Si Uꞌnan Surat na ni Apostol Pablo konran Taga
CORINTO
1
Siꞌko si Pablo, a banaꞌ ta karabayan nan Dios, sinagyat nakon magꞌin nin apostol nan Cristo a si Jesus. Kalamoꞌ koyadti si busat tamo sa pammemper a si Sostenes.2 Ipaꞌwit miyaytin surat komoyon iti sa dupong ran mammemper konan Dios isen sa syudad nin Corinto. Si Dios nipurok nakamo nin tutawo na sin naipasaya kamo konan si Cristo a si Jesus. Sinagyat nakamon Dios nin magꞌin nin dirin tutawo na kapadan nipanagyat na konran sarban raruman tutawo sa sarban lugar nin mampangrayo kona ni Uunuren tamon Jesu-Cristo, a syay pari-parihon Uunuren tamo ngaꞌmin. 3 Sapa kumon ta si Dios a syay Ama tamo tan si Uunuren tamon Jesu-Cristo, bindisyunan rakamo tan byan rakamon mabistan kapapaꞌsar.
Say Pakikisalamat na ni Pablo
4 Kai nin maꞌpos a pakikisalamat ko konan Dios banaꞌ sa bindisyon a nibi na komoyo mangibwat sa kamaungan na yupaꞌ sa nikaipasaya moyo konan Cristo a si Jesus. 5 Ket, pinuyaan kamo, siꞌkamon naipasaya kona, nin sarba ngaꞌmin nin matkap moyo, laloynay pakababaꞌ moyon mangyakay nin minsahi nan Dios tan say kadunungan moyo nin nangibwat kona. 6 Wanin ta say manꞌiyakay mi maipaꞌkaꞌ kona ni Cristo ket niyator moyo sa kukapusuan moyo, 7 kanyaꞌ nin iti ngaꞌmin komoyo a sarban manꞌipuyaꞌ nan Ispirito nan Dios legꞌan moyon masulit nin mantagaꞌnan a pakaipadar na ni Uunuren tamon Jesu-Cristo. 8 Antabayan nakamon pagsenen anggan kalaꞌpusan ta pigaw nin kasa liꞌ nin maiparsa komoyo sa awro nin sumubliꞌ yay Uunuren tamon si Jesu-Cristo. 9 Wanin ta si Dios ket mailalwan ya. Sya a nangayab komoyo nin kikalamoꞌ ana konan Anak nan si Jesu-Criston Uunuren tamo.
Say Prubliman Kasan Pipapasaya sa Dupong sa Corinto
10 Kanyaꞌ nin pangingaꞌdo moyo pa, manꞌaduen kon bubsat, a sa pakayadiꞌ na ni Uunuren tamon Jesu-Cristo, ket andiꞌ kamo nin mipuruk-purok. Ana edet, mipapasaya kamo anamaet nin sayan-sayay pangingisip tan apes moyo. 11 Manꞌibibilin ko in komoyo ta natandaan ko konran tutawo na ni Cloe, manꞌaduen kon bubsat, a mampiaawayan moyo no siꞌno a pangulo nin manepeg moyon tumbuken. 12 Say rabay kon irgwen ket main sara komoyoy mamaritaꞌ a wanra, “Iti kami kona ni Pablo.” Wanra baleꞌ nin raruma, “Ya, iti kami kona ni Apolos.” Wanra et nin raruma, “Siꞌkami, kona ni Pedroa.” Saray raruma et wanra, “Siꞌkami baleꞌ, iti kami kona ni Cristo.”
13 Kaꞌkit a wanin! Matau-tao ya para si Cristo? Mayin, siꞌko para nin si Pablo a nipasak sa kudos para komoyo? Sin binawtismwan kamo ket sa ngaran ko para nin si Pablo? 14 Kisalamat ako konan Dios ta amboꞌ nin siꞌko a namawtismo komoyo, no kai sara tamoꞌ si Crispo tan si Gayo a binawtismwan ko, 15 kanyaꞌ nin sawanin ket kasan makapamaritaꞌ a binawtismwan ya sa ngaran ko. 16 Ay oꞌ, siꞌko et anamain a namawtismo konran myimbron pammali na ni Estefanas, ket pwira konra kasaynan raruma et nin mapanemtem kon binawtismwan ko.
Say Nikaipasak nan Cristo ket Syay Kadunungan nan Dios
17 Anaod, kai nako nin nibakiꞌ nin mako mamawtismo ni Cristo, no kai edet, nin mangipatandaꞌ konan Mabistan Patandaꞌ. Ket sa sain nin pangingipatandaꞌ ko, kai ako nin mampangusar nin makaayat nin susaritaꞌ ta pigaw nin saray tutawo ket kai sara nin maayat sa kaungan ko, no kai edet, matandaan ra a si minsahi maipaꞌkaꞌ sa nipati na ni Cristo sa kudos ket siti a main nin pakayadiꞌ. 18 Anaod, siin si minsahi nin maipaꞌkaꞌ sa kuri nin nipati na ni Cristo sa kudos, wanran saray mangkaikaꞌ sa pakadusa liꞌ ket kakalawakawan ya tamoꞌ, baleꞌ kontamon manꞌikadayoꞌ nan Dios sa pakadusa ket mangkaikspiryinsya tamoy pagkukuri nin pakayadiꞌ nan Dios sa sain. 19 Wanin a lamang a wanan Dios nin mabasa sa Masanton Kasuratan, wana,
“Ipaꞌkit ko a say diri ran kadunungan nin saray mampangipaꞌkaꞌ a madunong sara ket kasan kakanaan,
tan ipaꞌkit ko a say pananaros ran saray matudyoꞌ a pananaros ket kasan alaga.”b
20 Kanyaꞌ nin ani a maibaritaꞌ tamo maipaꞌkaꞌ konran saray manꞌibilang ran tutawo nin madunong, tan saray intilihinti, tan saray maong nin magꞌirgo? Kai para a si Dios ket nipaꞌkit na a say sarban kadunungan nin tutawo ket kasan kakanaan? 21 Oꞌ a ta madunong yan tuloy a Dios ket plano naynan gindat a kai matandaan nin tutawo no siꞌno ya sa pangungusar ran kadunungan ran diri. Ana edet, rabay nan isalba nasaray tutawo banaꞌ tamoꞌ ta namper sara sa manꞌipatandaan mi a wanran mumadunong ket kakalawakawan. 22 Wanin ta, saray Judio, maningkap saran milagron pakaꞌkitan nin katutuꞌwan nin manꞌiyakay baꞌyo sara nin mamper, tan saray amboꞌ nin Judio, rabay ray ararem nin uakay nin naipatukdoꞌ sa pangingikit ra bilang tawo. 23 Say manꞌiyakay mi baleꞌ ket, si Cristo a syay nibakiꞌ nan Dios nin magꞌuray iti sa mundo ket nipasak ya sa kudos, ket sitin akay swawiꞌ ya sa say iti sa kukaisipan ra. Maipaꞌkaꞌ konan siin, saray Judio kai ra gapo nin maitulok a nakem ra, tan kakalawakawan anamaet tamoꞌ konran amboꞌ nin Judio. 24 Baleꞌ kontamo nin siꞌtamon nasagyat nan Dios, Judio atamo man o amboꞌ, napatutuꞌwan tamoyna a say nikaipasak na ni Cristo sa kudos ket ipaꞌkit a pakayadiꞌ tan kadunungan nan Dios. 25 Anaod, si ginwaꞌ na nin Dios nin manꞌipaꞌkaꞌ ran tutawo nin kakalawakawan tamoꞌ ket mas maalaga ya dyan say kadunungan ran diri. Anamaet, si ibaritaꞌ ra nin nikatalo nan Dios ket mas a magwaan nan siti dyan say sarban pakababaꞌ nin tawo.
26 Kiten moyo tanay kapapaꞌsar moyo, inadoꞌ kon bubsat. Sin kinayaban nakamon Dios, matalag sara komoyoy madunong sigon sa pangingikit ran tutawo. Matalag sara komoyoy main nin mababaꞌ tan matalag sara anamaet a ataꞌgay a nikatawo ra. 27 Anta, si Dios piniliꞌ nasaray tutawon manꞌibilang ran raruma nin kalawakaw ta pigaw nin padingꞌeyan nasaray mangipaꞌkaꞌ a madunong sara. Piniliꞌ nasara anamaet nin Dios a ibilang ran kasan mababaꞌ nin tutawo ta pigaw nin padingꞌeyan nasaray mangipaꞌkaꞌ a mapwirsa sara. 28 Piniliꞌ nasara et nin Dios a ayupaꞌ a nikatawo ra. Oꞌ piniliꞌ nay ibilang nin kasan kwinta ta pigaw nin gawꞌen nan makasawan nin kuri a ibilang nin mapwirsa. 29 Ginwaꞌ na in nin Dios ta pigaw nin kasa gapo nin siꞌnuman nin tawo a makapimaung-maong sa adapan na. 30 Ket siꞌtamo baleꞌ nin mammemper, si Dios, nipasaya natamo konan Cristo a si Jesus. Ket banaꞌ kona ni Cristo, nagꞌin atamon mapteg sa pangingikit nan Dios tan nipurok natamon magꞌin nin tutawo na tan ginlat natamo sa pakaaripen nin kasalanan. Sawanin, say kadunungan nan Dios, iti kona ni Cristo nin nibi na kontamo. 31 Ket banaꞌ ta wanin maꞌkit tamoy katutuꞌwan nan Masanton Kasuratan a wana:
“No mangipasirayo a siꞌnuman, say ginwaꞌ na tamoꞌ nin Catawan a ipasirayo na.”c