Wanti e a gawꞌen moyo a saytin lamang a nibibilin ko sa dudupong ran kapada tamon mammemper itaw sa prubinsyan Galacia: 2 Tepeꞌ nin awron Linggo, matkap a say barang saya komoyo ket mangipurok anan gindat nin ibi na sigon sa natingkapan na nin nanglinggo. Dinepen na in ta pigaw nin no isen akoyna liꞌ komoyo, amboꞌ kamo tamoꞌ liꞌ no saytaw nin mangalap. 3 Ket no isen akoyna liꞌ, ibi ko a surat nin mangitandaꞌ konran saray tutawon pyawen moyon mangiyater nin tulong moyo ket ibakiꞌ kosara sa Jerusalem. 4 Ket no wadiꞌ a matkap liꞌ a mako ako anamaet sa Jerusalem, kialuyon sarayna liꞌ kongko.

5 Mako akoynadsen liꞌ komoyo sa Corinto nin mangibwat ako sa prubinsyan Macedonia ta dumalan ako yapoꞌ itaw. 6 Ket isen ako yapoꞌ liꞌ angangko komoyo nin midyo maꞌteng, angangko leleg nin panaon nin marayꞌep, ta pigaw nin matulungan rako liꞌ sa kappako ko sa adtiman nin keen ko anamana. 7 Anaod, kai ko nin rabay a makoynadsen komoyo sawanin nin dumalan tamoꞌ ta rabay koy isen yapoꞌ liꞌ nin maꞌteng komoyo no iyaburoy na nin Dios.

8 Sawanin baleꞌ, iti ako yapoꞌ sa syudad nin Efeso anggan pistan mantawagen nin Pentecostes 9 ta main iti nin alakin pagkanawanawa nin mabista a kaugutan nin pangingipatandaꞌ kodti konan Mabistan Patandaꞌ, mataman no abaw saradti a mangkumuntra kongko.

10 Saya et, no rumateꞌ yadsen liꞌ komoyo si Timoteo, pagawan moyo pa a kasan sukat nin kasalakan na komoyo legꞌan nadsen, ta mampagtrabaho ya anamaet para konan Uunuren a si Jesus nin kapada ko. 11 Andiꞌ moya nin kai nin baga-bagawen, no kai edet, tulungan moya ta pigaw nin prisko a kaisipan nan sumubliꞌ iti kongko ta mantagaꞌnan koya, wanin ra anamaet nin kapadan mammemper iti.

12 No banaꞌ anamaet konan si busat sa pammemper a si Apolos, niꞌno koyayna nin dinagdag a keen nakamo anamaet pasyaren isen nin kalamoꞌ ran saray raruman bubsat iti, baleꞌ kasa et gapo sa nakem na a makodsen sawanin nin tyimpo. Saytaw ana liꞌ kano no kanawanawa na.

13 Bubsat, pakatalad kamon pirmi tan dumaer kamo sa pammemper moyo. Pakatpel kamo tan pagsenen moyoy nakem moyo. 14 Ket, animan a gawꞌen moyo, gawꞌen moyo nin siaadoꞌ.

15 Tandaꞌ moyo angangko, bubsat, a saray nuꞌnan nagꞌin nin mammemper isen sa prubinsyan Acaya ket si Estefanas tan saray intiron kabbali na. Sara, nitalaga ray byay ra sa pagsisirbi konran kapada ran tutawo nan Dios. Ket sawanin anaod, dawaten ko komoyo a 16 paisirong kamo konra tan konran saray raruma et anamaet nin kapada ra a mampagtrabaho tan mampipagal para konan Uunuren a si Jesus.

17 Maririket akon tuloy a nako saradti si Estefanas, Fortunato tan si Acaico; banaꞌ ta iti sara, baraꞌmo anan lamang nin iti kamo. 18 Anaod, pinariga rako, wanin anamaet a ginwaꞌ ra komoyo. Alilbien moyo saray wantin tutawo.

19 Say dudupong ran mammemper iti sa prubinsyan Asia, iparateꞌ ray pammakumusta ra komoyo. Sara si Aquila tan Priscila tan saray iti sa dupong ran mammemper nin mampididinep nin mangrayo konan Dios itaw sa bali ra, iparateꞌ ra a maꞌmot a pammakumusta ra komoyo sa ngaran nan Uunuren a si Jesus. 20 Sarba ran saray bubsat sa pammemper iti, iparateꞌ ray pammakumusta ra komoyo.

Ket siꞌkamodsen anamaet, mikumustawan kamo nin mangipaꞌkit nin pangangadoꞌ moyo sa saya tan saya bilang tutawo nan Dios.

22 Si siꞌnuman a kai nin mangadoꞌ kona ni Uunuren a Jesu-Cristo, dusawen naya liꞌ nin Dios!