaw nin mampiikap sa Judea matkap a malayo saraynan mako umadi sa tutalugtog. Sara anamaet a itaw nin mampiikap sa mismon syudad nin Jerusalem, matkap a lumakwan sarayna tan saray itaw sa rikor, matkap a andiꞌ sara ana nin lumuob 22 banaꞌ ta siti ana a panaon nin dusawen nasara nin Dios a Israelita nin sigon sa naisurat sa Masanton Kasuratan a matkap nin matukid nin sarba. 23 Kadoꞌ sarayna liꞌ a mabuktot tan saray uinan main nin uaꞌnak ran mampasuswen konan siin a panaon, banaꞌ ta sa intiron lugar ket magkamain nin grabin pakapadyaꞌdyaꞌ ta ipaꞌkit na nin Dios a alakin sager na konan sitin nasyon nin Israel. 24 Kanyaꞌ nin main konran saray Israelita a patye-patyen yupaꞌ sa ispada tan main anamaet konra a dakpen ta iꞌras saran magꞌin nin aripen sa nagsikabarang nin nunasyon. Miꞌsa, si Jerusalem ket daegen rayan saray kalaban a amboꞌ nin Judio ket sakupen raya angga nin marateꞌ a nitandaꞌ nan Dios nin panganggawan nin pagꞌuuray ra.”
Say Isusubliꞌ nan si Pinaitawo
25 “Ket main nin bagay a maꞌkit liꞌ nin mangyadiꞌ konan awro, bulan tan sa bubituen. Gewgewan ra liꞌ nin sarban tutawodti sa mundo ta masalak sara banaꞌ sa kasaw nin kanurkor nin taaw tan kaalalakyan nin daluyon. 26 Makle-maklep sara liꞌ a tutawo sa liꞌmo tan sa pangingisip ra sa rumateꞌ liꞌ nin mangyadiꞌ iti sa babon lutaꞌ, ta say pupakayadiꞌ a mamauksoy sa taꞌgay langit ket maguloyna. 27 Kaaram, maꞌkit rako liꞌ nin siꞌkon si Pinaitawo nin manrumateꞌ nin iti sa gunem nin main pakayadiꞌ tan kasan kapadan kagalangan.a 28 Kanyaꞌ nin no sarban sayti ket tumaranaꞌ ana liꞌ nin mangyadiꞌ, paksawen moyoy nakem moyo tan rumiriket kamo banaꞌ ta say pakaisalba moyo ket adani ana.”
29 Ket nibaritaꞌ naya ni Jesus konra a sayay pangingiyarig a wana, “Kiten moyay kayon igos tan say raruma et nin kukayo. 30 No sumalingsing yaynan gumulong, masigurado moyon tumaranaꞌ anay tyimpon rapeg. 31 Wanin anamaet, no maꞌkit moyoyna liꞌ nin mampangyadiꞌ anaytin bubagay a nipatandaꞌ ko, matandaan moyon adani anay pagꞌaadiꞌ nan Dios.
32 Ibaritaꞌ koyti komoyo, sarban nibaritaꞌ ko komoyo ket natukid ana mataman nin baꞌyo kamo et nin mati ngaꞌmin. 33 Makasa a langit tan lutaꞌ, baleꞌ say ibaritaꞌ ko magnayon nin tutuo anggan-angga.”
34 Nibibilin na et ni Jesus konra, “Pakailag kamo! Bangliꞌ nin say pirmi tana nin iti sa kaisipan moyo ket say piririga, pipabok tan say kapapaga sa byay, ket siguradon bigraen nakamoyna liꞌ nin awron isusubliꞌ ko 35 a bilang sa sayay laꞌwan a bigraꞌ nin misadaꞌ. Rumateꞌ ya in nin awro sa sarban tawo. 36 Kanyaꞌ nin matkap a sisasadyaꞌ kamon pirmi tan matkap a dumasal ta pigaw nin magkamain kamon kasaw nin nakem nin maagwantawan a sarba ngaꞌmin nin sain a mangyadiꞌ liꞌ. Ket no wanin, makakiadap kamo liꞌ kongko a siꞌkon si Pinaitawo.”