Mas a kaabigan no si sayay lalaki ket kasa nin asawa na.^a 2 Baleꞌ, ta pigaw nin mapalꞌisan nin barang saya a pagkakasalanan yupaꞌ sa amboꞌ nin manepeg a pirararay, si sayay lalaki o sayay babayi ket matkap a main nin asawa na. 3 Ket manepeg a si asawan lalaki, gawꞌen nay ubligasyon na bilang asawa konan asawa na, tan wanin anamaet konan asawan babayi, manepeg a gawꞌen nay ubligasyon na bilang asawa konan asawa na, 4 ta si asawan babayi, amboꞌ yayna a mampagꞌuray sa lalaman na no kai si asawa nayna; wanin anamaet, si asawan lalaki amboꞌ yayna a magꞌuray sa lalaman na no kai si asawa nayna. 5 Andiꞌ moyo nin isiblet a lalaman moyo sa saya tan saya, pwira wadiꞌ no nitaratwan moyon main yapoꞌ nin panaon a kai kamo yapoꞌ nin miraray ta igagara moyo tamoꞌ yapoꞌ a panaon moyo sa kadadasal. Baleꞌ mayadiꞌ in a panaon, miraray kamoyna ta pigaw nin kai rakamo nin matukso ni Satanas banaꞌ ta kai kamoyna nin makaagwanta. 6 Sayti ket pakitarusan ko komoyo maipaꞌkaꞌ sa pikakasal; kai ko nin manꞌigan-gan. 7 Anaod, rabay ko a say barang saya kumon ket kipada kongko nin kuntinton kasan asawa. Baleꞌ anaod, main nin nibi nan Dios sa barang saya, tan sayti ket niduduma.

8 Konran balo nin lalaki tan babayi ibaritaꞌ koyti:

Mas a kaabigan para komoyo no arigen rako nin kai kamo anamanaet nin sumrep sa byay a main nin asawa. 9 Baleꞌ no kai moyo nin mapukpukan a lalaman moyo, mas maabig a sumrep kamo anamanaet sa byay a main nin asawa dyan si mapaidap kamo sa pammaed sa kaingaran moyon kiraray.

10 Sawanin, sayti a ibaritaꞌ ko konran main nin asawa. Kai ti nin nangibwat kongko no kai gan-gan na nin Uunuren:^b

Andiꞌ ya nin kisyay a babayi konan asawa na. 11 Baleꞌ no kisyay ya wadiꞌ a babayi konan asawa na, matkap a dumaer yan andiꞌ ana nin kikalamoꞌ, o kidunong yan sumubliꞌ konan asawa na. Anamaet, andiꞌ naya anamaet nin isyay nin lalaki a asawa na.

12 Ket konra anamaet nin saray main anan asawa baꞌyo sara nagꞌin nin mammemper, wanti a ibaritaꞌ ko ta kasan niyakay na maipaꞌkaꞌ sa sayti nin Uunuren:

No si sayay lalakin nagꞌin anan mammemper, si asawa na ket amboꞌ yan mammemper, ket sitin asawa na napasayay nakem nan mangkikalamoꞌ kona, matkap a andiꞌ naya nin isyay. 13 Wanin a lamang a no si sayay babayin nagꞌin anan mammemper, si asawa na ket amboꞌ yan mammemper, ket sitin asawa na napasayay nakem nan kikalamoꞌ kona, matkap a andiꞌ ya nin kisyay. 14 Nibaritaꞌ ko a wanin ta banaꞌ konan si asawan mammemper, babayi o lalaki, si asawa nin amboꞌ nin mammemper ket naiyayi yaynan lamang sa pikakalamoꞌ a iti sa pudir nan Dios. No amboꞌ nin wanin, saray aꞌnak ra ket kai nasara kumon nin maakoꞌ nin Dios, baleꞌ anaod banaꞌ konan si asawan mammemper, iti saraynan lamang sa pudir nan Dios.

15 Baleꞌ no si amboꞌ nin mammemper nin asawa, lalaki o babayi, ket rabay nay kisyay, aburuyan moya. Sa wantin mangyadiꞌ, si mammemper nin asawa, lalaki o babayi, kai ya nin maitaker nin iti sa istado. Panemtemen moyo a say rabay nan Dios ket si maituno atamon mammemper konran sarban tawo. 16 Dumaer kamo kumon nin iti sa istado, siꞌkamon si asawa moyo ket amboꞌ yan mammemper ta saliꞌ pa a magꞌin nin dalan kamo a maisalba ya a asawa moyo.

17 Pwira sa sain, dumaer a barang saya komoyo sa no ani a kapapaꞌsar nin nibi nan Uunuren kona sin baꞌyo naya nin nasagyat ana nin Dios. Siti a bibilin ko sa sarban dupong.

18 No bilang wadiꞌ si sayay tawo ket naturiꞌ yayna ta Judio ya sin nasagyat nayan Dios, andiꞌ na nin galten a pakaꞌkitan a naturiꞌ yayna. Ket no amboꞌ ya anamaet nin turiꞌ ta amboꞌ yan Judio sin nasagyat nayan Dios, kai na nin matkap a paturiꞌ. 19 Kasan pidumawan nin turiꞌ ya man o kai, no kai say impurtanti ket mantukiden nay manꞌipagwaꞌ nan Dios. 20 Dumaer a barang saya sa no ani a kapapaꞌsar na sa byay sin nasagyat nayan Dios. 21 Saya ka paran aripen sin nasagyat nakan Dios? Andiꞌ mo in nin pakaaburidwan. Baleꞌ no magkamain kan pagkanawanawan magꞌin nin amboꞌ nin aripen, kalapen ma in nin pagkanawanawa.^c 22 Anaod, panemtemen moyo a no saya kan aripen sin nasagyat nakan Dios nin kipasaya konan Uunuren, naglat nakayna sa pakaaripen mon magkasalanan ket ginwaꞌ naka nin kanawanawa ana a magsirbi kona. Wanin anamaet a lamang, no saya kan amboꞌ nin aripen sin nasagyat ka, aripen nakayna anamaet sawanin ni Cristo nin magsirbi kona. 23 Nibayad nay byay na ni Cristo nin nisubliꞌ nakamo konan Dios^d kanyaꞌ nin tumubaleꞌ kamo kona, a andiꞌ kamo nin baraꞌmon mampaaripen sa tutawo. 24 Kanyaꞌ nin animan a kapapaꞌsar sa byay nin barang saya sin panaon a nasagyat nayan Dios, dumaer ya sa saytaw nin kapapaꞌsar na nin kialuyon konan Dios.

25 Ket sawanin anamaet, say maipaꞌkaꞌ konran saray kai et gapo nin sinumrep sa byay a main nin asawa.

Kasan gan-gan nan Uunuren maipaꞌkaꞌ konra. Baleꞌ, banaꞌ sa ingangaꞌdo nan Uunuren kongko, mapagmatalkan moyoyti say iti sa nakem ko a itao ko komoyo. 26 Para kongko, banaꞌ sa abaw nin idap a manꞌadapen tamo, mabista para konan sayay tawo a kai nin sumrep sa byay a main nin asawa. 27 Baleꞌ siꞌkamon lulalaki nin main anan asawa, andiꞌ moya nin isyay a asawa moyo. Ket no kasa et nin asawa mo andiꞌ kayna nin mangrap. 28 Wanin man, kai ya nin magkasalanan a sayay babayi o lalaki no sumrep ya sa byay a main nin asawa, baleꞌ maprublima a byay a main nin asawa. Anaod, rabay katamon ipalꞌis sa maprubliman kapapaꞌsar.

29 Siti a rabay kon tarusan moyo, bubsat:

32 Sawanin, say rabay ko ket si andiꞌ moyo nin kaaburidwan a maipaꞌkaꞌ sa no paꞌno moyon magwaꞌ a rispunsibilidad moyo. Anaod, si sayay lalakin kasan asawa, say pipanemtem na ket no paꞌno nayan pagsirbyan a Uunuren nin mapaririktan yay Catawan kona. 33 Ket si sayay lalakin main nin asawa anamaet, say pipanemtem na ket no paꞌno nayan mabyan nin mabistan byay a asawa na nin mapaririktan ya kona. 34 Anamaet a lamang, mapiduma nin bilang sa wanin a maipaꞌkaꞌ konran bubbayi. Si babayin kasan asawa o kasaynan asawa, say pipanemtem na ket no paꞌno nayan pagsirbyan a Uunuren, kanyaꞌ nin say lalaman na tan say kanakman na, ket ikon na tamoꞌ nin Uunuren. Baleꞌ si babayin main nin asawa, say pipanemtem na ket no paꞌno nayan mabyan nin mabistan byay a asawa na nin mapaririktan ya kona.

35 Para sa kaabigan moyo ket nibaritaꞌ ko in komoyo a amboꞌ nin pammaed komoyo. Say apes ko ket si mabista tan matunong a kabibyay moyo ta pigaw nin kasan makaribang komoyo sa pagsisirbi moyo konan Uunuren.

36 Sawanin, say maipaꞌkaꞌ anamaet konan sayay lalakin main nubya baleꞌ mampagdwadwa ya no ituloy nayan ikasal, baleꞌ magkamain yay lalaki nin maꞌmot nin pangangapes konan inadoꞌ na. Maaburuyan a pakasal sara. Amboꞌ in nin kasalanan. 37 Baleꞌ no nidisisyon nan sayay lalaki a kai yayna nin kikasal konan inadoꞌ na, no kai edet pagmantiniwen naya sa kapapaꞌsar nan sayay balasang, mabistaytin lamang, dapot no magsen a pinanakem na, no kai ya tamoꞌ nin napasuet, tan no mababaꞌ nan dangkaan a lalaman na. 38 Edet, mabista no kikasal yay lalaki konan nubya na, baleꞌ mas mabista no kai ya nin sumrep sa istado.^e

39 Si sayay babayin main nin asawa, paꞌsar na a naitaker konan asawa na legꞌan a mabyay yay lalaki. Baleꞌ no mati yay asawa na magwaꞌ yan kikasal sa siꞌnuman a rabayen na, baleꞌ matkap a si kikasalan na ket mammemper ya. 40 Baleꞌ para kongko mas mariga ya no kai yayna nin kiasawa anamanaet. Sa wangko, kumpruntado anamaet in sa no ani a bibilin nan Ispirito nan Dios.