14
Kanyaꞌ nin ipamuspusan moyon miaaduan kamon saya tan saya, ket suetan moyon magaꞌmuran in nin lamang say manꞌipuyaꞌ nan Ispirito nan Dios, lalun-laloyna a pakayadiꞌ nin mangibaritaꞌ nin nipatandaan nan Dios.
2 Anaod, si sayay magꞌirgo sa kai nin mataros a irgo, si Dios tamoꞌ a mangkairgo na tan amboꞌ nin saray tutawo ta kasan makataros sa manꞌibaritaꞌ na, no kai sa nipaninreg nin kapusuan na keta mampamaritaꞌ yan adi konran raruma. 3 Baleꞌ si tawon mangibaritaꞌ nin nipatandaan nan Dios kona, konran kapada nan tawo ya nin mangkiirgo, ket makatulong yan tuloy ta mapagsen a pammemper ra, tan mapaksaw a kanakman ra tan maliwaliwa sara. 4 Si makapagꞌirgon kai nin mataros a irgo say lalaman nan diri tamoꞌ a matulungan na, baleꞌ, si tawon makaibaritaꞌ nin nipatandaan nan Dios kona, saray kalalamoꞌ nan mididinep a matulungan na.
5 Rabay ko a main kumon nin pakayadiꞌ moyo ngaꞌmin nin makapagꞌirgon kai nin mataros a uirgo. Wanin man, mas rabay kon mabyan kamon pakayadiꞌ nin mangibaritaꞌ nin no ani a nipatandaan nan Dios. Ket sangkablyan kamo no wanin ta mas abaw a maitulong moyo konran raruma dyan no makapagꞌirgo kamon kai nin mataros a irgo; pwira no maipataros moyo a manꞌibaritaꞌ moyo ta pigaw nin makatulong nin lamang komoyo ngaꞌmin isen nin mampididinep nin mangrayo konan Dios. 6 Isipen moyoy maipaꞌkaꞌ konan siti e, bubsat: Bilang wadiꞌ, no mako akodsen komoyo, say sarban ibaritaꞌ ko ket say irgon kai moyo nin mataros, ani a kaabigan nin maibi komoyo? Kasa gapo, pwira no ibaritaꞌ kon mapalaway komoyo a nipatandaan nan Dios kongko, o naadal ko maipaꞌkaꞌ kona, o minsahi nin nangibwat konan Dios o raruman akay nin matarusan moyo.
7 Kapada in nin pannugtog nin instruminto sa musika, alimbawaꞌ say mantawagen nin flauta o arpa. Paꞌno ran tandaꞌ nin mampangrengeꞌ no ani a mantugtugen no saray mampanugtog ket amboꞌ nin mapalaway a manꞌibi ran tuno? 8 Wanin anaod sa trumpitan usaren nin mamin sinyal no main nin gira. No amboꞌ nin mapalaway a sinyal nin manꞌibi nan mampanarumpita, kai sara nin makasadyaꞌ nin mako kigira a sundaloꞌ. 9 Wanin sa sain a lamang a maipaꞌkaꞌ komoyo. No magꞌirgo kamo sa kai nin mataros a irgo, kasa nin kabalikasan konra nin mampangrengeꞌ. Anaod, mampagꞌirgo kamon ilpad tamoꞌ nin siri!
10 Abaw a klasin uirgodti sa mundo tan say barang saya ket main nin katarusan. 11 Ket no si sayay tawo kiirgo ya kongko sa irgon kai ko nin tandaꞌ, kasan kabalikasan kongko nin manꞌibaritaꞌ na. Istranghiro sa saya tan saya a paꞌsar mi nin kai nin makapitaros.
12 Say matkap moyo edet nin gawꞌen ta masulit kamon makarisibi nin say manꞌipuyaꞌ nan Ispirito nan Dios ket, si sulitan moyon mausar et pa in say pakayadiꞌ a makatulong nin mamatuboꞌ konran tutawo nan Dios. 13 Kanyaꞌ anaod nin si napuyaan nin pakayadiꞌ nin makapagꞌirgon kai nin mataros a irgo, idasal nan dawaten a pakayadiꞌ nin mangipataros nin inirgo na. 14 Anaod, no dumasal ako sa kai nin mataros a irgo, tutuo a say kadadasal ko ket mangibwat sa kapusuan ko, baleꞌ kai nin kalamoꞌ a nakem ko.
15 Ket banaꞌ anaod ta wanin, wanti ey gawꞌen ko:
Dumasal ako sa irgo a mangibwat sa kapusuan ko nin mairgo ko, baleꞌ dumasal akon lamang nin mangibwat sa kanakman ko. Wanin a lamang, mangansyon ako sa irgo a mangibwat sa kapusuan ko nin mairgo ko, baleꞌ mangansyon akon lamang nin mangibwat sa kanakman ko. 16 Wanin ta bilang wadiꞌ si saya komoyo ket kisalamatan nayay Dios sa irgo tamoꞌ a pangibwaten nan kapusuan na nin mairgo na, paꞌno saran makaꞌbat nin “Peteg a wanin” saray kai et nin naakayan sa saytin bubagay? Kai ra nin mataros a manꞌibaritaꞌ na! 17 Anaod mataman no wanin ana nin kaabig a pakikisalamat na konan Dios, kasa gapon maibin kaabigan konran kalalamoꞌ nan mampangrayo.
18 Kisalamatan koyay Dios a mas abaw a parso nin pagꞌiirgo ko sa wanin a uirgo dyan siꞌkamo. 19 Wanin man, no sa dupong ran mammemper nin nadinep, mas rabayen ko et a mataman limay saritaꞌ tamoꞌ a mairgo ko baleꞌ matarusan ket main nin mapurot ran kalalamoꞌ ko, dyan si makapagꞌirgo akon ribu-ribon saritaꞌ a kai nin matarusan.
20 Bubsat, matkap a amboꞌ nin inaanak a pangingisip moyo no maipaꞌkaꞌ sa sayti say manꞌibaritaꞌ ko komoyo. Wanin man, magꞌin nin paꞌsar abing kamo no maipaꞌkaꞌ sa pangngawaꞌ nin dukaꞌ, baleꞌ no maipaꞌkaꞌ anamaet sa pangingisip moyo, matkap a paꞌsar matuntawo kamoyna. 21 Adalen moyoyti nin mabasa sa Masanton Kasuratan a wana intaw nin Dios konran saray Israelita,
“Yupaꞌ konran tutawon itaw sa adayoꞌ a pagꞌirgo koynaod liꞌ konran saraytin tawo. Itaw ket marngeꞌ ra sa sakalakon irgo ran sarain a minsahi ko konra. Wanin man a mangyadiꞌ, kai saran lamang et liꞌ nin mangimbabaet kongko.”b
22 Mangibwat konan siin, matarusan tamo nin say pagꞌiirgo sa uirgo a kai ra nin matarusan nin saray mampangrengeꞌ ket saya nin pakaꞌkitan nin paninintinsya na nin Dios konran saray kai nin namper, amboꞌ nin konran saray mamper. Anamaet, say nipatandaꞌ nan Dios sa irgon matarusan ra ket makapaabig konran saray mamper, amboꞌ nin konran saray kai nin mamper.
23 Ket sawanin anaod, bilang wadiꞌ ta nididinep kamo tan sarba moyo ket magꞌirgon kai nin mataros a uirgo, ket main nin amboꞌ nin mammemper o sayan kai et nin naakayan sa saytin bubagay a nako, tan marngeꞌ rakamo, ya, di kasan sapon ipaꞌkaꞌ ra nin mangkaluang kamo. 24 Baleꞌ no sarba moyo wadiꞌ ket manꞌibaritaꞌ moyo a nipatarusan nan Dios komoyo, ket rumateꞌ ya a sayan amboꞌ et nin mammemper o sayan kai et nin naakayan sa sayti, maipapanemtem kona a kasalanan na tan maamingaw na nin sintinsyawan naya liꞌ nin Dios banaꞌ sa sayti mangibwat sa nibaritaꞌ nin barang saya komoyo. 25 Ket anaod, ipadar nan Dios kona a adin iti sa nakem nan siin a tawo. Ket banaꞌ sa sain, manalimukod yan magbabawiꞌ sa kukasalanan na tan raywen nayay Dios. Wana et nin ibaritaꞌ, “Peteg a iti ya a Dios sa busel moyo!”
Matkap a Main nin Pitutuno sa Sarban Gawꞌen sa Dupong
26 Wanti e a rabay ko nin irgwen, bubsat:
Tepeꞌ nin mididinep kamo, say barang saya komoyo ket matkap a sisasadyaꞌ nin gumwaꞌ nin ipagwaꞌ nan Ispirito nan Dios kona.
Alimbawaꞌ main nin nangisadyaꞌ nin kansyon nin pangrarayo konan Dios; main nin mangyakay; main nin mangipapalaway nin nipaingar nan Dios kona; main nin magꞌirgon kai nin mataros a irgo, tan main anamaet nin mangipataros sa sain nin nibaritaꞌ. Si matkap anaod ket, say sarban gawꞌen moyo, makatulong nin mamatuboꞌ sa pammemper nin barang saya komoyo.
27 No main saray magꞌirgon kai nin mataros a uirgo, rwa o tulo ra tamoꞌ a matkap ket kai sara nin mirirngan, tan matkap a main nin mangipataros nin inirgo ra. 28 Baleꞌ no kasan makapangipataros, andiꞌ rayna nin iparngeꞌ konran raruma nin kiirgo sara tana konan Dios tan sa lalaman ran diri. 29 Sara anamaet a mangibaritaꞌ nin say nipatandaan nan Dios konra, rwa o tulo sara tamoꞌ a magꞌirgo, ket saray raruma timbangen ray narngeꞌ ra no nangibwat kasi konan Dios o kai. 30 Baleꞌ bilang wadiꞌ, legꞌan a mampangipapalaway yay saya ket main nin sayan mampangrengeꞌ a tininreg nan Dios nin mangibaritaꞌ nin rabay nan ipatandaan, tumgen yaynay kapresan nin mampagꞌirgo tan byan nayaytin lugar si saya. 31 Ket sa wanin, sarba moyo ket maibaritaꞌ a nipatandaan nan Dios komoyo, ta pigaw nin makaadal tan mapaksaw a nakem nin sarba. Andiꞌ a say sarba moyo ket magꞌirgon miririrngan, 32 ta saray mangibaritaꞌ nin nipatandaan nan Dios konra ket madugaan ray pagꞌiirgo ra. 33 Matkap a wanin ta kasan lugar konan Dios a pigugulo, no kai edet, puon ya nin pitutuno. Anaod, wanin a matkap nin ugaliꞌ sa sarban dudupong ran tutawo nan Dios sa nagsikabarang a lulugar.
34 Saray bubbayi, mititinek sara tamoꞌ no nadinep kamon mammemper ta pigaw nin mangrayo kamo konan Dios. Anaod, kai sara nin maaburuyan nin kibbaꞌbat konran lulalaki, no kai edet, paisirong sara konra nin bilang sa naisurat sa Libron Gugan-gan. 35 Ket bilang wadiꞌ a main nin rabay ran matandaan, tepeten ra konran asawa ra itaw sa pammali ra ta madawal saran magꞌirgo a bubbayi no nadinep saran mammemper.c
36 Manꞌipaꞌkaꞌ moyo para a naiduma kamo? Amboꞌ nin siꞌkamoy ibwatan nin Saritaꞌ nan Dios tan amboꞌ nin siꞌkamo tamoꞌ a rinatꞌanan! 37 Ket sawanin, no main isen komoyo nin wana, sya ket makapangibaritaꞌ ya nin nipatandaan nan Dios, o wana, sya ket mampaisirong ya sa pagꞌuuray nan Ispirito nan Dios, siin, manepeg a akuen na a sayti nin manꞌisurat ko komoyo ket matkap nin tumbuken nin gan-gan na ni Uunuren a Jesus. 38 Baleꞌ no kai na nin alilbien nin wanin, andiꞌ moya gapo anamaet nin alilbien.d