Si Ikarwan Surat na ni Pablo konran Taga
CORINTO
Say Maipaꞌkaꞌ konan Sitin Surat
Sitin surat na ni Pablo konan dupong ran mammemper itaw sa Corinto ket sinurat naya sin main nin alakin prublima sa pikakalamoꞌ ra, nin namaidap nin nakem na, ta main nin iti konan sitin dupong a namarsa nin mabyat kona ni Pablo (3:1; 8:20-23; 10:2,8,10,15; 11:5,7; 12:11,12,17). Iti ket ibusngaw nay ararem a kaingaran na para konra, a ipaꞌkit nay alakin apes na nin kituno konra tan matalek ya nin maipatunong a lamang a pitatawo ra. Ket maririket yan tuloy sin narngeꞌ nan wanin a nangyadiꞌ. Saytin nisurat na ni Pablo, peteg a nangibwat sa kapusuan na.
Sitin mantawagen nin ikarwan surat na ni Pablo konran taga Corinto ket ikatlo o ikaꞌpat yayna kumon baleꞌ rwa ra tamoꞌ konran sarayti a naiyator (2:3,9; 7:8,12). Sa primiron parti nan siti (1:1–9:15), say nibaritaꞌ na ni Pablo say maipaꞌkaꞌ sa rilasyon nan mismo konra nin tutawo sa dupong. Nipapalaway na no ambaleꞌ a kai na nin nituloy a plano nan pammisita konra (1:12–2:11) tan no ambaleꞌ a mabyat a nisurat na konra maipaꞌkaꞌ sa niparsa ra tan say nipanguntra ra kona nin saray itaw sa dupong ra (2:12–7:1). Napaririket yan lamang ta nagbabawiꞌ sara tan nikituno sara kona (7:2-16).
Ket dinawat na nin mangisadyaꞌ saran alakin tulong nin mangibwat sa maruros a nakem ra para konran mangkapaidap sa Judea (8:1–9:15). Sa susuyot a parti nan sitin surat, nipapalaway na no siꞌno yan pageꞌ a sayay minsahiro nan Dios ta main itaw konra a nipataꞌgay a tutuon apostol sara kano (10:1–13:10).
Nipaꞌwit nayayti ni Pablo nangibwat sa Macedonia sin panaon nin ikatlon parso nin pakudti-pakodtaw na sa pangingipatandaꞌ na maipaꞌkaꞌ kona ni Cristo. Mabasa a maipaꞌkaꞌ sa saytin pakudti-pakodtaw na sa Ginwa-ginwaꞌ 18:23–21:14.
Say Linaman nan Sitin Surat
Pammagalang (1:1-2)
Ipapalaway na ni Pablo no mayin a kai nin matuloy a bisitawen rasara (1:3–7:16)
Mampangirangep saran dyaꞌdyaꞌ si Pablo ta pigaw nin makatulong sara sa raruma (1:3-11)
Nasilyan a plano na ni Pablo para sa kaabigan ran taga Corinto (1:12–5:21)
Say rabay na ni Pablo ket si maipasirayo ray saya tan saya sa adapan na ni Cristo (1:12-14)
Kai na nin rabay ni Pablo nin abas a ipaꞌkaꞌ ra maipaꞌkaꞌ sa plano na (1:15–2:11)
Sara si Pablo ket katrabahwan nasaran Dios (2:12–5:21)
Sayti a rabay na ni Pablo nin mangyadiꞌ sawanin banaꞌ ta sinilyan ray plano ra (6:1–7:16)
Isadyaꞌ ran taga Corinto a tulong ra konran kapada ran mammemper (8:1–9:15)
Sayay ihimplo a nibi ran tulong nin taga Macedonia konran kapada ran maidap (8:1-15)
Ibakiꞌ rasara ni Pablo nin tumulong si Tito sa pangngisadyaꞌ ran tulong ra (8:16–9:5)
Sayay pangipapanemtem — Mangibwat konan Dios a ipanulong tamo (9:6-15)
Sadyaan ran taga Corinto a pammisita na ni Pablo (10:1–13:10)
Dawaten na ni Pablo konran mammemper a kasayna liꞌ kumon nin pakatkapan et a ipatunong nasara (10:1–12:13)
Rabay nan marateꞌ ni Pablo a naipatunong anay pigagawaꞌ ran mammemper (12:14-21)
Usisaen ray lalaman ran diri nin saray mammemper ta pigaw nin kai rayna nin ipaꞌkit et ni Pablo a pakayadiꞌ ra (13:1-10)
Bindisyunan nasara ni Pablo (13:11-13)