Si Uꞌnan Surat na ni Apostol Pablo konran Taga
CORINTO
Say Maipaꞌkaꞌ konan Sitin Surat
Siti a uꞌnan surat na ni Pablo konran mammemper itaw sa syudad nin Corinto. Main nin nuꞌna dyan siti nin surat na konran taga Corinto (5:9), baleꞌ kai tamo nin tandaꞌ a linaman na. Sitin surat na sawanin ket sinurat naya banaꞌ sa maprubliman kapapaꞌsar nan dupong ran mammemper itaw tan ta pigaw nin ubatan na a tutepet ra (7:1). Maalaga nin tuloy kontamo a main yayti nin surat banaꞌ ta iti tamo nin maadal a maipaꞌkaꞌ sa prublima nin baꞌyon dupong. Maadal tamo anamaet no ani a ubat nan Dios sa saytin prublima.
Nako nayadtaw nin nipatandaꞌ ni Pablo a Mabistan Patandaꞌ sa Corinto sin panaon nin ikarwan paku-pako na sa nagsikabarang nin lugar. Itaw ya nin sayay taon tan kapikngaꞌ, ket nagkamain nin dupong ran mammemper itaw (Ginwa-ginwaꞌ 18:1-17). Iti sa Corinto a sintro nin gubyirno nan Acaya a sayay prubinsyan nasakupan nan Roma. Siti si Acaya ket Grecia ana sawanin a ngaran na. Sangkaalakyan tan sangkaimpurtantiwan yaytin syudad si Corinto sin saytaw pwira konan Roma, banaꞌ ta iti ya sa abay nin alakin taaw. Bantog ya banaꞌ sa abaw itaw nin alalakin kumirsyo, abaw a klasin rilihyon, tan banaꞌ a lamang ta abaw saray lulalaki tan bubbayidtaw nin miꞌya-miꞌyan tamoꞌ.
Kayadiꞌ nin linmabas a masurok nin tuloy taon, sin itaw ya si Pablo sa syudad nin Efeso, nakarisibi yan surat a nangibwat sa dupong ran mammemper itaw sa Corinto. Main anamaet nin narngeꞌ nan irgu-irgo maipaꞌkaꞌ konra. Iti konan sitin surat, binibilin nasara maipaꞌkaꞌ sa piaaway ra (1:10–4:21) tan amboꞌ nin manepeg nin pirararay (5:1-13; 6:12-20). Imbatan na anamaet ni Pablo a tutepet ra maipaꞌkaꞌ konran tutawon rabay ray sumrep sa istado (7:1-24), tan no ani a mabistan gawꞌen ran saray bubalo tan saray raruman kasan asawa (7:25-40), tan wanin et, say maipaꞌkaꞌ sa kanen a niyatang sa dios-dios (8:1-13). Nibaritaꞌ nadti ni Pablo konra a maipaꞌkaꞌ sa no ani a manepeg tan kusto nin gawꞌen maipaꞌkaꞌ sa dupong ra, pati say maipaꞌkaꞌ sa pakababaꞌ nin manꞌibi nan Ispirito nan Dios konran mammemper para sa pakapagsen nin pammemper nin saya tan saya (10:1–14:40). Niyakay na et a maipaꞌkaꞌ sa isusubliꞌ nin mabyay (15:1-58).
Wana ni Pablo a say matkap nin ipamuspusan ran gawꞌen ket say kawaꞌnanen ray saya tan saya (12:31–13:13).
Say Linaman nan Sitin Surat
Pammagalang tan pakikisalamat na ni Pablo (1:1-9)
Say prubliman kasan pipapasaya sa dupong ran mammemper (1:10–4:17)
Matkap a galten rasaran mammemper a gumu-gumwaꞌ nin dukaꞌ sa dupong ra (4:18–5:13)
Say pangingidimanda nin kapada nin mammemper (6:1-11)
Say pangungusar sa lalaman nin mamin kagalangan konan Dios (6:12-20)
Say maipaꞌkaꞌ sa nisurat ran saray mansuratan (7:1–15:58)
Si tepet maipaꞌkaꞌ sa kasesrep sa byay a main nin asawa (7:1-40)
Si tepet maipaꞌkaꞌ sa kanepegan nin mangan nin say niyatang sa dios-dios (8:1–11:1)
Say manepeg para konran bubbayi sa dupong ran mammemper (11:2-16)
Say manepeg nin tumbuken sa Pagkukumunyon (11:17-34)
Say pangungusar nin pakababaꞌ a mangibwat konan Ispirito nan Dios (12:1–14:40)
Say maipaꞌkaꞌ sa isusubliꞌ nin mabyay (15:1-58)
Say panininep nin tulong konran kapammemperan (16:1-4)
Say plano na ni Pablo (16:5-9)
Say masusuyot a bubibilin na ni Pablo (16:10-18)
Pammakumusta (16:19-24)