2 Sawanin anamaet, raywen katamo ta sipapanemtem kamo lawas kongko, tan mansunuren moyoy uakay nin niparateꞌ ko komoyo. 3 Mataman baleꞌ nin wanin, rabay ko nin matarusan moyoyti e:

Si ibwatan^a nan barang sayay lalaki ket si Cristo, tan si ibwatan nan si babayi ket si lalaki, tan si ibwatan nan Cristo ket si Dios. 4 Ket banaꞌ anaod ta wanin, si sayay lalaki nin dumasal o ibaritaꞌ nay nipatandaan nan Dios kona sa pididinep moyo, matkap a kasan animan nin sakbong nan ulo na ta no main, kai naya nin manꞌipadar nin ipasirayo a si ibwatan na. 5 Baleꞌ konran bubbayi ket naiduma ta, no si sayay babayi nin dumasal o ibaritaꞌ nay nipatandaan nan Dios kona ket kasan animan nin sakbong nan ulo na, kai naya nin manꞌipadar nin ipasirayo a si ibwatan na. Makapadingꞌey in a kapada no kiniskisan yay ulo na. 6 Anaod, no andiꞌ ya sa manepeg nin bakas na, pakiskis yaynan diritsa. Baleꞌ banaꞌ ta makapadingꞌey nin tuloy a kiskis yay sayay babayi o a papukris yan baraꞌmon lalaki a bakas na, say manepeg anaod ket sakbungan nayay ulo na.

7 Anamaet anaod, amboꞌ nin manepeg no sakbungan nayan sayay lalaki a ulo na ta syay pinarsa nangibwat sa bakas nan Dios ket syay mampangipadar nin mangipasirayo konan Dios a syay ibwatan na. Si babayi baleꞌ, sya a mampangipadar nin mangipasirayo konan lalaki a syay ibwatan na. 8 Wanin ta si uꞌnan lalaki, kai ya nin nangibwat konan babayi no kai, si uꞌnan babayi, nangibwat ya konan lalaki. 9 Saya et, si lalaki kai ya nin pinarsa para konan babayi no kai si babayi a pinarsa para konan lalaki.^b 10 Kanyaꞌ nin banaꞌ konan siin nin rason tan banaꞌ ta saray uanghil ket manꞌimatunan ray pigagawaꞌ ran tutawo nan Dios, matkap nan ipaꞌkit nin babayi a naibi nin pagkanawanawa kona.

11 Wanin man, sa nikaipasaya tamo kona nin Uunuren, kai raya nin mapagsirbyan nin bubbayi a Uunuren nin kasan pakibiang ran lulalaki tan kai raya anamaet nin mapagsirbyan nin lulalaki nin kasan pakibiang ran bubbayi. 12 Oꞌ a ta mataman no sa lalaman nan si nuꞌnan lalaki a ibwatan nan nuꞌnan babayi, si lalaki ket matkap a iyanak nayan sayay babayi; baleꞌ si Dios a ibwatan nin sarba.

13 Sayti e a panemtemen moyo sa pagdidisisyon moyo no manepeg kasi a mangipangulo yan dasal a babayi nin kasan sakbong nan ulo na: 14 Amboꞌ para nin kusto a manꞌibaritaꞌ ran makapadingꞌey a mianro yan sabot a sayay lalaki? 15 Baleꞌ sakalako sa sayay babayi ta no anro yay sabot na, ket mamabista kona, tan siin nin anron sabot na ket nibi nayan Dios nin sakbong nan ulo na. 16 Ket no bilang wadiꞌ a main isen komoyo nin kuntra sa saytin manꞌibaritaꞌ ko, siti a ibaritaꞌ ko:

Siꞌkami tan mataman anamaet lamang sa raruman dudupong ran mammemper konan Dios sa naduma-duma nin lugar, sain a kaugalian.

17 Ket sawanin, main nin saya et nin amboꞌ nin manepeg nin gawaꞌ moyo a ibaritaꞌ ko komoyo. Wanin ta no mididinep kamo ta pigaw nin mangrayo kamo konan Dios, kai ana edet nin makapaabig komoyo no kai makadukaꞌ. 18 Muꞌna-muꞌna, naiparateꞌ kongko a no mididinep kamo ta pigaw nin mangrayo kamo konan Dios, mipupurok kamo. Ket midyo tepren ko nin wanin a pageꞌ 19 ta mangyadiꞌ a wanin a matau-tao kamo ta pigaw nin maalilbiꞌ saraytaw saray tutuo sa pangingikit nan Dios. 20 Kanyaꞌ nin no mididinep kamo ta pigaw nin midudungo kamo kumon nin mangan nin say pakapanemteman nin patiti nan Uunuren, adayoꞌ sa sain a nakem moyo. 21 Anaod, kai kamo kano nin tumaꞌgan konran raruma ta pigaw nin midudungo kamo kumon nin mangan nin napasaya, no kai muꞌna-muꞌna kayna kano nin siꞌkan masibaꞌ nin mangan. Say mangyadiꞌ ket saray raruma ket nabok sara, saray raruma anamaet ket mabitil sara. 22 Kaꞌkit a wanin! Ani, kasa paran pammali moyo nin pangnganan tan pinuman moyo? Kasa gapon pangingibilang moyo sa sayti nin nipamipapasaya nan Dios ket man-gawꞌen moyon madingꞌeyan saray mampagkurang! Ket sawanin, ani a tagaꞌnan moyon ibaritaꞌ ko komoyo maipaꞌkaꞌ sa sain? Say raywen katamo? Kai gapo!

23 Anaod, siꞌko, niyakay ko komoyo no ani a niyakay nan diri ni Uunuren tamon Jesus. Wanti e: Sin mampangapon sara konan sitaw a yabin liniputan ya, nangalap yan tinapay, 24 nikisalamatan nayay Dios, miꞌsa naya nin simpi-simping tan wana, “Siti a lalaman ko nin maidaꞌton para komoyo. Gawꞌen moyoyti nin pirmi nin mangipapanemtem kongko.” 25 Wanin anamaet, sin nayadiꞌ sarayna nin nangan, kinalap nayay baso tan wana, “Sayti nin arak a pakaꞌkitan nin baꞌyon pakitarato nan Dios sa tutawo nin paꞌgeten yan dayaꞌ ko nin tumuroꞌ. Tepeꞌ nin minom kamon sayti, gawꞌen moyoyti nin mangipapanemtem kongko.”^c

26 Anaod, sa pangngawaꞌ moyon sain, angga liꞌ nin sumubliꞌ yaynadti si Uunuren tamon Jesus, manꞌipatandaan moyoy patiti na tepeꞌ nin mangan kamo nin sitin tinapay tan minom kamo konan sitin kupa. 27 Edet, si siꞌnuman a mangan nin tinapay o minom nin arak nan Uunuren baleꞌ kai nin maibagay a pigagawaꞌ na sa pidudungo sa say pakapanemteman, maranod yan nanidaꞌ sa lalaman na nin Uunuren tan sa pinaturoꞌ nin dayaꞌ na. 28 Ket banaꞌ konan siin, matkap a usisaen nin barang saya no kumanaꞌ a kanakman na baꞌyo ya nin kipangan nin tinapay tan kiinom nin arak. 29 Wanin ta si tawon mangan o minom a kai na nin asikaswen a napasaya saray mammemper sa sayan-sayay lalaman kona ni Cristo, mannabuan nan pakadusa a lalaman nan diri. 30 Siin a rason no ambaleꞌ a abaw sara komoyo a maisasakit tan mabublay a lalaman ra, tan nati-nati saraynay raruma. 31 Baleꞌ no manꞌusisaen tamoyna yapoꞌ a lalaman tamon diri, kai natamo nin dusawen nin Dios. 32 Baleꞌ no mandusawen natamo man sawanin nin Dios, man-gawꞌen na in nin pangangakay na kontamo ta pigaw nin kai atamo liꞌ nin maikalamoꞌ nin madusa konran saray kai nin mamper kona no awro liꞌ nin mangukom ya.

33 Kanyaꞌ nin, bubsat, no mididinep kamo nin gawꞌen a pakapanemteman konan Uunuren, tagaꞌnan moyo sara a kalalamoꞌ moyo ta pigaw nin miraramaꞌ kamo nin mangan. 34 Ket no mabitil yayna a siꞌnuman, mangan yayna yapoꞌ sa bali na ta pigaw nin say pidudungo moyo nin mangan ket kai nin magꞌin puon a dusawen nakamo nin Dios.

Ket say maipaꞌkaꞌ sa raruma et nin bubagay, bibilinen katamoyna liꞌ no isen akoyna.