Main nin mapuloꞌ ray bubalasang nin barang saya konra ket main nin lampadawan na ta keen raya nin sanaen a nubyo.^a 2 Saray lima konra ket kasinakem sara; saray lima et baleꞌ ket manakem sara. 3 Saray liman kasinakem, nangawit saran pageꞌ nin lampadawan ra baleꞌ kasan awit ran risirba ran ladak. 4 Saraytaw baleꞌ saray liman manakem, nangawit saran risirba ran ladak. 5 Naꞌteng yan kai nin rinmateꞌ a nubyo kanyaꞌ nin mangitunggeꞌ saraynan mantumaꞌgan angga sin nakakaꞌlek sara.

6 Sin kapikngaꞌ yabi ana, bigraꞌ a main nin tinmaꞌway a wana, ‘Suoynay nubyo! Keen moya nin sanaen!’ 7 Nibarikwas saraytaw saray mampaꞌlek a bubalasang tan nisadyaꞌ ray lampadawan ra. 8 Wanra nin saray kasinakem konran saray manakem, ‘Byan rakami tana kadiꞌ nin ladak moyo ta makuyep anay lampadawan mi.’

9 Niꞌbat ra nin saray manakem, ‘Kai a magwaꞌ. Kai nin makayadiꞌ ti kontamo ngaꞌmin say awit min ladak. Mako kamoyna nin manaliw sa tindawan.’ 10 Sawanin, legꞌan ran nako nin nanaliw, rinmateꞌ yay nubyo. Nayi sara anaytaw kona saray sisasadyaꞌ a bubalasang sa kamiꞌnan nin bansal ket sin nakasrep sarayna sa bali, nisadaꞌ yaynay purta.

11 Amboꞌ nin naꞌteng, rinmateꞌ saraytaw saray liman kasinakem. Itaw sara sa rikor ket nitaꞌwa-taꞌway ra, ‘Sinyor, pasrepen rakami!’ 12 Baleꞌ si nubyo niꞌbat na konra, ‘Kai gapo nin magwaꞌ! Kai katamo nin katandaꞌ!’ ”

13 Wana ni Jesus, “Kanyaꞌ anaod nin siꞌkamo, matkap a sisasadyaꞌ kamo abirno nin ani a udas ta kai moyo nin tandaꞌ no ani nin awro o udas ako liꞌ nin sumubliꞌ.”

14 “Maiyarig et sa wanti e a pagꞌaadiꞌ na liꞌ nin Dios sa panaon nin isusubliꞌ kodti. Main nin sayay lalaki nin nako sa sayay adayoꞌ a lugar. Miꞌsa ya nin nibwat, kinayaban nasaray kukatulungan na ta pigaw nin ibatiꞌ nan ipagaꞌgetan a kukayamanan na konra. 15 Tinau-tao na sigon sa pakababaꞌ ran mangaꞌget. Si saya, binyan nayan liman milyon nin pisos, si saya, rwan milyon, tan si saya et, sayan milyon.^b Miꞌsa nibwat yayna.

16 Sitaw si binyan nin liman milyon, nikaꞌ nan tampor nin nikumirsyo, ket nakaganansya yan liman milyon. 17 Wanin anamaet lamang a ginwaꞌ nan si binyan nin rwan milyon, ket nakaganansya yan rwan milyon. 18 Sitaw baleꞌ si binyan nin sayan milyon, nikaꞌ nayaytaw nin nikali si kwarta nan amo na.

19 Linmabas a anron panaon ket si amo, rinmateꞌ ya nin mako kikwintawan konra. 20 Sitaw si binyan nin liman milyon, nako yadtaw kona tan niparisibi naytaw say kwartan nibi kona tan say naganansya nan liman milyon. Wana, ‘Don, binyan nakon liman milyon, ket sya e, tan ya e anamaet a liman milyon a naꞌkitan na.’

21 Wanan amo kona, ‘Mabistay ginwaꞌ mo! Manakem tan kapagpyawan kan katulungan! Banaꞌ ta kapagpyawan ka sa daiteꞌ, ipya ko et komo a alaki. Paradti ta kiramaꞌ ka sa ririket ko.’

22 Nako yadtaw anamaet lamang taw si binyan nin rwan milyon tan wana, ‘Don, binyan nakon rwan milyon, ket sya e, tan ya e anamaet a rwan milyon a naꞌkitan na.’

23 Wanan amo kona, ‘Mabistay ginwaꞌ mo! Manakem tan kapagpyawan kan katulungan. Banaꞌ ta kapagpyawan ka sa daiteꞌ, ipya ko et komo a alaki. Paradti ta kiramaꞌ ka sa ririket ko.’

24 Nako yadtaw anamaet taw si binyan nin sayan milyon. Wana konan amo, ‘Don, tandaꞌ kon kasan ingangaꞌdo mo. Yataben moy kai mo nin nimula tan kalapen moy ganansya sa kai mo nin kinapagalan. 25 Linmiꞌmo ako kanyaꞌ nin say ginwaꞌ ko, nikali koyay kwarta mo. Suoy a kwarta mo!’

26 ‘Dukaꞌ tan matamlad kan katulungan!’ wanan niꞌbat nin amo. ‘Wanin anamain a tandaꞌ mo maipaꞌkaꞌ kongko, a yataben koy kai ko nin nimula tan kalapen koy ganansya sa kai ko nin kinapagalan, 27 ket, mayin edet a kai ma nin nikwa sa bangko a kwarta ko ta pigaw kumon nin no rumateꞌ ako ket risibyen koyay kwarta ko pati say abang na?’ 28 Nigan-gan nan amo konran raruman katulungan, ‘Sigi, kalapen moyoy kwartan nibatiꞌ ko kona ta ibi moyo konan si mapuloꞌ nin milyon a kwarta na.’ 29 Wanti ta, si siꞌnuman a main kona a sayay bagay, malamuꞌnan ya nin umabaw yaynan umabaw ket magkamain yan malaem. Baleꞌ mataman nin si daiteꞌ nin main kona, maglat et liꞌ konan si siꞌnuman a kai nin mangusar sa naipya kona. 30 Ket sitin kasan sirbin katulungan, itampal yadtaw sa rikor nin pinasyan dedlem, nin itaw ket main nin umasisit tan umagrem tan ngumaretenget a ngipen ra banaꞌ sa pakapaidap tan bereng.”

31 “Ket siꞌko anaod, si Pinaitawo, sumubliꞌ ako liꞌ nin siꞌkoy Adiꞌ a kalamoꞌ kosara a sarban uanghil tan tumekreꞌ ako liꞌ sa sangkataꞌgayan nin truno ko. 32 Madinep sara liꞌ ngaꞌmin sa adapan ko a sarban tutawodti sa mundo, tan kapadan pangingisyay nan kukarniro nan sayay mammastor konran kukanding, pisyayen kosara liꞌ sa rway grupo a tutawo. 33 Saray iꞌdeng ran kukarniro ikwa kosara liꞌ sa pawanan ko, tan saray iꞌdeng ran kukanding ikwa kosara liꞌ sa pawiri ko. 34 Ket siꞌkon si Adiꞌ wangko liꞌ konran iti sa pawanan ko, ‘Paradti, siꞌkamon binindisyunan na nin Dios a Ama ko. Risibyen moyay Pagꞌadian a naisadyaꞌ anan gindat para komoyo nangibwat et sin kapamarsa konan mundo, 35 ta sin nabitilan ako ket pinakan rako; sin milataꞌ ako ket pinainom rako; abirno nin kai rako nin katandaꞌ ket sinanꞌili rako sa pammali moyo; 36 sin kasan maisket ko ket binyan rako; sin main nin masakit ko ket inalilaꞌ rako; sin napriso ako ket binisita rako.’

37 Ket wanra liꞌ nin saray matunong nin iti sa pawanan ko, ‘Catawan, kaꞌno ka nin nabitilan ket pinakan ka, o nilataꞌ ka ket pinainom ka? 38 Kaꞌno ka nin kai nin katandaꞌ ket sinanꞌili ka sa pammali mi, o kasan maisket mo ket binyan ka; 39 tan kaꞌno ka nin nagmasakit o napriso ket binisita ka?’

40 Ket siꞌkon si Adiꞌ, iꞌbat ko liꞌ, ‘Ibaritaꞌ koyti komoyo, no ginwaꞌ moyo in konan saya konran saraytin mammemper kongko a sara ket baraꞌmo saran bubsat ko, abirno nin aninay kaayupaan na, ginwaꞌ moyoynan lamang kongko.’

41 Wangko liꞌ anamaet konran iti sa pawiri ko, ‘Lumakwan kamodti, siꞌkamon nisamba na nin Dios. Mako kamodtaw sa burung-burong nin apoy a kai gapo nin maꞌrep a nisadyaꞌ para konan Dimunyo tan saray uanghil na 42 ta sin nabitilan ako ket kai rako nin pinakan; sin milataꞌ ako ket kai rako nin pinainom; 43 sin kasan piikapan ko ket kai rako nin sinanꞌili sa pammali moyo; sin kasa nin maisket ko ket kai rako nin binyan; sin main nin masakit ko tan sin napriso ako ket kai rako nin binisita.’

44 Ket itepet ra liꞌ, ‘Catawan, kaꞌno ka nin nabitilan, o nilataꞌ, o kasan piikapan, o kasan maisket, o main nin masakit, o napriso ket kai ka nin tinulungan?’

45 Siꞌko nin si Adiꞌ, iꞌbat ko liꞌ, ‘Ibaritaꞌ koyti komoyo, sin nisiblet moyoy tulong moyo konan saya konran ayuyupaꞌ nin tutawo ko, siꞌkoy sinibletan moyo.’

46 Sarain nin tutawo, maikaꞌ sara sa pakadusawan nin kasan anggawan. Sara baleꞌ a matunong nin tutawo, mabyan sara nin anggan-angga nin byay a iti konan Dios.”