Katulong nasara Tamoꞌ nin Cristo si Pablo
4
Ket ta wanin anaod, say matkap nin pangngikwinta komi ket ibabakiꞌ na ni Cristo. Nagmatalkan nakami tamoꞌ nin Dios nin mangipatandaꞌ nin plano na a gindat ket kai na et yapoꞌ nin nipatandaan. 2 Sawanin, konan siin, si sayay mampagmatalkan, matkap anaod nin tutuo ya sa pangngawaꞌ nan manꞌipagwaꞌ nan amo na. 3 Ket, kongko, kasan pidumawan no usisaen moyo, o saray raruman tawo, no matunong a pagtatrabaho ko o kai. Ni mataman siꞌkon diri, kai ko nin mapya a pangungusga kon diri sa gawaꞌ ko. 4 Anaod, malinis a kunsinsya ko, baleꞌ kai nin maibaritaꞌ nin siin a malinis ako sa pangingikit nan amo ko a si Uunuren. Sya tamoꞌ a mangusisaꞌ nin gawaꞌ ko. 5 Kanyaꞌ nin andiꞌ moyo nin inaboꞌ a sintinsya baꞌyo na et nin inaboꞌ ni Uunuren a Jesu-Cristo a sintinsya na no sumubliꞌ yadti liꞌ, ta ipaꞌkit na liꞌ nin padaran a sawanin ket adi tan kai tandaꞌ nin gugagara nin tutawo. Kayadiꞌ liꞌ, say barang saya ket mangrisibin manepeg nin rayo mangibwat konan Dios.Matkap a Arigen rayan Mammemper si Pablo
6 Nginaranan koya si Apolos tan say lalaman ko, kawaꞌnan kon bubsat, nin alimbawaꞌ para sa kaabigan moyo nin pakaadalan moyon say rabay nan ibaritaꞌ nin si wanra a “Andiꞌ moyo nin labasan a no ani a itaw sa kasuratan.” Ket magꞌin kamon amboꞌ nin marangas maipaꞌkaꞌ komi nin mangangakay moyo a pablyen moyo saray raruma baleꞌ balawen moyo saray raruma. 7 Siꞌno ya in si sa wana ket mas ataꞌgay kamo dyan saray raruma? Kasa-kasa kamo no amboꞌ nin si Dios a mami. Kanyaꞌ nin no pinayaburan nakan Dios, andiꞌ ka gapo nin marangas maipaꞌkaꞌ sa sain.
8 Mampangimey kamo a baraꞌmon kumplito kamoyna sa kamaungan nan Dios tan kasaynan pakatkapan moyo et kona! Baraꞌmo kamoynan mampagꞌuray itaw sa Pagꞌadian nan Dios, ket linabasan rakami ana nin mangangakay moyo! Pageꞌ pa anaod kumon nin mampagꞌuray kamoyna, ta no wanin kumon ket makakipagꞌuray kami komoyo anamaet! 9 Wanin pa anaod kumon ta sa wangko ket si Dios, baraꞌmon ginwaꞌ nakamin apostoles nin sangkaayupaan a paꞌsar sa sarban tutawo. Baraꞌmo kamin tutawon nasintinsyawan nin patyen nin mangkikit-kikiten ran sarban tutawo tan uanghil. 10 Manꞌikwinta kamin kasinakem banaꞌ kona ni Cristo, baleꞌ siꞌkamon inakay-akayan mi, say wamoyo no pinasyan kaungan moyoyna banaꞌ kona ni Cristo! Kasan mababaꞌ mi, baleꞌ mapwirsa kamo anaod! Kai kami nin mambaga-bagawen, baleꞌ ataꞌgay a pangingikit komoyo anaod! 11 Anggan sawanin nin udas ket mabitil tan milataꞌ kami; kurang a seket mi; mangkaduksa-duksaꞌ kami tan makudti-makodtaw kamin kasan pammali mi; 12 mampagtrabaho kamin maong nin manꞌusaren mi a gamet min maningkap nin ikabyay mi; no main nin magsari-saritaꞌ komi, idasalan misara; no marumiꞌ-rumiꞌ kami, itpel mi; 13 no main nin manidaꞌ komi ket mabista a ubat mi. Anggan sawanin, sa pangingikit ran tutawo ket kwinta basura kamidti sa mundo, a sangkaayupaan sa sarban tutawo.
14 Kai ko nin manꞌisurat ti nin pammadingꞌey komoyo, no kai edet, pammibilin ko komoyon bilang kawaꞌnan kon aꞌnak ko. 15 Oꞌ, aꞌnak katamo anaod ta abirno nin magkamain kamon abaw nin mammaga maipaꞌkaꞌ kona ni Cristo, saya tamoꞌ a kwinta ama moyo. Nagꞌin akon baraꞌmon ama moyo sa nikaipasaya moyo konan Cristo a si Jesus, yupaꞌ sa nipangiparateꞌ ko konan Mabistan Patandaꞌ komoyo. 16 Kanyaꞌ anaod nin mandawaten ko komoyo, arigen moyo a kabibyay ko. 17 Siin a rason no mayin a binibilin koyan makodsen komoyo si Timoteo, ta pigaw nin ipapanemtem na komoyoy pigagawaꞌ ko a sayti ket nangibwat konan Cristo. Manꞌikwinta koya anamaet nin kawaꞌnan kon anak ko sa pammemper tan mailalwan koya. Say ibaritaꞌ na komoyo ket syan lamang a manꞌiyakay ko sa adtiman nin dudupong ran mammemper a keen-keen ko.
Matkap a Galten saray Gumu-gumwaꞌ nin Dukaꞌ sa Dupong
18 Sawanin, sa pangngipaꞌkaꞌ ran raruma komoyo a maliꞌmo akoynan makodsen ket nipataꞌgay sarayna. 19 Baleꞌ, sa madaliꞌ anan awro, mako akodsen no iyaburoy na nin Uunuren tan tandaen ko no ani a pakayadiꞌ ra, amboꞌ tamoꞌ a maibaritaꞌ ran sarain a mampipataꞌgay. 20 Anaod, ipaꞌkit nan Dios a mampagꞌurayan nayay sayay tawo yupaꞌ sa gawaꞌ nin pakayadiꞌ na sa kabibyay nan tawo, amboꞌ nin yupaꞌ sa mabistan irgo nan tawo.
21 Ani a rabayen moyo? Mako akodsen para nin main awit nin aspok, o nin maipaꞌkit koy pangawaꞌnan tan kauyamuan ko komoyo?