Si Mabistan Patandaꞌ ket Siti e: Pinasubliꞌ yan Mabyay si Jesus
15
Sawanin, bubsat, ipapanemtem koya komoyo a Mabistan Patandaꞌ nin niparateꞌ ko komoyo. Siti ket inakoꞌ moya tan syay maꞌget a mampamatukduan moyon pammemper moyo, 2 ket yupaꞌ konan siti, mangkaisalba kamo, no ituluy-tuloy moyan tepren. Kasan sirbi baleꞌ no say mantepren moyo ket amboꞌ nin say nipatandaan ko komoyo.3 Anaod, muꞌna-muꞌna koyan nipatandaan komoyoy sangkaimpurtantiwan nin bagay a nipatandaan anamaet kongko. Siti anaod e:
Si Cristo, nati ya ta pigaw nin mapirduna a kukasalanan tamo nin maitukoy sa nipaisurat nan Dios. 4 Ket, nitabon ya, ket sa ikatlon awro, pinasubliꞌ yan mabyay nin maitukoy sa nipaisurat nan Dios. 5 Ket, pinaꞌkit ya kona ni Pedro, miꞌsa konran labinrwa a napiliꞌ na. 6 Kaaram, pinaꞌkit ya et konran nididinep nin masurok a limanyasot a tumutumbok kona a kaꞌbawan konra ket mabyay et anggan sawanin; saray raruma baleꞌ ket nati sarayna. 7 Kaaram, pinaꞌkit ya anamaet kona ni Santiago, miꞌsa konran sarba ran apostoles 8 tan sangkasuyutan sa sarba, pinaꞌkit ya kongko a baraꞌmo ako nin naiyanak sa panaon a kai ana nin manꞌilalwan.
9 Anaod, siꞌkoy sangkaayupaan sa sarba komi nin apostoles banaꞌ ta dinuksa-duksaꞌ kosaray tutawo nan Dios ket kai ako nin maikanaꞌ nin sabtan a sayay apostol. 10 Wanin man, banaꞌ sa sangkaalakyan nin kamaungan nan Dios kongko, saya akon apostol sawanin. Ket sain nin kamaungan na, kai anamaet nin nagꞌin nin kasan kakanaan banaꞌ ta mas abaw et a nagwaan ko dyan saray sarba ran kapada kon apostoles. Amboꞌ nin sa pakababaꞌ kon diri baleꞌ a nagwaꞌ ti no kai yupaꞌ sa kamaungan tan tulong nan Dios. 11 Ket anaod, siꞌko o sara man a raruma, pari-parihoy manꞌipatandaan mi tan sain ket timper moyo.
Say Maipaꞌkaꞌ sa Isusubliꞌ liꞌ nin Mabyay
12 Sawanin anaod, no timper moyoytaw say nipatandaan mi a pinasubliꞌ ya nin mabyay si Cristo, ket mayin a saray raruma komoyo ket ibaritaꞌ ran kasa kanon isusubliꞌ ran mabyay nin nunati? Mangkalingo kamo! 13 No tutuo in si kasan isusubliꞌ ran mabyay nin nunati, kai ya edet kumon nin pinasubliꞌ nin mabyay si Cristo! 14 Ket no kai ya nin pinasubliꞌ nin mabyay si Cristo, kasa edet nin kabalikasan nin sain say manꞌipatandaan mi tan kasan lamang anamaet nin kabalikasan nin say pagmamatalek moyo kona. 15 Saya et, lumiwaꞌ a mampibulaꞌ-bulaꞌ kami sa manꞌibari-baritaꞌ mi maipaꞌkaꞌ konan Dios banaꞌ ta manꞌibari-baritaꞌ mi a pinasubliꞌ nayan mabyay si Cristo. Baleꞌ no tutuon kasan isusubliꞌ ran mabyay nin nunati, bulaꞌ edet a pinasubliꞌ nayan mabyay si Cristo, 16 ta no tutuo anaod a pageꞌ a kasan isusubliꞌ ran mabyay nin nunati, kai ya edet kumon nin pinasubliꞌ nin mabyay si Cristo. 17 Ket no kai ya pinasubliꞌ nin mabyay si Cristo, kasan kabalikasan edet anaod nin pagmamatalek moyo tan say kukasalanan moyo ket kai et nin napirduna. 18 Anamaet et a lamang anaod, saraytaw saray nati anan namper kona ni Cristo, naꞌmet saran peteg no wanin. 19 Ket, no say sarban manꞌilalwan tamon iti kona ni Cristo ket angga tamoꞌ sa byay tamodti sa lutaꞌ, kasaynan sangkakudwaꞌdwan no kai siꞌtamo banaꞌ sa nipanglingo kontamo.
20 Baleꞌ say katutuꞌwan, pinasubliꞌ yan mabyay si Cristo! Sya a sangkauꞌnawan nin pinasubliꞌ nin mabyay anggan-angga nin pakaꞌkitan a saray nati nin namper kona ket pasublien sara liꞌ anamaet nin mabyay.
21 Wanin ta, banaꞌ sa ginwaꞌ nan sayay tawo, si Adan, say sarban tawo ket mati; wanin anamaet a lamang, banaꞌ sa ginwaꞌ nan sayay tawo, si Jesu-Cristo, sarba ran mamper kona ket sumubliꞌ sara liꞌ nin mabyay. 22 Anaod, sarba tamon tawo ket mati banaꞌ ta puri natamo ngaꞌmin ni Adan; wanin anamaet a lamang, sarba tamo nin naipasaya kona ni Cristo ket mabyay atamo anamanaet liꞌ a lamang.a 23 Baleꞌ maunong nin mangyadiꞌ in liꞌ: Pinaisubliꞌ yaynan mabyay si Cristo nin nuꞌna nin bilang syay puon nin yinatab. Ket sumubliꞌ sara liꞌ anamaet nin mabyay a sarba ran tutawo na no sumubliꞌ yadti. 24 Miꞌsa, no nadaeg nayna liꞌ ni Cristo a pakayadiꞌ tan kapangyadian ran sarba ran magꞌuuray, mangangga ana liꞌ a kapresan nin panaon, ket ipagamet nayna liꞌ a pagꞌaadiꞌ sa sarba konan Dios a Ama.
25 Anaod, si Cristo ket matkap a pagkuriwen nay pagꞌuuray na anggan nadaeg nasarayna liꞌ nin ngaꞌmin a sarba ran kukalaban na, ket 26 si sangkasuyutan nin kalaban a daegen na, say patiti. 27 Matkap a mangyadiꞌ in ta wanan mabasa sa Masanton Kasuratan a say sarba, si Dios ket nitalaga nan maikwa sa sirong nin pagꞌuuray na.b Baleꞌ, syimpri a, kai na nin rabay nin ibaritaꞌ nin siin a niyayi na nin Dios a kadiryan na nin nikwa sa sirong nin pagꞌuuray na ni Cristo, banaꞌ ta sya a nangitalaga sa pagꞌuuray nan Anak na. 28 Ket, no naipasirong nayna liꞌ nin Anak a sarba sa pagꞌuuray na, ket say sarba iti ana sa sirong nin pagꞌuuray na, pati say kadiryan na ipagamet nayna liꞌ sa sirong nin pagꞌuuray nan Ama na ta pigaw nin si Dios ket pageꞌ nin liso a syay Dios sa sarba ngaꞌmin nin bagay tan nin sarba ngaꞌmin.
29 Anamaet, no pageꞌ nin tutuo a kasan isusubliꞌ ran mabyay nin nunati, mayin edet a saray raruma ket pabawtismo sara para konran saray mammemper a nati ana a kai nin nabawtismwan? Ani et ey anaod a sirbi nin pabawtismo sara para konran saray nati anan mammemper no wanin?
30 Siꞌkami et, no pageꞌ a tutuon kasan isusubliꞌ ran mabyay nin nunati, ambaleꞌ a manꞌisanlaꞌ mi et a byay mi sa sarban udas? 31 Tutuoyti say ibaritaꞌ ko a inawru-awro nin manꞌisanlaꞌ ko a byay ko sa patiti. Tutuo in, kapada katutuo a maririket akon maong nin siꞌkamo ket naipasaya kamo konan Cristo a si Jesus nin Uunuren tamo. 32 Ani edet a magagap kon kilaban konran tutawon kuntra kongko sa Efeso a baraꞌmo saran maatap a uayep, no kikumpurmi ako konran saray kai nin mamper a main nin isusubliꞌ ran mabyay nin nunati ana? No kasa, basta nin sumunor akoyna edet konran saray mamaritaꞌ a wanra,
“Mangan atamoynan mangan; minom atamoynan minom ta
bangliꞌ no dilap o kamakarwa ket mati atamoyna.”c
33 Andiꞌ kamo nin palingo konran saray mampangipaꞌkaꞌ nin wanin, ta tutuo a
“Say kikala-kalamoꞌ sa tutawon dukaꞌ ket manidaꞌ nin mabistan pitatawo.”
34 Papalawayen moyo a pangingisip moyo tan itgen moyoynay pagkakasalanan moyo. Manepeg a padingꞌeyan katamo nin wanti ta main et nin tutawodsen komoyo a kai raya gapo nin katandaꞌ a Dios.
Say Maipaꞌkaꞌ sa Lalaman nin Pinasubliꞌ liꞌ nin Mabyay
35 Sawanin, bangliꞌ nin main isen nin manepet a wana, “Paꞌno wadiꞌ nin mangyadiꞌ in a si sayay nati ana ket sumubliꞌ yan mabyay? Ani liꞌ wadiꞌ a klasi nan magꞌin nin lalaman nan sayay naumok anan nati no sumubliꞌ ya nin mabyay?”
36 Aninay kasinakman na! Kiten tamoyay sayay bikoy. Amboꞌ para a no imula ya ket matkap a masilyan a kapapaꞌsar na, ta si bikoy, masidaꞌ ya yapoꞌ baꞌyo ya nin rumsik. 37 No mangmula ka, bikoy ya tamoꞌ a imula mo, bilang wadiꞌ irik o animan nin raruma, amboꞌ yay masibulot nin kayu-kayo a tumuboꞌ. 38 Nidisisyon naynan gindat nin Dios no paꞌno a bakas nan mula nin tumuboꞌ mangibwat konan bikoy, tan pinatuboꞌ na a barang sayan klasin bikoy nin main nin dirin bakas nin tuboꞌ.
39 Wanin anamaet a lamang, niduduma a klasin laman ran nagsikabarang nin pinarsan mabyay: sakalakoy klasin laman ran tutawo; sakalako konran uayep; sakalako et konran manuk-manok, tan wanin anamaet sa kunaꞌ.
40 Wanin et a lamang, say bakas nin say itaw sa langit, main nin pidumawan sa bakas nin say iti sa lutaꞌ. Ket, sakalakoy andaꞌ nin say itaw sa langit tan say andaꞌ nin iti sa lutaꞌ, 41 si awro sakalakoy andaꞌ na; sakalako konan bulan; wanin anamaet sa bubituen. Mataman say bubituen, sakalakoy andaꞌ nin saya tan saya.
42 Wanin a kapapaꞌsar sa sain nin alimbawaꞌ no pasublien sarayna liꞌ nin mabyay a nunati. Si lalaman nin nitabon maumok ya, baleꞌ si pinasubliꞌ liꞌ nin mabyay, lalaman yan magnayon anggan-angga. 43 Si lalaman nin nitabon, dukaꞌ a bakas na tan kasan pakayadiꞌ na, baleꞌ si lalaman nin pinasubliꞌ liꞌ nin mabyay ket mabista tan main nin alakin pakayadiꞌ na. 44 Si lalaman nin nitabon ket para ya sa byay iti sa lutaꞌ, baleꞌ si pinasubliꞌ liꞌ nin mabyay ket sakalakon klasin lalaman yayna ta para yadtaw sa langit. Tandaꞌ tamo a main nin lalaman tamo para sa byay iti sa lutaꞌ; matandaan tamo anamaet a main nin lalaman tamo paradtaw sa langit. 45 Wana anaod nin mabasa sa Masanton Kasuratan, “Si sangkauꞌnawan nin tawo a si Adan, pinagꞌin yan mabyay.”d Baleꞌ main et nin paꞌsar Masusuyot nin Adan a sya si Cristo, a ispirito yan pangibwatan nin byay a paradtaw sa langit. 46 Panemtemen tamo baleꞌ, muꞌna yapoꞌ si lalaman tamon paradti sa lutaꞌ, miꞌsa liꞌ si mas impurtanti a si lalaman tamon paradtaw sa langit. 47 Si sangkauꞌnawan nin tawo a si Adan, say ibwatan na ket lutaꞌ, baleꞌ si ikarwan Adan a sya si Cristo, say ibwatan na ket sa langit. 48 Sarba tamo ket puri na ni Adan, a sya nangibwat ya sa lutaꞌ, kanyaꞌ nin bilang atamo kona. Anamaet baleꞌ, naipasaya atamo kona ni Cristo a ibat sa langit, kanyaꞌ nin bilang atamo kona. 49 Kapada a kinmalap atamo konan si nangibwat iti sa lutaꞌ, anamaet a lamang, kumalap atamo liꞌ konan si nangibwat itaw sa langit.
50 Kanyaꞌ nin ibaritaꞌ koyti, bubsat: Siti si kapresan nin lalaman tamo ket kai ya nin makakiramaꞌ sa Pagꞌadian nan Dios itaw sa langit. Wanin ta si lalaman nin mati, kai ya magwaꞌ nin kiramaꞌ sa sain say magnayon nin kasan anggawan.
51 Rengꞌen moyo, ibaritaꞌ ko komoyo nin nipadar nan Dios kongko: Amboꞌ nin sarba tamo nin mammemper ket mati, baleꞌ sarba tamo ngaꞌmin ket kapingmatan ana liꞌ nin masilyan a lalaman tamo. 52 Sayti ket mangyadiꞌ liꞌ nin pinasyan daliꞌ, kapada kadaliꞌ nin kidem-mata, no patnuyen yaynay trumpita nan Dios nin pakatandaan a anggawan ana. Ket saray mammemper nin nati ana, pasublien sara liꞌ nin mabyay nin main nin baꞌyon lalaman ra nin magnayon anggan-angga, tan siꞌtamo anamaet nin mabyay et, masilyan anamaet a lalaman tamo. 53 Anaod, sayti say kapresan nin lalaman tamo nin mati tan maumok, matkap a masubrayan nin kai ana nin mati o maumok. 54 Ket no nangyadiꞌ ana in liꞌ, natukid yaynaytaw anaod si mabasa sa Masanton Kasuratan a wana,
“Nadaeg tan naglat ana anaod nin pirmaninti a patiti!e
55 Manalo et para a patiti kontamo? Kai gapo!
Main et paran magwaꞌ nan manidaꞌ nin patiti kontamo? Kasa anamaet!f”
56 Anta, say nangibwatan nin pakagawaꞌ nan manidaꞌ nin patiti ket say pagkakasalanan tamo, ket say mami nin pakagawaꞌ nin sayti sa patiti ket say Gugan-gan.g 57 Baleꞌ kisalamat atamo konan Dios banaꞌ ta manꞌibi na kontamo a pakayadiꞌ nin madaeg tamoy kasalanan tan patiti banaꞌ sa ginwaꞌ na ni Uunuren tamon Jesu-Cristo.h
58 Wanin anaod, mampablyen kon bubsat, kanyaꞌ nin ipundo moyoy isip tan gawaꞌ moyo sa tutuon akay ta pigaw nin kai kamo nin maiyalis nin say amboꞌ nin kuston akay. Pakaseseg kamo nin sirbyan yay Uunuren a si Jesu-Cristo banaꞌ ta tandaꞌ tamo a say gawꞌen tamo para kona ket kai nin magꞌin nin kasan kakanaan.