13
Mataman no makapagꞌirgo ako wadiꞌ nin nagsikabarang nin irgodti sa lutaꞌ tan mataman et nin say irgo ran uanghil, no kasa nin pangangadoꞌ ko, siin nin pakayadiꞌ ko ket kasan kakanaan na. Say saritaꞌ ko, anggan tunoy tamoꞌ ket baraꞌmo ako tamoꞌ nin umaweng nin kampanaꞌ o pyangpyang. 2 Mataman wadiꞌ no maibaritaꞌ ko no ani a nipatandaan nan Dios kongko, tan mataman wadiꞌ nin mataros ko a niyadi nan plano nan Dios tan say arararem nin uakay, tan mataman et wadiꞌ nin wanin ana a pagmamatalek ko ket maiyalis koy tutalugtog, baleꞌ kasa nin pangangadoꞌ ko, kasa gapon lamang nin sirbi ko. 3 Mataman wadiꞌ nin ibi ko ngaꞌmin a sarba nin kamamain ko konran mumaidap, tan angga et sa ibi ko a lalaman ko, ket sa wanin makapirayo ako,a baleꞌ kasa nin pangangadoꞌ ko, kasa gapon lamang nin magagap ko.4 Si sayay tawo nin main nin pangangadoꞌ na maanos ya tan maong a ugaliꞌ na. Kai ya gapo nin umimbel tan kai ya nin mipasirayo tan amboꞌ yan marangas. 5 Amboꞌ nin buraras a piuugaliꞌ na. Kai na anamaet nin ipilit a rabay na; amboꞌ nin anted a pakaabot na tan kai ya nin mamaꞌlem nin sakit-nakem. 6 Kai na nin pakaririketan a dukaꞌ a mangyadiꞌ no kai say pakaririketan na ket say no ani a mapteg tan tutuo. 7 Si tawo nin mampangadoꞌ itpel na a sarba ngaꞌmin; mampagmatalek tan mampangilalo yan pirmi mataman no ani a mangyadiꞌ tan maagwantawan na a animan nin rumateꞌ.
8 Maipaꞌkaꞌ sa pakayadiꞌ a manꞌipuyaꞌ nan Ispirito nan Dios a bilang say pakayadiꞌ nin mangibaritaꞌ nin nipatandaan nan Dios, say pakayadiꞌ nin magꞌirgon nagsikabarang nin uirgo a kai nin tandaꞌ, tan say pakayadiꞌ nin maipapalaway a arararem nin bubagay, sayti ket pari-pariho nin mapaso. Baleꞌ no maipaꞌkaꞌ sa pangangadoꞌ, siti ket kai nin mangangga! 9 Anaod, say pakatandaꞌ tamo sawanin ket main et nin kakurangan, tan say pangngibaritaꞌ tamon nipatandaan nan Dios ket pauꞌna tamoꞌ yapoꞌ et a lamang, 10 baleꞌ no rumateꞌ ana liꞌ a pangngilaꞌpos nan Dios, sain say pauꞌna tamoꞌ ket mapaso liꞌ. 11 Bilang wadiꞌ, sin anak ako et, nagꞌirgo akon inaanak; say pinanakem ko ket inaanak; nagrason akon inaanak. Baleꞌ sin tinmuntawo ako, ginurutan koynay inaanak a pigagawaꞌ. 12 Wanin kontamo banaꞌ ta say maꞌkit tamo tan matarusan tamo sawanin ket bilang sa makawerwer nin maꞌkit sa malapot nin ispiho. Baleꞌ no rumateꞌ ana liꞌ a pangngilaꞌpos na nin Dios ket mangkaꞌkit tamoyayna liꞌ nin adap-adapan. Sawanin, say tandaꞌ ko ana ket amboꞌ et nin masibulot. No saytaw liꞌ baleꞌ, say tandaꞌ ko ket liso ana kapada a si Dios ket tandaꞌ nakoynan liso.
Matkap nin Ipatyoꞌ a Suet tamo nin say Pangangadoꞌ tamo
13 Edet, sayti nin tulo ket magnayon: say pagmamatalek, say pangingilalo tan say pangangadoꞌ. Si sangkataꞌgayan sa sayti ket, say pangangadoꞌ.