Si Plano nin Dakpen rayan Pupangulo si Jesus
26
Sin nayadiꞌ nayna nin nibaritaꞌ ngaꞌmin in nin uakay ni Jesus, wana konran tumutumbok na, 2 “Tandaꞌ moyo a rway awro tana baꞌyo a pista nin mantawagen nin Nipanglabasa. Ket siꞌkon si Pinaitawo, maipagamet akoyna konran iti sa uray ta pigaw nin ipasak rako sa kudos.”3 Siin nin awro, nididinep saray Pupangulon Pupadiꞌ tan saray Mangatuntawo sa palasyo nan Sangkataꞌgayan nin Padiꞌ a si Caifas. 4 Nagꞌiirgwan ra no paꞌno raya nin dakpen si Jesus nin kai ra matandaan nin tutawo, miꞌsa raya nin patyen. 5 “Baleꞌ amboꞌ nin no pista,” wanra, “ta bangliꞌ no gumulo saray tutawo.”
Say Pangngisadyaꞌ nan Lalaman nan Cristo sa Tabon na
6 Itaw ya si Jesus sa Betania, sa bali na ni Simon a gindat nin main nin makaparmay a sakit sa katat. 7 Sin kapresan ray mampangan ket main nin babayin nako kona ni Jesus. Sitin babayi ket main nin awit nan sayay pangangwanb a main nin laman nin banglo a pinasyan bili, ket nibuꞌboꞌ nayti sa ulo na ni Jesus. 8 Masager saray tumutumbok na ni Jesus sin naꞌkit ray ginwaꞌ nan babayi. Wanra, “Pinirdi nayna in nin banglo! 9 Abaw in kumon nin kwarta no nilakoꞌ ya ket, naibi et kumon konran pubri.”
10 Tandaꞌ na ni Jesus a manꞌirgwe-irgwen ra ket wana konra, “Ambaleꞌ ket? Pauryan moya! Pinasyan bista nin ginwaꞌ na kongko. 11 Abirno nin ani a udas, isen saray pubri nin makalamoꞌ moyo, baleꞌ siꞌko, amboꞌ anan maꞌteng a iti ako et komoyo. 12 Binanglwan nayay lalaman ko nin pananadyaꞌ na para liꞌ sa tabon ko. 13 Ibaritaꞌ koyti komoyo, adtiman nin lugar sa intiron mundo a pakaipatandaan nan Mabistan Patandaꞌ, say ginwaꞌ nan sitin babayi ket maibari-baritaꞌ liꞌ anamaet nin pammanemtem kona.”
Kitarusan ya si Judas konran Pupangulo
14 Sumunor konan siin, si Judas Iscariote, saya konran labinrwan tumutumbok na ni Jesus, ket nako ya konran Pupangulon Pupadiꞌ, 15 tan wana konra, “Umnoy ibi moyo kongko no banaꞌ sa gawꞌen ko ket maipagamet ya komoyo si Jesus?” Namilang saran tulumpuloꞌ nin pirakc tan nibi ra kona, 16 ket, nangibwat ana sin sain, nangkit yayna nin tyimpon maipagamet naya konra si Jesus.
Say Paninilibra nin Pistan Nipanglabas nan Anghil nin Patiti
17 Sin primiron awro nin Pistan Pangangan nin Tinapay a Kasan Pammakbo, nako sara kona ni Jesus a tumutumbok na tan nitepet ra kona, “Adti a rabay mo nin pangisadyaan min pangapunan sa pangngisilibra tamon Pistan Nipanglabas?”
18 Wana ni Jesus konra, “Mako kamo konan siti nin tawo sa Jerusalem tan ibaritaꞌ moyo konayti: ‘Wana ni Maistro tamo, narateꞌ anay udas ko. Siꞌko tan saray tumutumbok ko, isen sa bali mo a pangisilibrawan mi nin Pistan Nipanglabas.’ ”
19 Ket ginwaꞌ ran tumutumbok a wana konra tan nisadyaꞌ raynay pangapunan ra sa pista.
20 Sin yabi, nidudungo sara sa pangnganan si Jesus tan saray labinrwan tumutumbok na. 21 Sin kapresan ran mampangan wana ni Jesus, “Ibaritaꞌ koyti komoyo, saya komoyo a magtraidor kongko.”
22 Rinmereꞌ saran tuloy a tumutumbok. Barang saya wana kona ni Jesus, “Uunuren, maibaritaꞌ mo para nin siꞌko?”
23 Niꞌbat na ni Jesus, “Si saya komoyo a mangkipanawsaw kongko nin tinapay sa yawong, sya a magtraidor kongko. 24 Anaod, siꞌkon si Pinaitawo, mati ako a bilang sa wana sa Kasuratan. Baleꞌ kadoꞌ yayna in si magtraidor kongko! Mas maong ana kumon a kai ya nin naiyanak.”
25 Si Judas a syay magtraidor kona wana, “Maistro, maibaritaꞌ mo para nin siꞌko?”
Niꞌbat na ni Jesus kona, “Nairgo moyna.”
26 Sin kapresan ran mampangan nangalap yan tinapay si Jesus, tan nikisalamat ya konan Dios miꞌsa simpi-simping naya tan nitayak na konran tumutumbok na. Wana, “Kalapen moyayti tan kanen moya. Siti a lalaman ko.”
27 Kaaram, kinalap nayay baso a main nin arak nin ubas. Nikisalamat ya konan Dios, miꞌsa naya nin nibi konran tumutumbok a wana, “Sarba moyo, minom konan siti. 28 Sayti a dayaꞌ ko nin mamaꞌget nin kataratwan konan Dios. Tumuroꞌ liꞌ ta pigaw nin mapirduna a kukasalanan ran abaw a tutawo. 29 Ibaritaꞌ koyti komoyo, kai akoyna gapo minom nin arak nin ubas angga konan sitaw si awron minom ako liꞌ nin baꞌyon arak a kadungo katamo sa Pagꞌadian nan Dios a Ama ko.”
30 Sin nayadiꞌ sara nin nangansyon nin pangrarayo konan Dios nibwat saran nako sa Talugtog Olibo.
Ipauꞌna-uꞌna nayna ni Jesus a Lakwanan rayan Tumutumbok Na
31 Wana ni Jesus konra, “Sarba moyo ngaꞌmin, palaywan rako konan sitin yabi a bilang sa wanan Dios a naisurat sa Kasuratan. Wana, ‘Patyen koya liꞌ a mammastor ket saray karniro misisyak sara.’d 32 Baleꞌ saytaw no napasubliꞌ akoyna liꞌ nin mabyay, muꞌna akoyna liꞌ tan tagaꞌnan katamodtaw sa Galilea.”
33 Wanan nagꞌirgo ni Pedro, “Lakwanan rakayna ngaꞌmin, baleꞌ siꞌko kai gapo.”
34 Wana ni Jesus kona, “Ibaritaꞌ ko komo, Pedro, baꞌyo main nin tumarangꞌok nin manok konan sitin parbangon, mitlo moyna nin nibudiꞌ a katandaꞌ nako.”
35 Baleꞌ wana ni Pedro, “Mataman et nin kalamoꞌ nako nin patyen ra, kai ko gapo nin ibudiꞌ a katandaꞌ kata.”
Wanin anamaet lamang a wanra nin raruman tumutumbok.
Idasal nan Cristo a Kai nayna Kumon nin Irangep a Dyaꞌdyaꞌ
36 Rinmateꞌ sara si Jesus itaw sa sayay lugar a napangaranan nin Getsemani. Wana konran tumutumbok na, “Mabatiꞌ kamodti. Mako akodtaw e nin dumasal.” 37 Niꞌras nasaran kalalamoꞌ na si Pedro tan saray rway aꞌnak na ni Zebedeoe. Marereꞌ yan tuloy tan pinasyan byat nin manꞌisipen na. 38 Wana konra, “Pinasyan tuloy nin bereng ko ket ipati koyna layi. Iti kamo tamoꞌ. Lalamuꞌnen rako a andiꞌ kamo nin maꞌlek.” 39 Kinmadayoꞌ yan bugaꞌ konra. Linmukob ya tan dinmasal ya. Wana, “Ama ko, no magwaꞌ andiꞌ mo kumon ipairangep kongko in say dyaꞌdyaꞌ a adapen kon irangep. Wanin man, amboꞌ a karabayan ko a masunor, no kai say karabayan mo.”
40 Sin sinmubliꞌ ya konran saray tuloy tumutumbok na, naratꞌanan nasaran mangkaꞌlek. Pinukaw nasara tan wana kona ni Pedro, “Kai rako tana gapo nin malalamoꞌ nin andiꞌ kamo nin maꞌlek abirno nin sayay udas tamoꞌ? 41 Andiꞌ kamo nin maꞌlek no kai edet, dumasal kamo ta pigaw nin kai kamo nin madaeg nin tukso, ta sa nakem moyo ket disidido kamon gawꞌen moyoy manepeg baleꞌ mapatapoꞌ kamon kinatawo moyo.”
42 Kinmadayoꞌ ya anamanaet si Jesus tan dinmasal yan uman. Wana, “Ama ko, matumbok a karabayan mo. No siin a karabayan mo si matkap kon irangep in say adapen kon irangep nin dyaꞌdyaꞌ, wanin lawas.”
43 Sin sinmubliꞌ ya anamanaet sa kamiꞌnan ran tulon tumutumbok nin kalalamoꞌ na, mampaꞌlek sara anamanaet ta talagan kai ra nin mapukpukan a elek ra. 44 Kanyaꞌ nin linakwanan nasara anamanaet tan dinmasal yan pitlo nin wantaw a lamang sa nayadiꞌ anan nidasal na.
45 Sinmubliꞌ ya anamanaet konran tumutumbok na tan wana konra, “Mampaꞌlek kamo et! Pakandaꞌ kamo! Narateꞌ anay udas a siꞌkon si Pinaitawo ket maipagamet akoyna konran dukaꞌ a tutawo. 46 Mibangon kamo tan sumnaꞌ atamo. Sya eyna e a tawon nagtraidor kongko.”
Say Nipanakep kona ni Jesus
47 Mampagꞌirgo ya et si Jesus sin rinmateꞌ ya si Judas a saya konran labinrwan tumutumbok na. Abaw saray tutawon kalamoꞌ na nin nibakiꞌ ran Pupangulon Pupadiꞌ tan saray Mangatuntawo. Di-beneng tan di-batutaꞌ sara. 48 Nibaritaꞌ naynan gindat konra ni Judas no paꞌno rayan maipurok si Jesus. Wana, “Si arkan ko, syaytaw a diri. Dakpen moyan tampor.”
49 Sin rinmateꞌ yadtaw si Judas, diri-diritso na kona ni Jesus. “Maabig a yabi, Maistro,” wana kona ket inarkan naya.
50 “Amigo, gawꞌen moynan tampor a gagara mo,” niꞌbat na ni Jesus kona. Inmarak saray tutawo ket dinakep raya si Jesus.
51 Si saya konran kalalamoꞌ na ni Jesus, inuyos nayay beneng na tan tinagaꞌ nayay sayay katulong nan si Sangkataꞌgayan nin Padiꞌ ket naglat yay tutulyan na. 52 Wana ni Jesus kona, “Ikaluban mayna in si beneng mo. Saray mangyusar nin armas, armas anamaet a pakamatyan ra. 53 Kai mo para nin tandaꞌ a no kidawat akon tulong konan Dios a Ama ko ket mangibakiꞌ yadti nin ribu-ribon uanghil na? 54 Baleꞌ no wanin, paꞌno nin matukid a wanan Dios a naisurat sa Kasuratan a matkap nin mangyadiꞌ in ey?”
55 Ket wana ni Jesus konran tutawo, “Saya ako para nin kriminal ta nakabeneng kamo tan main nin pekpek moyon manakep kongko? Inawru-awro kon nangyakay itaw sa sakop nan Timplo nan Dios, kai rakoyna nin dinakep itaw! 56 Baleꞌ mampangyadiꞌ ti ngaꞌmin nin pakatukidan nin nisurat ran prupita.”
Ket nagsipalayo sara ngaꞌmin a tumutumbok na tan linakwanan raya si Jesus.
Say Nipamarsa ran Pupangulo konan Cristo
57 Saraytaw saray nanakep, nikaꞌ raya si Jesus sa palasyo nan Sangkataꞌgayan nin Padiꞌ a si Caifas. Itaw nididinep saray Madudunong sa Gugan-gan tan saray Mangatuntawo. 58 Si Pedro, tinmumbu-tumbok ya kona ni Jesus, baleꞌ itaw ya tamoꞌ sa dayoꞌ. Sin sinumrep saray nanakep sa palasyo, angga yadtaw tana sa baraybay. Kaaram nituloy na sa luob nin pukok nan palasyo tan nikitekreꞌ ya konran gwardya ta rabay nan matandaan no ani a mangyadiꞌ kona ni Jesus.
59 Saray Pupangulon Pupadiꞌ tan sarba ran myimbro nan Kunsiho, naningka-tingkap saran abirno bulaꞌ-bulaꞌ nin ibidinsya kuntra kona ni Jesus ta pigaw nin masintinsyawan rayan patiti. 60 Baleꞌ kasan maꞌkit ran sumadag abirno nin abaw saray namaritaꞌ nin bulaꞌ-bulaꞌ nin kuntra kona. Sa kaꞌtengan main nin rwa ray pinaipadar. 61 Wanra, “Wanan siin a tawo, mababaꞌ naya kanon sidaen miꞌsa ipaꞌdeng nayan uman sa luob nin tuloy awro a Timplo nan Dios.”
62 Inumdeng yay Sangkataꞌgayan nin Padiꞌ tan wana kona ni Jesus, “Ani a maiꞌbat mo sa sain a manꞌiparsa ra komo?” 63 Baleꞌ kai ya gapo nin nagꞌirgo si Jesus. Ket wanan Sangkataꞌgayan nin Padiꞌ kona, “Igan-gan ko komo, ibaritaꞌ mo komi, sa ngaran nan sibibyay a Dios, no siꞌkay Cristo a Anak nan Dios a si nipangakoꞌ nan ibakiꞌ nadti.”
64 Niꞌbat na ni Jesus, “Nairgo moyna. Ket ibaritaꞌ ko komoyo, sa amboꞌ nin maꞌteng nin panaon, maꞌkit rako nin siꞌkon si Pinaitawo nin nakatekreꞌ iti sa pawanan nan Dios, a sya a Makapangyayadiꞌ, nin manrumateꞌ akon iti sa babon gunem mangibwat sa langit.f”
65 Sin narngeꞌ nayti nin Sangkataꞌgayan nin Padiꞌ, rinakyat nayay aysing na nin pangipaꞌkit nan alakin sager na. Wana, “Panguꞌna-uꞌna konan Dios in say nibaritaꞌ na! Ani, matkap et a tistigos? Narngeꞌ moyoynan mismo sawanin a panguꞌna-uꞌna na konan Dios! 66 Ani a wamoyo?” wana.
Ket niꞌbat ran kalalamoꞌ na, “Nagkasalanan ya ket manepeg a patyen ya.”
67 Ket linudaꞌ-ludaan raya si Jesus sa rupa, tan tinasu-taso raya. Rinampa-rampaꞌ raya nin raruma 68 tan wanra, “Siꞌkan si syay Cristo, ibaritaꞌ mo pa no siꞌnoy nangrampaꞌ komo!”g
Say Nipangibudiꞌ na ni Pedro a Katandaꞌ naya si Jesus
69 Itaw ya si Pedro nin mantumekreꞌ sa baraybay nan palasyo. Kinmadani ya kona a sayay alilaꞌ nan babayi nin Sangkataꞌgayan nin Padiꞌ ket wana kona, “Saya ka anamaet konran kalalamoꞌ nan sitaw si Jesus a taga Galilea, a!”
70 Nibudiꞌ na in ni Pedro nin narngeꞌ ran sarba ran itaw a wana, “Kai ko nin tandaꞌ in say manꞌibaritaꞌ mo!” 71 Inmalis yan nako sa purta nan pukok. Saya anamanaet nin alilaꞌ nin babayi a nakaalilbiꞌ kona ket wana konran tutawodtaw, “Sitin tawo, kalamoꞌ nayan siin si Jesus a taga Nazaret.”
72 Sinambawan na nin kai na anamanaet nin inalilbiꞌ ni Pedro a wana, “Kai koya nin tandaꞌ in nin tawo.”
73 Sin nainsanan nin bugaꞌ kinadanyan rayan saray lulalakin itaw tan wanra kona, “Pageꞌ pa a saya ka konran kalalamoꞌ na. Madlaw sa punto mon magꞌirgo a taga Galilea ka.”
74 “Sambawan ko nin kai koya nin katandaꞌ in nin tawo,” wana ni Pedro, “ket taman mangno ako no mampibulaꞌ-bulaꞌ ako.”