Andiꞌ nin Mipalpagan Maipaꞌkaꞌ konran Trabahador Tamoꞌ
3
Manꞌaduen kon bubsat, sin isen ako et komoyo, kai katamo nin naiyakay nin bilang sa pangangakay ko konran saray mampagꞌurayan nan Ispirito nan Dios, no kai edet, niyakay katamo nin bilang nin uabing kamo et a baꞌyu-baꞌyo kamo et nin namper kona ni Cristo tan bilang nin mampagꞌurayan kamo et nin uapes nin tawo. 2 Banaꞌ ta wanin moyo, niyakay katamo nin say mainumꞌay moyon matarusan nin maipada sa gatas a ikabyay nin abing. Kai kamo et nin magwaꞌ para sa ararem nin uakay nin maipada sa kanen ran matuntawo. Anaod kai kamo et magwaꞌ para sa sayti, 3 ta say karabayan moyo et a mampagꞌuray komoyo. Anaod, main et nin piiimbelan tan piaawaya komoyo, kanyaꞌ nin maꞌkit a say karabayan moyo et nin diri a mampagꞌuray komoyo nin bilang konran saray amboꞌ nan tutawo nin Dios. 4 No saray raruma komoyo wanra, “Si Pablo a mantumbuken mi,” tan saray raruma anamaet wanra, “Si Apolos a mantumbuken mi,” mapala-palaway anaod nin maꞌkit mangibwat sa manꞌibaritaꞌ moyo a bilang kamo et nin saray amboꞌ nan tutawo nin Dios.5 Ani ya ket si Apolos tan siꞌkon si Pablo sa pangngipaꞌkaꞌ moyo? Pariho kami tamoꞌ nin mampagsirbi konan Dios, ta pariho kamin nangyakay komoyo, ket tinumper kamo. Man-gawꞌen nin barang saya komi a trabaho nan nibi nan Uunuren. 6 Siꞌko baraꞌmon nimula koy bikoy, tan si Apolos baraꞌmon sinbuan na, baleꞌ si Dios a namatuboꞌ, amboꞌ kami. 7 Kanyaꞌ nin amboꞌ yay nangmula o si namboꞌ a impurtanti, no kai si namatuboꞌ tamoꞌ, si Dios. 8 Si nangmula tan si namboꞌ, parihoy paꞌsar ra tan si barang saya ket gun-gunawan naya liꞌ nin Dios sigon sa trabahon nagwaan na. 9 Anaod, si Dios ket pariho nakamin katrabahwan. Ket si Dios anamaet, ikon nakamon baraꞌmon gagawaꞌ na nin mampagtrabahwan mi.
Trabahador sara Tamoꞌ si Pablo sa Pinakatimplo nan Dios
Baraꞌmo et nin si dupong moyon mammemper ket bali nayan Dios nin manꞌipapaꞌdeng na komi, 10 ket siꞌkoy baraꞌmon sayay matudyoꞌ nin karpintiro nan Dios. Sa pakababaꞌ a nipuyaꞌ na kongko, nipaꞌdeng koy pundasyon bilang sa gawaꞌ nan maistron panday. Sawanin sakalakoynay mampangituloy nin mampamanday konan bali, ket barang saya a mamanday matkap nin ilagen nay gawaꞌ na a say rabay nin irgwen ket pakandaen nay pangangakay na. 11 Anaod, kal-la si Jesu-Cristo tamoꞌ a ginwaꞌ nan Dios nin pundasyon nin pammemper tamo a baraꞌmon sa magsen a pundasyon nin sayay paꞌdeng, ket kasaynan raruman magwaꞌ et nin ikwa. 12 Baleꞌ saray paꞌsar mampangituloy nin mamanday konan sitin bali, magwaꞌ a mampangusar saran kagawꞌan a kai nin mapuuran bilang say balitok, pirak, o say mablin bubato; o mampangusar saran kagawꞌan a madaliꞌ nin mapuuran bilang say kayo, rabot tan dayami. 13 Ket, say trabahon nagwaan nin barang saya, paꞌsar ipadalan liꞌ sa apoy, ket maꞌkit liꞌ no mapuuran o kai, a say rabay nin irgwen, sa awro nin pangungukom nan Dios ket maꞌkit liꞌ no main nin kakanaan o kasa, nin nagwaan nin barang saya. 14 Ket no paꞌsar maagwantawan liꞌ nin nipaꞌdeng nan sayay tawo a apoy, gun-gunawan naya liꞌ nin Dios, 15 baleꞌ no say nipaꞌdeng na ket napuuran, napirdi a pagal na. Pageꞌ a maisalba ya a mabyay ya, baleꞌ baraꞌmo yan tawon nalibri tamoꞌ a byay na sa puor.
16 Makaꞌngap ako komoyon mammemper ta baraꞌmon kai moyo nin maamingaw a si dupong moyo ket paꞌsar timplo nayan Dios ta si Ispirito na ket mampiikap ya komoyo. 17 Ket no main nin tawon gumwaꞌ nin animan a makasidaꞌ konan sitin paꞌsar masagradon timplo nan Dios, sidaen naya nin Dios ta si paꞌsar timplo na ket ikon nayan diri, tan siin nin paꞌsar timplo na ket siꞌkamo.
18 Sawanin, usisaen moyon maong a lalaman moyon diri a andiꞌ kamo nin paibarang sa pangingisip moyo. No main isen komoyo a mampangipaꞌkaꞌ a madunong ya sa pagkabyay sa sitin kapresan a panaon, say mabista ket gurutan nayna in nin kadunungan tan magꞌin yayna anabungat nin lantot sa wanran tutawo, ket konan Dios, sya a peteg nin madunong. 19 Anaod, say kadunungan a mangibwat iti konan sitin mundo ket kakalawakawan sa pangingikit nan Dios. Mabasa sa Masanton Kasuratan a wana,
“Laꞌwanen nasaran Dios a madunong sa sirib ran diri.”b
20 Wana et a lamang,
“Tandaꞌ nan Catawan nin kasan kakanaan nin say iti sa kanakman ran saray mumadunong.”c
21 Kanyaꞌ anaod nin andiꞌ kamo nin mipalpagan a tumutumbok nakamo nin siti o sitaw e nin mangangakay ta say tutuo ket, siꞌkamin sarba, iti kami para komoyo, 22 mataman nin siꞌkon si Pablo, o si Apolos, o si Pedrod. Mataman et si sangkamundwan, o say byay, o say patiti, o say mangyadiꞌ sawanin, o say rumateꞌ et, sarba ngaꞌmin ket nibi nan Dios nin ikon moyo para sa kaabigan moyo.e 23 Baleꞌ siꞌkamo, ikon nakamo ni Cristo, tan sya anamaet, ikon nayan Dios.