Si Ispirito nan Dios a Pangibwatan nin Pakababaꞌ tamo
12
aKet sawanin, bubsat, ubatan koy nisurat moyo maipaꞌkaꞌ sa bubagay a maipaꞌkaꞌ konan Ispirito nan Dios. Rabay kon mapalaway a pakatandaꞌ moyo.2 Tandaꞌ moyon sin kai kamo et nin namper kona ni Jesus, naibarang-barang kamon nangrayo nin dios-dios a kasan byay. 3 Edet, ipapalaway ko komoyo a maipaꞌkaꞌ sa pagꞌuuray nan Ispirito nan Dios. No si sayay tawo ket mampagꞌirgo ya mangibwat sa pagꞌuuray nan Ispirito nan Dios kona, kai nin magwaꞌ a magꞌirgo yan paninidaꞌ kona ni Jesus. Kai anamaet nin maibaritaꞌ nin peteg nin siꞌnuman a wana, “Si Jesus, syay Uunuren,” no kai ya nin nipaisirong sa pagꞌuuray nan Ispirito nan Dios.
4 Tandaan moyoyti: Sayan-saya ya tamoꞌ a Ispirito nan Dios mataman nin niduduma a manꞌipuyaꞌ na.b 5 Sayan-saya ya tamoꞌ a Uunuren nin mampagsirbyan tamo mataman nin niduduma anamaet a dalan nin pagsisirbi. 6 Sayan-saya ya tamoꞌ a Dios nin mampagtrabaho sa byay nin barang saya kontamo ngaꞌmin nin nangipuryadiꞌ nin sarba mataman nin niduduma anamaet a lamang a nagwaꞌ sa byay tamo.
7 Sawanin, si barang sayay mammemper ket mampuyaan yan pakayadiꞌ nan Ispirito nan Dios ta pigaw nin si barang saya konran nididinep nin mammemper ket matulungan ya.
8 Bilang wadiꞌ, main saraytaw saray mampuyaan nan Ispirito nan Dios nin mangibwat kona ket mangipatandaꞌ saran kadunungan nan Dios; main saraytaw anamaet saray mampuyaan nan Ispirito nan Dios nin maipapalaway ran kikumpurmi kona a arararem nin bubagay. 9 Ket main saraytaw et saray mampuyaan nan Ispirito nan Dios nin maksaw nin pagmamatalek a main nin gawꞌen nin mangibwat konan Ispirito nan diri; main saraytaw anamaet saray mampuyaan nan Ispirito nin diri nin makapamaandaꞌ sara nin main nin masakit; 10 main saraytaw anamaet saray pinuyaan nin pakayadiꞌ nan Ispirito nan Dios nin mangwaꞌ nin mumilagro. Main saraytaw anamaet saray pinuyaan nin pakayadiꞌ nan Ispirito nan Dios nin mangibaritaꞌ nin nipatandaan nan Dios konra, tan main saraytaw anamaet saray pinuyaan nin pakayadiꞌ nan Ispirito nan Dios nin mangipurok no sain ket ibat konan Dios o kai.c Ket main saraytaw et saray pinuyaan nin pakayadiꞌ nan Ispirito nan Dios nin makapagꞌirgon nagsikabarang nin irgo a kai ra tandaꞌ, tan main saraytaw anamaet saray pinuyaan nin pakayadiꞌ nan Ispirito nan Dios nin maibaritaꞌ ray katarusan nin sain nin irgo.
11 Edet, sa sarban sayti ket sayan-sayay nangwaꞌ, si Ispirito nan Dios. Itayak nan ipuyaꞌ a pakayadiꞌ na sa barang sayay mammemper dipindi sa rabay na.
Saya atamon Lalaman nin Abaw a Parti na
12 Isipen moyoy maipaꞌkaꞌ sa nikasaya nan lalaman nan sayay tawo. Abaw a parti na, baleꞌ mataman no wanin, sayan-sayay lalaman ya tamoꞌ. Wanin kontamon sarba tamon mammemper kona ni Cristo, sayan-sayay lalaman natamodti ni Cristo. 13 Wanin ta, nalipos atamo nin sayan-sayay Ispirito nan Dios ta pigaw nin nipasaya natamo sa sayan-sayay paꞌsar lalaman. Judio man o amboꞌ atamo nin Judio, aripen man o amboꞌ atamo nin aripen, pari-pariho tamoyan rinisibi a sayan-saya nin Ispirito nan Dios. 14 Si lalaman anaod, amboꞌ tamoꞌ nin sayan-saya a parti na no kai abaw.
15 Ket bilang wadiꞌ a makapagꞌirgo yay ayi ket wana, “Banaꞌ ta amboꞌ ako nin gamet, kanyaꞌ nin amboꞌ ako nin parti nan lalaman,” baleꞌ, kai in nin mangyadiꞌ a wana a magꞌin yaynan amboꞌ nin parti nan lalaman. 16 Wanin a lamang a mataman no wanan tutulyan, “Banaꞌ ta amboꞌ ako nin mata, kanyaꞌ nin amboꞌ ako nin parti nan lalaman,” kai anamaet a lamang nin mangyadiꞌ a wana a magꞌin yaynan amboꞌ nin parti nan lalaman. 17 No si lalaman ket mata ya tamoꞌ, paꞌno yan makarngeꞌ? Ket no tutulyan ya tamoꞌ anamaet, paꞌno yan makaangot? 18 Baleꞌ amboꞌ nin wanin a lalaman ta si Dios, ginwaꞌ nay lalaman tamo nin main nin nagsikabarang nin parti nin inunong nan maitukoy sa rabay na. 19 Anaod, no saya nin parti ya tamoꞌ, amboꞌ yayna nin lalaman. 20 Si lalaman anaod, abaw a nagsikabarang nin parti na; wanin man sayan-saya ya tamoꞌ a lamang nin lalaman.
21 Kanyaꞌ anaod nin si mata ket kai na nin maibaritaꞌ konan gamet, a wana, “Kasan pakatkapan ko komo!” Wanin anamaet a lamang, si ulo kai na nin maibaritaꞌ konan ayi, a wana, “Kasan pakatkapan ko komo!” 22 Say pete-peteg, matkap tamo saran tuloy a pupartin sa wantamo ket amboꞌ nin matarigꞌen. 23 Say puparti anamaet nin wantamon amboꞌ nin mabista ket asikaswen tamon maong tan say puparti nin madawal nin maꞌkit, pasketan tamo nin mabista nin salimbengan. 24 Baleꞌ say parti nin mabistan maipadar, kai ana matkap nin pabistawen et. Ginwaꞌ nan Dios nin wanin a lalaman tamo ta pigaw nin saytaw say parti nin ipaꞌkaꞌ tamon makapoy a galang ket asikaswen tamon maong 25 ta pigaw nin say puparti nan lalaman ket kai nin napuruk-purok, no kai edet, mipagawan a saya tan saya. 26 Ket no si sayay parti ket main nin maingar na, si intiron lalaman main anamaet nin maingar na, tan no pagawan yan maong a saya ket sarba kiririket kona.
27 Say rabay koynaod nin ibaritaꞌ ket siꞌtamo nin mammemper, lalaman natamodti ni Cristo. Anamaet, barang saya kontamo ket sayay parti na nin naiduma. 28 Ket main nin nagsikabarang nin rispunsibilidad a nanuyuan nan Dios kontamo a pinipapasaya na.
Muꞌna-muꞌna, sinuyoꞌ nasaray apostoles; ikarwa, saray mangibaritaꞌ nin say nipatandaan nan Dios konra; ikatlo, saray mangyakay nin minsahi nan Dios.
Miꞌsa, main saraytaw saray pinuyaan nan pakayadiꞌ nin mangwaꞌ nin mumilagro, tan say pakayadiꞌ nin manambar tan say pakayadiꞌ nin tumulong konran kalalamoꞌ ra, tan say pakayadiꞌ nin ipangulwan rasaray mammemper, tan say pakayadiꞌ nin makapagꞌirgo nin nagsikabarang nin irgo a kai ra nin tandaꞌ.
29 Kai edet anaod nin magwaꞌ a sarba ket apostol, o sarba ket mapuyaan nin pakayadiꞌ nin mangibaritaꞌ nin say nipatandaan nan Dios konra, o sarba ket mangyakay nin minsahi nan Dios. Kai anamaet lamang nin magwaꞌ a sarba ket mapuyaan nin pakayadiꞌ nin mangwaꞌ nin milagro, 30 o sarba ket mapuyaan nin pakayadiꞌ nin manambar, o pakayadiꞌ nin makairgo nin nagsikabarang nin irgo a kai ra tandaꞌ, o pakayadiꞌ nin mangibaritaꞌ nin katarusan nin sain nin irgo a kai ra nin mataros.
Si Sangkaimpurtantiwan ket say Pangangadoꞌ
31 Sawanin baleꞌ, sulitan moyo in say pupakababaꞌ a mas makapaabig para komoyon sarba tan ipapalaway ko anamaet komoyo sawanin no ani a mas mabista para komoyo nin sunuren moyo sa byay moyo.d