Naipatukdoꞌ sa Pakayadiꞌ nan Ispirito a Akay ra ni Pablo
2
Ket siꞌko, manꞌaduen kon bubsat, kai ako nangusar nin ararem a pagꞌiirgo o kukaisipan ran mumadunong sin primiro kon nakodsen nangipatandaꞌ komoyo nin maipaꞌkaꞌ sa mabistan patandaꞌa nan Dios. 2 Wanin ta nipangakoꞌ ko sa lalaman ko nin say ipatandaan ko tamoꞌ komoyo ket say maipaꞌkaꞌ kona ni Jesu-Cristo, say maipaꞌkaꞌ kona a nipasak ya sa kudos. 3 Sin rinmateꞌ akodsen komoyo, main nin kakapuyan nin lalaman ko tan masalak ako ta bangliꞌ no kai ko mababaan nin gawꞌen a manꞌipagwaꞌ nan Dios kongko. 4 Sa nipangipatandaꞌ ko, kai ako nangusar nin makaayat nin susaritaꞌ nin bilang konran madunong nin tutawo, baleꞌ si Ispirito nan Dios pinatutuꞌwan nin pakayadiꞌ na a nibaritaꞌ ko. 5 Say gagara nan Dios ket, a say pagmamatalek moyo kona ket kai moyo kumon nin ipatukdoꞌ sa kadunungan nin tawo no kai edet, sa pakayadiꞌ nan Dios.Say Kadunungan nan Dios ket Niyadi sin Saytaw
6 Mataman baleꞌ nin wanin, main nin peteg nin kadunungan a nangibwat konan Dios ket sayti a manꞌiyakay mi anamaet konran saray magsen anay pammemper ra. Sayti ket amboꞌ nin kapadan kadunungan nin tawo tamoꞌ o kadunungan nin nangibwat konran saray mampagꞌuray konan sitin mundo nin naiketeg anan makasa a pakayadiꞌ ra. 7 Sayti nin manꞌiyakay mi ket say plano nan Dios nin niyadi na yapoꞌ. Sin saytaw et, miꞌsa na et nin pinarsa a sarba, nidisisyon nayna no ani a gawꞌen na ta pigaw nin makakiramaꞌ atamo sa kataꞌgayan na. 8 Saray mampagꞌuray konan sitin mundo kai ra nin natarusan a tutuon kadunungan nan Dios, kai raya nin naamingaw ti nin plano na, ta no naamingaw raya, kai raya kumon nin nipasak sa kudos a Uunuren nin nipadar na a pinasyan kataꞌgayan na. 9 Anta sitin plano nan Dios, siti a manꞌibaritaꞌ sa Masanton Kasuratan itaw sa wana,
“Say pinasyan andaꞌ tan makapakaꞌngap nin bubagay a kai et gapo nin naꞌkit,
kai et gapo nin narngeꞌ o kai et gapo nin sinumrep sa nakem nin tutawo,
sain a bubagay nin nisadyaꞌ nan Dios para konran mangawaꞌnan kona.”b
10 Ket komin nibi nayay Ispirito na, nipatarusan na anaod nin Dios in nin bubagay ta si Ispirito nan Dios, tandaꞌ na nin maong a sarba ngaꞌmin, mataman et nin say sangkaararman anan adin kukaisipan nan Dios. 11 Kasa anaod nin makataros sa kanakman nan sayay tawo no kai sya tamoꞌ nin diri; wanin anamaet a lamang, kasan makataros sa kanakman nan Dios no kai si diri nin Ispirito na.
12 Edet anaod, siꞌtamo, si Ispirito nan diri a rinisibi tamo! Kanyaꞌ nin amboꞌ tana nin yupaꞌ sa pangingisip nin tutawo konan sitin mundo a pananaros tamo, no kai edet, say pangingisip nan Dios. Nibi naya nin Dios a Ispirito na kontamo ta pigaw nin iramaꞌ natamo sa mabibista nin nibi-nibi nan masibulot a nakem nin Dios kontamo. 13 Ket sa pangipapalaway mi anamaet, kai kami mangusar nin pagꞌiirgon bilang konran mumadunong a tawo, no kai say niyakay nan Ispirito nan Dios. Manꞌibaritaꞌ mi a maipaꞌkaꞌ konan Dios nin say manꞌusaren mi ket say mangibwat konan Ispirito nan Dios. 14 Baleꞌ si tawon say nikatawo na tamoꞌ a mampagꞌuray kona, kai na nin akuen a bubagay nin mangibwat konan Ispirito nan Dios ta kakalawakawan tamoꞌ ngaꞌmin para kona. Kai maabot nin pakataros na ta matarusan ti tamoꞌ mangibwat sa pangingipatyoꞌ nan Ispirito nan Dios. 15 Si tawo baleꞌ nin si Ispirito nan Dios a mampagꞌuray kona, matimbang nay kakanaan nin sarba, baleꞌ saray tutawo a kasa yay Ispirito nan Dios konra, kai rasara matimbang nin manepeg a tutawon main yay Ispirito konra. 16 Anaod, mabasa tamo sa Masanton Kasuratan a wana,
“Siꞌnoy masrepan nay pangingisip nan Dios?
Siꞌno anamaet a makapangipapalaway no ani a mabista nin gawꞌen na?”c
Siꞌtamo baleꞌ, main ya kontamoy Ispirito nan Dios kanyaꞌ nin say pinanakem tamo ket kapada nin pinanakem na ni Cristo.