Ipaꞌwit miyaytin surat komoyon iti sa dupong ran tutawo nan Dios isen sa Corinto tan konra et nin sarba ran raruman tutawo nan Dios isen sa intiron prubinsyan Acaya.

2 Sapa kumon ta si Dios a syay Ama tamo tan si Uunuren tamon Jesu-Cristo bindisyunan rakamo tan byan rakamon mabistan kapapaꞌsar.

3 Raywen tan pakisalamatan miyay Dios tan Ama nan Uunuren tamon si Jesu-Cristo; mapaingangaꞌdon Ama ya tan Dios yan sisasadyaꞌ nin tumulong kontamo. 4 Mantulungan natamo sa sarban dyaꞌdyaꞌ tamo ta pigaw nin banaꞌ a lamang sa sain nin panunulong nan Dios kontamo, ket makatulong atamo konran mampangirangep nin nagsikabarang nin dyaꞌdyaꞌ. 5 Pageꞌ nin abaw a dyaꞌdyaꞌ nin manꞌirangep mi nin siꞌkamin mampangilalaman kona ni Cristo; wanin a lamang, abaw anamaet a padalan nin panunulong nan Dios komi yupaꞌ kona ni Cristo banaꞌ ta mampangilalaman kami kona. 6 Ket no mampangirangep kami nin dyaꞌdyaꞌ, say gagara nan Dios sa pangingirangep mi ket si matulungan kamo tan para sa pakaisalba moyo. No tulungan nakami nin Dios, sain ket ta pigaw nin makatulong kami a lamang komoyo. Banaꞌ sa sain nin tulong, maagwantawan moyo anamaet a dyaꞌdyaꞌ nin kapadan dyaꞌdyaꞌ a manꞌirangep mi. 7 Ket banaꞌ ta wanin, napasayay ilalo mi a maagwantawan moyo ta tandaꞌ mi a no mampangirangep kamon dyaꞌdyaꞌ a kapadan nipangirangep mi, wanin anamaet, tulungan nakamon Dios nin kapadan nipanulong na komi.

8 Alimbawaꞌ nin sain ket say linabasan min mabyat a dyaꞌdyaꞌ sa Asia, nin rabay mi, bubsat, nin maipaꞌkaꞌ sa sayti ket sitatandaꞌ kamo. Pinasyan talagan byat nin nirangep mi kanyaꞌ nin kai mi ana nin naagwantawan ket say wami no mati kami ana. 9 Say wamin talaga no anggawan mi anaytaw. Baleꞌ, nangyadiꞌ taw komi ta pigaw nin maadal mi a andiꞌ nin magpya sa lalaman mi no kai edet, kona nin Dios a makapamabyay abirno konran nati ana. 10 Ket niligyas nakamin Dios kanyaꞌ nin napalꞌisan mi a adanin patiti; tan tandaꞌ min ituluy-tuloy nakamin iligyas. Iti a sarban ilalo mi kona. Kai nakami nin tegnan nin iligyas. 11 Ket, matkap anamaet nin tulungan rakami yupaꞌ sa kadadasal moyo; ket no wanin, magꞌin nin abaw saray kisalamat konan Dios banaꞌ sa panunulong na komi a mangibwat sa pangingidawat ran abaw a tutawo.

12 Anaod bubsat, matpel mi nin ibaritaꞌ nin main malinis nin kunsinsya a say pigagawaꞌ mi sa adapan ran tutawo, lalun-laloyna komoyo, ket tutuo tan mapteg sigon sa pangingikit na nin Dios. Say pigagawaꞌ mi ket kai nin mampangibwat sa main mi nin kadunungan bilang nin tawo no kai edet, mampagdipindi kami sa tulong nan Dios komi. 13 Maꞌkit in ta say isurat mi tamoꞌ komoyo ket say mabasa tan mataros moyo. Rabay kon makatandaꞌ rakamin maong 14 ta pigaw nin say tandaꞌ moyoyna ket magꞌin nin liso, ta no wanin ket, maipasirayo rakami tan siꞌkami ket maipasirayo kamo liꞌ anamaet no sumubliꞌ ya si Uunuren tamon Jesus.

15 Banaꞌ ta sigurado ako sa pikakalamoꞌ tamo kanyaꞌ nin say gindat nin plano ko ket si mirwa katamo nin bisitawen ta pigaw nin mirwa katamo anamaet nin matulungan. 16 Niplano kon dumalan yapoꞌ isen komoyo no adap ko sa prubinsyan Macedonia tan no ibat ako liꞌ ket dumalan akodsen anamanaet ta pigaw nin matulungan rako sa matka-matkap ko sa kappako ko sa Judea.

17 Sawanin, banaꞌ ta kai nin matumbok a niplano ko, ibaritaꞌ moyoyna paran kai nin magwaꞌ nin tepren a irgo ko? Manꞌisipen moyo paran manili-sili a isip ko nin kapada nan sayay tawon mampanumbok tamoꞌ nin karabayan na, a alimbawaꞌ ket “Oꞌ” wana abirno nin sa nakem na ket kai? Amboꞌ gapo nin wanin! 18 No paꞌno nin magwaꞌ nin tepren a irgo na nin Dios, ket kai kami nin nagdwadwa sa saytaw nin nibaritaꞌ mi 19 ta si Anak nan Dios a si Jesu-Cristo, kai ya nin manili-sili nin irgo na no kai mantukiden nay nipangakoꞌ nan Dios. Ket sya a nangitandaꞌ komoyo komi nin siꞌkamin si Pablo, si Silas tan si Timoteo. 20 Anaod, sarba ngaꞌmin nin nipangakoꞌ nan Dios ket tinukid na yupaꞌ kona. Kanyaꞌ nin, banaꞌ sa ginwaꞌ na, itandudoꞌ tamoyay ngaran nan Dios nin wantamo “Peteg a wanin.”^a 21 Si Dios nin diri a mampamasigurado komi tan komoyo anamaet nin nikaipasaya tamo kona ni Cristo, tan syan diri a namiliꞌ kontamo. 22 Nami ya et nin pangalilbian a tutawo natamo; nibakiꞌ nayan miikap kontamo a Ispirito ta pigaw nin peteg nin masigurado tamon matukid ngaꞌmin a sarban nipangakoꞌ na kontamo.

23 Tandaꞌ nan Dios! Say kaabigan moyo a rason nin kai ko nin nipangituloy nin pako kodsen, ta pigaw nin kai nin umidap a nakem moyo banaꞌ sa pangngawaꞌ kon matkap kon gawꞌen komoyo. 24 Kai mi nin gagaran idikta no ani a tepren moyo ta tandaꞌ min magsen anay pammemper moyo, no kai edet, say gagara mi ket say kitulong komoyo maipaꞌkaꞌ sa pammemper moyo ta pigaw nin malamuꞌnan et a ririket moyo.