3 Kai moyo para nin tandaꞌ a mangusisaꞌ atamo liꞌ nin uanghil? Gawꞌen moyo in liꞌ, kanyaꞌ nin matkap ket mas babaen moyo nin risulbyen a bubagay a maipaꞌkaꞌ sa byay tamoꞌ et iti sa lutaꞌ. 4 Kaꞌkit nin wanti a gawaꞌ moyo! No main nin riklamo moyo ket sukat a konran saray kasan pakibiang ra konan Dios moyo ipagamet nin iparisulbi! 5 Dumingꞌey kamo! Ani kasa tanan madunong isen komoyon makababaꞌ nin manimbang no siꞌnoy main nin katunungan konran bubsat na sa pammemper a mampikuntra? 6 Kaꞌkit nin wanin a si sayay mammemper ket ikaꞌ naya sa husgado a busat na sa pammemper! Sa udin, konra et nin amboꞌ nin mammemper!

7 Say katutuꞌwan, si midimandawan kamoyna ket ipaꞌkit a nadaeg ana a pammemper moyo. Mas mabista a imbis nin idimanda moyay busat moyo sa pammemper ket si palabasen moyo tana no naagrabyado tan nasaor kamo; 8 baleꞌ siꞌkamoyna edet a mampangagrabyado tan mampanaor, ket konra et nin bubsat moyo sa pammemper! 9 Tandaꞌ moyon peteg a saray mangangwaꞌ nin amboꞌ nin mapteg ket kai sara nin makakiramaꞌ sa Pagꞌadian nan Dios. Andiꞌ moyo nin luku-lukwen a lalaman moyon diri. Saray tutawon mampangwaꞌ nin madawal tan nikasamaꞌ a gawaꞌ, o mangrarayon dios-dios, o mamabayi o kilalaki, o baklaꞌ, o tumboy, o kiꞌyan sa kapada ran lalaki o kapada ran babayi; 10 o mannakaw, o maagom, o mabubok, o mabirngas, o tulisan, ket kasa gapo konra a makapangikon nin animan sa Pagꞌadian na nin Dios. 11 Oꞌ, wanin ran saray raruma komoyo sin saytaw, baleꞌ naringgasan kamoyna sa kukasalanan moyo; naipurok kamoyna para konan Dios; naikwinta kamoynan mapteg sa pangingikit nan Dios banaꞌ sa pagkukuri nin gawaꞌ na ni Uunuren a si Jesu-Cristo tan si Ispirito nan Dios.

12 Magwaꞌ a wanan ibaritaꞌ nin sayay tawo, “Pagkanawanawa ko a gawꞌen koy animan a rabay ko.” Anta, amboꞌ nin say sarba ket makatulong kontamo. Siꞌko, maibaritaꞌ ko, “Pagkanawanawa ko a gawꞌen koy animan,” baleꞌ kai ko nin aburuyan a magꞌin akon aripen nin animan. 13 Magwaꞌ et anamaet a wana nin sayay tawo, “Say kanen ket para konan tyan tan si tyan ket para ya sa kanen, baleꞌ si Dios ket parihon anggawan nayti liꞌ.” Mataman anaod baleꞌ nin wanin, kai rabay nin ibaritaꞌ a say lalaman tamo ket magwaꞌ tamon agamirenen sa amboꞌ nin manepeg a pirararay, no kai edet, naigagaran usaren tamoy lalaman tamo sa pagsisirbi konan Uunuren, tan si kanepegan nan Uunuren ket say pagꞌurayan nay lalaman tamo. 14 Wanti e no maipaꞌkaꞌ sa lalaman tamo: si Dios, pasublien natamo liꞌ nin mabyay yupaꞌ sa pakayadiꞌ na kapada nin nipamasubliꞌ nan mabyay konan Uunuren. 15 Mampangimey kamon baraꞌmon kai moyo nin tandaꞌ a say lalaman moyo ket naipasaya kona ni Cristo. Anaod, say lalaman moyo ket paꞌsar saka-sakalakon parti nan si lalaman na ni Cristo. Galten tamoya paray paꞌsar parti nan lalaman na ket ikiraray yayti konan sayay hustis? Andiꞌ gapo! 16 Nepeg moyon tandaen a si lalakin kiraray sa hustis ket kipasaya ya sa lalaman kona, ta wana sa Masanton Kasuratan, “Saray rwa ket magꞌin saran sayan-saya.”^a 17 Ket anamaet baleꞌ, si sayay tawo a kipasaya konan Catawan, sya tan si Catawan ket magꞌin nin sayan-sayay kanakman ra.

18 Kadayꞌan moyo a amboꞌ nin manepeg a pirararay ta say wanin nin kukasalanan ket naiduma sa raruman kukasalanan a kai ya nin usaren ti nin lalaman sa pangngawaꞌ. Wanin ta si tawon mampangwaꞌ nin amboꞌ nin manepeg a pirararay, mansidaen nayay diri nin lalaman na. 19 Magwaꞌ para et a kai moyo nin tandaꞌ a say lalaman moyo ket syay pinakatimplon mampiikapan nan Ispirito nan Dios nin nibi na komoyo? Amboꞌ moyoynan ikon a lalaman moyo no kai ikon naynan Dios. 20 Anaod, sinaliw nakamo nin nisubliꞌ nakamo kona, kanyaꞌ nin usaren moyoy lalaman moyo nin makapamin kagalangan konan Dios.^b