5
Ket say mas grabi et, kunsintidor kamo! Naipara-parateꞌ ana kongko a main nin nikasamaꞌ nin gawaꞌ a manꞌaburuyan moyodsen! Si magsyuman kona ket kaꞌyan nayan saya nin lalakidsen komoyo!a Klasin kadukaan in a mataman et nin saray amboꞌ nin mammemper ket kai ra aburuyan! 2 Ket siꞌkamo, mampipataꞌgay kamo et sa udin! Matkap kumon ket gumereng tan dumingꞌey kamo, tan matkap a maglat yay tawon man-gumwaꞌ nin wanin sa dupong moyo!3-4 Abirno nin kasa akodsen, kalamoꞌ rako sa kanakman. Kanyaꞌ nin baraꞌmon isen akoynan lamang, ket sa pangilalaman ko kona ni Uunuren tamon Jesus, sinintinsyawan koyayna a tawon man-gumwaꞌ nin wanin. Sa pididinep moyo, kalamoꞌ rako sa kanakman, ket sa pakayadiꞌ na ni Uunuren tamon Jesus, 5 iyagwang moya in nin tawo kona ni Satanasb ta pigaw nin paidapen naya sa lalaman na ket mapatgen a pagkakasalanan na ta pigaw nin maisalba yan diri sa awron sumubliꞌ yay Uunuren tamo.
6 Sain say pipataꞌgay moyo ket amboꞌ nin manepeg sa kapapaꞌsar moyon wanin isen! Sigurado akon tandaꞌ moyo a say kasalanan nan saya komoyo ket apiktawan nay intiro moyo, kapada a say daiteꞌ tamoꞌ nin pammakbo ket pakbwen nay intiron masa. 7 Galten moyoynay kadukaan a bilang nin pammakbo sa kabibyay moyo, ta pigaw nin maringgas kamo ket magꞌin kamon baraꞌmon baꞌyon masa a kai gapo nalawukan nin pammakbo, ta wanin a talagay paꞌsar moyo. Anaod, si Cristo a syay paꞌsar Karniro tamo para sa paninilibra nin Pistan Nipanglabasc ket nidaꞌton yayna! 8 Edet, udas anan pagsisilibra sa nikaparinggas tamo! Andiꞌ atamoyna nin gumwaꞌ et nin bilang sa saytaw sa gindat a kabibyay tamo a say dukaꞌ a gawaꞌ-gawaꞌ tan main nin dukaꞌ a uapes, no kai edet, nin main anan karinggasan tan katutuꞌwan, kapadan tinapay a kai nalawukan nin pammakbo.
9 Nisurat koyna komoyod a andiꞌ kamo nin kilimug-limog konran tutawon man-gumwaꞌ nin nikasamaꞌ, 10-11 baleꞌ kai ko rabay nin irgwen a saray amboꞌ nin mammemper. Wanin ta no sara wadiꞌ a palꞌisan moyo nin kilimug-limugan, matkap a lumakwan kamoyna konan siti nin mundo. No kai edet, si manꞌibaritaꞌ kon andiꞌ moyo nin kilimug-limugan ket si sayay mampamaritaꞌ a mammemper ya baleꞌ kiraray ya sa amboꞌ nan asawa, o maagom ya, o mangrarayo yan dios-dios, o mabirngas ya, o mabubok ya, o mannakaw ya. Ni kidungon mangan, andiꞌ kamo gapo nin kidungo sa wanin nin tawo. 12 Anaod, kai nin naipudir kongko a manintinsya konran amboꞌ nin mammemper, no kai saray kapada tamon mammemper a kabiangan tamo. 13 Si Dios a manintinsya konran amboꞌ nin mammemper. Baleꞌ wanan mabasa sa Masanton Kasuratan,
“Galten moyo saray gumu-gumwaꞌ nin dukaꞌ sa dupong moyo.”e